Lucas 2

Naꞌedyeꞌ Jesucristos

(Mat 1:18-25)

1Aty meꞌsiꞌ muꞌ mujuꞌchaty jacchety ayoꞌ Augusto yụꞌtyeꞌ p̂eyacdyeꞌ muntyidyes in paj qui räj sanꞌquejĉoij muntyiꞌ in. 2Ọij nash tashches sanꞌquejĉodyes muntyidyes in, mọꞌ jämꞌtyeꞌ in yoquiꞌdyemꞌ ayoꞌbuꞌyi muꞌ Cirenio, Siriaĉan jiquej u. 3Muꞌ ayoꞌ Augusto jéyacsi paj qui räj muntyiꞌ in ĉụiꞌsiꞌĉan bäꞌyedyeꞌ jịjcaban in yóĉandyemꞌ vóshiꞌvun bäꞌyaque jiquej u muꞌin, muꞌĉan ca raꞌ sanꞌquejĉoij in.

4Mọꞌdyes qui muꞌ José Nazaretĉantyiꞌ shupquiꞌ, Galileaĉansiꞌ bäꞌyedyeꞌ. Sacjeꞌ Belénĉan jịjcaij Judeaĉansiꞌ bäꞌyedyeꞌ, ĉaĉaij na muꞌ Davidvuntyiꞌ vóshiꞌ muꞌ. 5Maríatum Belénve jịjcaij paj qui jiꞌsañiĉun, ĉaĉaij na muꞌ raꞌ jäcte, mọꞌ na María anic jạjtsis. 6Aty Belénĉan in chaꞌsheꞌ mọꞌ tupudyeꞌ p̂en muꞌ, 7naꞌi muꞌ tashchety ạvaꞌ mọꞌ. Comonꞌjeyaquiꞌ bäꞌyesĉan chat qui päcäꞌjete yóĉandyemꞌ jiꞌsäcsac cuꞌdyeꞌ o in, mọꞌĉandye chimeꞌ dyäquiꞌ in ĉaĉaij na mọꞌ dyäquedyeꞌ muntyidyes in anic bänꞌ mọꞌ jam junaꞌ vav.

Anjer jiꞌcaviti in ĉọjcaquityyaꞌ oveca in

8Chimeꞌdye c̣hẹiꞌyaꞌ mọꞌ Belén muꞌyaꞌ ĉọjcaquity oveca pạrej in, taĉandye ĉọshi tajñiꞌĉan in ĉọjcaquity oveca in. 9Vátyequej jiꞌcaviti muꞌinyaꞌ in yirity anjer Jenꞌtyiꞌ muꞌ, chimeꞌdye Jenꞌsiꞌ mạijquedyeꞌ tŝọ́tacsiꞌ, jämꞌ itŝijyacñi noiꞌyacñi in. 10Jéyacsi muꞌ anjer:

—Jam raꞌ noiꞌyi miꞌin, yụ nash jämꞌsiꞌ p̂eyacdyeꞌ tuiꞌtyiꞌ miꞌindyes, mọꞌ nash raꞌ räjdyes muntyiꞌ in soꞌmacsiꞌ raꞌ därsiꞌ maꞌjodyeꞌ räj muntyiꞌ in. Meꞌ yiꞌ ọij p̂eyacdyeꞌ tuiꞌsiꞌ yụ: 11Ọij nash mạyedyeꞌ aty naꞌi muꞌ jiꞌc̣honnactyiꞌ raꞌ miꞌin, muꞌ Cristo, Ayoꞌ tsun, Belénĉan naꞌi. 12Jeshaꞌ cạvecmac miꞌin, meꞌ raꞌ chị́yetinte miꞌin, muꞌĉan dạquictinteyaꞌ cuꞌdyesĉan acaꞌ mọꞌin, coꞌmoij raꞌ bäꞌyesĉan, yóĉandyemꞌ jiꞌsäcsacĉan cuꞌdyeꞌ o in —yi jéyacsi anjer.

13Meꞌĉandye daiꞌ vatyquej jiꞌcaviti mạyedyeꞌchety anjer in, timaꞌquete muꞌ Jenꞌ, yi in:

14—Timaꞌqueja muꞌ Jenꞌ mạyedyeꞌchety,

paj muꞌin jacchety muntyiꞌ in,

muꞌin maꞌjotactyiꞌ Jenꞌyaꞌ in,

paj muꞌin soꞌmac in c̣honꞌdyedyes muꞌin —yi anjer in.

