Lucas 16

Muꞌ muntyiꞌ ĉọjcaptety jedyeꞌ jam rụijtyity muꞌ

1Jesús jéyaqui jịꞌchiyactyiꞌ muꞌ:

—Muꞌyaꞌ jiquej yirity muntyiꞌ jedyeꞌtumtyiꞌ, chimeꞌdye muꞌyaꞌ úñity muꞌ ĉọjcaptety jedyeꞌ in. Yirisĉan mạyedyeꞌ yoctyiꞌ muntyiꞌ in p̂eijbite in úñity muꞌ jéte in muꞌ muntyiꞌ: "Uts ĉujcabuntyiꞌ jedyeꞌ mi pạrej ĉụiꞌsitubun jedyeꞌ mi", jéte in. 2Mọꞌdyes muꞌ muntyiꞌ jiꞌvorvaĉan úñity muꞌ jéyaqui: "¿Junꞌ caꞌ meꞌ mi? A nash seꞌvacsi yụ muntyiꞌ in p̂iyin in junꞌ chuc jämꞌtaqui mi aꞌc̣histum dyijyedyeꞌ mi. Yụ raꞌ cạvebiye déve mi, juñucsiꞌ chuc mọꞌcheꞌ, ĉaĉaij na yụ raꞌ jiꞌshupjadyeye carijtacdyeꞌĉantyiꞌ mi", jajiti ayoꞌ muꞌ. 3Dyijyi úñity muꞌ, yi ĉojtyiꞌĉan muꞌ: "¿Junꞌtaqui qui bu raꞌ q̂uinꞌ yụ aty shubanyaꞌ úĉantyiꞌ yụ? Yụ na jam junꞌ chịj bächäiꞌ jedyeꞌ, itŝiꞌ dyijyedyeꞌ yụ, tsịcaꞌ qui raꞌ yụ cọdacsity querec̣ha yụ chimeꞌ. 4Meꞌ raꞌ yụ paj qui muntyiꞌ tiĉuñin yụ in ĉụiꞌsiꞌĉan acaꞌ muꞌin, aty shubanyaꞌ yụ carijtacdyeꞌĉan yụ, yoctyisĉan acaꞌ jịjcaij yụ", yi ĉojtyiꞌĉan muꞌ. 5Mọꞌdyes qui muꞌ úñity räj jiꞌvorvacsi tyijtyi chuc dévetuptety ayoꞌ in. Muꞌ úñity jéte muꞌ tashcheꞌ atsijtyiꞌ dévetuptety ayoꞌ: "¿Juñucsiꞌ caꞌ dévetubutim ayoꞌ yụ?" 6Vorjete: "Yụ dévetute jiquej cien rata aseijte, meꞌsiꞌ déve yụ", jéte. Muꞌ úñity vorjete: "Mosh ọ́cheꞌ déve mi, yocsiꞌcheꞌ qui raꞌ jịjijcayem, ĉanamꞌ quiꞌtac ram yụꞌtyemꞌ, meꞌsiꞌ ramꞌ jiyaꞌdyeyebajtem uts ayoꞌ", jéte. 7Muꞌ úñity chijetedye yoctyiꞌ dévetutety: "Mi na ¿juñucsiꞌ caꞌ dévetutem?" jéte. "Cien obota trivo yụ́siꞌ", jéte. Muꞌ qui jéte: "Mosh ọ́cheꞌ déve mi yocsiꞌcheꞌ qui raꞌ jịjijcayem, q̂uenꞌĉan quiꞌtac ramꞌ yụꞌtyemꞌ, meꞌsiꞌ qui raꞌ mọmoꞌ jiyaꞌdyeyebajtem", jéte, meꞌ meꞌ jịꞌchacsebi déve muꞌin dévetutety ayoꞌ muꞌin. 8Muꞌ na ayoꞌ muꞌ chị́qui muꞌ anic dyijyedyeꞌtum ĉọ́qui úñity muꞌ, meꞌ dyijyi muꞌ paj qui ĉụiꞌ tsạꞌ buꞌyedyes quevaqui. Meꞌ tsanꞌ meꞌtyity úñity muꞌ, nọ́tyetacsi qui namꞌ muntyiꞌ yoctyiꞌ in paj qui muꞌin chimeꞌjetedye. Anicdye meꞌ, muꞌin cäc̣häꞌchuiꞌtyiꞌ in jacches jedyeꞌ in muꞌin mujuꞌchaꞌ dyijyedyeꞌtum carijtaqui in ĉụiꞌsiꞌyaꞌ jacches jedyeꞌ muꞌin, muꞌin na cäc̣häꞌchuiꞌtyiꞌ mạijyis in uyaꞌyaꞌ in, jam meꞌ dyijyedyeꞌtum carijtaqui Jenꞌdyes in —jéyacsi Jesús.

