Lucas 10

Jesús jutacsi muꞌin yävätidyeꞌ quiꞌtac päräꞌ jiyity in

1Aty meꞌsiꞌ muꞌ Ayoꞌ tsun tsimꞌtacsi yävätidyeꞌ quiꞌtac päräꞌ jiyi in, muꞌin jutacsi paj qui tashi räj socorꞌjeyacsi bäꞌyedyeꞌ in, yóĉandyemꞌ ramꞌ jịjcaij Jesús u, cäts päräꞌ päräꞌ jịjcaij jutacsi.

2Jesús jéyacsi:

—Anic daiꞌ muꞌyaꞌ jambiꞌ seꞌveꞌtyiꞌ p̂eyacdyeꞌ in, jeñej därsiꞌ quịjodyeꞌ meꞌ in jayej muntyiꞌ vädaquity muꞌĉan in. Cọdyetinte raꞌ Jenꞌ paj qui muꞌ jutacsi muntyiꞌ vädaquity in, ĉaĉaij nash muꞌdye Jenꞌ aꞌ mọꞌ. 3Tạij miꞌin voroꞌtacseĉamꞌ, yụ juteyac miꞌin jeñej buꞌyi oveca miꞌin chidyiꞌĉanyaꞌ vajedyedyeꞌ miꞌin. 4Jam raꞌ cạqui majmiyadyes jedyeꞌ miꞌin, mijam raꞌ víquis miꞌin, mijam raꞌ querec̣ha, mijam raꞌ yujches chimeꞌ miꞌin. Jam raꞌ meñi majmiyaꞌ vorjeyacsi muntyiꞌ täjacsi jụijyaꞌ miꞌin. 5Jụꞌñisĉan chuc acaꞌ dyäqui jụijyaꞌ miꞌin, tashi raꞌ vorjeyacsi miꞌin muꞌĉantyiꞌ in. Yi raꞌ vorjeyacsi miꞌin: "Tsun cọdyete Jenꞌ paj qui jämꞌyedyeꞌ meꞌchutiñeꞌ miꞌin", meꞌ raꞌ jéyacsi miꞌin. 6Jam ashyity muꞌĉantyiꞌ jụijyaꞌ in, cạ̈tsiꞌ raꞌ mọꞌ p̂eyacdyeꞌ jéyacsis miꞌin. Jam jämꞌyi jụijyaꞌ in, jam raꞌ cạ̈tsiꞌ muꞌindyes p̂eyacdyeꞌ in. 7Yóĉandyemꞌ dyäqui u miꞌin, taĉan raꞌ muꞌĉan miꞌin, jam raꞌ paiꞌ dyädyäquejoij miꞌin, muꞌin jiꞌsäcsinacyaꞌ in, jedyeꞌ chuc säcsedyeꞌ jụijyaꞌ soꞌminac in, jebetiñeꞌ raꞌ mọmoꞌ miꞌin, ĉaĉaij na mọꞌ bijodyeꞌ muꞌ carijtaquitysiꞌ Jenꞌdyes. 8Ventyectiñeꞌ jụijyaꞌ yiris bäꞌyedyeꞌ miꞌin, tiĉuñinac acaꞌtumtyiꞌ jụijyaꞌ in paj qui muꞌĉan dyäqui miꞌin, jemoñeꞌ jebetiñeꞌ miꞌin jedyeꞌ chuc soꞌminac jụijyaꞌ in. 9Chimeꞌ raꞌ jiꞌchäcacseban miꞌin areꞌreijtyiꞌ bäꞌyedyeꞌĉantyiꞌ in judyeyaꞌ raꞌ voroꞌtacsi miꞌin jéyacsi miꞌin: "Jenꞌ aty raꞌ ayoꞌbuꞌyi miꞌindyes", meꞌ raꞌ jéyacsi miꞌin. 10Ventyectiñeꞌ jụijyaꞌ yiris bäꞌyedyeꞌ miꞌin, muꞌĉantyiꞌ in jam tiĉuñinac jụijyaꞌ in, jemoñeꞌ cayeĉan jịjcaij miꞌin, muꞌinsiꞌyaꞌ raꞌ vej jéyacsi muꞌĉantyiꞌ miꞌin: 11"Paj tsanꞌ mọꞌ jac yujches tsun ọijsiꞌ bäꞌyedyes mọꞌ, chischisjeyactaqui raꞌ tsun, jịꞌĉocdyes anic vaꞌcac bäꞌyi miꞌin. Chịj qui na ramꞌ miꞌin aty c̣hẹiꞌyaꞌ ayoꞌbuꞌyi Jenꞌ miꞌindyes", meꞌ raꞌ jéyacsi miꞌin. 12Yụ jéyac, aty ayijyaꞌ tupudyeꞌ Jenꞌsiꞌ muꞌ, jịꞌcäts yụꞌtacsi raꞌ juchadyeꞌyaꞌ muntyiꞌ in, anic raꞌ mọjoꞌchaꞌ därsiꞌ vaꞌtacdyeꞌ Jenꞌ soꞌmacsi muꞌin jam tiĉuñinactyiꞌ q̂uinꞌ in, ọyaꞌyaꞌ raꞌ Sodomaĉantyidyes in —Jesús jéyaqui tsimꞌtactyiꞌ muꞌ.

