Mateos 17

Jesús yocdyejyi jiꞌcaviti

(Mar 9:2-13; Luc 9:28-36)

1Aty jäbän mạyedyeꞌ jiyiꞌ chat qui muꞌ Jesús därtyiꞌcheꞌ mụcuꞌ bojvi, muꞌin mọmoꞌ cạcsi Pedro judyeyaꞌ Santiago vojitytumdye muꞌ Juan, mijam yoctyiꞌ cäc̣häꞌ muꞌyaꞌ in. 2Muꞌcheꞌ muꞌ Jesús yocdyejyi muꞌinsiꞌyaꞌ vej muꞌin, anic pashyi vejyaꞌ jeñej tsun joꞌmeij, chipashyidye quịꞌsiꞌ muꞌ jaiꞌbaty muꞌ. 3Ĉụiꞌdye muꞌin jiꞌcaviti in Moisésvun judyeyaꞌ Elíasvun, p̂eyete Jesús in. 4Pedro p̂eyaqui jéte Jesús:

—Jịꞌchiyacsity, ¡anic jämꞌ úyaꞌ q̂uinꞌ tsun! Mạꞌjeꞌ jụijyaꞌ mi, yụ raꞌ chibin p̂isijsis acaꞌ jämꞌtyeꞌ, yiris raꞌ mídyes, judyeyaꞌ Moisésdyes judyeyaꞌ Elíasdyes.

5Pedro p̂eyacvaꞌjoij meꞌĉandye juñumjeyacsiꞌ pashyis dyicbaꞌbadyeꞌ. Yiris seꞌveꞌ in p̂eyacdyeꞌ dyicbaꞌbadyeꞌĉan, yiꞌ:

—Uts nash mạꞌjeyacdyety Ạvaꞌ yụ, anic maꞌjotaqui yụ, muꞌ raꞌ seꞌvetinte miꞌin.

6Jịꞌchiyactyiꞌ Jesústyiꞌ muꞌ aty seꞌveꞌyaꞌ in mọꞌ p̂eyacdyeꞌ, anic tyumꞌ tyeij ĉojtyiꞌ muꞌin, dyụtsyi in täjjequeꞌ jac jáfiyaꞌ muꞌin. 7Jesús c̣hẹiꞌyaꞌyi muꞌinyaꞌ in, judyeyaꞌ tocoꞌjeyacsi, chat qui jéyacsi:

—Sacyevac, jam raꞌ noiꞌyi miꞌin.

8Aty cạvebanyaꞌ in itŝij muꞌyaꞌ in, muꞌdyety muꞌyaꞌ Jesús.

9Aty chạbanyaꞌ mụcuꞌchety in, muꞌ Jesús jéyacsi:

—Mijam raꞌ méquiꞌ jịꞌchiqueyacsi muntyiꞌ miꞌin ọij cạvetiñes q̂uinꞌ, junꞌ quiꞌ chuc aty vañinyebanyaꞌ yụ Anictyity Muntyiꞌ yụ, chat qui raꞌ q̂uinꞌdyemꞌ jịꞌchiqueyacsi miꞌin ọij cạvetiñes q̂uinꞌ.

10Jịꞌchiyactyiꞌ Jesústyiꞌ muꞌ jéte in:

—¿Junꞌ buty yi muꞌin jịꞌchiyacsity yụꞌtacdyeꞌ in Elías chum ca raꞌ tashcheꞌ jiꞌcavibun, chat qui raꞌ q̂uinꞌdyemꞌ atsij muꞌ Jiꞌc̣honacsity Muntyiꞌ?

11Vorjeyacsi Jesús:

—Anicdye meꞌ, yiꞌ sánacdyeꞌ muꞌ chum raꞌ tashi jiꞌcavibun Elías, räj raꞌ jịꞌruij yụꞌtyeꞌ muꞌ, yiꞌ sánacdyeꞌ. 12Yụ jéyac, a nash cạ̈tsiꞌ ọij, aty jiꞌcavibun Elías, jam qui namꞌ chị́yete in, anic där jịꞌñibeꞌcate in junꞌ chuc mạꞌjeꞌ muꞌin in. Meꞌdye raꞌ chimeꞌ muꞌin raꞌ jịꞌñibeꞌcan yụ in Anictyity Muntyiꞌ yụ.

13Chat qui q̂uinꞌdyemꞌ muꞌin jịꞌchiyactyiꞌ muꞌ chiqueꞌ in muꞌ jap̂iijti muꞌ Juan chojtacsity, muꞌ jịꞌcätseꞌ urucyas sánacdyeꞌ.

Jesús jiꞌchäĉajte yirity sọyoꞌtumtyiꞌ nanaty

(Mar 9:14-29; Luc 9:37-43)

14Jesús chibindye jịꞌchiyactyiꞌ muꞌ shupqueshan muꞌyaꞌ in yóyaꞌdyemꞌ muntyiꞌ u in. Atsij yirity muntyiꞌ ĉọshte muꞌ Jesús, dyụtsyi muꞌyaꞌ. 15Jéte:

—Jịꞌchiyacsity, ñịbeꞌjibut ạvaꞌ yụ. Anic där ñịbeꞌ cạveꞌ muꞌ, junaꞌ ĉụiꞌ mọmoꞌ ñeꞌi muꞌ, jämꞌdyeyaꞌ tŝijĉan tŝọij, judyeyaꞌ ojñiꞌĉan tŝọij chimeꞌ. 16A tsanꞌ cạyacsi yụ jịꞌchiyactyiꞌ mi, jam qui namꞌ junꞌ tupuj jiꞌchäĉajte muꞌin in.

17Jesús yi jéyacsi jịꞌchiyactyiꞌ muꞌ:

—¡Där ac̣hiꞌtyity q̂uinꞌ miꞌin muntyiꞌ, jam anicyi miꞌin, anic cäj cạtiñeꞌ miꞌin! Meꞌdye raꞌ yạjquibadyeyac. Aty raꞌ jam junꞌ dyichchuyac miꞌin. Úyaꞌ jijtuvac yụ́yaꞌ.

18Jesús fạraꞌjeĉuñeꞌ mọꞌ sọyoꞌ, meꞌĉandye mọꞌ meijyebanꞌ sọyoꞌ mọꞌĉansiꞌ nanatyĉansiꞌ, chat qui muꞌ chäĉän.

19Aty jọbanyaꞌ muntyiꞌ in, muꞌin jịꞌchiyactyiꞌ Jesústyiꞌ muꞌ, muꞌin ĉọcte in jéte in:

—¿Junꞌ buty tsun meꞌ jam junꞌ meijtebanꞌ sọyoꞌ?

20-21Vorjeyacsi Jesús:

—Ĉaĉaij na tacaꞌ jayej anicyedyeꞌ Jenꞌcheꞌ miꞌin. Yụ jéyac, anicjetinte Jenꞌ jụijyaꞌ miꞌin, meꞌ tsanꞌ damꞌ mọmoꞌ anicyedyeꞌ miꞌin jeñej quis miquis vej mostazasimꞌ, jụꞌñis ĉụiꞌ mọmoꞌ cọdacdyeꞌ tupuj jụjbunac. Tupuj p̂eyetinte yirity mụcuꞌ, jétinte: "Paj meijyi yocyaꞌ jịjcaij", chat qui raꞌ muꞌ meijyi.

Jesús päräꞌ quiꞌ p̂eyeꞌ sänꞌdyeꞌ muꞌ

(Mar 9:30-32; Luc 9:43-45)

22Jesús jịꞌchiyactyiꞌtum muꞌ yiriꞌyaꞌ nati Galileaĉan in. Chat qui muꞌ Jesús jéyacsi:

—Muꞌin raꞌ ayoꞌyaꞌ jiꞌmeꞌtyin yụ in Anictyity Muntyiꞌ yụ. 23Chat qui raꞌ muꞌin ijan yụ in, chibin qui na ramꞌ mạyedyeꞌ meꞌ buꞌyi yụ, chat qui raꞌ vañinyeban yụ.

Ọij p̂eyacdyeꞌ muꞌ anic jiꞌtaracsiꞌ jịꞌchiyactyiꞌ muꞌ.

Querec̣ha cọdyetacsity Jenꞌsidyety acaꞌ muꞌ

24Jesús jịꞌchiyactyiꞌtum muꞌ Capernaumĉan venjoij in. Pạrej muꞌin dyimꞌtety querec̣ha Jenꞌsidyety acaꞌ atsij in ĉọshte Pedro in jéte in:

—¿Uts jiꞌchäyintyiꞌ mi, jam adac yụꞌte querec̣ha Jenꞌsidyety acaꞌ muꞌ?

25Vorjeyacsi Pedro:

—Yụꞌte nashuꞌ.

Aty acaꞌĉan siti Pedro, Jesús tashi jap̂iyiti Pedro, jajiti:

—¿Jätäjyi tyuꞌ um Simón? Uts jacchety ayoꞌ q̂uinꞌ in ¿tyijtyi buty cọdyetacsi bäꞌyedyedyety querec̣ha? ¿Areꞌ muꞌĉantyiꞌdye cọdyetacsi in, areꞌ mochtyiꞌ in?

26Vorjete Pedro:

—Muꞌin jacchety ayoꞌ in jam cọdyetacsi taĉantyiꞌ in, muꞌin mọmoꞌ mochtyiꞌ cọdyetacsi in.

Jesús jajiti:

—Anicdye meꞌ, ĉụiꞌtyiꞌ muꞌ jam junꞌ yụꞌtaqui. 27Meꞌdye yụ chimeꞌ Jenꞌtyiꞌ Ạvaꞌ yụ, yụ jam jemoñeꞌ yụꞌte Jenꞌsidyety acaꞌ. Meꞌ tsanꞌ meꞌ yụꞌte qui na ramꞌ yụ paj qui jam fáquinve yụ in. Tạij tsiqueꞌĉan jịjcava mi, yovityi raꞌ mi. Täꞌmaquiꞌ raꞌ jụijyaꞌ tạbedyeꞌ, jäcvaꞌ mọꞌ, muꞌĉan raꞌ yirity ficha chụꞌĉan mọꞌ. Muꞌ raꞌ jäctyem ficha chụꞌĉantyimꞌ chat qui raꞌ tupuj soꞌmacsim querec̣ha Jenꞌsidyety acaꞌ muꞌ, yụ́dyety judyeyaꞌ mídyety —jéte Jesús.

Currently Selected:

Mateos 17: CAS

Highlight

Copy