Luka 19

E Yesu nu Zakeyu

1Yesu ayinjila mwe Jeriko apitingana. 2Momonye mwalinji e Zakeyu, esongo wakwe wakasonchezya wamusonko, walinji amuchindame. 3Wakasi ukulola Yesu, vino ali, ukuwa muno walinji amufupi swinya muno aliwumba apotwa ukumulola. 4Achaleka asamalila pankolelo asya iwumba aya akwela mumukunyu ukuti alole Yesu, wino wapitanga munzilanye yoyo. 5Ala Yesu wafika paponye, apunumila anena Zakeyu ati, Zakeyu, pitisya yika, amuno ilelo nala inde nkafichile mung'anda yako.

6Zakeyo ayika nanti kuzinguluka apochelela Yesu nichimwemwe chikulu. 7Awantu wonsi wane waweni awakwinuluka, wakuti, Ngamuno chani chino umuntunye wee wafichila mung'anda yamuwembu!

8Ngapano Zakeyu ayimilila anena Imfumu e Yesu ati, Nteyelezya Mfumu! Nandi mpawule insawo yane pakasi impe awasaluke; swinya ndachino nachenjezya wumwi, namunyosezya impindi zini.

9Yesu amunena ati, Ilelo itulwa liza mung'andanye yoo; amuno Zekeyu-nye nawe awapiwuvi lyakwe Abrahamu. 10Amuno Umwana Muntu wizizile ukuvwamba nukutula wano wasowa.

Umulumbe walundalama lwakwe golide

(Mateyu 25:14-30)

11Awala pano awantu wakwivwa ivintunye vyoo, Yesu alandalila nukuvwanga awumila umulumbe. Paponye watezile wapalamila ukufika kwe Yerusalemu, awakwelengania wakuti Uwufumu wakwe Leza wapalamila ukwiza. 12Achaleka Yesu awanena ati, Kwalinji umuntu mulumbililwe wumwi wino wayile kunsi yakutali ukuti akateme pawufumu ngapano anyoke kumwawo swinya. 13Walile pano atani apite ayita awawomvi wakwe ikumi awapa wonsi ulundalama luwenzu longa-longa awanena ati, Musyale mukusandulula nsuke njize mbwele. 14Ukuwa awakaya wawuye wamupasile, achaleka awasyala wakutuma intumi azimukonchelela aziti, Tusinakulonda ukuti umuntunye wee ayize awe amfumu yitu.

15Umuntunye weyo aya atema pawufumu anyoka. Ala pano atani apuze nukupuza akomelezya awawomvi wakwe, wano wawapile indalama, ukuti waye kweneko akalole vino wasanduluzile. 16Uwakutalika aya afika ati, Tatakulu, ulundalama luwenzu luno wampile nasandululila zinji ikumi. 17Amuwanzya ati, Wachitichete; wemuwomvi muzima! Muno walinji wemusuwilwa mututichi, nakulasika mutwaya ikumi. 18Umuwomvi wachitiwili aya afika ati, Tatakulu, Mulundalama luno wampile; nasandululila zinji zisano. 19Nawe amunena ati, Walasa mutwaya tusano. 20Umuwomvi winji aya afika ati, Tatakulu, Ulundalama luno wampile 100; nalusunzile ndunyepa mukafunda achikala achiti-ndi. 21Nakutinanga, muno watala. Ukasenda nachino chisi achakonye, swinya ukasinza chino utalima. 22Amunena ati, Wemuwomvi muwipe nkaninye! Nakupanzizya kuvyamumulomo wakonye! Wamanya kuno natala, nkasenda vino visi avyane nukusinza vino ntalima. 23Ngafwandi amuno achani chino utasenguzile ulundalama lwane mubanki? Amuno mweni nanga pane nawela njize mpochelele ndutilizye. 24Ngapano akomelezya wane wimilile paponye ati, Mupokani ulundalama 1010 mupe wino ali nindalama ikumi. 25Awamunena awati, Tatakulu ngavino ali nindalama ikumi! 26Awatolelela ati, Nachawuzimanye nkuwanena nkuti, wensi wino ali navyo, aliyonjelezwa navinji; ukuwa wino asi nachimwi, nakatichinye kano ali nako kalipokwa kweweliwe. 27Achaleka fwandi, kuwalwani wane awamwatanye woo wano watalondanga ukuti imbe nemfumu: waletani pane muwakome nani nkulola!