15Jọban anjer in mạyedyeꞌcheꞌ jịjcaban in. Yi muꞌin ĉọjcaquity oveca jítidyeij in:

—Jeshaꞌ Belénĉan jịjcabajshaꞌ cạveĉajshaꞌ tsun yoj jisinꞌdyemꞌ muꞌ ayoꞌ tsun.

16Meꞌdye cavintum sacjebanꞌ in. Mọꞌĉan dạquiqueꞌ in mọꞌ María, judyeyaꞌ José judyeyaꞌ joijnoꞌ, muꞌĉan muꞌ chụjduij yóĉandyemꞌ jiꞌsäcsacĉan cuꞌdyeꞌ o in. 17Muꞌin ĉọjcaquity oveca in aty cạvacsi in chat qui jéyacsi in jätäjjeyacsi chuc anjer muꞌin in, p̂eijte joijnoꞌ jiquej in. 18Muꞌin seꞌvacsebity p̂eyacdyeꞌ in anic äjjeyacsebi p̂eyacdyeꞌ muꞌin. 19Mọꞌ na María räj mọꞌ yejĉoiꞌ dyijtuvaꞌqueꞌ ĉojtyiꞌĉan mọꞌ seꞌves p̂eyacdyeꞌ p̂eijtes muꞌ joijnoꞌ. 20Chat qui muꞌin ĉọjcaquity oveca in caꞌñibun in. Jämꞌ timaꞌquete Jenꞌ in, yoshoropaij jéte in junꞌ chuc cạvecte jiquej in judyeyaꞌ seꞌve in, ĉaĉaij na cäts shupquiꞌ yoj jeyacsidyemꞌ anjer jiquej u in.

21Aty q̂uenꞌĉan mạyedyeꞌ tyiti muꞌ joijnoꞌ, chat jiꞌseiꞌtac judyeyaꞌ yụꞌtyeyete tịj in, jéte in: Jesús, yụꞌtyeyete in, yoj yidyemꞌ anjer jiquej u jéyacsaque, jambiꞌdyemꞌ ạvaꞌtum jiquej mọꞌ.

Muꞌ joijnoꞌ Jesús jịꞌcavac Jenꞌyaꞌ muꞌ

22Aty meꞌsiꞌ chaꞌsheꞌ mọꞌ mạyedyeꞌ tupudyeꞌ Marías basdyidyes mọꞌ, jämꞌ yuꞌti qui Jenꞌsiꞌyaꞌ vej muꞌ, yoj yiꞌdyemꞌ yụꞌtacdyeꞌ o, jasoꞌmitis Moisés jiquej. Chat qui Jerusalénĉan jịjcaij in cạte in muꞌ joijnoꞌ, paj qui muꞌ jịꞌcavecte in Ayoꞌyaꞌ tsun, 23yoj yiꞌdyemꞌ yụꞌtacdyeꞌ Ayoꞌsiꞌ umꞌ. Yiꞌ: "Soꞌmetinte raꞌ Ayoꞌ tsun räj tashchety ạvaꞌ miꞌin sonꞌ in", yiꞌ. 24Chimeꞌdye jiꞌcoꞌshayeꞌ Jenꞌdyes in, yoj yiꞌdyemꞌ yụꞌtacdyeꞌ Ayos umꞌ, yiꞌ: "Jiꞌcoꞌshayevac Jenꞌdyes päräꞌ ọꞌtoꞌ in, jam jụijyaꞌ mọꞌ päräꞌ tórtula in."#2:24 Tórtula arajdye joꞌmes jeꞌñes ọꞌtoꞌ.

25Chimeꞌdye muꞌyaꞌ jiquej Jerusalénĉan yirity muntyiꞌ tịj muꞌ Simeón. Anic rụijtyity muꞌ, ĉútity Jenꞌcheꞌ, anic fer bisaqui paj qui muꞌin Israeltyiꞌ vóshiꞌ in c̣hoñi in. Jenꞌsiꞌ Ạꞌedyeꞌ muꞌ jameꞌchuti muꞌ. 26Mọꞌ jajiti muꞌ raꞌ cạvete muꞌ Cristo muꞌ jutactyiꞌ Jenꞌtyiꞌ muꞌ jambiꞌdyemꞌ säñi muꞌ. 27Mọꞌ Jenꞌsiꞌ Ạꞌedyeꞌ muꞌ jajutiti muꞌ Simeón paj qui Jenꞌsiꞌĉan acaꞌ jịjcaij. Vátyequej atsij muꞌ José judyeyaꞌ María c̣hoboꞌ mọty joijnoꞌ Jesús, siti in Jenꞌsiꞌĉan acaꞌ muꞌ, paj qui jịꞌcätsepte in junꞌ chuc yiꞌ Jenꞌsiꞌ yụꞌtacdyeꞌ muꞌ. 28Muꞌ qui Simeón roquenꞌjeĉunꞌte muꞌ Jesús, timaꞌquete Jenꞌ, jéte:

