Yohani 18

Yesu alemwa

(Mateyu 26:47-56; Marko 14:43-50; Luka 22:47-53)

1Ala Yesu wapepa wonye-woo afuntuka nawasambilizi wakwe alamba akaluzi e Kidron. Kokonye kwalinji ichalo, Yesu akuno aya nawasambilizi wakwe. 2E Yuda ekakutitila, wamanyile kuno ichalo chalinji, amuno kokonye akuno Yesu wasunkananga nawasambilizi wakwe impindi mvule. 3Achaleka Yuda aya kuchalo, wasenzile iwumba lyawavita wakalindilila wamwi awang'anda yakwe Leza wane wasimapepo wakulu na waFalisi watumile; wasenzile ivyanzo ninyale nivisonsolwa. 4Yesu wamanyile ivintu vyonsi vino vyanga vimuponele; achaleka akatuka awasunkania awawuzya ati, Nga mukuvwamba weni?

5Awatolelela awati, Tukuvwamba Yesu wa ku Nazareti.

Ati, Ne-waa,

E Yuda, ekakutilila, wimilile nawo paponye. 6Ala pano Yesu wawanena wati ne-waa, awapita chifundansizi awapona pansi. 7Yesu anyoka awawuzya swinya ati, Ngamukuvwamba weni?

Awati, Tukuvwamba Yesu wa ku Nazareti.

8Yesu ati, Mbanenile kali nati Newaa. Ndanenenye anemuntu mukuvwamba, lekani waa weni wapite. 9(Wavwanzile wonye-woo alyakuti chino wavwanzile chifiswe: chino watili, Tata, ntasovya nanti wenga wane wampa.)

10Simoni Peter walinji nulupanga; asomola ayuma umuzya wakwe simapepo mukulu, amusenga ikutwi lyakwe ndilo. Izina lyamuzyanye weyo walinji we Malikusi. 11Yesu anena Peter ati, Someka ulupanga lwako muchipata! Wuzye ukwelengania ukuti nakana ukung'wela ulupindi lwamatamyo luno Tata wampa?

Awatwala Yesu kwe Anasi

12Iwumba lyawavita numusika mukulu wawo nawakalindilila wachiYuda awalema Yesu, awamunyepa. 13Pakutalika awamutwala kwe Anasi. Weyonye walinji weyisivyala wakwe Kayafasi, wino walinji wesimapepo mukulu umwakanye wowo. 14We Kayafasi-nye awino wasochezile awaYuda ati, Achizima ukuti umuntu wenga angafwila awantu wonsi.

Peter akana Yesu

(Mateyu 26:69-70; Marko 14:66-68; Luka 22:55-57)

15E Simoni Peter numusambilizi winji awakonka Yesu. Umusambilizi winji weyo wamanyisilwe nkaninye kwe simapepo mukulu, achaleka ayinjila muluwanza lwang'anda yakwe simapepo mukulu apaliponga nu Yesu. 16Peter weni wisile pampongolo palonde. Umusambilizi winji weyo, wino wamanyisilwe kwesimapepo mukulu, afumila palonde, aya awavwanga numukazyana pampongolo asenda Peter ayinjila nawe mukasi. 17Umukazyana wino walinji pampongolo anena Peter ati, Wuzye usi wewumwi uwasambilizi wamuntunye wee?

Peter atolelela ati, Nsi neweliwe.

18Kwalinji impepo, achaleka wakayamwite nawakalindilila wapemvile umulilo wamakala, waliwilizizye—wakota. Peter aya kwakwe wane wotanga, awakota nawo.

Simapepo mukulu awuzya Yesu amawuzyo

(Mateyu 26:59-66; Marko 14:55-64; Luka 22:66-71)

19Simapepo mukulu awuzya Yesu kuvyawasambilizi wakwe nimisambilizizye yakwe. 20Yesu amutolelela ati, Navwanganga ichilola kwakwe wonsi; nukusambilizya kwane konsi kwawanga muzyang'anda zyakupepela namung'anda nkulu iyakwe Leza, muno awaYuda wonsi wakawungana. Nsitela mvwange chiwmwi kumbali. 21Ngafwandi chino ungambuzizya achani? Wuzya awantu wane wanjivwanga. Wawuzye wakunene chino nawenenanga—wamanya chino navwanzile.

