Njɔyn 12

Mèli ə kɨmnê Njisə̀s ə Petanì

(Matyò 26.6-13; Mâk 14.3-9)

1Ə̀ tè faŋ ke m̀tuʼ mtufə kə tuʼ me Zaʼâ tsɛ̂m zhəte, Njisə̀s ə ndùə ə Petanì, ə nyi tə̀ʼ ə̀ ghə̀ Lazalùs vɛ ə è zòmsè zâ. 2Ə kwùynə̀ èfɨazhiə sê Njisə̀s, Maltà ə tsɛ̀sə̀ vəynve. Lazalùs tè nyi wùə èmɔ̀ʼ əfètə̂ ə̀ghɨ̀ ghɛ ə tè tsɨs etûə àlaŋ zhiə yî ghə̀ Njisə̀s. 3Mèli ə njìə fèmbùʼtə̀ fə mngwɨl mə èlɨ̀mtə̂m, m lɨ̂mtə̀ tsɔ̂fə̀ kə nyî, tɛ èkɛve nâʼà àchûŋ. Ə tè fɛte mngwɨl mə təynmè è nât.#12.3Nât:Nât nyi flawà mə è kyi azuʼə̀ chûŋkè mə ə fɛtə̂ m̀ngwɨl me lɨ̀mtə fɔmə̂m ətəyn. Ə kɨmnə̂ ə Njisə̀s əghòl ə zə̂sə̀ è nyuŋ sə atu sə vəynse. Zuʼə̀ mngwɨl ətəynke ə lɨ̀mə̀ kə ndɛ èkɨ̂m. 4Chùmtè èpàm ə̀ Njisə̀s zhî zɛ ə tè tɔŋtə nə Njondàs Èskalɔ̀t, ə nyi kepî vəyn vɛ è tè nyì se pəʼlə Njisə̀s, ə pìə nə, 5“Pɔ̀m ghɛ̀ ə fe tàʼa pəʼlə mngwɨl mɨ̂nə̀ se fo ekɛ təynve sê ghɨ afɨf ghe ə? Ə fe kàʼa pəʼle ngwɨl mətə̂m ekɛ mə nyi ndàʼa wùə ətəyn sə pîŋ èfɨ̀plè” 6È tè paʼà wàmnè nyi kûmə̀ nə è tè kyi èkwâʼtè se tɔ̀ʼnè è ghɨ afɨfə. Ə̀ tè nyi kûmə̀ nə è tè nyi wùə chɔŋɔ, ə̀ ndə̂mə̀ vəyn shəyn èkɛ, faŋa va se njiə vîve ətəyn se nə̀yn eghɛ vəynze kɔ̀ŋzè ətəyn.

7Njisə̀s ə pìə nə, “Ghàyn za ke wùzhɔyn vɨnə nyî!, È tè ndə̀mə̀ mngwɨl nə mɨ̂yn se tə kɨmnə mi etuʼ vɛ ə pfɨ̂mə̀ mi ətəyn. 8Ghàyn nə ndam kyi ke ndò ghɨ afɨfə ə ghàyn əfètəyn, pîza m nə zâŋsè va ghâsènì.”

Ə pɨaʼtə se zhwiə Lazalùs

9Ghɨ Njûsə̀ ə tsɨə ghə zɨə nə Njisə̀s nyi ə Petanì, ə ndò ndûə fu se fe vəyn, se fɨnə fe Lazalùs kə̂ è zòmsè za. 10Ghɨ kɔʼsə nə eshyə̀ ə ngaŋtəghe e sè nə̂ epɨaʼtê se zhwiə Lazalùs, 11kûmə̀ èghɛ zɛ ə ze kyâyn sê Lazalùs, ghɨ Njûsə̀ setsɨ̀ tè tə ghənə, pomə̂ kə sê Njisə̀s.

