Lûqa 22
22
Îxanetê Yahûdayî
(Metta 26:1-5,14-15; Marqos 14:1-2,10-11; Yûhena 11:45-53)
1Roşanê Nanê Bêmîrazî yê cihûdan, bi nameyê xwu yo bîn Roşanê Fisihî bibi nizdî. 2Serkahînî û alimê Tewratî seba ke şarî ra tersayne, yew rayiro munasib geyrayne ke Îsayî bikişê. 3Eno mabeyn de, Îblîs dekewt qelbê Yahûda Îsxerîyotî, ey zî goş da Îblîsî. Yahûda Îsxerîyot diwês hewarîyanê Îsayî ra yew bi. 4Şi serkahînan û qumandananê muhafizanê mabedî het, înan dir qisey kerd ke do Îsayî senî teslîmê destê înan bikero. 5Keyfê înan enê rê ame û razî biyî ke seba enê pere bidê ey. 6Yahûdayî eno qebûl kerd û firsend geyra, gama ke qelebalix çinê bo Îsayî teslîmê destê înan bikero.
Şamîya Peyîne
(Metta 26:17-35; Marqos 14:12-31; Yûhena 13:21-30,36-38; Korîntijî-I 11:23-25)
7Roja Nanê Bêmîrazî bî. Gereka a roje qurbanê Roşanê Fisihî biameyne serebirnayiş. 8Îsayî Petrûsî û Yûhenayî ra va: “Şêrê, seba ke ma werdê Roşanê Fisihî biwerê, amadekarî bikerê.”
9Înan zî persa va: “Ti wazenê ma ça de werd amade bikerê?”
10Îsayî înan ra wina va: “Biewnîyê, gama ke şima dekewtî şaristan, yew mêrik do vejîyo vera şima. Doreyê awe dest de yo. Heta keyeyo ke o şino ey teqîb bikerê. 11Wayirê keyeyî ra vajê ‘Seydayê ma perseno vano, odaya meymanan ke ez û şagirdê xwu piya ma do tede werdê Roşanê Fisihî biwerê, ça ya?’ 12Wayirê keyeyî do qatê serî de yew odaya rakerdî ya hîra nîşanê şima bido. Werdî, uca amade bikerê.”
13Petrûs û Yûhena uca ra aqitîyayî. Înan her çî seke Îsayî vatbi dî û werdê Roşanê Fisihî amade kerd.
14-15Gama ke wextê werdî ame, Îsa û hewarîyanê xwu sifre de cayê xwu girewt. Îsayî înan ra va: “Mi zaf waşt, verî ke ez dej biancî û bimirî, ez enê werdê Roşanê Fisihî şima dir piya biwerî. 16Ez şima rê enê vajî, eno werdê Roşanê Fisihî Hukimranîya Homayî de do tam bireso manaya xwu; heta o wext ez do reyna enê werdî nêwerî.”
17Dima, yew uskura girewte. Homayî rê şukir kerd û wina va: “Ena uskura bigêrê û piya ci ra bişimê. 18Ez şima rê enê vajî, heta ke Hukimranîya Homayî bêro ez do reyna mehsûlê mehşilêre ra nêşimî.”
19Dima, nane girewte û şukir kerd. Nane kerde leteyî û da înan. Va: “Eno bedenê min o; bedeno ke oxirê şima de feda beno. Seba ke şima mi biyarê xwu vîr, wina bikerê.”
20Bi eynî şekil, badê werdî uskura girewte û wina va: “Ena uskura ehdo newe yo; ehdo newe ke oxirê şima de bi rişnayişê gunîya mi dest pê keno. 21Feqet biewnîyê, destê min û destê mêrikê ke do mi rê îxanet bikero eynî sifre de yê. 22Xwura Benîademo Semawî rayiro bellîkerde de şino merg. Feqet, wey halê ê mêrikî rê ke Benîademê Semawî rê îxanet keno!”
23Hewarîyan mabeynê xwu de dest bi minaqeşe kerd, va: “Kam do enê îxanetî bikero?”
