Lûk 12

Fɨ̀as kûmə̀ èkaŋkaŋa nəe

(Matyò 10.26-27)

1Ə̂ pə̀ kə Njisə̀s tè wàmnè ghɛ nə ghɨ̂nə̀, ghɨghe e zûŋtə̀ pə̀ kə setsɨ̀ setsɨ̀, e sè nyi kə ə kàʼa ə nyayle yiə, è və zhə̀tə̀ sè wàmnə̀ sê chùmtè èpàm sə vəynse piə nə, “Ghàyn tɔ̂ʼnə̀ kûmə̀ ghɨə Falàsîə ghɨ̂yn ə kaŋkaŋa nə̂ ghɛ nyi, ndam tə ghənə̂tè njiə əfètə̂ ə̀ ghɨ kè kə fèsə̀ʼ njiə əfètə̂ àpayn ə kwaŋa. 2Ghàyn ke nə fɨake va ə kɨyte mə ə tə ŋaʼsə̂ va, kɨ̀sə ə ndəte ndô ə tə faŋa se kê. 3Naʼapi ghè vɛ ə ghàyn nyaʼtə piə ndô zôyn tə fɨə ə ndayn, ə tə tɔŋɔ naʼapi ghè vɛ ə ghàyn nyaʼtə tsɨ̂mtə̀ piə ezhɔyn.

Njisə̀s ə tsàyn wùə vɛ ə kyi sə̂ fânə̀ vəyn

(Matyò 10.28-31)

4M piə sê ghàyn ə soyn sɨmse nə, kə ghàyn ə fanə ghɨ ghɛ ə kàʼa ə zhwi ke àchaʼ ewiyn a wûəkè, pîza kyi va nâʼà èghɛ e tətə̂e se fɨnə nə̀yn èpam ətəyn. 5M nə̀ tsâ vɛ ə ghàyn kyi sə̂ fânə̀. Ghàyn pɨlə fânə̀ kə Fèzhə̀. Fe kyi atyaʼ se zhwi ə ghàyn, fɨyn kyi atyaʼ se ndə̀m ə ghàyn elùʼ ewùs. M tsâ sê ghàyn nə, ghàyn fânə̀ kə fəynfe!

6Piə ə pəʼlə̂ m̀nɨŋtə̂ m̀ tâyn kè sə fekɛ̂tə̀ nyi, pîza mə Zhə̀fè vâyn kàʼa fe lɛ̀sè nâʼà fèmɔ̀ʼ. 7Pîza, sê ghàyn Zhə̀fè ke ndô kɔ̂yn ə se nyuŋ kɛ ə ke nyi ə ghàyn atu. E za nyi nə ghàyn kyi va sə̂ fânə̀ kûmə̀ nə ghàyn nə̂ kɔʼnə̂ tsɛ̂ m̀nɨŋ me tsɨ̂əm̀.

(Matyò 10.32-33; 12.32; 10.19-20)

8M piə sê ghàyn nə, ə tyə̂nə̀ piə ndè ə ghɨghe əshi nə è nyi wùə vɨ̂m, ə Vâ wùə tə pɔŋ pomə ə tsì sə Fezhə̀sè əshi nə è nyi wùə vəyn. 9Pîza vɛ ə è mɛne mi ə ghɨghe əshi, ə Vâ wùə tə pɔŋ mɛne vəyn ə̂ tsì sə Fezhə̀sè əshi.

10Zhə̀fè tə lɛ̂sə̀ fo naʼapi ndè vɛ ə è pi ghɛ epize kûmə̀ Va Wùə, pîza ə è tàʼa lɛ̀sè ə fo wùə vɛ ə è pi ghɛ epize kûmə̀ Sezuʼ se Ŋwaʼase.

11Ə tə kyiə ndù è ghàyn ə ghɨ saʼaghe əshi ə ndɛ̂ atsɨ̀ynte, kə ghàyn nə kayn mbi nə ghàyn nə̀ piə nə ghe, kə ghàyn nə kayn naʼapi nə ghàyn nə̀ piə zayn zə, 12kûmə̀ nə Zuʼ se Ŋwaʼase nə̀ tsâ eghɛ zɛ kə ghàyn pi kè ashìŋə̀ nə kɛ.”

