Yohani 20

Ankungwe ntupu

(Mateyu 28:1-8; Marko 16:1-8; Luka 24:1-12)

1Mwepwi pa Mulungu, yekuchili kufisile, e Mariya wa ku Magadala aya kunkungwe alola iwe lifumizwe penepo. 2Achaleka asamala aya kwe Simoni Peter apaliponga numusambilizi winji, wino Yesu wakunzile, awanena ati, Wafumizye Imfumu e Yesu munkungwe tutamanyile nakuno wamuwisile!

3Ngapano Simoni Peter numusambilizi muwuye awalungama kunkungwe. 4Wowilinye wasamalanga, ukuwa umusambilizi winji asamala asya Peter afikafika pankungwe. 5Ayinamila mwenemo alola imyenda mitelepe, ukuwa nanti kwinjila munkungwe. 6Ngapano Simoni Peter wino wasyalichile afika, weni afika ayinjila munkungwe. Alola imyenda mitelepe ilambalile mwenemo 7apaliponga nakamwenda kano kanyefilwe kumutwe wakwe Yesu. Keni katalambalile apaliponga nimyenda mitelepe ukuwa kavungine konga payo. 8Ngapano umusambilizi winji wino watalichizile ukufika pankungwe, nawe ayinjila mwenemo; alola asuwila. 9(Ukuwa naponye wachilinji ukwiluka Amawaliko Matele ayakuti alele azyulupuke kumfwa.) 10Ngapano awasambilizi awawela kumwawo.

Yesu aloleka kwe Mariya waku Magadala

(Mateyu 28:9-10; Marko 16:9-11)

11Mariya wimilile pankungwe kunzi walosyanga. Alapano akulosya ayinamila munkungwe, 12alola mwenemo awangeli wawili, wazwite ivitiswe, wisile pano palinji umuwili wakwe Yesu, wumwi kumitwe, numuwuye kumanama. 13Awamuwuzya awati, Mwanachi, ngu'kulila chani? Awatolelela ati Wasenzile Imfumu yane, ntamanyile kuno wamuwisile!

14Ala wavwanga wonye-woo, apiluluka alola Yesu ayimilile paponye; ukuwa weni nanti kumumanya. 15Yesu amuwuzya ati, Mwanachi, Ngu'kulila chani? Ngu'kuvwamba weni?

Weni welenganianga akuti, Nche amulimi, achaleka amunena ati, Tatakulu ndi awewe umusenzile nena kuno uyile wamuwika, inje nkamusende.

16Yesu amunena ati, Mariya! Apepetuchila kweweliwe amuvwanzya mu chiHebere ati, Raboni! (kuno

akuli kuti Musambilizya).

17Yesu amunena ati, Utize undemelele, amuno ntani nkwele nyochele kwe Tata. Ukuwa yanga kanenele awanawitu uti, Nkuwela nkunyochela kwe Tata kweso namwe, e Leza wane, e Leza winu namwe.

18Achaleka e Mariya waku Magadala aya nena awasambilizi kuno waweni Imfumu e Yesu, swinya namuno wamunenezile ivintunye vyoo.

Yesu aloleka kuwasambilizi wakwe

(Mateyu 28:16-20; Marko 16:14-18; Luka 24:36-49)

19Uwanda wowonye kwatezile kwila paMulungu, nawasambilizi wawungine apaliponga wayiyalizile mung'anda, amuno watinanga awa Yuda. Yesu afika ayimilila pewoliwo. Ati, Umutende wuwe namwe. 20Ala pane wavwanga wowonye awalanjizya amakasa napaluwazu. Awasambilizi awawa nichimwemwe kutaluvile pano walola Imfumu e Yesu. 21Yesu anyoka awanena ati, Umutende wuwe namwe. Ndivino Tata wantumile avino nani nawatuma. 22Ala wavwanga wonyewoo, awafutila ati, Pochelelani Emuzimu Mwimichile. 23Awantu wane mwawatetela uluwembu, awatela watetelwa; ndi mutawatetezile, ye uluwembu lwawo lutatetezilwe.

E Yesu nu Tomasi

24E Tomasi umusambilizi wawikumi nawawili, (wino witwanga ilyakwe Ntembwa), weni atalinji nawawuye pano Yesu wayile. 25Achaleka awasambilizi wawuye awamulandila awati, Tuweni Imfumu e Yesu!

Ukuwa Tomasi awanena ati, Ndintanga ndole amawamba yamisomani mumakasa yakwe, mbike numunwe wane mumawamba, mbike nikasa lyane paluwazu lwakwe, ntanga nsuwile.

26Swinya akula kwasila manda munenulambali awasambilizi walinji apaliponga mung'anda mukasi, nu Tomasinye walinji nawo. ivisakati vyiyazilwe, ukuwa Yesu afika ayimilila pakwe woliwo ati, Umutende wuwe namwe. 27Anyoka anena Tomasi ati, Wika umunwe wako paa, swinya ulole namakasa yane; utambalike nikasa lyako uleme paluwazu lwane. Leka ukuvwilika kwako, usuwile!

28Tomasi amutolelela ati, Mfumu yane swinya Leza wane!

29Yesu amunena ati, Wuzye wasuwila amuno wandola? Awalongo kutaluvile wane wasuwila napano watambweni!

Chino kalatanye wee wawalichilwa

30Yesu wachisile imilimo yinji imikulu paminso yawasambilizi wakwe Yino itawalikwa mwekalatanye wee. 31Vyonyevyoo vyawalikwa ukuti musuwile kuno Yesu we Mesaya, Umwanakwe Leza, alyakuti ndimwasuwila muwe nuwumi mwizina lyakwe.

Currently Selected:

Yohani 20: WWN82

Highlight

Copy