Ukulafya pano Yesu akwinjila mwe Yerusalemu

(Mateyu 21:1-11; Marko 11:1-11; Yohani 12:12-19)

28Ala Yesu wavwanga wonye-woo akolela aya kwe Yerusalemu. 29Ala vino wapalamila pakwe Betifage nu Betane, pamwamba wamingungu, atuma awasambilizi wakwe wawili ukuti wakolele pankolelo 30awakomelezya ati, Yanji kukaya kako kano mulungime; mwala ndi mwinjila mwenemo mwandi mukazane umwana wandokwe anyefilwe, wino wumwi asitela akwelele. Mumusapule mumulete koo. 31Ndi wumwi waya wawawuzya wati, Ngamuno chani chino mukusapulila umwana wandokwe? mumunene muti, Tatakulu akumulonda.

32Awapita awaya awazanila ndimuno Yesu wawanenezile. 33Awala pano wakusapula umwana wandokwe, awenecho awawanena aati, Ngamuno chani chino mukumusapulila?

34Awatolelela awati, Tatakulu

akumulonda, 35awasenda umwana wandokwe awamutwala kwe Yesu, awanza imyinjilo yawo panyama awakwezya Yesu penepo. 36Ala pano Yesu wakwelela awanza imyinjilo yawo munzila.

37Ala pano wapalamila kwe Yerusalemu, pano inzila yatantamuchila kumwamba wamingungu, iwumba kulu ilyawasambilizi wakwe aliwasalifya Leza mbali nukumutumvya namazwi makulu kuvintu vyonsi ivikulu vino waweni. Awati, 38Ndi Leza apepe imfumu yino ikwizila mwizina lya Mfumu! Umutende mwiyulu, nukuchindama kwe Leza!

39Ngapano awaFalisi wamwi mwiwumba awanena Yesu awati, Musambilizya, kalipila awasambilizi wako walekeichongo!

40Yesu awatolelela ati, Nkuwanena nkuti, ndi awasambilizi wane wamyalala amawenye yonga yandi yapunda.

Yesu alilila Yerusalemu

41Ala wapalamila mukaya wakalolechesya atuluka awalila, 42Ati, Ndachino ilelonye utele umanyile ivyamutende! Ukuwa kanonzi utanga uwulole! 43Amanda yalikwizila pano awalwani winu walikuliwilizya nilinga, wakufundichile, wakwiyalile monsi-monsi. 44Wakumongolanie wakulovye apaliponga nawantu wako wane wali mwenemo; watalisya iwe limwi limilile piwuye, amuno utamanyile impindi yino Leza wizile kukwiza kutula!

Yesu aya kung'anda yakwe Leza

(Mateyu 21:12-17; Marko 11:15-19; Yohani 2:13-22)

45Yesu ayinjila mung'anda yakwe Leza atalika ukuwinga wane wakazyanga, 46ati, Yawalikwa muMawaliko? Matele muno Leza wavwanga wati, Ing'anda yane iliwakwitwa ang'anda yakupepela. Ukuwa mwayichita ngati ang'anda yakuvwama awang'o!

47Yesu wasambilizyanga mung'anda yakwe Leza amanda yonsi. Wasimapepo wakulu, nawasambilizya wamasundo, nawasongo walondanga ukuti wamukome, 48ukuwa awasowa umwakuchitila chochonye, amuno awantu wanji wonsi wivwanga Yesu, watalondanga ukupulumula izwi nanti lyonga.

Currently Selected:

Luka 19: WWN82

Highlight

Copy