Ngàyn kûmə̀ wùə èghaʼâ ango

13Wùə vî əfètə̂ ànɔ̀yn nə kɛ ə piə sê Njisə̀s nə, “Tyə̀ynsè, pi sê ànyìə vɨ̂m nə è chyate fɨa vɛ pɨ̀a vâs tè zà sê ghàs, ə è fo vɨm.”

14Pîza Njisə̀s ə piə sê vəyn nə, “Nə mbɛ̀ ə vɨ̀yn, ə tè pâʼà chɔʼ mi nə m tyəm ə ghàyn ə fètəyn sə wùə èchyàtə,” 15ə fɨnə piə sê nɔ̂yn nə kɛ nə, “Ghàyn tɔ̂ʼnə̀ kûmə̀ əshi ə fɨə kûmə̀ nə ndam ə wùəe va ke kûmə̀ efɨa e tsɨə vɛ ə è kyi, ə kɔ̀ŋ ə è və kyi naʼapi zàyn.”

16Njisə̀s ə mɛ̀ ngàyn zɨ̀yn sê ghənə nə, “Wùə èghaʼâ viu tè kyi afûʼ mə fɨazhɨəve ə kɔʼ ətəyn nâʼà àchûŋ, 17ə pfɨfə kə sə və ngɨŋ nə, ‹M nyiə nə̀ ghaghè è fɨazhiə vɨnə, kyi va luʼ e ndəməve ə?› 18ə ke fɨnə piə kə sê ngɨŋ nə, ‹Mə kê ghɛ zɛ kə m nəyn. M nə̀ sâʼà sendɛ se fɨazhiə sɨmse ə m pɛ se ghaʼâsè ə m ndəm fɨazhiə nə vɨ̂yn naʼapi èkwə̀ vɨmve ətəyn 19ə m ke pi sê ngɨŋ zɨm nə, Tsɔ̀f àtu, ò se kyi efɨa e chûŋ se zhi nâʼà sə aghaf. Ò tsɔ̂ynsə̀ ndamə kə ndò. Ò zhiə, mɨə fɨnə saŋnə.› 20Pîza Zhə̀fè ə piə sê vəyn nə, ‹Ngo afɨa kyîke, ò nə̀ kwuə ndàyn ètuʼu. Ò nyiə nə̀ kwuə, ə zhi nde fɨa vɛ nə vɨnə?›”

21Njisə̀s ə wàmnə̀ mɨ̂sè nyi ə piə nə, “Ə̀ nyi nyiə kə ze nyi sê wùə vɛ ə è tuʼ ndəm fɨae sê ngɨŋ ə vəyn, kwənə va nâʼà èghɛ ə Zhə̀fè əshi.”

Zhə̀fè nə̂ tɔ̂ʼnə̀ è ghɔ vəynghe

(Matyò 6.25-34)