Njisə̀s ə nji ə Njèlusalɛ̀m kə Fɔ̀yn

(Matyò 21.1-11; Mâk 11.1-11; Lûk 19.28-40)

12Tuʼve ə pɨsə̂ zo, nɔ̂yn ə tsɨə kɛ ə ke pə̀yn se zhi ezaʼa tsɛze ə zɨə nə Njisə̀s pə̀ ndò ə Njèlusalɛ̀m, 13ə kyəmtə̂ èchɔ̂ ə fɨə ndûə è vəynve se kotə vəyn endom, pɨa pîə ndûə nə, “Òsanà! Pɔsêzè nyì sê vɛ ə è pə̀ ə Pɛ̂pɛ ezə. Pɔsêzè nyì sê fɔ̀ynə̀ ghɨə Isìlâyghè!”

14Njisə̀s ə kyiŋə vâ njàkâs ə kɔʼɔ ətu sè pə̂, kè kə nyi mə ə nyàʼ ə ŋwàʼlè ə̀ Fèzhə̀ nə:

15“Kə ghàyn fayn ə ghɨ endaʼ ə Zayɔ̀nə̀.

Fɔ̀yn vâyn vɨ̀yn ə è pə̀,

kwîə etûə va njàkâs.”

16Ə̀ tè nyì kə ghɛ nə ghɨyn kyàynə̀, chùmtè èpàm sə Njisə̀sè e fe kê va. Pîza kə Njisə̀s zòmə̀, ə kɛse ndùə elùʼ epomsə ə vəynve, ghənə ə ke Pɨ̀əytè nə ə̀ nyi əghɛ mə ə tə nyàʼ kûmə̀ vəyn nâʼà ə̀kɨ̂m, ghɨghe ə fɨnə nə̂ kə za sê vəyn.

17Ə̀ tè nyi zâ, mə nɔ̂yn ə ghɨ kɛ ə ke tè nyi yî ghə̀ Njisə̀s kə È tè tɔŋɔ fɨse Lazalùs eshyə̀ ə zòmsə̀ vəyn, ə ndò ə waŋə ndûə èghɛ zɛ ə ze kyâyn. 18Ghɨə tsɨə ghe ə fɨə se kwəynê yîghə̀ Njisə̀s kûmə̀ nə ghənə tə zɨ nə ə nyi əghɛ kayntə ghɛ ə È nə̀yn. 19Ghɨə Falàsîghè e sè pîə kə sê wùə èmɔ̀ʼ emɔ̀ʼ nə, “E za tyə̀nə̀ nə ghɛ zhîze fɨyn va kə ghâsènì nəyn. Fe kə mbi èkɨ̂m sè ndûə kə ə vəyn epàm ə!”

Njisə̀s ə tsàyn nə ə nə̀ zhwiə Zhi

20Ghɨ Nglêk yîghe tè nyì kepî əfètə̂ ghɨ̀ ghɛ ə tè ndù ə Njèlusalɛ̀m se ngɨmnê ə Fezhə̀ ashîŋə̀ azhi ə zaʼâ tsɛke 21Ghənə ə pə̀ sê Filìp, ə nyi wùə èndaʼ Pètsayndà, mə è ndò pə̂yn apàs endaʼa Ngalìlîkè. Ghənə ə pìə se vəyn nə, “Pɛ̀ apɨəyn, ghàs kyiŋə se fe Njisə̀s.”

