Lûk 5
5
Njisə̀s ə njì ghɨe fə vəyn ghə shiə
(Matyò 4.18-22; Mâk 1.16-20)
1Ə̀ tè nyi tuʼfîfe, Njisə̀s ə ndùə tyəmə etipìə enjwì vɛ ə ve tè nyi ə Njɛ̀nɛsalɛ̀t, nɔ̂yn ə ghɨ̀kè ə pə̀ sè fɛsə̂ njiə pə̀ kə ə vəyn ekyàʼ se zɨ eghɛ ə Fezhə̀zè. 2È və fe sèngwùʼ seghaʼâ sèpɛ̀ fu etipìə tsô, mə ghɨ ghɛ ghe tè ko mbwɔ̀vè ətəyn ə fɨ ndu epàm sè shuə m̀làm mə ghənə̂m. 3È və njiə ətə̂ zhizè, mə kyi Shimùyn, ə piə sê vəyn nə è paʼ njitê ndù è zəyn ə tsô. Ə̂ pə̀ kə̂ Shimùyn pàʼ njite ndu è zə̂yn, è və tso tsɨsə sè zaʼlə̂ ə̀ghɨ.
4È və pə̀ kə è wàmnè mɨ̂sè, ə se pi sê Shimùyn nə, “njite kwəynse ndù è ngwùʼ èghaʼâ əfètə̂ tsò, ə ghàyn maʼ tsosê m̀làm mâynmè, kə̂ ghàyn ko mbwɔ̀vè.”
5Shimùyn ə piə sê vəyn nə, “Ghàs nyîə pɨəyn ke se màʼ ə Pɛ̀ apɨəyn, ə tàʼa ko afɨa, pîza kə sè pi ghò nyi, m nə̀ fɨnə maʼà.” 6Ghənə màʼa m̀làm ə ko embwɔ̀ ve tsɨ̀ə kə nyi, m̀làm mə ghənə̂mè e sè kyiŋə se təyntê. 7Ghənə ə nə̀ʼsə̀ àgho sê soynse ə ghənə̂sè nə se pəyn tsàmte ghənə, ghənə pə̀ è ngwùʼ èghaʼâ ə̀mɔ̀ʼɔ̂ ə lwiynsə̂ sèngwùʼ seghaʼâ nə sɨ̂nə̀ mə sepɛ̀ è mbwɔ̀vè, se sè kyiŋə se mɨlə̂. 8Ə̂ pə̀ kə Shimuyn Pità fe ghɛ zɛ ə ze kyàyn, è və tɨmə əngwuʼ ə Njisə̀s əshi ə piə sê vəyn nə, “Ndò ə mìə ngwùŋ ə Pɛ̂pɛ. M nyi wùə èpi!”
9È tè wàmne za kûmə̀ nə è tè nyi è kayn yî ghɨ ghɛ è tè nyi yî ghə̀ ghənə kûmə̀ embwɔ̀e tsɨə vɛ ə ghənə ko. 10Ghɔ Zepɛndì ghɛ ə yî Shimùyn tè fɨ̀aʼa əmɔʼ, mə za nyi Njə̂m è Njɔyn, tè nyi kepî è kayn. Njisə̀s ə ke pi sê Shimùyn nə, “Kə ò fɨyn fayn, se zhə̀tè zôyn se ndù əshi, ò nə ko əghɨ.”
11Ghənə ə kɛse pə̀ è ngwùʼ seghaʼâ sə ghənə̂sè ə etipìə tsò ə za naʼapi ghè və̂ ghənə, ə chùmtə̀ ndùə Njisə̀s.
Njisə̀s ə tsuʼ wùə àkwùs
(Matyò 8.1-4; Mâk 1.40-45)
12Njisə̀s tè ndùə tɔ̂ŋ zhizè, wùə ə pə̀ mə kwùskè ə kwɨl wiyn əvəynve ekɨ̂m. Ə pə kə è fe Njisə̀s ə pfɨ̀ə kə ə və shi ə chyatə̂ vəyn nə è tsuʼ zhi piə nə, “Pɛ̂, ə ò kɔ̀ŋɔ̀, o tsuʼə mi.”
