Njɔyn 13
13
Njisə̀s ə shù gholə chùmtè èpàm sə vəynse
1Ə̀ tè faŋ fetuʼ kə ə zhi Zaʼatsɛze, mə Njisə̀s se ke ndò nə shîŋə̀kè ə kwəyn kə È ndo fâ mbi ə È ndu sê Pɨ̀a Vəyn. È tè nyîə kɔ̂ŋɔ̀ ə̀ghɨ ə mbi ghɛ ə ghe tè pomə sê Vəyn, È və tyə̀ynə̀ èkɔ̂ŋ ə vəyn sê ghənə se nduə fɨ ə kwùŋse.
2Ə nə̀ kwɨlə̂ sè zhiə ashìŋə̀ ezhwikwɨləke, ə̀ nyi zâ mə ndə̂plè ə fo kwâʼtè epize sê Njondàs Èskalɔ̀t, ə va Shimùyn, nə è pəʼle Njisə̀s. 3Njisə̀s tè nyîə ke nə Pɨ̀a ə fo tyaʼke sê zhi etûə èfɨa èkɨ̂m. È ve ke kepî nə zhi ndo pə̂yn se Zhə̀fè, kɛsə̂ ndûə se Zhə̀fè. 4Ə pə̀ kə ghənə sè zhiə fɨazhiəve, Njisə̀s ə ndwìə etuə alaŋ əzhike, ə chɔʼɔ sèndzɨs sə vəyn sə pɨəynse ə kolə̂ tawùlə̀ ə və chɨ̀ŋə fèkò, 5ə tutə m̀mo akaŋ ə shuə nə ewìynke, sè shûə ə̀ghol ə chùmtè èpàm sə vəynse ətəyn, zə̂sə̀ è tawùlə̀ zɛ ə è tè kol za ə və chɨ̀ŋə fèkò. 6Kə È pə̀yn sê Shimùyn Pità, Shimùyn ə pfɨfə sê vəyn nə, “Ò kyiŋə se shùə əghol ghɨmghe ə Pɛ̂?”
7Njisə̀s ə pìə sê vəyn nə, “Ò vayn kàʼa ò ke ghɛ zɛ ə m nə̂ zôyn, pîza, epàm əghɛ nə ghɨ̂yn ə ò nə kê.”
8Shimuyn Pità ə kwiynsə̂ ə pìə nə, “Ò nə shuə va ghol ghɨmə nâʼà tuʼ fife.”
Njisə̀s ə pìə sê vəyn nə, “Ə M va se shù əghôl ghɛ, ə o fɨyn va chùmtè èpàm zɨ̂mzè.”
9Shimuyn Pità ə ke pì nə, “Ə zho e nyi za ə Pɛ̂, kə ò shu ke ə̀ghol ghɨmə, shuə kəpî gho ghɨmə è tu kɨmke!”
10Njisə̀s ə pìə nə, “Pindè vɛ ə è nyi mə è və kàynè shu wiynve, è fɨyn kyi va se shùə ewiyn ekɨ̂m, ə̀ tsɛ̂ kə va gholə. Ghàyn nyîə zo zôyn, pîza zo va əkɨ̂m.” 11Njisə̀s tè nyiə kâynè ke wùə vɛ ə è nə̀ pəʼlə vəyn, ə̀ za nyi eghɛ zɛ ə è tè pi nə, ə̀ vachi ə̀ghɨ ə̀kɨ̂m kə ə zo.
