Lûqa 19

Zakay

1Îsa dekewt Erîha. Zereyê şaristanî ra vîyartêne. 2Erîha de yew mêrik estbi, nameyê ci Zakay bi. Serekê memûranê bacî bi; zaf zengîn bi. 3Waştêne bivîno ke Îsa kam o. La seba ke qama ey kilmeke bî, qelebalix ra nêeşkayne Ey bivîno. 4Vernî de vazda şi cayo ke Îsa do bivîyartêne. Seba ke Ey bivîno, şi serê yew încîrêra yabanî.

5Îsa gama ke ame cayo ke Zakay uca bi, acor ewnîya û va “Zakay, lez bêre war! Gereka ewro ez keyeyê to de bimanî.” 6Zakay tavilî ame war û bi keyf Îsa keyeyê xwu de kerd meyman.

7Çi kesê ke eno dî, vajorîyayî û va “Îsa senî şino beno meymanê yew mêrikê dîn ra dûrî?”

8Zakay wurişt payanî û Îsayî ra wina va: “Wayirê ma, ez do nîmeyê mal û milkê xwu bidî feqîran. Eger mi yewî ra bi neheqî çiyêk girewto, ez do çar qatê ci apey bidî.”

9Îsayî wina va: “Ewro eno keye resa xelasî. Çimkî eno mêrik zî neslê Îbrahîmî ra yo.#19:9 Neslê Îbrahîmî: Zakay zî sey heme cihûdan neslê Îbrahîmî ra bi. Labelê riyê karo ke kerdbi ra cihûdan o cemat ra tecrît kerdbi. Îsa tiya de gama ke ey ra vano “neslê Îbrahîmî” wazeno tekîd bikero ke Zakay yew bawermendo cihûdo bêriya yo. 10Axir, Benîademo Semawî seba ke vindîbiyayî bigeyro û bixelisno ame.”

Mîsalê des kîseyî peran

(Metta 25:14-30)

11Gama ke qelebalixî enê vateyî goşdarî kerdêne, Îsa nizdîyê Yeruşalîmî de bi û însanan vatêne qey do Hukimranîya Homayî tavilî vejîyo meydan. Eno semed ra, Îsayî qiseykerdişê xwu bi eno mîsal dewam kerd: 12“Yew mêriko esilzade, seba ke hetê împaratorî ra bibo hukimdar, xwu amade kerdo ke şêro yew welato dûrî. Dima ageyrayne welatê xwu û şarê xwu îdare kerdêne. 13Veng dayo xulamanê xwu ra des kesan û her yewî rê kîseyêk pere dayo û vato ‘Heta ke ez ageyrî enê pereyî bişixulnê.’

14“La şarê welatê ci ey ra nefret kerdêne. Ey dima împaratorî rê temsîlkarî şirawitê û xebere daya, vato ‘Ma nêwazenê eno mêrik bibo hukimdarê ma.’

15“La ancî zî mêrik biyo hukimdar. Senî ke ageyrayo welatê xwu, veng dayo xulamanê ke pereyê xwu emanetê înan kerdê û waşto bimûso înan çi qezenc kerdo. 16Xulamo verîn ameyo vato ‘Wayirê mi, to yew kîse pere dabi mi, mi des kîseyî qezenc kerdî.’

17“Hukimdarî ey ra vato ‘Aferîn, xulamo xeyrin! To nîşan da ke karo qijek de ti yewo wayirê îtîmadî yê. Eno semed ra mi îdareyê des şaristanan da to.’

18“Xulamê diyinî vato ‘Wayirê mi, mi bi yew kîseyê pereyê to panc kîseyî qezenc kerdî.’

19“Hukimdarî vato ‘Mi ti panc şaristanan ser o kerdî wayirê selahîyetî.’

20“Dima yewna xulam ameyo vato ‘Wayirê mi, ha to rê kîseyê peranê to. Mi yew desmale de piştî û nimitî. 21Ez to ra tersaya, çimkî ti yew mêriko sert ê. Çiyo ke to kede nêdaya ci, ti gênê. Çiyo ke to nêramito, ti çînenê.’

22“Hukimdarî ey ra wina vato: ‘Gidî xulamo bêxeyr! Ti bi fekê xwu xwu danê dest. Madem to zanayne ez yew mêriko sert a, çiyo ke mi kede nêdaya ci ez gêna, çiyo ke mi nêramito ez çînena, 23madem wina yo, to çi ra pereyê mi nêşixulna? Gama ke ez ageyrayne, mi do bi karê ci apey bigirewtêne.’

24“Dima, hukimdarî înanê dorê xwu ra vato ‘Kîseyê peran enê xulamî ra bigêrê, bidê eyê ke bi des kîseyan ameyo.’

25“Mêrikan hukimdarî ra vato ‘Feqet wayirê ma, xwura des kîseyî pereyê ey estê!’

26“Hukimdarî wina cewab dayo înan: ‘Ez şima rê enê vajî, o ke diyayo ci û bi ey kar kerdo rê do hîna zaf bidiyo; eyê ke kar nêkerdo zî, do çiyo ke destê ci de yo ra zî bibo. 27Ma bêrê înan ser, êyê ke nêwazenê ez bibî hukimdar, ê dişmenanê mi biyarê tiya û verê çimê mi de bierzê şimşêran fek.’”

Îsa Yeruşalîm de rûmet vîneno

(Metta 21:1-11; Marqos 11:1-11; Yûhena 12:12-19)

28Badê ke Îsayî enê vateyî vatî, vernî de şi û ver bi Yeruşalîm rayir girewt. 29Gama ke ame nizdîyê Beytfacî û Beytanya, enê dewî verardê Koyê Zeytûne de bî, şagirdanê xwu ra di kesî vernî de şirawitî. 30Înan ra wina va: “Şêrê ena dewa ke vera ma de ya. Eke şima resayî dewe, şima do yew kurrîyo beste bivînê ke qet kes nêwenişto ci. Ey akerê û mi rê biyarê. 31Eke yew şima ra biperso vajo ‘Şima çi ra kurrî akenê?’ Vajê ‘Îhtîyacê Wayirê ma pê esto.’”

32Her di şagirdî şî û her çî tam zî seke Îsayî vatbi dî. 33Gama ke kurrî akerdêne, wayiranê ci persa va: “Şima çi ra kurrî akenê?”

34Şagirdan va “Îhtîyacê Wayirê ma pê esto.” 35Bi eno qeyde kurrî ard Îsayî het. Înan ebayê xwu nayî kurrî ser û Îsa wenişna. 36Îsa gama ke kurrî ser o ver bi Yeruşalîm aver şiyêne, şarî zî ebayê xwu rayir de ravistêne. 37Îsa êdî amebi nizdîyê rayirê ke Koyê Zeytûne ra acêr şiyêne. Qelebalixo pîl ke şagirdanê ci ra ameyo meydan keyfweşî miyan de bi. Qelebalixî semedê mucîzeyanê ke dîbî, bi vengo berz Homayî rê hemd kerdêne. 38#Zebûr 118:26Vatêne “Hukimdaro ke bi selahîyetê Rebî yeno, mibarek bo! Asîman de silamet, Homayo ke erşê ala de yo rê hemd bo!”

39Qelebalix ra tayê Fêrisîyan Îsayî ra va: “Seyda, vengê şagirdanê xwu bibirne!”

40Îsayî zî cewab da înan, va: “Ez şima rê enê vajî, eger vengê înan bibirîyo, kerrayî yenê ziwan!”

Îsa semedê Yeruşalîmî bermeno

41Îsa amebi nizdîyê Yeruşalîmî. Gama ke şaristan dî, dest bi bermî kerd. 42Wina va: “Werrekna to zî ewro rayiro ke şino silametî ferq bikerdêne! La ena game ti nêeşkenê enê rayirî bivînê. 43Do roje bêro, dişmenê to do çeper dorê to de biancê û her hetan ra bêrê to ser. 44Do to erd ra duz bikerê û şarê to qetil bikerê. To de do kerra kerra ser o nêverdê. Çimkî saeta ke Homa ame ardimê to, to ferq nêkerd.”

Îsa şino mabed

(Metta 21:12-17; Marqos 11:15-19; Yûhena 2:12-22)

45Îsa dekewt hewşê mabedî, dest pê kerd înanê ke çî rotêne uca ra qewirnayî. 46#Yeşeya 56:7#Yeremya 7:11Înan ra va: “Ameyo nuştiş ke ‘Keyê mi do bibo keyeyê duayan.’ Labelê şima tiya kerdo ‘halînê heydûdan’.”

47Îsayî her roje hewşê mabedî de waezî dayne. Serkahînan, alimanê Tewratî û sermiyananê şarî zî waşt Ey bikişê. 48La nêzanayne do enê senî bikerê. Çimkî şarî Îsa zerrî ra goşdarî kerdêne.

Currently Selected:

Lûqa 19: diqSZZ

Highlight

Copy