13È və nɛ̀sə̀ agho ə kûmə̀ vəyn ə piə nə, “M nə kɔ̂ŋɔ̀, tɛ è.” Kè sə ashìŋə̀, kwùs ətəynke ə mìə ə vəyn ewiyn. 14Njisə̀s ə fo fɨ̀as sê vəyn nə, “Kə ò nə mɔmse se tsàyn sê wùə,” pîza ə piə nə, “Ndùə tyə̀yn ngɨŋ zɛ sê wùə èkɔʼsə nə̂ èshyə̀ ə fo efo zɛ ə Saʼ ə Mosîsè tè piə nə wùə tɛ è kwùsà kə ghò, è və fo kə ghɨ ke nə è və tɛ.
15Pîza saʼghe kûmə̀ Njisə̀s ə waŋə kə luʼ tekɨ̂m naʼapi kə è tè kyiŋə nə wùə è zafə nə vɛ ndə̀te ghɛ ətəyn. Nɔ̂yn ə ghɨ̀vè tè faŋa va se pə̀yn sə̂ zɨtə̂ èzaʼlê ə vəyn fɨnə pə̀ nə è və tsuʼə tèzaf tə ghənə̂tè. 16Pîza è tè faŋa va se za ghənə se ndù elùʼ, kè vəyn ènɨŋ se tsə̀m.”
Njisə̀s ə tsuʼ kèngɛchi
(Matyò 9.1-8; Mâk 2.1-12)
17Ə̀ tè nyi tuʼfîfe kèpi əshɨŋ nə ghɛ, Njisə̀s e zaʼlə̂ elùʼ, ghɨ Falàsîə è tyə̀ynsè sə alàŋsè e tsɨs kepî fu, mə fɨ pə̀yn ke tɔ̂ŋ sekɨ̂m ə Ngalìlî è Njòndyâ naʼapi è Njèlusalɛ̀m. Ə tè nyi za, tyaʼ ə Pɛ̂kè e nyi sê Njisə̀s, è tsuʼə tèzaf. 18Kè nyi, ghɨghe ə pə̀ è kèngɛchi ke nyɨŋ ə feghàm, sè kyiŋə endom se nji è kəynke ə ndɛ zɛ ə Njisə̀s tè nyi ətəyn se nyɨ̀ŋsè ə̂ və shiə. 19Pîza ndomve va kə ghənə nji è kəynke kûmə̀ anɔ̂yn kɛ ə ke tè nyi. Ghənə ə kɔʼɔ è kəynke endomve etûə ndɛ ə chɔʼɔ àpûʼ ə tsosə̂ kəynke əfètə̂ ànɔ̀yn nə kɛ ə nyɨ̀ŋsə̀ kəynke ə Njisə̀s əshi. 20Ə̂ pə̀ kə̂ è fe pomə̂ zɛ ə ghənə tè kyi, è və piə sê kèngɛchi nə kɛ nə, “Mə lɛ̀sè fo pi sɛse ə pə!”
21Tyə̀ynsè sə alàŋsè è ghɨə Falàsîə e sè pfɨfə se ngɨŋ sə ghənə̂sè nə, “Ə̀ vɨ̂nə nyi nde ə è sòylə̀ Zhə̀fè nyi ə? Ə̀ nyi kaʼa ə lɛse fo ndè pi sə wùəsè, ə tsɛ̂ kəva Zhə̀fè ə?”
22Njisə̀s ə kê eghɛ zɛ ghənə kwâʼtə̀ ə se pfɨf sê ghənə nə, “Ghàyn kayntə̂ nâʼà əghɛ nə ghɨnəmə nyi kûmə̀ ghè? 23Ə̀ pɔynə̂ zɨynzə, se pi nə, ‘Ə lɛ̀sè fo pi sɛse’ mə̂, se pi nə, ‘Ndwi ə ò kwi ə?’ 24M nə̀ tyə̂nə̀ sê ghàyn zôyn nə Va Wùə kyi ndô tyaʼa fâ chi se lɛ̀sè ə fo se pi sə ghɨ̀sè.” È və se pi sê kèngɛchi nə kɛmə nə, “M piə sê ghò nə ò ndwi nji akyə̀yn kɛke ə ò kwɨlə̂.”
25È və ndwìə kə sə eshɨ̀ŋə̀ èmɔ̀ʼ ə ghənə shi ə njiə feghâm fɛ ə è fè nyɨ̀ŋ ətəyn sè kwɨlə̂, kɔʼsə̂ ndùə Fèzhə̀. 26Ghənə e nyi è kayn, fâynzè ə ko ghənə, ghənə e sè tsîtə̀ Fèzhə̀ pîə nə, “Ghâsènì ə fe ghɛ əkayntə ghe ndàyn!”