22Njisə̀s ə wàmnə̀ nyi ə ke pi sê chùmtè epàm sə vəynse nə, “M piə sê ghàyn nə, kə ghàyn nə kanə mbi kûmə̀ endam zayn. Kə wùə sê ghàyn ə kanə mbi nə e nə̀ zhiə ghè ə, kɨ̀sə è nə̀ maʼà ghè ə zhi ewiyn ə. 23Kûmə̀ nə ndam ə wùəe tsɛ̂ ndò fɨazhiəve, wiyn ə wûəvè e tsɛ̂ sendzɨs. 24Ghàyn fe kə ŋɔ̂ŋɔve ə. Ve zho tsɛ̂ va fɨazhiəve, kwiə va, kyi va fɨ̂ltè kɨ̀sə mtayn sə̂ zanə̂ èfɨa ətəyn, pîza Zhə̀fè e pfɨtê vəynve. Nâʼà ghàyn pâʼà fe nə ghàyn kɔʼnə tsɛ̂ ndò nɨ̂ŋmè ə? 25Ə̀ nyi nde ə ghàyn ə fètəyn ə è kàʼa è kwəynse tuʼm̀ ə vəyn ndam kûmə̀ nə è kyi efɨmsê ə? 26Ghàyn nyiə se nyi mə ghàyn vâyn kàʼa ghàyn nə̀yn ghɛlə̀fè nyiə kə fɨ̂nə mə, ə ghàyn ə kanə nâʼà mbi kûmə̀ əghɛ mɔ̀ʼɔ nə ghɨ̂yn kûmə̀ ghè? 27Ghàyn nayne ke kə ndwɔ̂ŋ azhìvè ndəmə kɔʼɔ fɨnə pusə̀ ə. Ve pâʼà tyəmə fɨ̂aʼà àfɨa kɨ̀sə se tas ə sendzɨs sə̂ maʼà. M piə sê ghàyn nə, naʼapi fɔ̀yn Sòlomùyn è ghaʼ zɛ ə è tè kyi nâʼà èkɨ̂m pâʼà tyəm laf tayn kə andâŋ amɔ̀ʼ əfètə̂ endwɔ̂ŋ nə vɨ̂yn. 28Ə̂ Zhə̀fè nyi kàʼa Fe lafse tayn èwə̂yn nyî mə ve nyi ndâyn mə ezhwisəʼə ə və nyi mə nyɔ̀ʼ ewùs, ə È tə tàʼa lafsə̂ tsɛ ghàyn nyiə mə mə? Ghàyn kyi epomə̂ e tətə̂ zè.

29Kə ghàyn fɨyn fɨmsê tèkwâʼtè taynte kûmə̀ nə ghàyn nə zhiə ghè, ə ghàyn mɨ ghe. 30Ə̀ nyiŋə əghɨə mbiə epàm efɨa nə vɨ̂yn, pîza Pɨ̀a vâynvè e ke nə ghàyn kyiŋə ndò fɨa nə vɨ̂yn. 31Ghàyn pɨl mɔ̀mse ke sə̂ ndamə kə ghɨ ghɛ ə nyi etîə esaʼ ə Fezhə̀e kə fe nə̂ fo kwəynse efɨa nə vɨ̂yn sê ghàyn.

(Matyò 6.19-21)

32Kə ghàyn ə fânə̀, nâʼàpî kə nɔ̂nə̀ faynfe tətə, kûmə̀ nə Pɨ̀a vâynvè ə kɔ̀ŋ se fo eluʼ əfètə̂ èfɔ̀yn ə vəynve sê ghàyn. 33Ghàyn pəʼle fɨa vaynve ə ghàyn fo kɛ ətəyn sê ghɨ afɨfə. Ghàyn fɛte shəyn saynse kə sə vayn kàʼa ə se pof kə ndəm ghaʼ zɛ ə wùə vâyn kàʼa è zhi mɨ̂sè ətəyn, ə ndəm ekwùtwəyn sê ghàyn, elùʼ vɛ ə wùchɔŋɔ vâyn kàʼa è tayn ətəyn se nji, mə shɔshɔʼve vâyn kàʼa ə ve tayn fu se kwɨlə pofse. 34Kûmə̀ nə luʼ vɛ ghaʼ zɛze nyi ətəyn, ə̀ nyi kepî fu kə təm ghɛ nyi.”