Kam berz o?
24Sewbîna zî, mabeynê hewarîyan de minaqeşe dest pê kerd ke înan ra kam do tewr berz bihesibiyo. 25Îsayî înan ra wina va: “Hukimdarê ena dinya, şarê xwu rê tehekum kenê. Sermiyanî zî, payeyê hewlan danê xwu. 26Şima wina mebê. Mabeynê şima de tewr pîl, wa sey tewr qijî bo; îdarekar, wa sey xizmetkarî bo. 27Kam hîna berz o? O ke sifre de ronişte yo, yan o ke xizmet keno? O ke sifre de ronişte yo, ne? Feqet ez, mabeynê şima de sey xizmetkarî ya. 28Rojanê ke ez ameya ceribnayiş de, înanê ke mi dir deyax kerd, şima yê. 29Senî ke Babîyê min ê Semawî hukimranî da mi, ez zî hukimranî dana şima. 30Bi eno qeyde, hukimranîya mi de şima do sifreyê mi de biwerê û bişimê. Şima do textê hukmî de ronişê û diwês eşîranê Îsraîlî mehkeme bikerê.”
Înkarê Petrûsî verîna diyeno zanayiş
31“Şîmûn, Şîmûn! Îblîsî, seba ke sey xeleyî pirojine ra bivîyarno, şima waştî. 32Feqet mi, seba ke ti îmanê xwu vindî nêkerê, dua kerde. Gama ke to tewbe kerd û ti ageyrayî, qewet bide way û birayanê xwu yê bawermendan.”
33Şîmûnî Îsayî ra va: “Wayirê ma, ez to dir şina zindan zî, merg zî.”
34Îsayî wina cewab da: “Petrûs, ez to rê enê vajî. Emşo, verî ke dîk veng bido, ti do hîrê rey înkar bikerê ke ti mi şinasnenê.”
35Dima hewarîyanê xwu ra persa va: “Wexto ke mi şima bê kîse, bê tewre û bê çaroxan şirawitî, yew kêmanîya şima biye?”
Înan zî va: “Tu kêmanîya ma nêbiye.”
36Îsayî wina va: “La nika, o ke kîseyê ci zî esto, o ke tewreyê ci zî esto, wa bigêro xwu het. O ke şimşêrê ci çinê yo, wa ebaya xwu biroşo û yew şimşêr bierîno. 37#Yeşeya 53:12Ez şima rê enê vajî, gereka eno vateyê pêxembertî heyatê mi de bêro ca: ‘O sûcdaran dir yew hesibiya.’ Tay mendo, çiyê ke derheqê mi de nusîyayê bêrê ca.”
38Hewarîyan va: “Wayirê ma, biewnî, tiya de di şimşêrî estê.”
Îsayî va: “Bes!”
Îsa Koyê Zeytûne de dua keno
(Metta 26:36-46; Marqos 14:32-42)
39Îsa vejîya teber. Sey her wextî şi Koyê Zeytûne. Şagirdê ci zî Ey dima şî. 40Gama ke resayî uca, Îsayî înan ra va “Seba ke şima nêrê xapênayiş dua bikerê.”
41Dima, qasê mesafeyê eştişê yew kerra înan ra şi dûrî. Çok da û dua kerde va: 42“Babîyo Semawî, eger miradê to gore yo, dejê ke ez do biancî mi ra dûrî bibere. Ancî zî, neke yê mi, wa waştişê to bo.” 43Sema ra yew melek Îsayî ra asa, qewet da Ey. 44Îsa miyanê yew dejê xorînî de bi; hîna bi heraret dua kerde. Çilkê areqê ci sey çilkê gunî kewtêne erd.
45Dua ra wurişt û ageyra verê şagirdanê xwu. Dî ke ê tesîrê xemgînî ra şiyê hewn a. 46Îsayî înan ra va: “Şima çi ra şiyê hewn a? Wurzê, dua bikerê ke şima nêrê xapênayiş.”