Njisə̀s ə zhi yî ghɨ piə
(Matyò 9.9-13; Mâk 2.13-17)
27Epàm ə̂ ghɛ nə ghɨyn, Njisə̀s ə fɨə ə piə è ndùə ndò ə fe wùə, è ndamə tənə sètâks, zə vəynze e nyi Levì, è tsɨs apfɨ̀ə kɛ ə tənə tâksè ətəyn ə pìə sê vəyn nə, “Chùmte mi.” 28Kè sə ashìŋə̀, è və za naʼapi ghè ə ndùə kə ə vəyn epàm.
29Levì ə nə̀ za ə fɨnə pɨaʼtə̂ nâʼà ta èghaʼâ ə və ndɛ sê Njisə̀s. Ghɨghe ə pə̀ fu tsɨ̀ə kə nyi, paʼsə̂ è ghɨ ghɛ ə tənə tâksè, yî ghənə e sè zhiə. 30Ghɨə Falàsî əmɔ̀ʼɔ è tyə̀ynsè sə alàŋ sə ghənə̂sè e sè zɔ̂, pfɨfə sê chùmtè èpàm sə Njisə̀sè nə, “Kûmə̀ ghè ə ghàyn zhiə fɨnə mɨə ghayn ghə̀ ghɨ ghɛ ə ghe tənə tâksè è ghɨ piə mɔ̀ʼɔ ghə?”
31Njisə̀s ə pfɨfə sê ghənə nə, “Ə̀ tè piə ndɛ ə̀ ndè, è fɨnə kyiŋə èfu ə? Ə̀ nə̂ ə̀ kyiŋə kə əghɨ e zafə. 32M pâʼà pə̀yn se chi sê ghɨ ghɛ ə tyəm chichi, m pə̀yn kûmə̀ ə̀ghɨ piə se nə̀yn nə ghənə kwiyne təmə ə ghənə̂ghè.”
(Matyò 9.14-17; Mâk 2.18-22)
33Ghənə ə piə sê Njisə̀s nə, “Chùmtè èpàm sə Njɔynse tè pamə echo, tsə̂mə̀, sə sefalàsisè e pamə ècho, tsə̂mə̀, pîza sɛse tsɔ̂ynsə̀ zhiə kə ndò fɨnə mɨə kə kə̂ ghənə kɔ̂ŋɔ̀.”
34Njisə̀s ə pfɨfə sê ghənə nə, “Ə̂ ghàyn nyiə kàʼa ə pomə nə ghɨghe ə pamə ècho elùʼ ə malə̂, ndom ə̀ wùzhɔyn e pa nyi kepî fu ə? 35Tuʼfe tə pə̂, ə nji tsɨ̂sè ndom ə̀ wùzhɔyn ə̂ ghənə əfètəyn, ə ghənə ə sè pam echo.”
36È və piə za ə fɨnə mɛ kəpiə ngàyn zhizè sê ghənə ə piə nə, “Wùə vayn kàʼa è nji paŋ a sendzɨs a feke è pase ndzɨs se mɨse ətəyn. Ə è nə̀yn za, ə è pofse ke sendzɨs se fe nə sɛ sə ndô, ə pâs a fe nə kɛmə ə kwəynə̂ va è ndzɨs se mɨ nə sɛmə. 37E za nyi kepî eghɨ kə wùə vayn kàʼa è ndəm lɨ̀ mê pɔ̂m ə mshɔʼ mə pfɨ̀ə nyàmə̀m mə m̀ mə mɨ̂sè kûmə̀ nə è nə̀yn za ə lɨ̀ mə təynm̀ nə piə m̀ tɛ ndò ə m̀ zhwile shɔʼ mə̂ təynm̀, ə è laʼ lɨ̀m ə è laʼ shɔʼə̀m. 38Ə kyi ke se ndə̀m mlɨ mê pɔ̂m ə tə̂ m̀shɔʼ mê fêm. 39Piə ghàyn ke ndô nə̂ wùə mɨə lɨ̀ mê tɛ̂m, ə è və fɨnə kɔ̂ŋɔ̀ va lɨ̀ mê pɔ̂m, ə è faŋ ke nə, ‹Lɨ̀m tɛ̂, m̀ tsɔ̂fə̀.›”
Currently Selected:
Lûk 5: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
