Ətefɨ̂aʼ 4

Ə kyî pə̀yn è Pità yî Njɔyn elùʼ ə saʼ

1Pità yî Njɔyn tè pa wâmnə̀ sê ghɨ, ghɨ kɔʼsə nə eshyə̀ Ndɛ̂ ètsə̀mə yîghe, è tuə se sokə̀ʼ kɛ ə ke tè fɨ̀aʼa ə ndɛ̂ Fèzhə̀, è ghɨ Sandùsî ə mɔ̀ʼɔghe, ə pə̀ elùʼ vɛ ə ghənə tè nyi ətəyn. 2Ghənə tè pə̀ zâ nyɔ̂ʼsə̀ ètɔŋ kûmə̀ nə Pità yî Njɔyn tè zaʼlə sê ghɨ nə Njisə̀s ə zòmə̀, ze tyə̂nə̀ nə ghɨə ghɛ ə nyi mə ə kwu tə zômə̀. 3Ghənə ə pə̀ kyîə Pità yî Njɔyn ə ndùə fâ ə ndɛ chaʼ. Kə lɨma tè kàyne nyi mə kə fɨ̀m, ghənə ə faŋə fu se zaʼâ kə tuʼve zo. 4Pîza ghɨ tsɨə ghɛ ghe tè zɨ ghɛ ghɛ ə Pità yî Njɔyn tè zaʼlə, ə pomə, nɔ̂yn ə ghɨə poməke ə kɔʼɔ zaʼâ ndùə kam setâyn.

5Tuʼve ə zo, tuə ə ghɨ Njûskè, è tyə̀ynsè sə esaʼse, è chəʼse ə zùŋtə̀ ə Njèlusalɛ̀m. 6Anàs ə wùə èkɔʼsə nə èshyə̀ engaŋtə kwəynə, è Kayfàs, è Njɔyn, è Àlɛ̀ksandà kèpi è ghɨə mɔ̀ʼɔ etɔ̀ŋ ə ndɛ̂ ə̀ wùə èkɔʼsə nə tè shyə̀ engaŋtə kwəynə tè nyì fumə. 7Ə njìə pəyn è Pità yî Njɔyn ə piə nə ghənə tsɛ̀ tyəm ə ghɨghe əshi, ə pfɨfə sê ghənə nə, “Ghàyn kwì zayn se tsuʼ ə kèngɛchi kɨ̀nə? Ə nyi atyaʼ àkè è zə nde ze ə ghàyn tsuʼ vəyn ətə?”

8Ə̀ tè nyi za Pità e nyi mə è və lwiyn è Zuʼse Ŋwaʼase. È və pə̀ynsə̀ sê ghənə nə, “Ghɨə chisəghe è chəʼ sendaʼse, 9Ghàyn tɔŋɔ ghàs fâyn se saʼa ghàs kûmə̀ chùŋ zɛ ə ghàs nə̀yn sê kèngɛchi kɨnə̀ è kɨsè kə tsuʼ və ə? 10Ghàyn ghɨ Isìlâyghè, ghàyn e ke nə wùə vɨ̂yn ə è tyəm ə ghàyn əshi tɛ kûmə̀ àtyaʼ ezə ə Njisə̀s Klâys və Nazalɛ̀tkè. Ə̀ nyi Vəyn vɛ ə ghàyn tè paynte awâmnè, È və kwuə, pîza Zhə̀fè ə nə̂, È və zòmə̀. 11Njisə̀s nə vɨ̂yn tè nyi wùə vɛ ə Ŋwàʼlè ə̀ Fèzhə̀ tè pìə ghɛ ghɨnə kûmə̀ Vəyn nə:

‹Chi zɛ ə ghɨ pomə tè làŋ mâʼà,

zə kɛse sə èchi epòlə̀ ə ndɛze.›

12Ə̀ nyì ke Vəyn ènɨŋ ə È kàʼa ə È sɔza ə̀ghɨ, kûmə̀ nə Zhə̀fè pâʼà fɨyn fo wùə vîvè ə mbi kə è kàʼa ə è sɔza ghâsènì.”

