Ukufuma 1
1
Awa Israeli walemilwe uwuwi mu Ijeputi
1Yaa amazina yawanakwe Jekapu awanachonsi wane wayile nuyisi ku Ijeputi, wila muntu niwuvi lyakwe. 2E Rubeni nu Simeoni, e Levi, nu Yuda, 3e Isakari, nu Zebuloni, nu Benjemani, 4e Dani, nu Nafutali, e Gadi nu Asheri. 5Impendwa yikwata lyawantu wane walinji alikwata lyakwe Jekapu-nye walinji amakumi munenulambali. Jozefu weni watezile ali mu Ijeputi kali. 6E Josefu nawanyina ni nkulonye yoyo yonsi awafwa. 7Ukuwa awa Israeli walinji nikwata vule nkaninye swinya awawa na maka awizula insi-pwi.
8Imfumu ’mpya yino itamanyile ivyakwe Jozefu ipyana pawufumu mu Ijeputi. 9Inena awantu wakwe iti, Lolani, awantunye waa awa Israeli wavula nkaninye swinya wawa na maka achaleka twawa muwulwani. 10Aleni yivwani, tule tuwachitile amana alyakuti tuleke watize’ wanyame. Pali napano isumo liza lyakatuka, wangiza wayisanzye kuwalwani witu watusambuchile watulwisya, wongoloke wafume munsi yoo. 11Achaleka awawawichila awakuwakuwizya alyakuti wawatozole pakuwakuwizya pano wakuwomba imilimo mikalambane; awa Israeli awazenjela Fero utwaya e Pitomu nu Ramesesi, umwakusengulila ivyakulya. 12Lelo naponye chingatenga awantu wa mu Ijeputi wawakalalizile nu kuwayimvya, awa Israeli awanyama awalusya awakwila monsinye. Awantu wa mu Ijeputi awapata awa Israeli awawatina nu kuwatina; 13awawakuwizya awawachita uwuzya awaleka nu wumi wawo awuwipa pa kuwomba imilimo mikalambane iyakpondela ivu ni yakumata injelwa, 14ni milimo mikalambane yonsi iyamuvyalo. Awawakuwizya ukuwomba imilimo yamisango yonsi imikalambane.
15Ngapano imfumu ivwanga nawanachimbuza wano wapafyanga awanachi wa chi-Heberi; wumwi wamwitanga wakuti Shifura, nu muwuye watanji Puwa. 16Ati, Mukala pano mukuteka awanachi wa chi-Heberi pakupapa, awanena ati, Ndi umwana amonsi, amumukoma, ukuwa ndi amwanachi, amuleka awanga. 17Ukuwa wanachimbuza wawo watinanga Leza, awakana ukutontela imfumu, weni awaleka na wanawonsinye awalanga awapuma. 18Imfumu ituma intumi kwe wanachimbuza iwawuzya iti, Ngamuno chani chino mwachita woo mwaleka na wachilumendo wawa awapuma? 19Awatolelela awati, Awanachi wa chiHeberi watakolana na wanachi wa mu Ijeputi; chawapepuchila pakupapa akula pano nachimbuza atani afike kwewoliwo, umwana alanga akwasilwe. 20Leza wachisile wanachimbuzanye wawo ichete, nga awa Israeli awalanga wakunyama swinya wakuwa na maka. 21Muno wanachimbuza watinanga Leza awapa iwuvi. 22Ngapano Fero akomelezya awantu wakwe wonsi ati, Umwana wensi umulumendo wino wakwatwa ku wa Heberi amumusumbila muluzi, ukuwa uwachikazyana weni amuleka awanga.
Currently Selected:
Ukufuma 1: WWN82
Highlight
Share
Copy
Want to have your highlights saved across all your devices? Sign up or sign in
Chinamwanga Bible © United Bible Societies, 1981.