Chùmtè sə Njisə̀sè tè ndamə lɨmtə vəyn

35Njisə̀s ə fɨnə piə sê chùmtè epàm sə vəynse nə, “Ghàyn pɨate ngɨŋ saynse se nə̀ efɨ̂aʼ, ə ghàyn tyayn lâm saynse ə pfɨ̂tə̀ 36kə ghɨ e fɨaʼa ghɛ ə ghe lɨmtə pɛ̀ èfɨ̀aʼ ə̀ ghənə nə è kɛse kwɨlə̂ elùʼ ə malə̂ kə ghənə chɔʼ cho ndɛe nâʼà pi ashìŋə̀ kè kɛ ə è ngɔʼte. 37Ə pɛ̀ èfɨ̀aʼ kɛsə̂ kwɨlə̂ ə fe əghɨ fɨaʼa vəyn nə ghɨyn ghe kyâʼà, ə saŋnêzè ə nyi sê ghənə. M piə sê ghàyn səmɔʼ nə, kè nâʼà vəyn sə və ngɨŋ nəyn, ə ghənə tsɨsə elùʼ e zhiəe, ə è pɨaʼte ngɨŋ ə vəyn ə è tsɛ̂se fɨazhiəe sê ghənə. 38Ə è ndù se pə̀ pi ətəyn ə̀ shi kɨ̀sə ə nyi pi epɨsə̀pɨsə̀ ə fe ghənə e kyâʼà, ə saŋne eghaʼazè ə nyi sê ghənə! 39Ghàyn ke nə, ə pɛ̀ ndɛ ke shîŋə̀ kɛ ə wùchɔŋɔ nyi se pə̀ ətəyn, ə è tàʼa zà nə è pə̀yn kyim ndɛ̂ vəyn. 40Nâʼà ghàyn kyi sə̂ tsɨs naʼapi ashìŋə̀ àkè, lɨmtə̂ kepî zâ kûmə̀ nə Va Wùə tə kɛsə̂ pə̂ ashìŋə̀ kɛ ghàyn kwàʼtə̀ va nə è kàʼa è pə̀yn ətəyn.”

(Matyò 24.45-51)

41Pità ə pfɨfə sê Njisə̀s nə, “Pɛ̂pɛ, ò mɛ̀ ngàyn zɨ̀yn ke sê ghàs mə, mə ò mɛ̀ sê ghɨghe əkɨ̂m ə?”

42Pɛ̂pɛ ə pə̀ynsə̀ nə, “Wufɨ̀aʼa vɛ ə è zɨə pɛ̀ èfɨ̀aʼ ə̀ vəyn fɨnə tɔfə nyi vɨ̂yn? Ə̀ nyi vɛ ə pɛ̀ èfɨ̀aʼ ə̀ vəyn piə è ndùə èkwî, ə è ndəm vəyn əshi, ə è fo tyaʼa kə è və tɔ̂ʼnə̀ è ndɛ vəyn, fo efɨazhiəve sê ghɨ ashìŋə̀ kɛ ə ghənə kyiŋə ətəyn. 43Wufɨ̀aʼa ə̀təyn nə̀ nə̂ ə è və saŋnə̂ ashìŋə̀ kɛ pɛ̀ èfɨ̀aʼ ə̀ vəyn kɛse pə̀yn, è və nə̂ eghɛ zɛ ə è tè pi. 44M piə sê ghàyn səmɔʼ nə, ə ze kyàyn nyi ə pɛ̀ èfɨ̀aʼ nə vɛ ndəm vəyn nə è və tɔ̂ʼnə̀ èfɨa vəyn nâʼà èkɨ̂m. 45Pîza ə wufɨ̀aʼa nə vɨ̂yn tsɨsə ə kwàʼtə̀ kə sə və ngɨŋ nə, pɛ̀ èfɨ̀aʼ nə̀ ndamə tsɔ̀fə kə è kɛse kwɨlə, ə zhə̀tə̀ sə̂ pusə mmɨ̂ətə̀ me fɨ̀aʼam, pusə əghɔyn e ndômnə̀, pusə əghɔyn zəyn ghɛ ə ghe fɨ̂aʼà ə ndɛ, fɨnə zhiə tsɛ̂ andiŋ, mɨə m̀lɨ, m̀ ko vəyn, 46ə pɛ̀ èfɨ̀aʼ ə̀ vəyn tə kɛse pə̀yn tuʼfîfe, ashìŋə̀ kɛ ə è kwàʼtə̀ va nə è kàʼa è kɛse pə̀yn ətəyn, ə è fo ngəʼ sê vəyn nâʼà sə ŋaŋ, ə è fɨyn ndəm vəyn anɔ̀yn ə ghɨ̀ kɛ ə ke pomə va sê Zhə̀fè.