12Ə pə̀ kə Njisə̀s shù mɨ̂sè ghol ə ghənə̂ghè, ə kɛsə̂ mâʼà sèndzɨs sə vəynse, ə ndùə tsɨsə̂ ə Vəyn ə fekyə̀. Ə ke pfɨf sê chùmtè èpàm sə vəynse nə, “Ghàyn ə kê ghɛ zɨ̂nə̀ ə m nə̂yn sê ghàyn ə? 13Ghàyn tɔŋtə̂ mi nə tyə̀ynsè, fɨnə tɔŋtə̂ nə Pɛ̂pɛ, e nyi ke nâʼà səmɔʼ kûmə̀ nə ə̀ lote nyi àfɨa kɛ m nyi kəynke. 14Ə Mi vɛ M nyi Pɛ̂pɛ è Tyə̀ynsè vâynvè ə kwùʼtè shu ghol ghanə, è za nyi nə pîndè ə ghàyn ə fètəyn kyi sə̂ shûə ə̀gholə ànyì vəynghe. 15M za tyə̂yn chwìə sê ghàyn kə ghàyn ə nə̂ kə kə m nə̂yn. 16M pîə sê ghàyn səmɔʼ nə wùə èfɨ̀aʼa pâʼà tyəmə̂ tsɛ̂ pɛ̀ èfɨ̀aʼ ə vəyn, ndùətom e tsɛ̀ va wùə vɛ ə è tom vəyn. 17Zôyn kə ghàyn ke səmɔʼ, pɔsê nə̀ nə ə zə nyi sê ghàyn ezhoghɛ ə ghàyn nə̀ nyiəmə!
18M wàmnə̀ va kûmə̀ ghàyn ə̀kɨ̂m. M ke ndô ghàyn ghɛ ə m chitê ndə̂m. Pîza, ghɛ zɛ ə nyâʼ ə Ŋwàʼlè ə̀ Fèzhə̀ kyi se pə̀yn səmɔʼ. Ə və nyaʼ nə, ‘Wùə vɛ ə è zhiə kɨŋnə ghasè vəyn, nyi mə è və fɨ̀l tsɨ̀m sê mi. 19M tsâ ə̀ghɛ nə ghɨ̂yn sê ghàyn zôyn, ze pa tsɨs se kyàyn, kə e nə̂ kyayn, ə ghàyn pomə nə, ‘M Nyi Wùə Vɛ M Nyi Vəyn.’ 20M pîə sê ghàyn səmɔʼ nə, ə̂ fi ndzɨse pîndè wùə vɛ ə m tom, ə ə̀ nyi mə è fi ndzɨsê mi, ə̂ fiə ndzɨsə̂ pîndè mi, ə ə̀ nyi mə è fi ndzɨsê vɛ ə è tom mi.”
Njisə̀s ə tsàyn nə ə nə̀ pəʼlə̂ zhi
(Matyò 26.20-25; Mâk 14.17-21; Lûk 22.21-23)
21Ə pə̀ kə Njisə̀s pì ghɛ nə ghɨnə nyi, kwàʼtè ə vəynze e fo ètsôs sê vəyn nâʼà sə ŋaŋ. È və ke piə paynsê sê chùmtè èpàm sə Vəynse nə, “M pîə sê ghàyn səmɔʼ nə wùə èmɔ̀ʼ nyîə nyi ə ghà əfètəyn, nyi se pəʼlə mi.”
22Chùmtè èpàm sə vəynse tè nyi èkaynze, kyì e naynə kyì kaynə nə è wàmnə̀ kûmə̀ ndè ə. 23Chùmtè èpàm ə̀ Njisə̀s zhîzè emɔ̀ʼ vɛ ə è tè kɔ̂ŋɔ̀ sə nɨŋ e tsɨs paʼsê sê vəyn. 24Shimuyn Pità ə wàmnə̀ sê vəyn è shiə, nə è pfɨf sê Njisə̀s nə è wàmnə̀ kûmə̀ ndè ə.
25Chùmtè epàm nə zɛ ə kɨŋtə̂ paʼsə̂ ndûə ə Njisə̀s ə ngwùŋ ə pfɨfə nə, “Ò pîə ndè ə Pɛ̂?”