29—Tsuntyiꞌ Ayoꞌ, mi nash aty jịꞌcätseꞌ p̂eyacdyeꞌ mi,

q̂uinꞌ chat aty tupuj yụ́dyes,

q̂uinꞌ chat aty jam otejjiti säñi yụ,

30ĉaĉaij na aty cạvete yụ ĉụiꞌsiꞌyaꞌ vej yụ uts Jiꞌc̣honacsity Muntyiꞌ.

31Q̂uinꞌ mi yụꞌte uts Jiꞌc̣honacsity muꞌinsiꞌyaꞌ vej muꞌin jacchety muntyiꞌ räj in.

32Muꞌ raꞌ mạijchucsebi ĉojtyiꞌ muꞌin jam Israeltyiꞌ vóshiꞌ in,

jéyacsi raꞌ muꞌ mis p̂eyacdyeꞌ,

judyeyaꞌ qui raꞌ muꞌ soꞌmacsi c̣honꞌdyedyes muꞌin Israeltyiꞌ vóshiꞌ in,

meꞌ raꞌ uts Jiꞌc̣honacsity Muntyiꞌ —yi Simeón.

33Jesústyiꞌ jenꞌ muꞌ judyeyaꞌ tseꞌ muꞌ anic äjjepte p̂eyacdyeꞌ in Simeónsiꞌ, p̂eijtes muꞌ Jesús. 34Muꞌ qui Simeón yụꞌtyeyacsi p̂eyacdyeꞌ muꞌindyes in, yi jeꞌ María:

—Uts q̂uinꞌ ạvaꞌ mi jatsimꞌtity Jenꞌ, pạrej raꞌ jiꞌc̣honacsi muꞌ, pạrej na raꞌ soꞌmac tsäquiꞌsis in. Muꞌ raꞌ jayuꞌti Jenꞌ jịꞌĉocdyes muntyidyes in, meꞌ tsanꞌ meꞌ, ñiñete qui na ramꞌ muntyiꞌ in. 35Muꞌ raꞌ jorojĉan yụꞌtacsebi ĉojtyiꞌĉansiꞌ dyijyedyeꞌ muꞌin. Mi qui na ramꞌ fer táriꞌ utsdyes ạvadyes mi, sapenꞌyiꞌ raꞌ ĉojtyiꞌchem jeñej raꞌ p̂oc̣htac coc̣hinoyaꞌ ĉojtyim —yi jeꞌ muꞌ Simeón.

36Chimeꞌdye mọꞌĉan Jenꞌsiꞌĉan acaꞌ muꞌ yiris mọꞌĉan p̂en, Ana tịj mọꞌ, ạvaꞌ muꞌ Fanuelsiꞌ, vóshiꞌ muꞌ Aservunsiꞌ jiquej, meꞌ mọs tịj ñuruꞌ. Mọꞌ jasoꞌmitis p̂eyacdyeꞌ Jenꞌ, anic jiyiꞌ ishoꞌ mọꞌ. Yävätidyeꞌ mọmoꞌ yómodyeꞌ vämtyiꞌtum bäꞌyiꞌ mọꞌ jiquej, chat qui säntaquiꞌ vämtyiꞌ mọꞌ, 37q̂uenꞌĉan quiꞌtac vạjpedyeꞌ jiyiꞌ yómodyeꞌ muñes buꞌbanꞌ mọꞌ. Yejĉoiꞌ dyijtute Jenꞌ, pucmun Jenꞌsiꞌĉan acaꞌ jadyiquiꞌ, mạij judyeyaꞌ tsedyedyeꞌ, mọꞌ carijtaquiꞌ Jenꞌdyes yịñijdyeꞌtum judyeyaꞌ cọdacdyeꞌtum. 38Aty meꞌsiꞌ p̂eyaqui Simeón, mọꞌ qui yoshoropaij jéte Jenꞌ judyeyaꞌ p̂eijte muꞌ Jesús, jéyacsiꞌ muꞌin bisaquity in c̣honꞌdyedyes raꞌ muꞌin Israelĉantyiꞌ in.

