Intaliko 42

Awanyina Jozefu awaya ku Ijeputi

1Ala pano Jekapu wivwa kuno ku Ijeputi kuli amalezi, anena awanakwe ati, Nagchani chino mukulolana? 2Anena awanakwe ati, Tekanani njivwile wakuti ku Ijeputi kuli amalezi; tantamukani muye mukatukalile, alyakuti tuwe nu wumi, nanti kufwa. 3Achaleka awanyina Jozefu ikumi awatantamuchila ku Ijeputi mukukala amalezi. 4Ukuwa Jekapu atatumile Benjemani umuzuna wakwe Jozefu na wanyina, muno watinanga ukuti nche ichiwipe chimwi chingamuponela. 5Amuli muno awanakwe Israeli wapitizile mukukala ichakulya apaliponga nawantu wanji, muno ichinkumbili chakuzile munsi ya Kenani.

6E lozefu walinji a mulasi munsi, weliwenye awino wakazyanga awantu wonsi awa munsi. Na wanyina awaya awamufukamila. 7E lozefu alola awanyina, awamanya, ukuwa awapochelela ngati atawamanyile awawavwanzya nu wukali. Awanena ati, Nga mufumile kwi? Nawo awamutolelela awati, Tufumile ku Kenani, twizile mukukala ichakulya. 8Amuli muno Jozefu wamanyizile awanyina, ukuwa weni watamumanyile. 9Jozefu ayizuka ni vilota vino walosile, awanena ati, Mwe manengwe, mwizile mukunengula uwutonte wa nsi yoo. 10Ukuwa awakana awati, Awe tatakulu, twizile mukukala ichakulya swe wazya wako. 11Swe wakwe yisi wenga, swe wasuwilwa, swinya swe wazya wako tusi swe manengwe. 12Awatolelela ati, Mwizile mukunengula uwutonte wansi yoo. 13Nawo awamutolelela awati, Swe wazya wako, tuli kumi na wawili, awakwe yisi wenga munsi ya Kenani; umuzuna witu asyazile nu tata, nga wenga asipo. 14Jozefu awanena ati, Chili ndimuno mvwanjizile, ukuti mwe manengwe. 15Muno achoo mwandi mumanyikwe: nkulapa nu wumi wakwe Fero nkuti, mutanga mupite musuke mwize mukalete umuzuna winu koo. 16Tumani wenga pakwe mwemwe ayize akalete umuzuna winu, pano wamwi mwasyala mu chingololo, alyakuti amazwi yinu yamanyikwe, ndi aya kusimichila. Ndi mwakana nkulapa nu wumi wakwe Fero nkuti, Nachawuzimanye mwe manengwe. 17Awiyalila wonsi mu ng’anda ya vingololo ku manda yatatu.

18Pa wanda wachititatu lozefu awanena ati, Chitani choo alyakuti muwe nu wumi, amuno nkutina Leza; 19ndi mwe wasuwilwa lekani umunyonko wenga asyale, awikwe mu ng’anda ya vingololo, muno ichinkumbili chikuzile wamwi wasende amalezi watwalile awa ku kaya. 20Mwize mulete nu muzuna winu kwe nene, alyakuti amazwi yinu yawe aya kusimichila, peni mutalifwa. Nga awachitila ndi momonye. 21Achaleka awanenana awati, A chakusimichila twawifya ku mwanawitu, achaleka imipamba ya muzimu wakwe ikutuponela, amuno pano watulambilizyanga tutamwivwile; achaleka imipamba yoo ili pakwe sweswe. 22Rubeni awatolelela ati, Wuzye ntawanenile inti mutize muwembuke ku mulumendo? Ukuwa mutatela munjivwe. Achaleka kanonzi uwazi wakwe wukulondwa. 23Watamanyile kuno Jozefu wawivwile, muno pakasi pe woliwo palinji kapilula wa mazwi. 24Afuma pakwe woliwo aya mukulila, ala wanyoka pe woliwo swinya mukuwavwanzya, asolowola Simeoni amunyepa paminso yawo.

Awanyina awanyochela ku Kenani

25Jozefu akomelezya ukwizuzya imyuwa yawo na malezi, nu kuwika indalama zyakwe wila muntu mu muwa wakwe; awapa ni chakulya cha pa musinzo wawo. Avino awachitilwa. 26Apano awanyepelela amalezi pa ndokwe zyawo, awapita. 27Ala pano wenga uwakwe woliwo wiyula umuwa wakwe pakusenda ichakulya cha kupa indokwe yakwe pando, alola indalama mu muwa wakwe; 28anena awanyina ati, Wanyosezya indalama zyane; zyoo zili mu muwa wane; awala wivwa wowonye imyezo yawo ifyaluka awatalika ukuzakaza, awatalika awanenana wakuti, Nga achintu-chi choo chino Leza wachita kwe sweswe?

29Awala wafika kwe yisi e Jekapu munsi ya Kenani, awamunena vyonsi vino vyawaponezile, 30awati umuntu weyo e kapanzya wa munsi watuvwanzizye amazwi mawipe nkaninye, watunenile wati, mwe manengwe ya munsi. 31Ukuwa twamunenile twati, Swe wasuwilwa, tusi swe manengwe. 32Tuli ikumi na wawili, awakwe yisi wenga; wenga wasowela, nu muzuna witu ali nu tata munsi ya Kenani. 33Achaleka e kapanzya wansi watunenile wati, Kwakwe chonyechoo akuno ndiwamanyila kuno mwe wasuwilwa, syani umunyonko wenga kwe nene, sendani amalezi muwapita amuno ku ng’anda zinu kuli ichinkumbili. 34Mwize mulete umuzuna winu kwe nene, apano ndimanya kuno musi mwe manengwe ukuwa mwe wantu wakusimichila. Ndiwasapulila umunyonko, muliwakazya na munsi-nye yoo.

35Awala pano wakwitulula amalezi mu myuwa yawo, silolani, wila muntu indalama zyalinji mu muwa wakwe; achaleka ala yisi na wanakwe walola indalama awazakaza. 36Ngapano e Jekapu e yisi awanena ati, Mwandovezya awana: e Jozefu nawumwi, nu Simeoni nawe nawumwi, swinya mukulonda ukusenda Benjemani; vyonsinye vyoo vikumponela nene. 37Apano Rubeni anena yisi ati, Uyize ukome awanane wawili ndi ntizile nakunyosezya Benjemani; mumpe mu makasa yane, ndimunyosya kwe wewe. 38Ukuwa atolelela ati, Mutanga mupite nu mwanane, amuno umunyina wafwa, wasyala wenganye. Ndi chimwi chingamuponela pa musinzo wuno mukulonda ukupita, ye mulileka imfwe na malanda nimvwi zyane mpaka ukuzimu.

Currently Selected:

Intaliko 42: WWN82

Highlight

Copy