Hwègbèèlì 16

Tìmòtì à mà ɛndɛ na Pàwolò na Rzàyilarzi

1Hwa Pàwolò hwa mà ɛ̀ndɛ ò mbòwa ndɛnɛ yà Dɛ̀bì na Lìrzìtìrà. Mòtò mɔ̀kɔ à mà hwɛ aŋga ema à mà hwɛ̀lɛ̀hwɛ̀ Tìmòtì. Nyàŋgò wà eni à mà hwɛ ndi mòlanà wa wònyà Yudà ndèŋgànɛ̀lɛ̀ mɔ̀ hvɛ à mà lòkɛ̀ Yerzù, ndi e tatɛ̀ ya eni e ma hwɛ ndi mòtò wa Grìki. 2Hwàlòkèlì hwa imbowà ndɛnɛ ja Lìrzìtìrà na Ikɔ̀nìyùmì hwà mà òhwa gbamù lì hvòmɛ̀nɛ̀ Tìmòtì. 3Nà òma Pàwolò à mà arze lì wòwa Tìmòtì ò lì ɛndɛ na mɔ̀, à mà mò endà. A ma gbeyà ndi nanù ehwànja à mà hwiya nanù ema hwatò hwa wònyà Yudà ema hwa hwèlì ò eŋge erzòòkà hwà mà hwiya nanù ema e tatɛ̀ ya ama Tìmòtì à mà hwɛ ndi mòtò wa Grìki. 4Nà òma Pàwolò na Tìmòtì hwà mà hwɛ lì akeyà ò mbòwà na mambòwa, ò lì òhweyà hwatò ema hwa lòkɛ̀ hweyà ema I àpɔ̀rzìtòlò na hwàtimbelì hwa ŋmèmba hwa e mbòwà ndɛɛndɛ ya Jèrurzalɛ̀mù hwà mà tɛ̀yirzɛ. Hwà mà hwa òhweyà ò lì òŋgama hweŋge hweyà. 5O èŋgànɛ̀lɛ̀ ŋmèmba mò arzɛ mò ma ètìrzɛ̀hwɛ ò lì lòkɛ̀. O èŋgànɛ̀lɛ̀ mɔ̀rzɔ̀ŋgi mò awu mò hwàlòkèlì mò ma ahwatɛ wùnyà tɛ.

Pàwolò a ɛni jɛ̀nɛ̀nì

6Pàwolò na mòndeŋge mò eni hwà mà akeyà hwèrzòòkà hwe Hvrigèyà na Gàlèrzìyà, èhwanja Èlìŋgɛ̀ yà Wòtani ema hwa keka nanù ema hwa rzi keka lì òhwa eyà ya Lohwà ò erzòòkà ya arzɛ ya Èrzìyà. 7Nà òma hwà mà jèe lì uka ŋmeyò mò erzòòkà ya Mìrzìyà, wɔ̀ hwà mà keka ò lì kpèeyà ò erzòòkà ya Bìtìnìyà. Ndi tɔ̀ nanù Èlìŋgɛ̀ ya ama Yerzù e rzi imanɛlɛ nanù ema hwa kpèeyà aŋga. 8O èŋgànɛ̀lɛ̀, wɔ̀ hwà mà akeyà Mìrzìyà rzi hwa ɔ̀ndɔ̀ natɛ̀ɛ hwa uka ò mbòwa ndɛnɛ ya Trɔ̀wàrzì. 9O wòŋgò wuu, Pàwolò à mà ɛnɛ jɛ̀nɛni. O iŋgi jɛ̀nɛ̀nì à mà ɛnɛ munyanà wa erzòòkà ya Màrzèdonìyà ema à mà tɛ̀mɛ̀ rzìi a à mò rzòrzòmeya nanù ema, “Jà ò Màrzèdonìyà ò jò òŋgòwane.” 10O mburza hvònda ema Pàwolò à mà ɛnɛ ini jɛ̀nɛ̀nì, irzɔ i ma wòŋgirzɛnɛ ŋgelì hvɔ̀kɔ ò lì ɛ̀ndɛ ò Màrzèdonìyà, èhwanja i ma kulɛ nanù ema Lohwɛ̀ à mà hwɛ lì jò hwɛlɛ ò lì ɛ̀ndɛ lì òhweyà hwaŋga hwatò Ŋmɛ̀ndì mò Gbamù.