13Pità tè wàmnə̀ zâ, ghɨ nə ghɛ ə fe ə̀təm atyaʼ ghɛ ə yî Njɔyn tè kyi ə fɨnə fe nə ghənə nyi ke ə̀ghɨ ndaʼa, ke pîva ŋwàʼlè. Ghənə e sè nyi è kaynze ə ke fe səmɔʼ nə, Pità yî Njɔyn nyi əghɨ mə ə tè kwiə yîghə̀ Njisə̀s shîŋə̀ tekɨ̂m. 14Ghənə tè fɨyn kyi va ghɛze se pì kûmə̀ nə wùə vɛ Pità yî Njɔyn tè nəyn è və tɛ tè pa tyəm paʼsə̂ kə ghənə ə ngwùŋ. 15Ghənə ə pìə nə ghənə ndo fɨ fuə ndɛ ə̀saʼ. Ə pə̀ kə ghənə fɨ, ghənə ə zhə̀tə̀ kâ ə̀ghɛ, 16pfɨfə nə, “Ə nyiə nə̀ gha nâʼàghè è ghɨ ghɨ̀nə? Nâʼàpî ndè ə Njèlusalɛ̀m se ke ndò ghɛ ekayntə eghaʼâ zɛ ə ghənə nə̂yn. Ghâsènì vayn kàʼa kwiynse nə ghənə paʼà nə̀yn. 17Ə ghâsènì tɔŋɔ ghɨ ətəynghe, ə kayn nə kə ghənə fɨyn wâmnè èghɛ kûmə̀ Njisə̀s kə ghɨ tàʼa fɨnə zɨ eghɛ nə zɨ̂nə̀ se tsɨ̀.”

18Ghənə ə kɛsə̂ tɔŋɔ Pità yî Njɔyn ə kànə̀ nə kə ghənə nə̂ fɨyn mɔ̀msè se wàmnè kɨ̀sə ə̀ nyì pî se zaʼle eghɛ ə Njisə̀s ezə. 19Pità yî Njɔyn ə pə̀ynsə̀ sê ghənə nə, “Ghàyn kwaʼte ghɛ zɛ ə ze tsɔ̂fə̀ ə Zhə̀fè əshi sə ghàyn ə ngɨŋ, nə ghàs zɨ sê Zhə̀fè mə, mə ghàs zɨ sê ghàyn ə? 20Ghàs vayn kàʼa kɨmte cho ghasghe sə̂ pîə kə èghɛ zɛ ə ghàs fe ə fɨnə zɨə.” 21Ghɨ ə ndɛ saʼ nə ghɛ ə fɨnə fo fɨ̀as sê ghənə nâʼà sə ŋaŋ. Ghənə ə ke zà nə ghənə ndo kûmə̀ nə ghənə tè paʼà fe ndomve se pɔynsə ghənə, kûmə̀ nə ghɨə tsɨəghe tè nyîə pɔmsə̂ Fèzhə̀ kûmə̀ ə̀ghɛ ghɛ ə ghe kyâyn. 22Wùə vɛ ə tè nə̀yn ghɛ ekayntə nə zɨ̂yn ə vəyn wìyn, è və tɛ tè nyiə tsɛ̂ pìŋ m̀ghɨm mkyàʼ.

Ghɨə poməghe ə tsə̀m sə̂ kyi ə̀təm atyaʼa

23Ə tè nyi kə ə za Pità yî Njɔyn nə ghənə ndo, ghənə ə ndùə kotə̂ ə̀ghɨ poməghe ə tsà ə̀ghɛ ghɛ ə ghɨ kɔʼsə nə eshyə̀ yî chəʼse pî sê ghənə. 24Ə pə̀ kə ghɨ poməghe zɨ ghɛ təynze, ghənə ə tsɨ̀yntə̀ tsə̂mə̀. Ghənə ə tsə̂mə̀ se Zhə̀fè piə nə, “Pɛ̂pɛ, ə Ghô vɛ ə o fɛte kwutwəyn, è chike, è njwî ə fengwaŋve, è nâʼàpî àkè kɛ ə ke nyi ətəyn, 25O tə nə̀yn, Zuʼse Ŋwaʼase ə chisə pɨ̀a vâs və shi, Ndàfît ə wàmnə̀, ə pfɨfə nə:

‘Kûmə̀ ghè ə ghɨ etumə nyɔʼsə̀ tɔŋve nyiə?

Kûmə̀ ghè ə ghɨ pɨaʼtə pi sê ghɨ mɔ̀ʼɔ sə ndô?

