Matyò 9
9
Njisə̀s ə tsuʼ kèngɛchi
(Mâk 2.1-12; Lûk 5.17-26)
1Njisə̀s ə njiə ə ngwùʼ èghaʼâ ə tyàŋà ènjwî ə kɛsə̂ ndùə ə tɔ̂ŋ zɛ ə È tè ndamə ətəyn. 2Ndômnè yîghe ə pə̀ è kèngɛchi sê vəyn è nyɨŋ ə feghàm. Kə Njisə̀s tè fe pomə̂ zɛ əghɨ ghɛ tè kyi, È və pìə sê kèngɛchi kɛ nə, “Kyi təmə ə vayn vɨ̂m! Ə lɛ̀sè fo pi sɛse.”
3Tyə̀ynsè sə alàŋ shise ə zɨə za sè shwinə̂ pîə nə, “Wùə vɨnə̀ sòylə̀ Fèzhə̀.”
4Njisə̀s ə kê èghɛ zɛ ə ghənə kwâʼtə̀, ə pìə sê ghənə nə, “Kûmə̀ ghè ə ghàyn kwàʼtə̀ ghɛ epiə nyiə.? 5Ə̀ pɔynə̂ zɨyn zə, se pì nə, ‘Mə lɛ̀sè fo pi sɛse,’ mə se pì nə, ‘Ndwi, ò kwìə?’ 6M nə̀ tyə̀nə̀ sê ghàyn zôyn nə Vâ Wùə kyi ndô tyaʼa fâ chi se lɛ̀sè fo sepi sə ghɨ̀sè.” È və ke pì sê kèngɛchi kɛ nə, “Ndwi, njì ghâm fɛfe ə ndò kwɨlə̂.”
7Kèngɛchi ətəynke ə ndwìə ə kɛsə̂ kwɨlə̂. 8Ghɨghe ə fe za fâynzè ə ko ghənə. Ghənə ə zhə̀tə̀ se tsìtə Fèzhə̀ Fɛ ə Fe fo tyaʼa sê ghɨə nə ə nə̂ ə̀ ghɛ ghɨ̀yn.
Njisə̀s ə tɔŋə̂ Matyò nə è chumte Vəyn
(Mâk 2.13-17; Lûk 5.27-32)
9Njisə̀s ə ndò fumə ə piə è ndùə ndò ə fe wùə è tənə nə̂ sè tâks, zə vəynze e nyi Matyò. Matyò tè tsɨs apfɨ̀ə kɛ ə tənə tâksè ətəyn. Njisə̀s ə pìə sê vəyn nə, “Chùmte mi.”
Matyò ə ndwìə ə chùmtə̀ Njisə̀s.
10Epàmə̂ zɨ̂nə̀, Njisə̀s ə ndùə ə Matyò ə ndɛ se zhi. Ghɨ e tənə nə sètâksə̀ setsɨ̀ è ghɨ piə ə pə̀ paʼsə̂ sê zhiə yî ghə̀ Njisə̀s è chùmtè èpàm sə vəynse. 11Kə ghɨ Falàsî əmɔʼɔ fe kə Njisə̀s tsɨsə yîghə̀ kyì ghɨ̀ ghɛ, ə pfɨf sê chùmtè epàm sə Njisə̀sè nə, “Kûmə̀ ghè ə tyə̀ynsè vâyn zhiə yî ghɨ ghɛ ə ghe tənə tâksè è ghɨ epi ghə?”
12Njisə̀s ə zɨə eghɛ zɛ ə ghənə piə ə pə̀ynsə̀ sê ghənə nə, “Ghɨ ghɛ ə nyi wiynve twɔ kyiŋə va wùə èfù, ghɨ ghɛ ghe zafə nyi ghɛ ghe kyiŋə wùə èfù. 13Pîza, ghàyn ndu kyiŋ kə ghàyn zɨ kê ə̀ghɛ ghɨ̀ynə ə nyâʼ ə ŋwàʼlè ə̀ Fèzhə̀ nə, ‘Ə̀ nyi ekosê esəyn kə M kyiŋə sê ghɨə, ə̀ vachi è se ə se nyàmzè sê zhə̀tə̀m.’ M tè pâʼà pə̀yn ə mbi se tɔŋə̂ əghɨ ghɛ ə ghe se tyəm chichi, pîza M tè pəyn kûmə̀ ə̀ghɨ piə.”