Lideya wa Hvìlìpì a lòkɛ̀ Yerzù

11O mbòwa ndɛnɛ ya Trɔ̀wàrzì i ma kpèeyà ò melì me ŋmànja, rzìi jɛndɛ ò yòndi ya Rzàmòtrèrzì e rzi hwɛ lì tɛ̀mɛ̀ ò njiya. Nà òma wùnyà wò ma yahwɛ, rzìi jɛ̀ndɛ ò mbòwa ndɛnɛ ya Nìyàpòlìrzì. 12Aŋga ndi i ma anjiye rzìi je ɛndɛ ò Hvìlìpì. Hvìlìpì a hwèlì ndi e mbòwa ndɛnɛ ò erzòòkà ya Màrzèdonìyà, ndèŋgànɛ̀lɛ̀ e ma hwɛ ndi mbòwa ndɛnɛ ema hwà mà ika ndi imbenda ja Lòmani. I ma hwɛ aŋga ò ŋgurzu ja mèenyà. 13O Wùnya wò lì Arzìyòlɛ i ma wurza ò tenì ya mbòwà ndɛnɛ rzi ja ɛndɛ ò rzàawà ya mòrzò, i ma ɔ̀ŋgɛ̀lɛ̀ nanù ema jò ùŋmànɛ̀lɛ̀ èki ema wònyà Yudà hwa kànɛlɛlɛ aŋga. I ma lìya aŋga na hwalanà ema i ma ùŋmànɛ̀lɛ̀ hwa arzàŋgànɛ aŋga rzìi i wòteyà lì tuhwa mendeŋga na wɔ. 14O ìtììtènì ja hwaŋga hwalanà ò ma hwɛ mɔ̀kɔ wa awu ema à mà hwɛ̀lɛ̀hwɛ̀ Lideya ema à mà uwɛ̀lɛ̀lɛ̀yi ò mbòwà ndɛnɛ ya Tìyatìrà. A ma hwɛ ndi mòlanà wa nyòŋga ema à mà hwɛ lì àhwirzɛ̀ hwerzanja hwe teyaa ema hwe ma òhva mòrzurzuhwelì mò karzami. Oŋgò mòlàna à mà hwɛ lì gbèeyà Lohwɛ̀. Rzàŋgò à ma mò lìhvòhwa ŋmèma mò eni ò lì òkànèyà mamɛ ema Pàwolò à mà hwɛ lì òhwa. 15Hwà mà mò lùhwìrzɛ̀ na lìtumba la eni la arzɛ, ò mburza nanù à mà jò yòwɛ ò màandà mà eni rzi a òhwa nanù ema, “È lutelì tɛ ema imbahvɛ na hwèlì ndi mòlòkèlì mɔ̀kɔ, wa ama Rzàŋgò, e jèe e lìya ò màandà mà ami” mɔ̀ à mà jò tinɛlɛ natɛ̀ɛ rzìi je emeyà.