47Ə wufɨ̀aʼa se ke eghɛ zɛ ə pɛ̀ èfɨ̀aʼ ə̀ vəyn kyiŋə, ə tàʼa fɛte ə ngɨŋ ə vəyn se nə̀yn, ə pus vəyn nâʼà sə ŋaŋ. 48Pîza vɛ ə è ke va ə nə̀ eghɛ kə ə kàʼa ə pus vəyn sə ŋaŋ, ə pus kè vəyn se chə. Ə̂ fo naʼapi sê ndè setsɨ̀, ə kɛsə̂ kyiŋə kepî nə è fo setsɨ̀. Ə samse nâʼàpî sê ndè setsɨ̀, ə kɛsə̂ kyiŋə kepî se fi sê vəyn setsɨ̀.”

Njisə̀s pi nə e pə̀yn è chyâsèzè

(Matyò 10.34-36)

49Njisə̀s ə piə sê chùmtè epàm sə vəynse nə, “M pə̀yn se kwà ewùs əfètə̂ ə̀ghɨ̀. Ndè fo ə və sè pɛ̂! 50M kyi se kyiə mtsəfle sə shi. Ghɛ ətəynze e fo ngəʼ sê mi nâʼà sə ŋaŋ, m tsə̂mə̀ nə m̀ pə̀yn tsɛ! 51Ghàyn kwàʼtə̀ nə m pəyn fâ ə chi se nə̀yn nə ghɨghe ə ndamə è pɔ̂ynè ə? E va chiza. M pɨl pə̀yn è chyâsèzè. 52Se zhə̀tə̀ zôyn, sas ə ndɛ zɛ ə ze kyi ghɨghe ətəyn ə tâyn nə̀ chyâsə̀, ə ghɨghe ə ta ə nô əghɨ ə̀ pɛ̀, ghɨghe ə pɛ̀ e nô əghɨ ə̀ ta. 53Ghənə nə chyâsə̀, ə pɨ̀a ə nô yî vâ ə̀ vəyn ve ndômə̀, nyì e nô yî vâ vəyn və èzhɔyn, nyìə ndom e nô yî zhwiə vayn.”

Se fe kê ashìŋə̀

(Matyò 16.2-3)

54Njisə̀s ə se pi sê ghɨghe əkɨ̂m nə, “Ghàyn fe kə̂ mbàʼsè fɨə kɔʼɔ apàs kɛ ə zhwie sâŋà ətəyn, naʼapi ashìŋə̀ àkè, ghà piə nə ghol zɛ ə ze pə̂, ze ə pə̀ kə zâ, 55fɨnə zɨə kə̂ fofa fɨə pə̀ ndomve apàs etyə̀ke, kè sə ashìŋə̀, ghà piə nə tɨ̀mà nə̀ nə̂ ə kə nyi, ke nyi ke zâ. 56Ghàyn ghɨ ghɨ̀nə̀ ə ghàyn kaŋkaŋa nə̂ ghɛ nyi! Ghàyn ke sə̂ fɨə tyəmə naynə̂ kə àpɨəyn, ghà tsà eghɛ zɛ ə ze nyi se kyàyn, ze ə kyànə̀ kə zâ. Kûmə̀ ghè ə ghàyn fe kê va ghɛ ghɛ ə Zhə̀fè nə̀ zo ə?

(Matyò 5.25-26)

57Pɔ̀m ghè ə ghàyn fe kê va sə̂ ghàyn ngɨŋ nə ghàyn kyi sə̂ nə̂ eghɛ èchûŋ èkè e? 58Ə wùə nji ghò, ndùə è ghò elùʼ ə saʼ, o mɔ̀msə̀ nə ghâyn vəyn pɨaʼte endom, polə zâ, ə è nji ndù è ghò sê wùə sèsaʼ, ə è saʼ ghò ə è fo ghò sê wùə vɛ ə è fà ghɨghe ə chaʼ, ə è ndəm ghò ə ndɛ̂ chaʼ. 59M piə sê gho nə, ə̂ e kyàyn zâ, ə ò faŋ ke fu ə ndɛ̂ chaʼ se zaʼâ kə ò ndaʼ mɨ̂sè èkɛ vɛ nâʼà èkɨ̂m.”

Currently Selected:

Lûk 12: bfm

Highlight

Copy