Bäꞌyedyeꞌĉantyiꞌ in jam chiquetety Jenꞌ in

(Mat 11:20-24)

13—¡Där raꞌ ñịbeꞌ cạvetiñeꞌ miꞌin Corazinĉantyiꞌ miꞌin judyeyaꞌ Betsaidaĉantyiꞌ chimeꞌ miꞌin! Meꞌ tsanꞌ därsiꞌ ferdyeꞌ jịꞌcaveyac yụ, uts na jam dyijyi juchajcheꞌ miꞌin. Joꞌmes jịꞌcaveyacsi ferdyeꞌ jụijyaꞌ yụ muꞌin Tiroĉantyiꞌ in judyeyaꞌ Sidónĉantyiꞌ jụijyaꞌ in, jam raꞌ mụiꞌ dyijyaque juchajcheꞌ in, a vuty p̂oc̣hiꞌc̣hiijtyiꞌĉan quịꞌsiꞌ cofjiti u in, judyeyaꞌ chimyaꞌ bucjiti joꞌnoꞌcheꞌ chimeꞌ u in, meꞌ meꞌ jịꞌĉocdyes aty dyijyi juchajcheꞌ in. 14Miꞌin na jam meꞌ dyijyi, mọꞌdyes aty ayijyaꞌ tupudyeꞌ Jenꞌsiꞌ muꞌ, aty raꞌ jịꞌcäts yụꞌtacsiyaꞌ juchadyeꞌyaꞌ muntyiꞌ in, därsiꞌ raꞌ vaꞌtacdyeꞌ Jenꞌ soꞌminac miꞌin, jam jeñej muꞌin Tiroĉantyiꞌ in judyeyaꞌ Sidónĉantyiꞌ in, uyaꞌyaꞌ raꞌ muꞌin in. 15Miꞌin na Capernaumĉantyiꞌ, miꞌin buty dyijyi anic raꞌ mujuꞌchaꞌ yụꞌtac miꞌin, jam, jam raꞌ junꞌ meꞌ miꞌin, muꞌ raꞌ Jenꞌ vaꞌquicnac miꞌin, dadamꞌ raꞌ uyaꞌyaꞌ yụꞌtac miꞌin —Jesús yi p̂eyacsi bäꞌyedyeꞌĉantyiꞌ in jam chiquetety in.