Pàwolò na Rzàyìlàrzì hwa aŋgɛhwɛ ò hwèwòwà

16Wùnya wɔ̀kɔ, na òma irzɔ i ma hwɛ lì ɛndɛ ò èki ya màkanɛ̀, ŋgɔ̀ndɔ̀ hvɔ̀kɔ ya mòkòme ema e ma òhva èlìŋgɛ̀ ya wòhwe e ma jò ùŋmànɛ̀lɛ̀. Èŋge èlìŋgɛ̀ e ma gbeyà à mà hwɛ lì òhweyà hwatò hweyà ema hwe ò gbèyɛ̀nɛ. Liŋgi lìyaŋga ema à mà hwɛ lì aŋgba lì ma gbeyà ema hwatò ema hwà mà mò anda nàa mòkòme hwà mà mo luwàna wòlì rzayi-rzayi. 17Oŋgò ŋmanà ŋgɔ̀ndɔ̀ à mà wòteyà lì òŋgama Pàwolò na irzɔ rzi a tɛ ò ŋmanyu nanù ema, “Hwanù wunyanà hwa hwèlì ndi hwàgbèèlì hwa ama Lohwɛ̀ ema lì karzami. Wɔ̀ hwa jèelì ndi ò lì e òhweyà nɛ inyɔ e tànɛyi lì rzùŋgàhwà.” 18A ma gbeyà nanù ò tenì ya rzayì-rzayì ja mèenyà, natɛ̀ɛ e ma tàtìrzɛ̀ Pàwolò, rzi a mò ayeŋgòwɛ̀lɛ̀lɛ̀ a kanja èŋge èlìŋgɛ̀, a yò òhweyà nanù ema, “O lìna la ama Yerzù Krirztò na ò kànèlì ò mò anjiye ò nyò.” O lìŋgi lìrzakò mɛnɛ, èŋge èlìŋgɛ̀ ya wòhwe e ma mò anjiya ò nyò. 19Nà òma hwaŋga hwatò ema hwà mà anda òŋgò ŋmanà ŋgɔ̀ndɔ̀ nàa mòkòme hwà mà ayɛ̀ɛmbɛ̀ nanù ema mɔ̀ à rza tànɛyi lì gbeyà hvɛ nanù ema hwa luwe wòlì, wɔ̀ hwà mà hvùma Pàwolò na Rzàyìlàrzì rzìi hwa hwà kòòwà ò lì hwa ɛ̀ndɛ̀nɛ̀ ò hwàkànèlì ema hwà mà hwɛ ò ìtììtènì ja e mbòwa ndɛnɛ. 20Wɔ̀ hwà mà hwa jànà ò wòrzò wò hwàtimbelì hwa Ròmànì, rzìi hwa hwà òhwàna nanù ema, “Hwanù wunyanà hwa hwèlì ndi wònyà Yudà, ndèŋgàna hwa jànà lùwànje ò mbòwà ya arzu ndɛnɛ. 21Wɔ̀ hwa hwèlì hwa òkòlɛ̀ hwɛ̀ɛ̀mɛ̀ hwe wòhwe ema hwe teŋgɛ̀nɛ̀yi i mbenda ja arzu nàa hwatò hwa Ròmànì. Irzɔ i rza tànɛyi ò lì emeyà hwenè hwɛ̀ɛ̀mɛ̀ tɔ̀ lì hwe gbeyàna.” 22Aŋga ndi e ŋgìndì yɔhvɛ ya lata hwaŋga hwatò ò lì teŋgɛ̀nɛ̀ Pàwolò na Rzàyìlàrzì. Hwàtimbelì hwa Ròmànì hwà mà hwa nyàawànà màatù ma awu rzìi hwa hwà kɔrze merzòmbò. Rzìi hwa òma hwatò ò lì hwa gbìiyɛ̀ hvònji. 23O mburzà èŋge hvònji ya ŋginyà rzi hwa hwà aŋgɛ̀ ò hwèwòwà. È mɔ̀ɔ̀ŋgèlì wa hwatò hwa hwèwòwà à mà kànèyàhwa nanù ema a hwa hvendane gbamù. 24Nà òma òŋgò mɔ̀ɔ̀ŋgèlì wa hwèwòwà à mà luwe lìni lìlò, rzìi a aŋgɛ Pàwolò na Rzàyìlàrzì ò tenì ya iluka ema i hwèlì ò tenì ya tenì ya hwèwòwà. A hwa kanya matàŋgà mà awu na lìkɔ̀rzɔ̀.

25O eyà ya kɔrzi ya wuu, Pàwolò na Rzàyìlàrzì hwà mà hwɛ lì kànɛ na lì embeya Lohwɛ̀ mɛ̀rzɔ̀kɔ̀ me kààtì. Rzìi hwanɛ̀yi hwatò hwa hwèwòwà hwa a hwa òkànèyà. 26O wòtɛmɛ̀tɛmɛ̀ mònyìŋgìrzɛ̀nɛ̀ mò ŋginyà mò ma wòteya, rzìi mò nyìŋgìrzɛ̀nɛ̀ mòŋgò mɔ̀nɔ̀ŋgɔ̀ mò arzɛ mò èŋge ndawò ya hwèwòwà. O lìwòkimɛnɛ mawòhvà mà arzɛ ma mà kùwa lì lìhvòweya, iŋgɔ̀kɔ̀hwi ema hwà mà kɔ̀wɔ̀nè hwatò hwa hwèwòwà ja arzɛ i ma kùwa lì tumeya. 27È mɔ̀ɔ̀ŋgèlì wa hwèwòwà à mà imòwe ò ijɔ, rzìi a ɛnɛ mawòhvà mà hwèwòwà ma arzɛ na òma mà lìhvòwelì a ɔ̀ŋgɛ̀lɛ̀ ndi nanù ema hwatò hwa hwèwòwà hwa arzɛ hwà mà kùwa lì hwaŋga. Ène eyà e ma gbeyà a rzìima e rzɔ̀lɔ̀ ya eni ò lì àwòŋwɛ̀. 28Ndi Pàwolò à mà tɛ na lìlò lì karzami nanù ema, “O rza àwòŋwɛ̀ ò wà witi, irzɔ hwa arzɛ i hwèlì anù.” 29Oŋgò mɔ̀ɔ̀ŋgèlì wa hwèwòwà à mà òhwa nanù ema hwa jàne hwètùlù, à mà ahwèŋgɛ̀ rzìi a kpèeyà ò tenì ya e ndawò ya hwèwòwà, rzìi a kpàana mòkambiya ò wòrzò wò ama Pàwolò na Rzàyìlàrzì. 30À ma hwa wurzirzɛ ò ewòka rzìi a hwa ijòwa nanù ema, “Ìi hwa rzàŋgò, mamɛ na hwɛni lì gbeyà ò lì rzùŋgàhwà na Lohwɛ̀ e?” 31Wɔ̀ hwà mà mò alàhwɛ̀ nanù ema, “O lòkɛ̀ Rzàŋgò Yerzù, aŋga nanù Lohwɛ̀ a ò rzùŋgà. A ò rzùŋgà na lìtumba la aŋgɔ.” 32Rzìi wɔ̀ hwa mò òhweyà mɔ̀, na hwatò hwa arzɛ ema hwà mà hwɛ ò ndawò ya eni ŋmɛ̀ndì mò gbamù mò ama Rzàŋgò. 33O wòŋgò wu mɛnɛ, òŋgò mɔ̀ɔ̀ŋgèlì wa hwatò hwa hwèwòwà rzi a hwa wòwa, a hwa rzòrza hwèhwàŋgù hwe awu. O lìwòkimɛnɛ mɔ̀ na lìtumba la eni la arzɛ hwà mà lùhwìrzɛ̀hwɛ̀. 34Oŋgò mɔɔŋgelì wa hwèwòwà à mà ɛ̀ndɛ̀nɛ̀ Pàwolò na Rzàyìlàrzì ò ndawò ya eni, rzìi a hwa ŋgba mòlelì. Oŋgò mòtò na lìtumba la eni la arzɛ hwà mà ònda na mɔ̀nyɛ̀ŋgì ehwànja hwà mà lòkɛ̀ Lohwɛ̀.