Nazaretve jijtuban in

39José judyeyaꞌ María ijaij in junꞌ chuc cọdaquiꞌ mọꞌ yụꞌtacdyeꞌ Jenꞌsiꞌ muꞌ, chat qui sacjebanꞌ in meꞌsiꞌdye in, caꞌñibun in ĉụiꞌsituban bäꞌyedyeꞌ in Nazaretĉan jijtuban in mọꞌ Galileaĉansiꞌ bäꞌyedyeꞌ. 40Muꞌ Jesús aty utuꞌyejoij p̂añi ferdyeꞌtumyejoij anic dyijyedyeꞌtum cati, ĉaĉaij na muꞌ Jenꞌ jañutyiti mạꞌjitidyesyaꞌ muꞌ.

Aty nanaty muꞌ Jesús Jenꞌsiꞌĉan jịjcaij acaꞌ muꞌ

41Räjĉan yómodyeꞌ chaꞌsheꞌyaꞌ muꞌ José, Jesústyiꞌ jenꞌ muꞌ judyeyaꞌ tseꞌ muꞌ Jerusalénĉan sóbajquiqui in, cạvequeꞌ Jiꞌc̣honacdyedyes feshta in. 42Jesús yiriꞌtac päräꞌ jiyiꞌ yómodyeꞌ tyiti muꞌ, cuvij Jerusalénĉan jịjcaij in, cuvij feshta cạvequeꞌ in, mọꞌ yicdyeꞌ muꞌin. 43Jiyiꞌ feshta, chat qui muꞌ José, mọꞌtumdye Maríatum caꞌñibun in. Muꞌdyety Jesús taĉan jiꞌyajcabun Jerusalénĉan, jam junꞌ chịj jenꞌ muꞌ judyeyaꞌ tseꞌ muꞌ, 44jeñety penꞌdyeꞌtum jäquiꞌ atsijban, meꞌ ĉọ́te in. Aty yiris mạyedyeꞌ miꞌeban in, chat q̂uinꞌdyemꞌ dyijtute in chat qui quevjajte in chätidyeꞌĉan muꞌin, 45jam méquiꞌ dạcajte in. Muꞌyaꞌdye camanꞌjebanꞌ caꞌñibun José judyeyaꞌ María, Jerusalénĉan jịjcaban quivij in, queviĉajte in.

46Chibin mạyedyeꞌ quevjajte muꞌĉan in, chat q̂uinꞌdyemꞌ dạĉajte in, Jenꞌsiꞌĉan na jiquej acaꞌ muꞌ. Jịꞌchiyacsitytum bäꞌvaꞌjoij seꞌvacsevaꞌbi p̂eyacdyeꞌ muꞌin judyeyaꞌ cọdyetacsi chimeꞌ p̂eyacdyeꞌ muꞌin. 47Muꞌin seꞌvetety in anic muꞌin äjjepte in dyijyedyeꞌ muꞌ, anic rụijsis voryedyeꞌ muꞌ. 48Muꞌ na jenꞌ judyeyaꞌ tseꞌ muꞌ aty cạvete in anic äjyi in. Yiꞌ tseꞌ muꞌ jajiti:

—¿Junꞌ dash meꞌjitiĉaꞌ miꞌin ạvaꞌ? Tsun cajotyitiꞌ quevjadyeyac paiꞌ där dyijtuyac tsun.

49Vorjeyacsi Jesús:

—¿Junꞌ dash quivjudyiĉaꞌ yụ miꞌin? ¿Jam adac chịj miꞌin úĉan nash yụ ĉụiꞌsiꞌĉan acaꞌ Jenꞌsiꞌĉan yụ?

50Muꞌin na jam chiquepte p̂eyacdyeꞌ in, jedyeꞌ chuc mọꞌ cạiꞌ. 51Chat qui q̂uinꞌdyemꞌ jịjcacseban Nazaretĉan, yóĉandyemꞌ yejĉoij chicaqui jenꞌ umꞌ judyeyaꞌ tseꞌ muꞌ. Mọꞌ na tseꞌ muꞌ räj mọꞌ dyijtuiꞌ ĉojtyiꞌĉan mọꞌ. 52Muꞌĉan muꞌ p̂añi Jesús, anic dyijyedyeꞌtum cati muꞌ, räjĉan jamaꞌjotyiti Jenꞌ muꞌ, meꞌdye chimeꞌ muntyiꞌ maꞌjotyete in.

Currently Selected:

Lucas 2: CAS

Highlight

Copy