22Filìp ə ndùə tsâ sê Andɨ̀lò, ghənə ə pɛ̀ ə ndùə tsâ sê Njisə̀s. 23Njisə̀s ə pìə sê ghənə nə, “Shîŋə̀kè ə kwəyn zôyn kə Zhə̀fè ndwise kɔyn ə Vâ Wûəkè ekwùtwəyn. 24M pîə sê ghàyn səmɔʼ nə, ə tàʼa zho eshi ə ngwàʼ ə̀ sɔ̀f zə chi nə ze kwu, ə ze faŋ ke sə ngwàʼ. Pîza, mə ə zho, ə ze kwu tsɔ̀fə kə e mu shiə sɔ̀f ə tsɨəghe. 25Ghɨ ghɛ ə kɔ̂ŋɔ̀ ndam ə ghənə̂zè nə Njîsə̀ zəynze, ghɨ ghɛ ə pânə̀ zə ghənə̂zè nə endam fa mbi, ə tə ndam èndam zɛ ə ze tə mîə va. 26Ə̂ fɨaʼà pîndè sê Mi, ə è və kyi se chùmtə mi kə luʼ vɛ m nyi ətəyn, ə wufɨ̀aʼa vɨ̂m ə pɔŋ nyi fu. Pɨ̀a vɨm nə̀ fo èmâʼte sê wùə vɛ è fɨ̀aʼa sê mi.”

Njisə̀s ə wàmnè kûmə̀ èkwu ə vəynze

27Njisə̀s ə fɨnə pîə nə, “Zôyn nyî, kwâʼtè zɨmze nyîə fo ètsôs sê mi nâʼà sə ŋaŋ, m ke va nə m piə nə ghe, ‘Pɨ̀a vɨ̂m, m kaʼa m pi nə kə Ò pomə nə ngəʼ zɨ̀nə pəyn sê Mìə? Pîza ə̀ nyi kûmə èghɛ nə zɨnə mə ə M tè pəyn, kə M tə tsɛ tɔynê fa ashìŋə̀ ə ngəʼ kɨ̂yn. 28Pɛ̂! tyə̀yn pomsêzè sê zə zɛze.”

Kè nyi, kyə̀ ə fɨ ekwùtwəyn ə pìə nə, “M se nyi mə mə tyə̀n pomsê zɨmze, nyi se fɨnə tyə̀ynə kwəynsê.”

29Nɔ̂yn ə ghɨ kɛ ə ke tè tyəm fu ə zɨə kyə̀ ətəyn, yîghe e pîə nə ə̀ pɨa eghol, yîghe e piə nə ə̀ wàmne tsì sê Vəyn.

30Pîza, Njisə̀s ə pìə sê ghənə nə, “Kyə̀ zɨ̀nə pâʼà wàmnè se tsàmtè ə mi, è wàmnè se tsàmtè ə ghàyn. 31Shîŋə̀ kə pə̀yn kə Zhə̀fè saʼ mbi zɨ̀nə̀, ə tyaʼa fɔ̀yn vɛ ə è saʼa mbi zɨnə pfɨ. 32Ə nə̀ kɔʼsə̂ mi ekwùtwəyn, ə m tɔŋɔ nâʼà ə̀ghɨ ə̀kɨ̂m, ə ghe pə̀yn sê mi.” 33È tè wàmnə nyi se chwìtè ekyì ekwu zɛ ə è nə kwuə.

34Nɔ̂yn əghɨ̀ kɛ ə ke tè nyì fu ə pə̀ynsə̀ vəyn nə, “Saʼ zasze zaʼlə̂ nə vɛ ə chɔʼ ndə̂m kyi se ndamə faŋ, Ò kwì zayn sə̂ pîə nə, ə kyi se kɔʼsê ə Vawùə ekwùtwəyn ə? Va Wùə nə vɨnə nyi nâʼà ndè?”

35Njisə̀s ə pìə sê ghənə nə, “Ə ghàyn fe pa kyi epayn kè sə fendiŋə̀ fə ashìŋə̀fè nyî, ə ghànə kwîə, luʼte e pa panə, kə lɨma nə̂ ka ghàyn. Ə wùə kwìə alɨm, ə è və fe kê va nə e ndùə ghaynze ə? 36Ghàyn pomə sê payn, kə ze pa nyi ə ghàyn əfètəyn kə ghànə nyi əghɔyn epanə.”