26Njisə̀s ə pìə nə, “M nə̀ tsɨ̂ə àpayn ə kwaŋ kɨ̂yn e mbàs ə m fo sê wùə vɛ ə m wàmnə̀ kûmə̀ vəyn.” È və wàmnə̀ zâ ə tsɨ̀ə fo sê Njondàs, ə vâ Shimùyn Èskalɔ̀t. 27Kè kə Njondàs fi mɨ̂sə̀ pə̂yn payn ə kwaŋ ətəynke nyî, Satàyn ə njiə mɨ̀sə̀ kə ndò ə vəyn ewìyn. Njisə̀s ə pìə sê vəyn nə, “Zàŋse nə̀yn ghɛ zɛ ə ò kyiŋə se nə̀yn.” 28Pîza wùə fumə ə ghənə fètəyn ghɛ ə tè zhiə ə tàʼa kê nə Njisə̀s tè wàmnə̀ sê vəyn kûmə̀ ghè ə. 29Kə ə̀ tè se ndə̂mə̀ Njondàs èkɛve, chùmtè epàm sə Njisə̀s shîse e sè kwâʼtə̀ kə nə è pìə nə Njondàs zhɔyn fɨa vɛ kə tuʼve zo, ə zhi etuʼ azhi ezaʼa tsɛve ətəyn, ə̀ va zâ ə è və pîə nə è fo kɛve sê ghɨ afɨfghe.
30Njondàs ə fiə àpayn ə kwaŋ kɛ sê Njisə̀s kè sə ashìŋə̀, ə fɨə ndûə alɨm.
Njisə̀s ə fo saʼe feze
31Ə̀ tè nyi kə Njondàs fɨ ndû zâ, Njisə̀s ə ke pì nə, “Shîŋə̀kè ə kwəyn kə ə fe tyaʼ ə Va Wûəkè. Ə fɨyn fe kepî èpomsê ə Fezhə̀zè tɔynə̂ ə Vayn. 32Ə Zhə̀fè fi pomsêzè tɔynə̂ ə Vayn, ə Zhə̀fè è ngɨŋə̂ Vəyn nə nəyn nə ə fe pomsə Vaynze. Zhə̀fè nə̀ nə̂, ə ghɛ nə zɨ̂nə̀ zaŋse kyayn. 33Ghɔnyì ghɨmə, M fɨyn va sə̂ nyi ghâsènì sə aghaf. Ghàyn nə̀ kyiŋə mi mɔŋ, pîza M tsâ sê ghàyn zôyn, kè eghɨ kə m se nyi mə mə tsàyn sê ghɨ atyaʼa Njûsə̀, ə̀ nyì kepî za kə M tsâ sê ghàyn nə ghàyn vayn kaʼa ndu elùʼ vɛ ə M ndûə ətəyn 34M fo èsaʼ e feze sê ghàyn zôyn nə ghànə kɔ̂ŋɔ̀ sèngɨŋ saynse. Kè kə M kɔ̂ŋ ghàyn, ghàyn e kɔ̂ŋɔ̀ kəpî sèngɨŋ saynse. 35Ə ghàyn kyi kɔ̂ŋ sê wùə èmɔ̀ʼ emɔ̀ʼ, ə nâʼàpî ndè ə ke nə ghàyn nyi sechùmtè èpàm sɨmse.”
Njisə̀s ə tsàyn nə Pità nə̀ mɛnə̂ zhi
(Matyò 26.31-35; Mâk 14.27-31; Lûk 22.31-34)
36Shimuyn Pità ə pfɨfə sê Njisə̀s nə, “Ò ndùə ghayn ə Pɛ̂?”
È və pə̀ynsə̀ nə, “Ò vayn kàʼa ò ndu elùʼ vɛ ə m ndûə ətəyn zôyn, pîza nyi se nə chùmtə pə̀yn.”
37Pità ə pfɨfə sê vəyn nə, “M vayn kàʼa m chumte ghô zôyn kûmə̀ ghè ə Pɛ̂? M kaʼa kwu kûmə̀ ghò.”
38Njisə̀s ə pfɨfə nə, “Ò kàʼa ò lote kwu kûmə̀ mi ə? M pîə sê ghò səmɔʼ nə ndom ə̀ mbvɨ nə̀ pîə è tɔŋɔ ndò, mə ò mɛ mi shîŋə̀ teta.”
Currently Selected:
Njɔyn 13: bfm
Highlight
Share
Copy
Want to have your highlights saved across all your devices? Sign up or sign in
©2022 CABTAL
