Mâk 16

Njisə̀s ə zòmə̀

(Matyò 28.1-8; Lûk 24.1-12; Njɔyn 20.1-10)

1Ə̀ tè nyi kə tuʼ endaʼve tsɛ̂ Mèli Màkndàlɛ̂n, Sàlomè, è Mèli nyìə Njə̂m, ə zhɔnə m̀ngwɨl me lɨ̀mtə̂m se ndùə kɨmnê epfɨyn ə Njisə̀svè ətəyn. 2Tuʼve ə zo ə Sɔndè, mə zhwize sa pə̂ kə ndò, ghənə ndùə ə Njisə̀s eshyə̀ eghaʼâzè. 3Kə ghənə tè ndùə, kyì e pfɨfə sê kyì nə, “Ə̀ nə̀ pɨŋsə̂ tsɨ̂sə̀ ndè chi zɛ ə echô èshyə̀ eghaʼâzè se ghasènì ə?” 4Ghənə tè pa nyi sə tyà ə pìə naynə̂ ndò, ə fe mə ə pɨŋse tsɨ̂sè ndôm èchi ətəynze. 5Ghənə ə njiə ndûə eshyə̀ eghaʼâzè ə fe èkwuŋ vîve è ndzɨse fɨfə̂sè ewìyn, è ve tsɨs apàs ekɔyntwɔke. Ndɨmke ə tənə̂ ə ghənə mndɛ̀.

6Kwuŋ ətəynve ə pìə sê ghənə nə, “Kə ghàyn fayn. M ke ndô nə ghàyn kyiŋə Njisə̀s, ə wùə Nazalɛ̀t vɛ ə tè paynte awâmnè. È və zòmə̀! È va fâyn. Ghàyn fekə luʼ vɛ ə tè nyɨ̀ŋse vəyn ətəyn ə. 7Ghàyn ndu tsayn sê chùmtè èpàm sə vəynse è kɨ̂sè Pità nə Njisə̀s ə zòmə̀, ‹È vê è ndùə ə ghàyn əshi ə Ngalìlî. Ghàyn nə̀ fe vəyn fumə kè kə è tè tsàyn sê ghàyn.›”

8Zəyn ətəynghe ə nyɨŋə fɨə fu eshyə̀ eghaʼâzè pɨyntə̂ kə nyî, choze ə zomə ghənə. Ghənə tè pâʼà tsàyn ghɛ zhîze sê wùə kûmə̀ èfâyn.#16.8 Ŋwàʼlè se mɨ sə mɔ̀ʼɔ se kiva ndiŋə̀ mè 9-20.

Ndom ə mɔ̀ʼɔ vɛ ə ŋwàʼlè ə Mâk mì ətəyn

Njisə̀s ə fɨ ə̂ Mèli Màkndàlɛ̂n ekyàʼ

(Matyò 28.9-10; Njɔyn 20.11-18)

9Kə Njisə̀s tè pɨse zômə̀ ə Sɔndè, È və tyə̀nə̀ ngɨŋə̂ Vəyn sə shi sê Mèli Màkndàlɛ̂n. Ə̀ nyi wùzhɔyn nə vɨnə ə Njisə̀s tè chùm fɨse tèpamə̂ tə satàyntè esɛ̀mbɛ̂ ə vəyn ewìyn. 10Wùzhɔyn ətəyn ə ndùə tsâ sê ghɨ ghɛ ə tè nyi tsɛ yî ghə̀ Njisə̀s. È və kotə̂ ghənə e chîə è kwu ə Njisə̀szè. 11Pîza kə ghənə zɨ nə Njisə̀s pa nyi wiynve twɔ, Mèli vê è fɨyn fe vəyn, pîza ə tàʼa pomə̂ sê vəyn.

Njisə̀s ə tyə̀yn ngɨŋə̂ Vəyn sê ghɨə Vəynghe əpɛ̀

(Lûk 24.13-35)

12Njisə̀s ə nə̀ fɨnə tyə̂nə̀ ngɨŋə̂ vəyn sê ghɨə Vəyn ghe əpɛ̀ mə ghənə ndô fɨə pə̂ endaʼ. Pîza famə ashìŋə̀, È və chwìtə̀ ngɨŋə̂ Vəyn endom sə nɨŋ. 13Ghənə ə kɛsə̂ ndûə tsâ sê soynsə ghənə̂ sə mɔ̀ʼɔse. Pîza soynsə ghənə̂sè ə tàʼa pa pomə̂.

Njisə̀s ə tyə̀yn ngɨŋə̂ Vəyn sê chùmtè èpàm sə vəynse njò èmɔ̀ʼ

(Matyò 28.16-20; Lûk 24.36-49; Njɔyn 20.19-23; Ətefɨ̂aʼ 1.6-8)

14Ə mòtə̀, Njisə̀s ə fɨnə tyə̂nə̀ ngɨŋ ə̀ vəyn sê chùmtè èpàm sə vəynse njò èmɔ̀ʼ mə ghənə zhiə ndò. È və zɔ̂ ghənə kûmə̀ nə ghənə tè kiva pomə̂zè, è kɨsè kə ghənə tè tə se pomə̂ nə ə fe vəyn mə è və zòmə̀. 15È və pìə sê ghənə nə, “Ghàyn ndu luʼ tekɨ̂m ə mbi ə ghàyn ndaʼa tom èchùŋ sê ghɨghe əkɨ̂m. 16Ə̂ pomə pîndè, ə fiə m̀mo, ə è tə kyî esɔzaze. Ə̀ faŋa pîndè se pomə̂, ə è tə kyî èpɔynsê. 17Ghɨə poməghe nə kyîə àtyaʼ sə̂ nə̂ ə̀ghɛ kayntəghe: Ghənə nə chûmə̀ fɨsə̂ tèpamə̂ tə satàyntè ə mì ezə, ə fɨnə wàmnə̀ tèwâmnè tîte ndɔ̀ʼɔ zaʼle. 18Ə ghənə kyi pî mbam è ghoke ə è tàʼa nə̂ ghənə è ghɛ zhîze. Ə ghənə zhi pî lɨf ə è tàʼa nə̂ ghənə è ghɛ zhîze. Ghənə tə ndə̂mə̀ ə̀gho ə ghənə ə ghɨ zafəghe ətu, ghe tɛ kə ndò.”

Njisə̀s ə kɔʼ ekwùtwəyn

(Lûk 24.50-53; Ətefɨ̂aʼ 1.9-11)

19Ə pə̀ kə Pɛ̂pɛ Njisə̀s wàmnè mɨ̂sè sê chùmtè èpàm sə vəynse, Zhə̀fè ə nə̀ è və kɔʼɔ ekwùtwəyn, ə tsɨsə̂ ə Fəynfe ekɔyntwɔve. 20Chùmtè èpàm sə Njisə̀sè ə fɨə ndaʼà ndûə Tom Èchùŋ luʼ tekɨ̂m. Pɛ̂pɛ tè nyì yighə̀ ghənə, ə fo àtyaʼ nə ghənə nə̂ ə̀ghɛ əkayntəghe, se tyə̀yn nə ghɛ ghɛ ə ghənə tè pìə nyi səmɔʼ.#16.20 Ŋwàʼlè semɨ shîse ə kwəynsê ndom vɨ̀nə ə ŋwàʼlè ə̀ Mâk mì ətəyn epàmə mndiŋə̀ 8

Currently Selected:

Mâk 16: bfm

Highlight

Copy