9Yụ jéyac: meꞌdye raꞌ miꞌin chimeꞌ, yụꞌtaqui raꞌ ĉụiꞌsiꞌ jedyeꞌ miꞌin jacches paj qui nọ́tacsi yoctyiꞌ muntyiꞌ miꞌin, aty räꞌiꞌyaꞌ mọꞌ, chat qui raꞌ muꞌ Jenꞌ tiĉuñinac mạyedyeꞌcheꞌ miꞌin muꞌcheꞌ raꞌ räjĉan Jenꞌyaꞌ bäꞌyi miꞌin.

10Tyi chuc jịꞌcätseꞌtyiꞌ miquis p̂eyacdyeꞌ jụijyaꞌ, muꞌ raꞌ jịꞌcätseꞌ därsiꞌ p̂eyacdyeꞌ chimeꞌ. Muꞌ na damꞌ shuꞌatucsity, meꞌ tsanꞌ miquis jedyeꞌ jụijyaꞌ, muꞌdye raꞌ shuꞌaij därsiꞌ jedyeꞌ yocsiꞌ. 11Shiꞌaij jụijyaꞌ miꞌin, yocve jịjijcayetiñeꞌ jacches jedyeꞌ jụijyaꞌ, miꞌin jam raꞌ junꞌ soꞌmac miꞌin paj qui carijtaqui Jenꞌdyes miꞌin. 12Yocve jịjijcayeptinte yoctyis jedyeꞌ jụijyaꞌ muꞌ, jam raꞌ junꞌ soꞌmac miꞌin ĉụiꞌdyes jedyeꞌ miꞌin.

13Cạvemac, yirity úñity muntyiꞌ jam tupuj päräꞌcheꞌ úñi, ĉaĉaij na yirity raꞌ mạꞌjete, yoctyiꞌ na jam, muꞌ mạꞌjetety muꞌ raꞌ jämꞌ carijtyeyete, muꞌ na yoctyiꞌ fạ́quete, jam muꞌ junꞌ jämꞌ carijtyeyete, äcäijjete mọmoꞌ muꞌ. Meꞌdye chimeꞌ muntyiꞌ in jam tupuj päräꞌcheꞌ dyijyi in, Jenꞌcheꞌ judyeyaꞌ querec̣hacheꞌ —jéyacsi muꞌ Jesús.

14Fariseo in aty mọꞌ seꞌvepteyaꞌ Jesússiꞌ p̂eyacdyeꞌ in, dyisacte in ĉaĉaij na muꞌin fer dyijtutety querec̣ha in. 15Jesús jéyacsi:

—Jeñej jämꞌyity jiꞌĉuti miꞌin muntyisyaꞌ vej muꞌin, muꞌ qui namꞌ Jenꞌ chäyibunac ĉojtyiꞌ miꞌin junꞌ chuc dyijyi miꞌin. Cạvevac, mọꞌ mọjoꞌchaꞌ jämꞌsiꞌ dyijtuiꞌsiꞌ muntyiꞌ in, mọꞌ itŝiꞌ shupquiꞌ Jenꞌsiꞌyaꞌ vej muꞌ, mọꞌ anic fạ́queꞌ —jéyacsi Jesús.

Jenꞌsiꞌ yụꞌtacdyeꞌ muꞌ judyeyaꞌ ayoꞌbuꞌyedyeꞌ muꞌ

16Mọꞌ tashches sánacdyeꞌ Jenꞌsiꞌ yụꞌtacdyeꞌ muꞌ judyeyaꞌ yocsiꞌ sánacdyeꞌ muꞌ jasoꞌmititysiꞌ p̂eyacdyeꞌ Jenꞌ in, räj mọꞌ yụꞌtaqui Jenꞌ paj qui fer buꞌyiꞌ junꞌ quiꞌ chuc naꞌiyaꞌ muꞌ Juan chojtacsity jiquej. Aty meꞌsiꞌ tiyacchuti voroꞌtacsi yocsiꞌ p̂eyacdyeꞌ p̂eyeꞌ ayoꞌbuꞌyedyeꞌ raꞌ Jenꞌsiꞌ muꞌ, chat qui muntyiꞌ in anic fer mạꞌjeꞌ siti Jenꞌyaꞌ in ayoꞌbuꞌyedyeꞌyaꞌ muꞌ.

17Räjĉan buꞌyiꞌ raꞌ Jenꞌsiꞌ yụꞌtacdyeꞌ muꞌ, mọjoꞌchaꞌ carij jịꞌmotsac muꞌ, ọyaꞌyaꞌ carij jịꞌmotsac ọij jac judyeyaꞌ mạyedyeꞌ, mijam raꞌ méquiꞌ mọtsiꞌ yiris miquis jiꞌchäyitidyeꞌ yụꞌtacdyes.

(Mat 19:1-12; Mar 10:1-12)

18Tyi chuc yacchuqui ĉụiꞌsiꞌ p̂en muꞌ judyeyaꞌ yocsiꞌcheꞌ qui vämi, muꞌ meꞌtyity soꞌmete juchaj muꞌ Jenꞌ. Chimeꞌdye tyi chuc mọꞌcheꞌ vämi jụijyaꞌ yacchucsiꞌcheꞌ p̂en, meꞌdye muꞌ chimeꞌ soꞌmete juchaj muꞌ Jenꞌ —jéyacsi Jesús.