16Quivij jéyacsi muꞌin cạptety p̂eyacdyeꞌ in:

—Tyi chuc seꞌvibunactyiꞌ p̂eyacdyeꞌ in, yụ́siꞌmun seꞌvibun yụ in, tyi chuc jam seꞌvibunactyiꞌ p̂eyacdyeꞌ miꞌin, meꞌdye raꞌ yụ́siꞌ p̂eyacdyeꞌ jam seꞌvibun yụ in, tyi chuc jam seꞌvibun p̂eyacdyeꞌ yụ in, muꞌin jam seꞌvete in muꞌ jutintyiꞌ yụ —jéyacsi Jesús.

Caꞌñibun muꞌin in yävätidyeꞌ quiꞌtac päräꞌ jiyity in

17Aty meꞌsiꞌ jụijyaꞌ in, muꞌin yävätidyeꞌ quiꞌtac päräꞌ jiyity in jutactyiꞌ Jesústyiꞌ muꞌ caꞌñibun in, anic maꞌjodyeꞌtum atsijban in. Jébajte in muꞌ Jesús:

—Räj sọyoꞌ chimeꞌ chäquibun p̂eyacdyeꞌ tsunsiꞌ in, aty jiꞌjäcbiyacyaꞌ tịj mi.

18Jesús vorjeyacsi:

—Anic nash meꞌ, ĉaĉaij nash muꞌ Satanás aty vaꞌcactyiꞌ mạyedyeꞌcheꞌ, yụ cạvete jiquej vaꞌcacyaꞌ jeñej yiris venaiꞌyis meꞌyetaqui jọꞌchaij. 19Meꞌdyes yụ soꞌmeyac ferdyeꞌ paj qui mọꞌ ñútyinac jiquej miꞌin, meꞌ qui tsanꞌ nas yútyetinte jụijyaꞌ, paj tsanꞌ ijtyiquij, aty jam qui jedyeꞌ raꞌ junꞌtyinac. Ferdyeꞌ miꞌin tupuj jiꞌpenbiꞌ sọyos ferdyeꞌ mọꞌ. 20Meꞌ tsanꞌ meꞌ chäquinac q̂uinꞌ sọyoꞌ in, jam qui na ramꞌ mọꞌ maꞌjotyetiñeꞌ miꞌin, mọꞌ ramꞌ maꞌjotyetiñeꞌ miꞌin aty sánac tịj mạyedyeꞌcheꞌ miꞌin.

Jesús maꞌjoij

(Mat 11:25-27; 13:16-17)

21Aty meꞌsiꞌ muꞌ Jesús anic maꞌjoij muꞌ Jenꞌsiꞌtum Ạꞌedyeꞌ muꞌ. Yi muꞌ Jesús jéte Jenꞌ:

—Yụ́tyiꞌ Jenꞌ, mi nash ayoꞌbuꞌyi jaccheꞌ judyeyaꞌ mạyedyeꞌcheꞌ, yụ yoshoropaij jéye mi, mi nash jịꞌchiqueyacsim ọij dyijyedyeꞌ mi muꞌin jam chị́dyeꞌtumtyiꞌ in, muꞌin qui namꞌ chị́dyeꞌtumtyiꞌ in judyeyaꞌ dyijyedyeꞌtumtyiꞌ ĉútity in, jam jịꞌchiqueyacsim. Ọij dyijyedyeꞌ mi Jenꞌ, ĉaĉaij na meꞌ mạꞌjeꞌ mi.

22Chat qui muꞌ Jesús jéyacsi muꞌyaty in:

—Jenꞌ yụ räj yuꞌtyiyin jiquej yụ räj meꞌchuiꞌ yụ ayoꞌbuꞌyedyes yụ. Jam yirity tyi chäyin yụ in, meꞌdye Jenꞌ mọmoꞌ chäyin yụ. Chimeꞌdye Jenꞌ jam yirity tyi chị́yete, yụ mọmoꞌ Ạvaꞌ muꞌ chị́yete yụ. Chimeꞌdye jụꞌñity chuc yụ mạꞌjeꞌ jịꞌchiqueyacsi paj qui chị́yeteve in muꞌ Jenꞌ, muꞌin mọmoꞌ tupuj chị́yete in —yi jéyacsi Jesús.