Ə pfɨf ghɛe sê Njisə̀s kûmə̀ èpam e choe
(Mâk 2.18-22; Lûk 5.33-39)
14Chùmtè epàm sə Njɔyn Foə m̀mòse ə pə̀ sê Njisə̀s ə pfɨfə sê vəyn nə, “Kûmə̀ ghè ə ghàs è ghɨ Falàsîə pamə choe, chùmtè èpam sɛse pamə va ə?”
15Njisə̀s ə pə̀ynsə̀ ghənə è ngàyn nə, “Ghɨ ghɛ ghe pə̂yn elùʼ ezhiə nə malə̂vè kàʼa ghə chîə zàyn ndom ə̀ wùzhɔyn e pa nyi yî ghə̀ ghənə? Ze vayn kyàyn! Tuʼve tə pə̂, ə nji tsɨ̂sè ndom ə̀ wùzhɔyn ə̂ ghənə əfètəyn. Ə̀ tə nə̂ ə nyi fumə fetuʼ kə ghənə pam choe.”
16“Ghàyn kê nə ə wùə fɛtə ndzɨsə vəynse, è vâyn kàʼa è nji pâs ə sendzɨs efeke ə è fɛte ndzɨse mɨse ətəyn, kûmə̀ nə ə ndzɨse fɛsə təynse zhə̂tè se sàʼtè, ə se chyase ngɨŋə̂ səynse ə tə se mɨse. Ə puʼə təynke ə ghaʼa tsɛ̂ kə ke fə̂ nyì sə shi. 17E za nyì kepî èghɨ kə wùə vayn kàʼa è nji lɨ̀ mefɛ̂m ə è ndɔm ə fètə̂m fe mɨfe. Ə è nə̀yn za, ə lɨ̀ mə təyn mè kɔʼ ə təm fə təynfe payte, ə laʼ lɨ̀m m̀kɨ̂m, ə təmfe pof kepî. Pîza ə pɨlə njîə m̀lɨ̂ me fɛ̂m ə ndɔ̀mə̀ mtəm mê fɛ̂m. Zɨnə mə nə̀ nə̂ nə lɨ̀ mə tsɔ̂fə̀, təmfe tsɔ̂fə̀ kəpiə.”
Njisə̀s ə ndwisè vâyn èzhɔyn ekwu ə fɨnə tsuʼə wùzhɔyn viu
(Mâk 5.21-43; Lûk 8.40-56)
18Kə Njisə̀s tè pìə zɨnə mə, wùə èchisə ə̀ ghɨ Njûs viu ə pə̀ tɨmə ə̀ndzɨs ə və shi è ngɨmnê zekɨ̂m ə pìə nə, “Vayn vɨ̂m vê zhɔyn kwûʼ kwu kê zôyn; pîza pə pase gho kɛke ə vəyn ewìyn ə è kɛse ndwî.”
19Njisə̀s ə ndwìə è chùmtè èpàm sə vəynse ə chumtə̀ wùə ə̀təyn.
20Ke ghənə tè ndûə, wùzhɔyn vîvè mə è və tə fe ndûŋtè shîŋə̀ vəynke sə sepìŋ njòse pɛ̀ ə pə̀ ə Njisə̀s epàm, ə kòmə̀ ècho esɔ̀ŋ ə sendzɨs ə vəynze. 21Wùzhɔyn nə̂ təyn ə pìə sê ngɨŋə̂ vəyn nə, “Ə m kôm ke ndzɨs sə vəynse ə m tɛ.”
22Njisə̀s ə kə̀mnə̀ èwiyn ə fe vəyn ə pìə nə, “Kə ò fayn ə vayn vɨm. Pomə zɛze ə nə̀yn ò vê tɛ.” Kè sə ashìŋə̀, wùzhɔyn ə̀təyn ə tɛ.
23Njisə̀s ə ndùə tâynə̀ ə wùə èchisə nə vɛ ndɛ. Kə è nji ə ndɛ, ə fe ə̀ghɨ setsɨ̀ ghe puʼlə̂ m̀pɔ̂ŋ, è ghɨə ghe tɔŋə sèndɔŋ zhəmə sènjàŋ se kwuse. 24Njisə̀s ə ke pì nə, “Ghàyn fɨ nâʼà ə̀kɨ̂m. Vayn vɨnə paʼà kwu, è pɨənə̂ ndò.” Ghənə əkɨ̂m ə zhə̀tə̀ se chaʼa vəyn. 25Kə nɔ̂yn ətəynke tè fɨ mɨ̂sè əpɨəyn, Njisə̀s ə njiə ndûə ə ndɛ fètəyn zɛ ə nyɨ̂ŋsè vayn èzhɔyn ətəyn ə kyîə àgho ə vâ ətəynke, è və ndwìə kə sə ashìŋə̀. 26Tom kûmə̀ èghɛ nə zɨnə mə ə waŋə kə luʼ tekɨ̂m fumə apàs endaʼke.
