Intaliko 44

Ulupindi alusowa

1Akomelezya kayamwite wa mung’anda yakwe ati, Yizuzya ichakulya mu myuwa ya wantu waa, ukulingana na maka yawo, uwike ni ndalama zyakwe wila muntu mu muwa wakwe, 2uwike nu lupindi lwane, ulwakwe silivara mu muwa wa muzuna wawo, 3apaliponga ni ndalama zyakukalila amalezi. Achita ndimuno Jozefu wamunenezile. Akula kwacha umutondotondo awakatuka awapita, ni ndokwe zyawo. 4Awala pano wapita umusinzo wutichi ukufuma mu kaya, Jozefu anena kayamwite wakwe ati, Wakonke, ndi wawazana uti, Ngachani chino mwachitila ichiwipe ku chizima? Ngamuno chani chino mwiwizile ulupindi lwane ulwakwe silivara? 5Aluno tatakulu akung’welanga, luno akalawulila. Mwachita ichintu chiwipe wuli!

6Ala wawazana awanena amazwi-nye yaa. 7Awatolelela awati, Ngamuno chani chino tatakulu wavwanjila amazwi-nye yaa? Sweswe tutanga tuchite ichamwata wonyewoo! 8Ngavino indalama zino twazanile mu myuwa yitu twanyosizye, twafuma nazyo kunsi ya Kenani; ngafwandi amuno chani chino tungiwila e silivara nanti we golide mu ng’anda yakwe sokulu. 9Mu muwomvi wako wensi, muno ulupindi lwazanwa, ndi afwe, naswe swensi tuwe swe wazya wa mfumu. Nawe ati, Ndi chiwe ndimuno mwatachila: 10mwakwe wensi wino lwazanwa, wandi awe a muzya wane, ukuwa wanji wonsi wasi nu mulandu. 11Achaleka wila muntu atula umuwa wakwe pansi nanti kuzinguluka, wila muntu asapula umuwa wakwe. 12Atalika ukuvwamba, atalichila kwe songo apelelechezya ku mutichi, nu lupindi aluzanwa mu muwa wakwe Benjemani. 13Achaleka awalepula ivizwalo vyawo, na wila muntu alonga iviya vyakwe pa ndokwe yakwe awanyochela ku chinamwene.

14Ala pano Yuda na wanyina wafika ku ng’anda yakwe Jozefu, pano ali mwenemo, awafika awafukama pakwe weliwe. 15Jozefu awanena ati, Nga chintu-chi choo chino muchisile? Wuzye mutamanyile ukuti umuntu, ndivino nene, nachawuzimanye wamanya ukulawula? 16E Yuda ati, Nga twavwanga chani kwe tatakulu? Nga twandi tuti chani? Nga tungayizifizya wuli? Leza azanile ukuwifya kwa wawomvi wako, swe wazya wako, tatakulu, sweswe swensi na wino ulupindi luzanilwe mu makasa yakwe. 17Ukuwa ati, Awe! Ntanga nchite choo; nkandi umuntu wino ulupindi luzanilwe mu makasa yakwe awino wandi awe a muzya wane; mwenji pitani mupite umutende kwe-so.

Yuda avwanjila Benjemani

18Ngapano Yuda apalamila pakwe weliwe ati, We tatakulu, nkukulambitizya leka umuwomvi wako avwange izwi limwi mwi kutwi lyakwe tatakulu, utaleka uwukali wako wuchise umuwomvi wako; amuno uti ngati we Feronye. 19E tatakulu wawuzizye umuwomvi wakwe ati, Wuzye muli nu so, pamwi umunyonko? 20Naswe atutolelela tatakulu atuti, Tuli nu tata umukote, nu muzuna witu, umwana wa mu wukote wakwe tata, umunyina wafwa, wasyala wenganye mwakwe nyina; yisi wamukunda, 21Achaleka wanenile awawomvi wako uti, Kamuletani njize mulole. 22Twanenile tatakulu atuti, Umulumendo atanga asye yisi, amuno ndi wamusya, yisi angafwa. 23Achaleka wanenile awawomvi wako swinya uti, Ndi mutizile mwaleta umuzuna winu, mutalilola impumi yane. 24Twalanga pano twaya ku muwomvi wako e tata atumunena amazwi yakwe tatakulu. 25Nga ala tata watunena wati, Nyochelani swinya, mukakale ichakulya chitichi, 26twamutolelezile atuti, Tutanga tuye kweneko, suka ndi twapita nu muzuna witu, apano tungaya kweneko; amuno tutanga tukalole impimi ya muntu weyo suka ndi tuli nu muzuna witu. 27Achaleka umuwomvi wako etata watunenile ati, Mwamanya kuno wakwane wampapizile awana wonsi wawili; 28wenga wansya, inyoka inti, Nachawuzimanye wanyankulanwa tunyama tunyama; nsitela mulole ukufika ni lelo. 29Ndi mwasenda nawenye-wee swinya, ndi chiwipe chimwi chiza chamuponela mulileka inje ni mvwi zyamalanda ukufika ukuzimu. 30Achaleka ndi niza nafika ku muwomvi wako etata nanti mulumendo, angafwa, muno uwumi wakwe wuli pa wumi wa mulumendo, 31na wawomvi wako walitelemuchizya umuwomvi wako etata nimvwi zya malanda ukuzimu. 32Ukuwa muno umuwomvi wako wakomelezizye ivya mulumendo kwe tata ati, Ndi ntizile nanyosya umulumendo kwe wewe, ndiwa nu mulandu paminso yakwe tata mu wumi wane wonsi, 33achaleka nkukulambilizya, nkuti, Leka ne muwomvi wako nsyale ne muzya kwe tatakulu; ukuwa umulumendo apite na wanyina. 34Nga ingaya wuli kwe tata ndi insi nu mulumendo? Nkutina ukulola ichiwipe chino chingaponela tata.

Currently Selected:

Intaliko 44: WWN82

Highlight

Copy