Ghɨ Njûs ə tsɨə ghə tə nə ghənə pomə̂ va sê Njisə̀s

Njisə̀s ə wàmnə̀ ə̀ghɛ nə ghɨ̂yn ə ndùə ndə̂tə̀ ngɨŋə̂ Vəyn sê ghənə. 37Pî kə nɔ̂yn ə ghɨ̀ nə kɨ̂yn tè fe ghɛ kayntə ghɛ ə Njisə̀s tè nə̂ ə̀kɨ̂m, ghənə ə tàʼa pa pomə̂ sê Vəyn. 38Zɨnə mə tè kyayn se lwiynsê əghɛ ghɛ fɨ̀aʼtè Èsayà tè pi nə:

“Pɛ̂, ə̀ pomə nde tom zɛ ə ghàs tsà?

Ə̀ nyì sê ndè ə Pɛ̂pɛ tyə̂yn paynse tyaʼa Vəyn kə?”

39Ghənə tè vayn kaʼa pomə kûmə̀ nə Èsayà ə tə pì elùʼ vîve nə:

40“Zhə̀fè ə nə̀yn, ghənə ghe fôf

ə fɨnə tɛsə̂ ə̀təm ə ghənə̂ghè kə shiə ghənə̂ ghə fe va, kwâʼtè tə ghənə̂tè e zɨə kê va, ə ghənə fɨyn va se pə̀yn se Mi, kə M tsuʼ ghənə.”

41Èsayà tè piə əghɛ nə ghɨ̂yn, kə è tè se nyi mə è və fe pomsê ə Njisə̀szè, ə wàmnə̀ kûmə̀ Vəyn.

42Nâʼà pîza, ghɨ ə chisə è ghɨ Njûs yîghe ə pomə sê Njisə̀s, tsɨ̀ə kə nyi, pîza ə tàʼa fɨ ə ndayn kûmə̀ nə ghənə tè fànə nə ə fɨ, ə ghɨə Falàsîə chum ghənə ə ndɛ̂ atsɨ̀ynte. 43Ghənə tè nyîə kɔ̂ŋɔ̀ nə ghɨ ghə tsɨ̂tə̀ ghənə tsɛ̂ kə ə tsɨ̂tə̀ Zhə̀fè.

Njisə̀s ə pì nə ə tə saʼa ə̀ghɨ tɔynə̂ ə Vəyn ewàmnè

44Njisə̀s ə fɨnə pîə nâʼà è kyə̀ è tɛ nə, “Ə̀ pomə pîndè sê mi, ə ə̀ nyi mə è və pomə̂ kepî sê wùə vɛ è tom mi. 45Ə̀ fe pindè mi, ə ə̀ nyi mə è və fe kepî wùə vɛ è tom mi. 46M pəyn ə mbi kə epayn kə nâʼàpî ndè vɛ ə è pomə sê Mi tàʼa faŋ alɨm. 47Ə ghɨə zɨ tom Zɨ̂mzè ə tàʼa ndə̀mə zɨ̂ynzè, M tə tàʼa saʼa ghənə. M tè paʼà pə̀yn chi se saʼa mbi, pîza se pɨlə sɔzà ə ghɨ mbighe. 48Ghɨ ghɛ ə tə Mi, ə tàʼa pomə tom zɨ̂mzè, nyîə kyi wùə vɛ ə è tə saʼa ghənə. Ghɛ ghɛ M nyi mə mə wàmnè tə pə ə nyi ə̀ghɛ ghɛ ə tə saʼa ghənə ətəyn etuʼ ekwuŋsəve. 49Zɨnə nyì səmɔʼ kûmə̀ nə M tè paʼà wàmnè ə Mì atyaʼ pîza Pɨ̀a vɛ ə È tom Mi nyîə tsâ èghɛ zɛ M kyi se pì. 50M ke ndô nə nâʼà pî ghè vɛ ə è tsàyn nə M pi nyîə pə̂ èndam zɛ ə ze tə mîə va. E za nyi nə ghɛ zɛ M pîə nyi eghɛ zɛ ə Pɨ̀a nyi mə È və tsàyn nə M pi.”

Currently Selected:

Njɔyn 12: bfm

Highlight

Copy