Njisə̀s ə nə̀yn, fòfvè epɨ̀a e kɛsə̂ fe tèluʼ
27Njisə̀s ə ndò fumə sè kwîə ndûə, ghɨ e fofə ghə pɛ̀ ə chùmtə̀ vəyn, pɨ̀a tɔŋɔ piə nə, “Kose səyn sê ghàs ə Va fèghàŋ ə ndɛ Ndàfîtfè!”
28Kə Njisə̀s tè ndù njiə ə ndɛ, ghɨ e fofə ətəynghe ə pɛ̀ ə pə̀ kotə̂ vəyn fu. È və pfɨfə sê ghənə nə, “Ghàyn kyi ndô pômê nə M kaʼa M tsuʼ ghayn ə?”
Ghənə pə̀ynsə̀ nə, “Èn! Ghàs pomə ndò ə Pɛ̂pɛ.”
29Njisə̀s ə pasə̂ ə̀ghɔ vəynghe ghənə əshi ə pìə nə, “Ə ze kyayn sê ghàyn kè kə pomə̂ zaynze nyi.” 30Shiə ghənə̂ ghə kɛsə̂ fe tèluʼ. Njisə̀s ə ke fo fɨ̀as sê ghənə pîə se ghənə nə, “Kə ghàyn tsayn sê wùə ghɛ zɛ ze kyâyn.”
31Pîza, ghənə fɨə ndûə ə waŋə èghɛ ətəynze kè luʼ tekɨ̂m fumə apàs endaʼke kə Njisə̀s nyi mə è və nə̀yn ghɛ ekayntəze.
Njisə̀s ə tsuʼ wùə è wâmnə̀ va
32Kə ndômnè ghɛ Njisə̀s tè tsuʼ mə ghənə ə fòf tè ndo ndûə, ghɨ yîghe ə pə̀ è wùə sê Njisə̀s è ve wamnə̀ va kûmə̀ nə è tè nyîə kyi èpamə̂ ə satàynzè. 33Pîza, kè kə Njisə̀s chùm fɨse pamə̂ ə satàyn ətəynze, wùə ətəyn ə zhə̀tə̀ se wàmnè, nâʼà pîndè ə è tè nyì fu e nyi è kaynze piə nə, “Ghàs paʼà tyə̂m fe kyì eghɛ nyî fàyn endaʼ ə Isìlâyzè.”
34Pîza ghɨ Falàsîghè ə pìə nə, “Ə̀ fo fɔ̀yn ə̀ tèpamə̂ tə satàyntè è tyaʼa nə è və chûmə̀ fɨsə̂ tèpamə̂ tə satàyn nə tɨ̂yn.”
Njisə̀s ə kyî kosê esəyn sê ghɨə
35Njisə̀s e kwîə ka môtə̀ sètɔ̂ŋ sèkɨ̂m è tə̀ʼse, zaʼlə̂ èghɛ Fezhə̀zè ə se ndɛ sə atsɨ̀yntese, ndaʼà tom èchùŋ kûmə̀ èfɔ̂yn ə Fezhə̀vè, tsuʼə ə̀ghɨ zafə ghəkɨ̂m è kyì tə tezaf tekɨ̂m. 36Kə è tè fe nɔ̂yn ə ghɨ̀kè, təm ə vəynghe ə lwinə è kosê esəyn sê ghənə. Təmə vəynghe tè lwiyn èkosê esəyn kûmə̀ nə ghənə tè nyiə kyi èfɨmsê, kyi va tsâmtèzè. Ghənə tè nyi kə sendzè ə se kyi va ngyəyn. 37È və pìə sê chùmtè èpàm sə vəynse nə, “Fɨazhiəu nyi se kwì, tsɨ̀ə kə nyi, pîza ghɨe kwiəghe tətə̂ kə nyi. 38Ghàyn tsə̂m nə pɛ̀ àfùʼ tom ghɨə əkwiəghe.”
Currently Selected:
Matyò 9: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL