Matyò 10
10
Ə ghɨətomə njò sepɛ̀
(Mâk 3.13-19; Lûk 6.12-16)
1Njisə̀s ə tɔŋə̂ chùmtè èpàm sə vəynse njòse pɛ̀, ə fo atyaʼ nə ghənə ə chûmə̀ fɨsə sezuʼ se pise fɨnə tsuʼə tèkyì tə tezafte tekɨ̂m. 2Ə̀ ghɨnə nyi əzə əghɨ̀tomə njò sepɛ̀: Wùə shi tè nyi Shimùyn vɛ ə tè tɔŋtə kəpî nə Pità, è ànyìə vəyn Andɨ̀lò. È Njə̂m yî ànyìə vəyn Njɔyn, ə ghɔ Zepɛ̀ndîə; 3Filìp è Pàtòlòmiyâ, è Tɔ̀mɔ̂s è Matyò vɛ è tè tənə tâksè, è Njə̂m ə vâ Àfeyùs, è Tàtyə̂s, 4ə fɨyn nyi Shimùyn ə wùə vɛ ə è kyi ndaʼə vəynze ətəm (àlwù), è Njondàs Èskalɔ̀t vɛ ə è tè kɛse pəʼle Njisə̀s.
Njisə̀s ə tsàyn ghɛ zɛ kə ghɨ tom ə vəynghe ə nə̂
(Mâk 6.7-13; Lûk 9.1-6)
5Ə̀ tè tom fɨsê Njisə̀s è chùmtè èpàm sɨ̂nə̀ njò sepɛ̀ ə fo ghənə è lwɔ̂ŋvè nə, “Kə ghàyn ndu sê wùə endaʼ àtum; kə ghàyn ndu sê wùə ə̀ tɔ̂ŋ ə Sàmalìtâyn nâʼà èmɔ̀ʼ. 6Ghàyn pɨl ndu ke sê ghɨə Isìlây ghɛ ə ghe nyi nyiə kə sendzè senjisəse. 7Ghàyn ndu, ke kə ghàyn ndùə, ghàyn è ndaʼà nə, ‘Fɔ̂yn ə Fezhə̀vè ə paʼsê’ 8Ghàyn tsuʼ ghɨə zafə, ə zòmsə̀ ghɛ ə nyi mə kwu, ə tsuʼ ghɨ ghɛ ə ghe kyi kwùsà, ə chûmə̀ fɨsə̂ tèpamə̂ tə satàyntè. Mə fo ghàyn è tyaʼa nə ghàyn nəyn ghɛ ghɨ̀nə̀ ə̀kɨ̂m pîza kyiŋə va ndâʼ zhîze sê ghàyn. Ghàyn pɔŋ nəyn ə̀ghɛ nə ghɨ̂yn mə ghàyn pfɨfə va ndaʼè sê ghɨə. 9Kə ghàyn nə nji èkɛ. 10Kə ghàyn nə nji shəyn, pî sèndzɨs se pɛ̀ pî sepfɨ sə ghòlse, pî kə mbàŋ è tɔ̀ʼtə. Kûmə̀ nə wùə èfɨaʼa kyi se kyî efɨazhiəve sê wùə vɛ ə è fɨaʼà sê vəyn.
11Ə ghàyn nji ə tɔ̂ŋ kɨ̀sə ə̀ nyì pî tə̀ʼ, ghàyn nji ndu ə ghàyn naynə vɛ ə è nyi èpɨaʼtêzè se fiə ghàyn, ə ghàyn ndam ə və ndɛ se zaʼâ kə ghàyn ndo fɨ fumə endaʼ 12Ə ghàyn nji ndû ə ndɛ, ghâ pìə nə, ‘Pɔ̂ynè ə̀ Fèzhə̀ nyì sê ghàyn.’ 13Ə ghɨ ndɛ ətəynghe fi ndzɨse ghàyn achûŋ, ə tɔŋtê zaynze ə pɔ̂ynzè faŋ sê ghənə; pîza ə ghənə taʼa fiə ndzɨsə ghàyn achûŋ, ə tɔŋtê zayn zə pɔ̂ynèzè kɛse pəyn sê ghàyn. 14Mə faŋ pî ndɛ èkè kɨ̀sə tɔ̂ŋ se fiə ndzɨsə ghàyn, gha zà eluʼ ətəynve ə puʼə tsɨsə̀ àpɨ̂l elùʼ ətəynke ə ghànə ghòl se chwìtè nə Zhə̀fè pâʼà fi ndzɨsê ghənə. 15M pîə sê ghàyn səmɔʼ nə ə̀ tə nə̂ ə nyi etuʼ ə saʼe, ə Zhə̀fè chwite kosê esəyn ghaʼâzè sê tɔ̂ŋ ə̀ Sondòm è ghɨə Ngòmolà tsɛ̂ kə Fe chwîtə̀ sê ghɨə tɔ̂ŋ nə ghɨ̂nə̀.”
E zɨə ngəʼ zɛ ə chùmtè èpàmse tə zɨə ə Njisə̀s ezə
(Mâk 13.9-13; Lûk 21.12-17)
16Ghàyn zɨte! M tomə fɨsə̂ ghàyn nyi, ghàyn e ndûə sə̂ nyi kə sendzè əfètə̂ sènyàm se pɨase. Ghàyn kyi sə̂ tɔfə kə kə sembam, kyi sə̂ kyi èngɨmnê kə ekwɨ̀l. 17Ghàyn e tɔ̀ʼnə̀, kûmə̀ nə ghɨ nyi ndô mə tə kyîə ghàyn ə nji è ghàyn elùʼ ə saʼ ə ghənə pus ghàyn ewàynsè ə ghənə sendɛ sə atsɨ̀yntese. 18Ə tə kyîə ndûə è ghàyn ə ghɨ ghaʼâ ghə əshi, è fɔ̂yntè nə ə saʼ kè kûmə̀ mi, ghənə tə nə̂ zɨnə mə kə ghàyn ndaʼa tom èchùŋ zɨ̂mè sê ghənə è kɨsè se ghɨ atumə. 19Ə pə̂yn è ghàyn nə saʼ, kə ghàyn nə kayn mbi nə ghàyn nə̀ ndùə piə nə ghe ə è kɨsè ndom vɛ ghàyn nə̀ pîə ətəyn, ə shîŋə̀ ə təynke pə̂yn, ə ghɛ zə nyi kə ghàyn pi. 20Ghɛ ghɛ ə ghàyn tə wâmnə̀ tə nə̂ ə va ghanə; ghe tə pə̂ sê Zuʼ sə Pɛ̂sè kə È tə wâmnə̀ se ghàyn.
21Ghɨə tə njiə fo ə̀ ghɔnyìə ghənə̂ghè nə zhwi, ə pɨ̀a ə ghɔnə nji fo ə̀ghɔyn nə ə zhwi. Ghɔynə tə kə̀mnə̀ ə nô ghə̀ pɨ̀a yî ghə̀ nyì, ə fo nə zhwi. 22Ghɨghə əkɨ̂m tə pânə̀ ghàyn ə mì ezə. Pîza mə ə kol pîndè təmə se nduə tàyn ə mɨ̀se ə è tə kyî èzɔzaze. 23Ə tsɨ̂fsə̂ ghàyn ə tɔ̂ŋ èmɔ̀ʼ, gha tə ndûə ə tə zə mɔ̀ʼɔze. M piə sê ghàyn səmɔʼ nə ghàyn tə nə̂ mɨ̂sə̀ va fɨ̂aʼ zaynze ə setɔ̂ŋ sə Isìlâytè tekɨ̂m ndɔ̀ʼɔ Va Wùə kɛse pəyn. 24Wùə vɛ è lanə tsɨ̂ə tsɛ va tyə̀ynsè ə̀ vəyn; wùə èfɨ̀aʼa ngaŋtə̂ tsɛ va tu efɨ̀aʼkè. 25E tyə̂nə̀ nə wùə ezaʼlə kyi va sə̂ kyiŋə èkɔʼsê ze tsɨə tsɛ zə wûə vɛ è zaʼlə vəyn. Wùə vɛ è fɨ̀aʼà kyi kepî va sə̂ kyiŋə èkɔʼsê ze tsɨ̂ə tsɛ zə wûə vɛ ə è fɨ̀aʼà se vəyn. Ə tɔŋtə tu esas ə ndɛke nə Peelzepùl, ə tɔŋtə̂ ə̀ ghɨə vəynghe sas ə ndɛghe tsɨ̂ə tsɛ̂ za mə.
Njisə̀s ə tsàyn wùə vɛ ə kyi sə̂ fânə̀ vəyn
(Lûk 12.2-7)
26“Kə ghàyn fɨyn fayn əghɨ msɔ̀ŋghe kûmə̀ nə ghɛ zhize va ə ndətə̀ ə ze tə faŋə se fɨ ə ndayn. Nâʼà pîghè vɛ ə ndətè, ə tə kê. 27Ghɛ zɛ M tsâ sê ghàyn alɨm, ghàyn kyi se kɛsə tsa ghəynghe ə ndayn sê ghɨə, mə ghɛ zɛ ghàyn ndə̀tè zɨ, ghàyn kyi se tsa paynsê ə ghəynghe ezhɔyn. 28Kə ghàyn fayn ghɨ msɔ̀ŋ ghɛ ə ghe kaʼa ə ghe zhwi ke àchaʼ ewìyn ə wûəkè, pîza mə vâyn kàʼa zhwi zuʼ sə vəynse. Ghàyn e pɨlə fânə̀ Fèzhə̀ Fɛ ə fe kaʼa Fe pofsə̂ zuʼsə wùəsè, è chaʼ ə vəynke ewùs. 29Piə ə pəʼlə̂ m̀nɨŋtə̂ m̀pɛ̀ kè sə fekɛtə̀ nyi, pîza femɔ̀ʼ e va ə fe kàʼa fe tayn ə chi, ə tsɛ̂ kə va nə pɨa vâyn Zhə̀fè kɔ̀ŋ ndô nə ze kyayn. 30Pîza, sê ghàyn Zhə̀fè ke ndô kɔ̂yn ə se nyuŋ kɛ ə ke nyi ə ghàyn atu. 31E za nyi nə ghàyn kyi va sə̂ fânə̀ kûmə̀ nə ghàyn nə̂ kɔʼnə̂ tsɛ̂ m̀nɨŋ me tsɨ̂əm̀.
Se tə Njisə̀s, ə̀ puzâ se pomə̂ vəyn
(Lûk 12.8-9)
32Ghɨ ghɛ ə pîə ə ndayn nə ə nyi ghɨmə, M tə nə̂ kəpî èghɨ sê ghənə ə pɨ̀a vɨ̂mvè əshi ekwùtwəyn. 33Pîza ghɨ ghɛ ə tə Mi ə ndayn, M tə tə ghənə ə Pɨ̀a vɨ̂mvè əshi ekwùtwəyn.
Njisə̀s ə pə̀yn è chyâsèzè ə ghɨə msɔ̀ŋ ghɨə fètəyn
(Lûk 12.51-53; 14.26-27)
34Kə ghàyn nə kwaʼtə̀ nə m pəyn fâ ə chi se pə̀yn è pɔ̂ynè. Ngaŋ! M paʼà pə̀yn chi se pə̀yn è pɔ̂ynè, m pɨl pə̂yn se nə̀yn nə chyâsèzè ə nyi. 35M pəyn se nə̀yn nə vayn èndômə̀ ndwi ə pɨ̀a ekyàʼ, ə vayn zhɔyn ndwi ə nyì ekyàʼ, ə zhwìə vayn ndwi ə nyìə ndom ekyàʼ. 36Pàyn sə wûə se pise tə fɨə kə və ndɛ.
37Wùə vɛ ə è kɔ̂ŋɔ̀ pɨ̀a kɨ̀sə nyì tsɨ̂ə tsɛ̂ kə è kɔ̂ŋə̀ Mi, kwənə va sə̂ nyi chùmtè èpàm zɨ̂mzè; Ə̂ kɔ̀ŋɔ̀ pindè vayn èndômə̀ vəyn kɨ̀sə vayn èzhɔynə̂ vəyn tsɨ̂ə tsɛ̂ kə è kɔ̀ŋɔ̀ mi, ə è və kwəynə va sə̂ nyi chùmtè èpàm zɨ̂mè. 38Ə̀ faŋ pîndè se pɨàʼà awâmnè ə vəynke se chùmtè ə mi, ə è və kwənə va sə̂ nyi chùmtè èpàm zɨ̂mè. 39Ə̂ mɔ̀msè pîndè se sɔ̀ ə ngɨŋə̂ vəyn, ə è njise zə̂ynzè; ə njìsə̀ pîndè ngɨŋə̂ vəyn kûmə̀ Mi, ə è tə kyî èndam zɛ ə ze tə mîə va.
Emaʼte vɛ ghɨə kyiə kə fiə ndzɨsə chùmtè
(Mâk 9.41)
40Ə̂ fi ndzɨse pîndè ghàyn, ə̂ ə nyi mə è fi ndzɨsê mi, ə̂ fiə ndzɨsə̂ pindè mi, ə̂ ə nyi mə è fi ndzɨsê pɨ̀a vɨ̂m vɛ è tom mi. 41Ə̂ fi pi ndè fɨ̀aʼtè kûmə̀ nə è nyi fɨ̀aʼtè ə̀ Fèzhə̀, ə è və kyi èmâʼte kèpi kə̂ fɨaʼtə̀ Fèzhə̀, ə fi ndzɨse pindè wùə kûmə̀ nə wùə ə̀təyn nyi chichi ə Zhə̀fè əshi, ə è və kyi emâʼte ə wùə chichize. 42Ghàyn ke səmɔʼ nə ə̂ fo pîndè wà m̀mò èsanə sê wùə èmɔ̀ʼ əfètə̂ ə̀ghɨ̀ ghɨ̀yn kûmə̀ nə è nyi chùmtè èpàm zɨ̂mè, pî vɛ ə va wùə èghaʼâ, è kyi se kyî emaʼtè ə Fezhə̀vè.”
Currently Selected:
Matyò 10: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
