Intaliko 6

Uwuwipe wamulawa

1Walanga pano awantu watalika ukuvula munsi, awana wakazyana awakwatwa kwakwe woliwo. 2Awanakwe Leza awalola ukuzipa kwa wakazyana, nga wayisolela awakutwala. 3Achaleka Imfumu e Leza avwanga ati, Umuzimu wane wutanga wi kale mu muntu pe na pe, amuno weni a mulawa. Uwulanzi wa manda yakwe wuliwa imyaka umwanda wonga ni myaka amakumi yawili (120). 4Mu mandanye yayo iviwantu vikulu vyalinji munsi amuno awanakwe Leza wayile ku wakazyana wa wantu awapapa awana. Iviwantunye vyovyo avino vyalinji awantu wakulu awalumbililwe mu mpindi-nye yoyo inkali.

5Imfumu e Leza alola kuno uluwembu lwa wantu lwakulisya munsi, swinya alola kuno na melengania ya mu myezo yawo yalandalila ukuwipa amanda yonsi. 6Achaleka Imfumu e Leza alwilwintika kwe chino welewulizile awantu munsi, choo achimuvitisya nkaninye. 7Apano Imfumu e Leza ati, Nandi ndovye munsi awantu wane nelewuzile, awantu ni vinyamana vyonsi vino vikasela ni nyunyi zya mupela, amuno chamvitisya pakuvyelewula. 8Ukuwa Nowa azanwa amuyane paminso ya Mfumu e Leza.

9Na koo a kuli kunyama kwi kwata lyakwe Nowa. Nowa walinji a mulungamane, nanti ndema; Nowa wakonkanga Leza. 10Nowa walinji na wana wonsi watatu, e Shem, e Ham, nu Jafeti.

11Ukuwa munsi yonsi imiwele ya wantu iyononeka paminso yakwe Leza, na munsi amuwa kanyati. 12Leza alolechesya kuno insi yononesile; imiwele ya wapuma wonsi munsi yononesile.

Nowa awaza uwato

13E Leza anena Nowa ati, Nkulonda ukulovya awalawa wonsi; amuno munsi mwizula nimpokoto zyawo; lola nandi mbalovye mbonone apaliponga ninsinye 14Kayiwazile uwato wa matabwa matali; uwike mwenemo ni miputule, umatilile uwato mukasi na ku londe ninamba. 15Na woo, awuli mwata wuno wandi uwazile uwato, mu wutali wuwe amapande umwanda wonga na makumi yasano, na mu wupapatale wuwe amapande amakumi yawili na mapande yasano (150), nga mu chimo wuwe amapande ikumi na yasano. 16Ulunzye nu musonje umukono wonga ukusomboka; usye nu mulyango kumbali; swinya uleke wuwe nu wulunga wakutalika nu wachitiwili nu wachititatu. 17Amuno nachawazimanye ndituma intalala munsi, kukulovya ichawumi chonsi chino chili nu kufuta kwa wumi, ukuti chilowe munsi; chonsi chino chili munsi chililowa. 18Ukuwa wenji ndilayana nawe; uliyinjila mu wato, wewe na wanako, nu wakwako na wanyokovyala wa muka wanako. 19Swinya uliyinjila mu wato ni vya vumi vyonsi viwili-viwili, ichonsi ni chanachi alyakuti uyize uvitule; 20Inyunyi zyonsi izya misango yonsi, ni nyama zyonsi izya misango-misango, ni vikasela pansi vyonsi ivya misangomisango, vyonsi viwili viwili viliyinjila nawe, alyakuti uyize uvitule. 21Swinya uyize usende ivyakulya vya misangomisango uvisunge; alyakuti vize viwe a vyakulya vyakio ni vyakulya vyawo. 22Nowa achita wowonye; wachisile vyonsi vino Leza wamunenile.

Currently Selected:

Intaliko 6: WWN82

Highlight

Copy