Jedyeꞌtumtyiꞌ muntyiꞌ judyeyaꞌ Lázaro

19Jesús jéyacsi:

—Muꞌyaꞌ jiquej yirity muntyiꞌ anic jedyeꞌtumtyiꞌ, anic jämꞌtyiꞌĉan quịꞌsiꞌ räjĉan bäꞌyi, räjĉan mạyedyeꞌ feshta jämꞌtyeꞌ judyeyaꞌ jämꞌ säcsi. 20Muꞌyaꞌ chimeꞌ yirity muntyiꞌ ñịbety, Lázaro tịj muꞌ, yedyety muꞌ chóminꞌdyeꞌ. Mụijyamꞌ bäꞌyi acasyaꞌ chụiꞌdyeꞌ jedyeꞌtumtyisyaꞌ. 21Muꞌ Lázaro mạꞌjeꞌ tsanꞌ jebeiꞌ mọꞌ säcsedyeꞌ jọꞌchaiꞌsiꞌ mesaches yacchutis jedyeꞌtumtyis. Ọij na ac̣huj ayij mọꞌyaꞌ in, enamꞌjepte chóminꞌdyeꞌ in. 22Yirisĉan mạyedyeꞌ säñi muꞌ Lázaro. Atsij muꞌin anjer in jäshte in Abrahamyaꞌ cạte in jämꞌsiꞌcheꞌ bäꞌyedyeꞌ, muꞌcheꞌ yụꞌte in. Muꞌ jedyeꞌtumtyiꞌ muntyiꞌ chimeꞌ muꞌ säñi judyeyaꞌ nạc muꞌ.

23Muꞌ jedyeꞌtumtyiꞌ muntyiꞌ muꞌĉan muꞌ yụꞌtac yóĉandyemꞌ säñitysiꞌĉan ĉärꞌtacdyeꞌ u in, anic där ñịbeꞌ cạveꞌ muꞌĉan. Muꞌĉan muꞌ cheꞌve cạvi, muꞌcheꞌ nạijte muꞌ Abraham Lázarotum moch. 24Fer p̂eyaqui fayete Abraham jéte: "Abraham, mi nash vóshiꞌ yụ jiquej, ñịbeꞌjitiꞌ, jutiyitiꞌ muꞌ Lázaro paj muꞌ ĉútin yụ úĉan, paj qui muꞌ tuyin ojñiꞌ yụ c̣hirijriꞌchemꞌ paj pacajjishbun nem yụ, ĉaĉaij nash ñịbeꞌ cạveꞌ úĉan tŝijĉan yụ", yi jéte. 25Vorjajiti Abraham: "Ạvaꞌ yụ, jeshaꞌ tsạꞌdyemꞌ jiquej mi, räjĉan maꞌjoij bäꞌyi mi, q̂uinꞌ na aty ñịbeꞌ cạveꞌ mi. Lázaro jiquej anic muꞌ där ñịbeꞌ cạveꞌ, q̂uinꞌ aty maꞌjoij bäꞌyi muꞌ. 26Ọ́yaꞌ chimeꞌ chäcdyis toꞌ, mijam mọꞌ tyi cajñeꞌ in, mọꞌdyes úyaty in jam junꞌ cajñeꞌ in, chimeꞌdye muꞌĉantyiꞌ in jam junꞌ úyaꞌ atsij in", yi jajiti Abraham.

27Muꞌ jedyeꞌtumtyiꞌ vorjete: "Yụ nash cọdyeye mi Abraham juteme muꞌ Lázaro paj ĉucbubun jenꞌsiꞌ acaꞌ yụ. 28Muꞌyaꞌ nash vojity yụ ĉanamꞌ in. Paj muꞌ jéyacsi paj qui jam muꞌinmun úĉan jijtuij in yóĉandyemꞌ q̂uinꞌ yụ u, paj jam jeñej yụ in ñịbeꞌ cạveꞌ yụ", yi jéte 29Vorjajiti Abraham: "A nash meꞌchupte in Moiséssiꞌ sánacdyeꞌ judyeyaꞌ jasoꞌmititysiꞌ p̂eyacdyeꞌ Jenꞌ chimeꞌ in, paj mọꞌ chiqueꞌ in." 30Vorjete muꞌ muntyiꞌ: "Meꞌ tsanꞌ meꞌ, tsạꞌeban qui namꞌ jụijyaꞌ yirity säñity muntyiꞌ, jéyacseban muꞌ, anicyi raꞌ muꞌin in", jéte. 31Vorjajiti Abraham: "Jam mạꞌjeꞌ chiquepte jụijyaꞌ in Moiséssiꞌ sánacdyeꞌ muꞌ judyeyaꞌ jasoꞌmititysiꞌ p̂eyacdyeꞌ Jenꞌ in, jam raꞌ junꞌ anicyi chimeꞌ in, paj tsanꞌ yirity säñity tsạꞌeban jéyacseban muꞌin in", meꞌ jajiti muꞌ muntyiꞌ —jéyacsi muꞌ Jesús.

Currently Selected:

Lucas 16: CAS

Highlight

Copy