Lûqa 21

Bexşo heqîqî

(Marqos 12:41-44)

1Îsayî sereyê xwu berz kerd, zengînê ke bexşê xwu eştêne qutîya bexşî, dîyî. 2-3Eno mabeyn de, yew cînîya vîyaya feqîre ameye û di pereyê paxirî eştî qutî. Îsayî gama ke eno dî, wina va: “Ena cînîya vîyaya feqîre tenya di pereyê paxirî dayî. La heqîqet eno yo ke, aye her kesî ra zêde da. 4Çimkî înanê bînan çiyo ke serwetê xwu ra zêde mendo, eşt. La herçiqas ena cîneke zaf feqîr a zî, çiyê aye esto, heme da.”

Îqazê derheqê ameyeyî de

(Metta 24:1-35; Marqos 13:1-31)

5-6Gama ke tayê kesan behs kerd ke mabed çiqas weş bi kerrayan û bi neziran ameyo xemilnayiş, Îsayî va: “Do roje bêro, her çiyo ke şima tiya vînenê birijîyo. Do kerra kerra ser o nêmano.”

7Înan zî persa va: “Seydayê ma, enê çiyê ke ti vanê do çi wext bibê? Elameto ke biyayişê nînan nîşan dano çi yo?”

8Îsayî wina va: “Dîqet bikerê! Wa kes şima nêxapêno. Zaf kesî do vejîyê meydan û nameyê mi bikar biyarê. Do vajê ‘Ez Mesîh a’ û vajê ‘Wext bi nizdî.’ Înan dima meşêrê! 9Gama ke şima xeberanê herbî û îsyanî şinawenê, telaşe mekerê. Verî, lazim o ke enê bibê. Feqet eno, hema peynîya dinya nîyo.”

10Dima, enê îlawe kerdî, va: “Miletî miletan dir, dewletî dewletan dir do herb bikerê. 11Do erdlerzê şîdetinî, ca bi ca xelayî û janê nêweşîyan bêrê meydan. Do biyenê dehşetane bibê, do asmîn de elametê ecêbî bêrê dîyayiş.

12“Feqet biyayişê enê heme çiyan ra ver, do însanî şima bitepişê û ezîyet bikerê. Seba ke ceza bikerê, do şima teslîmê mehkemayan bikerê, do şima dekerê zindanan; do şima kaşbikerê verê hukimdaran û walîyan. Enê heme çî, do seba nameyê mi bêrê şima sere de. 13Eno zî şima rê do bibo firsend ke şima derheqê mi de şahidî bikerê. 14Enê rewşan de nêbo ke şima bifikirîyê vajê ‘Ma do senî xwu midafea bikerê?’ 15Ez do hêzê xîtabetî û hîkmet bidî şima; neyarê şima do nêeşkê vera enê de vinderê û cewabê şima bidê. 16Dadî û babîyê şima, way û birayê şima, merdim û hevalê şima bîle do şima bidê dest û şima ra tayê kesan bidê kiştiş. 17Seba nameyê mi do her kes şima ra nefret bikero. 18Feqet do tek yew mûya porê şima rê zî zirar nêro. 19Şima do bi sebir û deyax ganê xwu bixelisnê.”

Rijîyayişê Yeruşalîmî

20“Gama ke şima dî Yeruşalîm hetê artêşan ra ameyo dagîrkerdiş, bizanê ke rijyayişê şaristanî biyo nizdî. 21O wext êyê ke Yahûdîye de yê, wa biremê koyan. Êyê ke şaristan de yê, wa uca ra aqitîyê. Êyê ke yaban de yê, wa anêgeyrê şaristan. 22Ê rojî, enê rojî yê ke, nuşteyê ke pêxemberan nuştê do bêrê ca û Homa do enê şarî ceza bikero. 23Wey halê ê cînîyan rê ke ê rojan de hemîla yê, yan zî putekan lewnenê! Çimkî welat do rojanê zaf zehmetinan de bo. Eno şar do raştê xezebê Homayî bêro. 24Yew qismê şarî do bierzîyo fekê şimşêran, êyê bînî zî do êsîr bigêrîyê û miyanê miletan ra bêrê vilakerdiş. Heta ke wextê miletanê bînan temam bibo, Yeruşalîm do binê linganê înan de bêro pelixnayiş.

25“Do roj û aşme û estarayan de elametê ecêbî bêrê dîyayiş. Heme miletê ke rîyê erdî de yê, do bi xumexumê derya û piroginayişê pêlan serûbin bibê û şaş bimanê. 26Însanî, gama ke felaketê ke do bêrê dinya ser de pawenê do tersan ra bixeriqîyê. Çimkî do qewetê semawî bilerzê. 27O wext do bivînê ke Benîademo Semawî miyanê hewran de bi qudreto berz û bi îhtîşam yeno. 28Gama ke biyayişê nînan dest pê kerd, tîk vinderê û sereyê xwu berz bikerê. Çimkî xelasîya şima nizdî ya.”

Vateyê Îsayî ebedî yê

29Dima, Îsayî înan rê eno mîsal qisey kerd: “Biewnîyê încîrêre ra, yan zî yew dara bîne ra. 30Gama ke darî pindik danê şima fam kenê ke mewsimê hamnanî biyo nizdî. 31Bi eynî şekil, gama ke enê biyenî qewimîyenê, bizanê ke Hukimranîya Homayî nizdî ya. 32Ez şima rê enê vajî, heta ke enê heme çî nêqewimîyê, eno nesil do meydan ra wenêdarîyo. 33Erd û asmîn do meydan ra wedarîyê, la vateyê mi esla do meydan ra wenêdarîyê.”

Her wext amade bên

34“Xwu rê dîqet bikerê. Mekewê sefahet û serxoştî û endîşeyanê enê heyatî dima. Wina ke, roja qîyametî, wa şima xafil nêqefilno. 35Çimkî, a roje do bêro temamê înanê ke dinya de cûyenê ser. 36Coka her wext amade bên. Seba ke şima bieşkê enê heme biyenan bivîyarnê û bi cesaret vejîyê hizûrê Benîademê Semawî, dua bikerê.”

37Îsayî biroj hewşê mabedî de waezî dayne, bişewe zî şaristan ra vejîyayne û şiyêne Koyê Zeytûne de mendêne. 38Şar zî seba ke goşdarîya Ey bikero, her roje rew şiyêne mabed.

Currently Selected:

Lûqa 21: diqSZZ

Highlight

Copy