26Fɔ̂yn tə mbite pɨaʼtə sèngɨŋ sə ghənə̂sè,

ghɨ ghɛ ə ghe chisə ghɨ endaʼghe kwîə zûŋtə̀, pɨaʼtə kəpi se nò Pɛ̂ Zhə̀fè

è Wùə vɛ ə È tè chɔʼ ndə̂m.’

27Ə̀ za nyi eghɛ zɛ ə ze tè kyayn. Fɔ̀yn Ɛlɔ̀t yî Pontus Paylɛ̀t, è ghɨ atum əmɔ̀ʼɔ yî ghɨə chisə Isìlâyghè ə zùŋtə̀ ə pɨaʼtə se tam ə Njisə̀s, ə wùə èfɨ̀aʼa vê vɛ ə è nyi èŋwaʼe, ə vɛ ə Ò tè chɔʼ. 28Ghənə tè zùŋtè ə nə̀ kə èghɛ zɛ ə Ò se nyi mə Ò tə pɨaʼte ndəm kè ə ghò atyaʼ nə e tə kyânə̀. 29Zôyn nyi, ə Pɛ̂pɛ, kwaʼte fâynsè zɨnə ə ghənə fâynsə̀ ghàs ə fo kwəynsə atyaʼ sê ghàs, ghɨ əfɨaʼa ghɛghe, ə ghàs ə ndâʼà tom zɛ, fânə̀ va fɨa. 30Tyə̀yn tyaʼ kɛke ò tsuʼə ə̀ghɨ. Tsàmte ghàs nə ghàs ə nə̂ sèchwìə è ghɛ kayntəghe tɔynə̂ ezə Njisə̀szè, ə wùə èfɨ̀aʼa vɛ ve èŋwaʼa.”

31Ə pə̀ kə ghənə tsə̀m mɨ̂sè, luʼ vɛ ə ghənə tè nyi ətəyn, və shɨŋə nəʼə̀. Zuʼse Ŋwaʼase ə lwinə ə ghənə ewìyn nâʼà ə̀kɨ̂m. Ghənə ə zhə̀tə̀ sè ndaʼa tom ə̀ Fèzhə̀ ètəm a tyaʼa.

Ghɨ pomə tè chyatə̂ efɨa ə ghənəvè

32Nâʼà ghɨ poməghe əkɨ̂m tè nyi ke sə afɨa àmɔ̀ʼ, kyi ke èkwâʼtè èmɔ̀ʼ è təmghə əmɔ̀ʼ. Nâʼà wùə èmɔ̀ʼ tè piə va nə ə̀ fɨa kɨ̀nə kyi ke zhi, nâʼà pi ndè e njiə àfɨa, chyâtə̀ fo ànyìə vəyn. 33Ghɨətom ə Njisə̀sghè tè ndàʼà nâʼà è tyaʼa sê ghɨ nə ghənə nyi se tsɛ̀ esaʼ nə Zhə̀fè ə tè zòmsè Pɛ̂ Njisə̀s. Zhə̀fè ə pɔsə̂ kwəynsə̂ ghənə ə̀kɨ̂m. 34Wùə tè va əfètəyn ànɔ̀yn nə kɨ̂yn ə è tè làʼà fɨake. Ghɨ ghɛ ə ghe tè kyi mbvɨynse è ndɛse tè pəʼlə̂ efɨa nə vɨ̂yn, pə̀ è kɛ ətəynve, 35fo se ghɨətomə Njisə̀sghè, ghənə e chyâtə̀ sê ghɨ poməghe, nâʼà pîndè e fiə kə kɛ è làʼà.

36Ə̀ nyi zamə kə Njosɛ̀f, ə wùə èsas ə ndɛ Levìzè mə ə tè piə vəyn endaʼ ə Sàypulòszè, tè nəyn. Ghɨətom ə Njisə̀s ghè tè tɔŋtə vəyn nə Pànapàs, (Ə wùə vɛ ə è tè nə̂ nə ghɨ ghə kyi ə̀təm etɛ.) 37È tè pəʼle mchi mə vəm̀, ə fo èkɛ ətəynve sê ghɨətom ə Njisə̀sghè.

Currently Selected:

Ətefɨ̂aʼ 4: bfm

Highlight

Copy