Luka 16

Ichiwelewele chamulasi

1Yesu anena awasambilizi wakwe ati, Kwalinji umuchindame wumwi wino walasisile wumwi pawulasi, weyonye awino ayambwa ukuti akusampania insawo yakwe yisikulu. 2Amwita amunena ati, Achani choo chino nkwivwa ivyako? Leta vyonsi vino wawalika penepo insawo yane, amuno utanga ulange wemulasi wane. 3Umuntunye weyo avwanga mumwezo wakwe ati, Tatakulu akasi ukundesya umulimo wane, nsinamaka ukulima, nako ukupempa indi ninsoni. 4Kanonzi namanya vino nandi nchite! Ndi imilimo yane yiza yasila njize imbe niviwuza vyakumpochelela mung'anda zyawo. 5Achaleka awakwita wano wapavile indalama zyakwe yisikulu wenga-wenga. Anena uwakutalika ati, Wapavile wuli kwetatakulu? 6Ati, iviya vyamafuta umwanda, atolelela ati, Kalata wampa yako wee, yikala pansi zuwa uwalike amakumi yasano. 7Anyoka anena winji ati, Ngawenji wapawa wuli? Amutolelela ati, Imise yankumba imyanda ikumi. Ati, Kalata wako wee, yikala pansi uwalike amakumi kananimonsi. 8Eyisikulu wamulasi muwipe amuwanzya pakuchita ivyamuchenjelo; amuno awantu wamunsi moo wali numuchenjelo wakuchita ivintu vyawo ukulusye awantu wane wakapita umusanya.

9Yesu alandalila nukuvwanga ati, Achaleka nkuwanena nkuti, yikundilanji iviwuza ninsawo yamunsi-moo, alyakuti pano yiza yasila mwize mupochelelwe mukaya kamuyayaya. 10Wensi wino amusuwilwa mututichi, alisuwilwa namuvikulunye; nawensi wino asi amusuwilwa mututichi atalisuwilwa namuvikulunye. 11Achaleka fwandi, ndi mwe mintasuwilwa munsawo, yamunsi, ngafwandi mungasuwilwa wuli munsawonsawo? 12Ndimutasuwilwa kunsawo yakwe wanji ngafwandi weni angawapa vino avinu?

13Pasi umuwomvi wino angawa amuzya kwewayisikulu wawili, amuno pamwi angapata wumwi akunde umuwuye; pamwi angatontela wenga akwelengule umuwuye. Mutanga muwombele Leza mbali nindalama.

Amazwi yamwi yano Yesu wavwanzile

(Mateyu 11:12-13; 5:31-32; Marko 10:11-12)

14Awala awaFalisi wivwa wowonye, awaseka Yesu muno wakundisizye indalama. 15Yesu awanena ati, Mwemwenye mwewantu mukuyilanjizya uwuzima paminso yawantu, ukuwa Leza weni wamanya imyezo yinu. Amuno chino awantu wakwelengania wakuti achikulu, kwe Leza kweni chikulanga achavye.

16Amasundo yakwe Musa namazwi yano awatumwa wawalisile yalinji-po ukwiza fika pampindi yakwe Yohani kabatizya; ukuwa ukufumilila papo Ilandwe Zima ilya Wufumu wakwe Leza ali no likawizwa, wonsi wakalwila ukuti winjile mwenemo. 17Ukuwa achipepuke iyulu ninsi ukuzimanjika ukulusye akalisundo konga ukuti kalowe.

18Wensi wino wawinga umuchi watwala winji atela wazeleluka; nawino watwala umwanachi wino wawingwa nawenye atela wazeleluka.

Umuchindame nu Lazaro

19Kwalinji umuntu wumwi umuchindame wazwalanga ivizwalo vyamutengo wukulu imyikalile yakwe yalinji ayakuyitopwa kutupu amanda yonsi. 20Swinya kwalinji umusaluke wumwi, wino witwanga ilyakwe Lazaro, walinji nivilonda umuwili wonsi, wasendwanga atwalwa pamulyango wamuchindame, 21awalonda ukulya imvongonyo zyachakulya zino zyaponanga pitebulo lyamuchindame. Imbwa zyayanga mukumumyanta ivilonda vyakwe. 22Umusaluke afwa awangeli awamusenda awamutwala kumasyo kwe Abrahamu, kuchakulya chamwiyulu; nawe umuchindame afwa azikwa. 23Ala pano ali mukuyimba kukulu ukuzimu; ayinuka alola Abrahamu, apatali, ali nu Lazaro. 24Achaleka apunda ati, Tata Abrahamu! Waninkumbu nani, utume Lazaro atimpike insongo yamunwe wakwe muminzi ayize atalalike ululimi lwane, amuno nkuyimba mumbiwi yamulilo moo! 25Ukuwa Abrahamu ati, Mwana, yizuka kuno muwulanzi wako wapilwe ivintu vyonsi ivizima, pano Lazaro weni walinji nivintu viwipe vitupu; ukuwa nawe kanonzi akusechela koo, nawe ukuyimba. 26Pakwe vyoo vyonsi, pakasi pakwe mwemwe naswe pali iyenje zike, lino wane wakulonda ukulamba ukufuma koo ukwiza kwemwemwe watanga walambe nanti awino akulonda ukulamba ukufuma koko ukwiza kwesweswe atanga. 27Umuchindame ati, Nazina tata, nkukulambilizya ukuti utume Lazaro kung'anda yakwe tata, 28amuno kweneko indi nawanawitu wasano; uleke akawasochele alyakuti watize wize kumasyo yanye-yaa ayakuyimba. 29Ukuwa Abrahamu ati, Awanyonko wali nu Musa nawatumwa wane wangawasochela; ndi awanyonko wale wakwivwa vino wawonye wakutaka. 30Umuchindame ati, Chisi awowo, tata Abrahamu! Ukuwa ndiwumwi wakatuka wafuma kuwafwe waya kuwanawitu, apano wangatontolokwa. 31Ukuwa Abrahamu ati, Ndi watanga wivwe Musa nawatumwa watanga wasuwile nanti awino wazyulupukanye.

Currently Selected:

Luka 16: WWN82

Highlight

Copy