Intaliko 35

Leza apepa Jekapu pa Betele

1Leza anena Jekapu ati, Katuka yanga ku Betele, akuno ukikale uzenge ni leza kwakwe Leza wino walolesile kwakwe wewe pano wasamazile umunyonko Esau. 2Achaleka Jekapu anena wonsi awa pa chiwanza chakwe, wonsi wane walinji nawo ati, Fumyani amakolania ya munsi zinji yano muli nayo, yiswefyani mwewenecho, muzwale ni vizwalo vinji. 3Tuyani tukatuke tuye ku Betele, alyakuti nkazenge ileza kweneko nkazenjele Leza weyo wino wanjavwizye pano nalinji na matamyo amuno wandi awawa nani mu musinzo wane wonse. 4Achaleka awapa Jekapu utumakolania twansi zinji tonsi tuno walinji nato, awamupa na mantenga yonsi yano wasomekanga ku makutwi yawo; Jekapu afisa mwisika lya muwuyu wuno walinji papipi nu Shekemu.

5Pano wakatuka wapita ukutinia kwakwe Leza akuya mu twaya tonsi tuno twaliwilizizye, alyakuti watize wakonke awanakwe Jekapu. 6Apano Jekapu afika kuno wakutanji Luzi (wino wa Begele), munsi ya Kenani, weliwe na wantu wano walinji nawo. 7Akuno aya azenga ileza ayita amasyo yayonye ati Eli-Betele, amuno apano Leza wayiwumbuzile kwe Jekapu pano wasamazile umunyina. 8Nawe Debora ekalela wakwe Rebeka afwa, azikwa mwisika lya muwuyu kwi sika kwe Betele; ayita amasyo yayo ati, Umuwuyu-wakulosya.

9Leza aloleka kwe Jekapu swinya pano wafumanga ku Mesopotamia, amupepa. 10Leza amunena ati, Utandi uwakwitwa izina lyako swinya ilyakwe Jekapu, nkandi ilyakwe Israeli. Achaleka ayitwa Israeli. 11Leza amunena ati, Ne Leza wa maka yonsi: vulanga uwanyama; umwiko nu mupanda wa myiko ni zya mfumu ziliwafuma mwe wewe. 12Insi yino napile Abrahamu nu Ayizeki, ndikupa wewe swinya iliwa aya wizikulu wako. 13Ngapano Leza afuma pakwe weliwe pa masyo yano wavwanganga nawe. 14Jekapu azenga mawe pa masyo yano watela wakuvwanjila; azenga ulupanda lwa mawe; ayitila penepo ivifimwa vya kung’wa na mafuta. 15Achaleka Jekapu ayita masyo yayo ati, Betele.

Imfwa yakwe Rakelo

16Walanga vino wafuma ku Betele ye kwasyala imilundu yimwi ukufika ku Efrata, Rakelo avindwa, awalonda ukupapa. 17Ala pano akutamika ni mpapo, nachimbuza amunena ati, Utize uwatina amuno kanonzi wandi uwe nu mwana winji umonsi. 18Muno umwezo wakwe wafumile (muno wafwile) ayita umwana ati, Benoni; ukuwa yisi amwita izina lyakwe Benjemani. 19Achaleka Rakelo afwa, azikwa mumbali ya nzila yino yalungama ku Efrata (alili lyakuti Bethlehemu.) 20Jekapu azenga ulupanda lwa mawe pankolelo pa nkungwe yakwe; ichimanyilo cha pa nkungwe yakwe Rakelo chilipo ukufika ni lelo. 21Israeli awapita aya azenga imitanda yakwe pankolelo ya kapungu ka mu Edere.

Awanakwe Jekapu

22Pano Israeli wisile munsi-nye yoyo e Rubeni umwanakwe azeleluka nu Biliha umuzya wino yisi watwazile, nu yisi amanya.

Awanakwe Jekapu walinji ikumi na wawili. 23Awana wa mwe Leya: Rubeni (ekatote wakwe Jekapu), Simeoni, Levi, Yuda, Isakari nu Zebuloni. 24Awana wa mwe Rakelo: Jozefu nu Benjemani. 25Awana wa mwe Biliha umuwomvi wakwe Rakelo: Dani nu Nafutali. 26Awana wa mwe Zilipa, umuwomvi wakwe Leya: Gadi nu Asheri. Waa awanakwe Jekapu wano wapafile mu Mesopotamia.

Imfwa yakwe Ayizeki

27Jekapu afika kwe yisi Ayizeki ku Mamure, pamwi Kiriataraba (alili lyakuti Habroni), kuno Abrahamu nu Ayizeki wikalanga. 28Ayizeki iwalinji ni myaka umwanda wonga ni myaka amakumi kananimonsi (180). 29Apano Ayizeki watayile umwezo wakwe afwa aya ku wakwasi wakwe, umukalamba wa manda mavule; nga wanakwe Esau nu Jekapu awamuzika.

Currently Selected:

Intaliko 35: WWN82

Highlight

Copy