Intaliko 48

Ukupepwa kwakwe Efulemu nu Manase

1Pansizi pakwe choo Jozefu anenwa ukuti, Eso a mulwale. Achaleka asenda awanakwe wowili e Manase nu Efulemu. 2Awanena Jekapu awati, Umwanako e Jozefu wiza ngapano Israeli ayikankalizya, ayikala pa chitala. 3Nga Jekapu anena Jozefu ati, Leza wa maka yonsi walolesile kwe nene pa masyo yano wakutanji Luzi munsi ya Kenani ampepa, anena ati, 4Lola, ndikupa uwukwasi ndeke unyame, ndileka mwakwe wewe mufume iwumba lya wantu, swinya pansizi pakwe wewe insi-nye yoo iliwa a yi wuvi lyako amanda yonsi. 5Kanonzi awanako wowili wane wapapizilemunsi ya Ijeputi pano nachilinji ukwiza kwe wewe, e Efulemu nu Manase, a wane, ndivino e Rubeni nu Simeoni wali. 6Ni wuvi lyako lino lilikwatwa pansizi pakwe waa liliwa alyako; waliwakwitwa izina lya wunyina pakupyanana. 7Amuno pano nafumanga ku Mesopotamia kukusyama Rakelo afwa, afwila pa nzila munsi ya Kenani ye tuchili ukufika ku Efrati; imuzika lwa mu nzila yakuya ku Efrati (kuno kuli kuti Bethlehemu).

8Ala Israeli walola awanakwe Jozefu awuzya ati, Nga awaweni waa? 9Jozefu atolelela yisi ati, Awanane, wane Leza wampa koo. Amulambilizya ati, Walete kwe nene mbapepe. 10Aminso yakwe Israeli yatezile yawa na kafinzi muno a wukote achaleka atalolanga. Achaleka Jozefu awapalamizya pe weliwe; awafyompa awafukatila. 11Israeli anena Jozefu ati, Ntelenganianga kuno ndilola impumi yako, lelo Leza waleka nalola na wanako-nye. 12Ngapano Jozefu awafumya pa makokola yakwe, asokowala ayinama. 13Jozefu awasenda wowili, Efulemu kwi kasa lyakwe ndilo lwa kwi kasa lyakwe Israeli ilyakwe kamani, nawe Manase kwi kasa lyakwe kamani lwa kwi kasa lyakwe Israeli ilya ndilo awapalamizya pakwe weliwe. 14Israeli atambalika ikasa lyakwe ilya ndilo aliwika pa mutwe wakwe Efulemu, umuzuna, nalyo ikasa lyakwe kamani aliwika pa mutwe wakwe Manase, asuntunkania amakasa yakwe amuno Manase walinji we katote. 15Nga apepa Jozefu ati,

E Leza wino wasunganga watata e Abrahamu nu Ayizeki,

E Leza wino akankolelela mu wulanzi wane wonsi ukufika ni lelo,

16Umungeli wino wankomola ku wuwipe wonsi, apepe awalumendo:

Alyakuti’ izina lyane liwalandalila mwakwe woliwo;

apaliponga na mazina yakwe watata e Abrahamu nu Ayizeki,

Alyakuti wanyama munsi.

17Ala pano Jozefu walola kuno yisi wawika ikasa lyakwe ilya ndilo pa mutwe wakwe Efulemu, achimuvitisya; achaleka alema ikasa lyakwe yisi, alifumya pa mutwe wakwe Efulemu aliwika pa mutwe wakwe Manase. 18Ngaanena yisi ati, Chitanga chiwe wonyewoo, tata, amuno wee awili katote; awino wika ikasa lyako ilya ndilo pa mutwe wakwe 19Ukuwa yisi akana ati, Manyile, manyile mwanane; amuno nawenye aliwa mukulu ukulusye, ni kwata lyakwe liliwa a liwumba lya mwiko. 20Achaleka awapepa uwandanye wowo ati,

Mu manda ya kunkolelo Israeli aliwapepa akuti,

E Leza aleke uwe ngati we Efulemu swinya ngati we Manase; mumwata woo awika Efulemu pankolelo pakwe Manase. 21Ngapano Israeli anena Jozefu ati, Lola, Kanonzi indi mupipi ni mfwa, ukuwa Leza wandi awawa nawe, swinya alikunyosya ku nsi yakwe waso. 22Nukulusyenye wenji nakupa ichipya chonga icha pa mwamba papela chino naposile ukufuma mu makasa ya wa Amori, muno a lupanga nu wulapwa wane.

Currently Selected:

Intaliko 48: WWN82

Highlight

Copy