Îsa yeno tepiştiş
(Metta 26:47-68; Marqos 14:43-50; Yûhena 18:3-12)
47Îsayî hema qisey kerdêne ke yew qelebalix asa. Yahûda vernîya înan de bi, o zî diwês hewarîyanê Îsayî ra yew bi. Seba ke Îsayî maçî bikero, aver ame. 48Îsayî ey ra va: “Yahûda, ti bi yew maç Benîademê Semawî rê îxanet kenê?”
49Înanê dorê Îsayî, gama ke fam kerd do se bibo, va: “Wayirê ma, ma bi şimşêr êrîş bikerê?” 50Înan miyan ra yewî, da xizmetkarê serkahînî ro, goşê ci yo raşt perna.
51Feqet Îsayî va: “Vinderê, bes o!” Dima, destê xwu sawit cayê goşê xizmetkarî ra û şîfa da ey.
52Îsayî serkahînan, qumandananê muhafizanê mabedî û sermiyananê ke gala ci kerdêne ra wina va: “Qey ez heydûd a ke şima bi şimşêran û çuwayan ameyî mi ser? 53Her roje mabed de ez şima reyde biya, şima destê xwu nêsawit mi ra. La ena saete saeta şima ya, wext wextê hukmê tarîtî yo.”
Petrûs înkar keno ke Îsayî şinasneno
54Înan Îsa tepişt û berd keyeyê serkahînî. Petrûsî dûrî ra ê teqîb kerdêne. 55Înan orteyê hewşî de adir wekerd û roniştî, Petrûs zî ame înan miyan de ronişt. 56Yew keyneka xizmetkare dî ke Petrûs verê adirî de ronişte yo. Bi dîqet ewnîya ey ra, va: “Eno mêrik zî Îsayî dir piya bi.”
57Labelê Petrûsî va: “Cînek, ez Ey nêşinasnena” û înkar kerd.
58Bineyke badê yewnayî o dî va: “Ti zî înan ra yê!”
Petrûsî va: “Ez nîya, heval!”
59Teqrîben yew saete badêna, yewnayî bi israr wina va: “Tu şibheyê mi çinê yo, eno mêrik zî Ey dir piya bi. Çimkî Celîleyij o.”
60Petrûsî va: “Ti vanê se mêrik, ez fam nêkena!” Tam a esna de, Petrûsî hema qisey kerdêne, dîkî veng da.
61Wayirê ma Îsa fetelîya û ewnîya Petrûsî ra. O wext Petrûsî ard xwu vîr ke Îsayî ey ra vatbi “Petrûs, emşo verî ke dîk veng bido, ti do hîrê rey mi înkar bikerê.” 62Petrûs vejîya teber û zerrî ra berma.
63Mêrikanê ke Îsa tepiştbi, bi Ey tinaz kerd û dest pê kerd, O kuwa. 64Çimê ci girêdayî û va: “Eke ti pêxember ê, dê bizane, ma ra kamî da to ro?” 65Û Ey rê hema zaf nengî çînayî.
Îsa hizûrê Meclisê Berzî de
(Metta 26:59-66; Marqos 14:55-64; Yûhena 18:19-24)
66Mecliso Berz ke sermiyanan, kahînan û alimanê Tewratî ra ameyne meydan, gama ke roj akewt kom bi. Muhafizan Îsa ard hizûrê enê meclisî. 67Înan Ey ra va: “Eger ti Mesîh ê, ma rê vaje.”
Îsayî wina va: “Ez şima rê vajî zî şima mi ra bawer nêkenê. 68Ez perse bipersî zî şima cewab nêdanê. 69Feqet tiya ra pey Benîademo Semawî do kişta raşte ya Homayê qadirî de ronişo.”
70Hemîne têdir persa va: “Yanî ti Lajê Homayî yê?”
Îsayî zî înan ra va: “Seke şima vanê, ez O ya.”
71Înan va: “Êdî şahidî rê çi îhtîyacê ma esto? Çiyê ke vatî, ma bîzat fekê ci ra şinawitî.”
Currently Selected:
Lûqa 22: diqSZZ
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