22Ala pane Yesu wavwanga wonyewoo, kalindilila wumwi wino walinji paponye amupama nulupi ati, Nga amuvwango-chi woo wuno ukuvwanga kwe simapepo mukulu?

23Yesu atolelela ati, Ndi navwanga ichiwipe chimwi, nena wonsi wano wali paa chino nawifya. Ukuwa ndi mvwanzile ichete, ngawanjumila chani?

24Achaleka Anasi amutuma anyefilwe kwe Kayafasi esimapepo mukulu.

Peter akana Yesu swinya

(Mateyu 26:71-75; Marko 14:69-72; Luka 22:58-62)

25Peter wimilile paponye akota umulilo. Achaleka awantu wanji awati, Wuzye usi wewumwi uwawasambilizi wamuntunye weyo?

Peter akana nkaninye ati, Nsi neweliwe.

26Wenga uwawazya wakwe simapepo mukulu, uwaluko lwakwe wino Peter wamusenzile ikutwi, avwanga ati, Wuzye ntakuweni nu Yesu muchalo?

27Swinyanye Peter akana ati, Awe!

Napaponapapo mukolwe alamula.

A watwala Yesu kwe Pilato

(Mateyu 27:1-2, 11-14; Marko 15:1-5; Luka 23:1-5)

28Awasenda Yesu awamufumya kung'anda yakwe Kayafasi awamutwala kwisano lyakwekapanzya. Walinji amutondotondo. AwaYuda watinjizile mukasi amuno watakasi ukuti wakombele, muno walondanga ukuti walye ichakulya chakupitililwa. 29Achaleka Pilato afumila kunzi aya kwewoliwo awawuzya ati, Nga akasinza-chi kano mwavililichila umuntunye wee?

30Itolelelo lyawo lyalinji alyakuti, Tutanga tumulete kwewewe ndachino atele asi numulandu.

31Pilato awanena ati, Mwemwenye nalwinu musendani mukamupanzye ndimuno isundo linu lyawela.

AwaYuda awatolelela awati, Tutazumilizwa ukukoma umuntu wumwi. 32(Choo chaponile alyakuti amazwi yakwe Yesu yafiswe yano watasile kukuwumbula umwata wamfwa yakwe.)

33Pilato anyochela mwisano ayita Yesu. Amuwuzya ati, Wuzye wemfumu yawa Yuda?

34Yesu atolelela ati, Wuzye iwuzyo lyoo alyako wemwenecho pamwi-nche wanji wakunenile ivyane?

35Pilato atolelela ati, Wuzye ukuti ne muYuda? Awantu waluko lwakonye nawasimapepo wakulu awano wakulesile kwenene. Nga uchisile chani?

36Yesu ati, Uwufumu wane wusi awamunsi yoo; ndi uwufumu wane wanga wutele awamunsi yoo, ngali awantu wane walwa nanti kuti awaYuda wandeme. Nakana, uwufumu wane wusi awamunsi moo!

37Achaleka Pilato amuwuzya ati, Wuzye kweni wemfumu vwile?

Yesu atolelela ati, Wewenye nalwako wataka wati nemfumu. Nakwasilwe njiza munsi muno achonye-choo, ukuti njize mvwange ivyakusimichila. Wensi wino awakusimichila akakwivwa mazwi yane.

38Pilato amuwuzya ati, Nga ukusimichila achani?

Yesu apanizwa imfwa

(Mateyu 27:15-31; Marko 15:6-20; Luka 23:13-25)

Ngapano Pilato anyoka afumila palonde kuwaYuda awanena ati, Ntazanile umulandu wumwi wuno ingamupanzizya. 39Ukuwa ukulingana numwata wuno muli nawo, penye nkawasapulila uwamuvingololo wumwi pampindi yachakulya chakupitililwa. Wuzye mukulonda mbasapulile imfumu ya waYuda?

40Awamutolelela nukupunda kukulu awati, Twakana, weni pole! Swenji tukulonda Barabasi! (Barabasinye weyo walinji wekapoka.)

Currently Selected:

Yohani 18: WWN82

Highlight

Copy