35O eka ya elele, hwàtimbelì, hwà mà òmeya òŋgò mɔɔŋgelì hwa hwèwòwà i pòlìrzi na ŋmɛ̀ndì ema mò ma òhwa nanù ema, “È hwɛmɛ hwaŋga wunyanà hwa ɛ̀ndɛ.” 36O èŋgànɛ̀lɛ̀ rzɔ e mɔ̀ɔ̀ŋgèlì hwa hwèwòwà à mà òhweyà Pàwolò nanù ema, “Hwàtimbèlì hwà mà òma ŋmɛ̀ndì nanù ema, ò wa na Rzàyìlàrzì e rzòlòwahwe ò hwèwòwà. O èŋgànɛ̀lɛ̀ rzɔ e tànɛyi lì ɛ̀ndɛ naŋgɛ. È ɛndɛ na ɛ̀yɔ̀lɛ̀.” 37Ndi Pàwolò à mà òhweyà iŋgi pòlìrzi nanù ema, “Irzɔ i rza lùwahwi tɔ̀ njɔ̀mi, tɔ̀ hvɔ̀kɔ ya lìtòna, ndi hwà mà jò gbiyɛ hvònji ò marzò ma hwatò. Ndèŋgànɛ̀lɛ̀ hvɛ irzɔ i hwèlì ndi wònjà ja lìkànèyà la Ròmànì. O mburzà nanù, rzi hwa jò aŋgɛ hvɛ ò hwèwòwà. O nàŋgɛ̀ nanù wɔ̀ hwa arza nanù ema je ɛ̀ndɛ ò wùndɛ̀ e? Jàyɛ̀ e rza ɛndeya! Hwàŋga hwàtimbèlì hwiti ndi hwa hwɛnì lì jà anù, ò lì jò rzòlòwa.” 38Iŋgi pòlìrzi, i ma ɛ̀ndɛ lì òhweyà hwaŋga hwàtimbèlì mamɛ ema Pàwolò à mà òhwe. Nà òma hwaŋga hwàtimbèlì hwà mà hweye nanù ema, Pàwolò na Rzàyìlàrzì hwà mà hwɛ ndi wònjà ja Ròmànì, hwà mà lɛmbeya wɔ̀ŋgɔ̀. 39Ène ŋgàna e ma hwa gbeyà ema hwà mà ɛ̀ndɛ lì hwa atɛkɛ. Rzi hwa hwà rzòlòwa ò hwèwòwà, hwa hwà òhweyà nanù ema e hwɛ gbamù nanù ema hwa anjiye ò mbòwà ndɛnɛ ya awu. 40Pàwolò na Rzàyìlàrzì hwà mà anjiya ò hwèwòwà, rzìi hwa ɛ̀ndɛ lì kpèeyà ò ndawò ya ama Lideya. Nà òma hwà mà uke aŋga hwà mà ùŋmanɛlɛ hwàlòkèlì, Pàwolò na Rzàyilarzi rzìi hwa òhweyà hwaŋga hwàlòkèlì mbɔrzi ya lì hwa embɛ rzìi hwa ɛndɛ e ya awu.

Currently Selected:

Hwègbèèlì 16: bri

Highlight

Copy