23Camanꞌyi cạvi jịꞌchiyactyiꞌ muꞌ, caminve jéyacsi:

—Där maꞌjoij miꞌin ọij cạvetiñes q̂uinꞌ miꞌin. 24Daiꞌ muꞌyaꞌ jiquej in urucyaty muntyiꞌ in, ayoꞌ in judyeyaꞌ jasoꞌmitity p̂eyacdyeꞌ Jenꞌ chimeꞌ in, muꞌin mạꞌjeꞌ tsanꞌ cạveꞌ in ọij cạvetiñes q̂uinꞌ miꞌin, jam qui namꞌ tupuj cạveꞌ jiquej. Chimeꞌdye mạꞌjeꞌ tsanꞌ seꞌveꞌ in ọij p̂eyacdyeꞌ seꞌvetiñes q̂uinꞌ miꞌin, jam qui namꞌ tupuj seꞌve in —jéyacsi Jesús.

Jịꞌĉocdyes p̂eyacdyeꞌ Samariaĉantyiꞌ muntyiꞌ

25Yirity muntyiꞌ jịꞌchiyacsity yụꞌtacdyeꞌ atsij ĉọshte muꞌ Jesús, mạꞌjeꞌ tsanꞌ jiꞌpente Jesús p̂eyacdyeꞌyaꞌ muꞌ. Muꞌ muntyiꞌ jéte:

—Jịꞌchiyacsity, ¿jedyeꞌ buty jemoñeij paj qui tupuj Jenꞌyaꞌ bäꞌyi yụ?

26Jesús vorjajiti:

—¿Jätäjyiꞌ caꞌ Jenꞌsiꞌ yụꞌtacdyeꞌ muꞌ? Aty caꞌ p̂eyeꞌ mi, ¿jätäjyiꞌ caꞌ?

27Muꞌ jịꞌchiyacsity yụꞌtacdyeꞌ muꞌ vorjete:

—Meꞌ yiꞌ: "Mạꞌjemac fer muꞌ Jenꞌ Ayoꞌ miꞌin, räj ĉojtyiꞌ miꞌin, judyeyaꞌ ạꞌedyeꞌ miꞌin, judyeyaꞌ ferdyeꞌ miꞌin, judyeyaꞌ dyijyedyeꞌ chimeꞌ miꞌin." Chimeꞌdye yiꞌ: "Mạꞌjeyacsevac fer chätidyeꞌ miꞌin, yojdyemꞌ ĉụiꞌ mạꞌjiti u miꞌin, meꞌ raꞌ mạꞌjeyacsi miꞌin", yiꞌ mọꞌ sánacdyeꞌ —jéte.

28Jesús vorjajiti:

—Anic rụij yi mi, meꞌ chiqueꞌ jụijyaꞌ ọij p̂eyacdyeꞌ mi, chat raꞌ Jenꞌyaꞌ bäꞌyi mi.

29Muꞌ na jịꞌchiyacsity mạꞌjeꞌ tsanꞌ rụij shupqui Jesússiꞌyaꞌ vej muꞌ, mọꞌdyes qui jéte Jesús:

—¿Tyijtyi bu raꞌ chätidyeꞌ mạꞌjeyaqui yụ?

30Jesús vorjajiti:

—Jụdyej yụ raꞌ jéye. Muꞌyaꞌ jiquej yirity muntyiꞌ roiꞌjeꞌ jịjcaiꞌ mọꞌ majmi Jerusalénĉansiꞌ. Jericóve jịjcaij. Majmiyaꞌ rébacsi ac̣hiꞌyity in, tapjete in, räj c̣honꞌjetyete taptete vatyquej muꞌyaꞌ in c̣honꞌjetyete quịꞌsiꞌ in, räj jäctyete in, judyeyaꞌ jämꞌ yụꞌte paꞌquete in, aty jam yi yụꞌte in, araj säñi yụꞌte in, chat qui farajjetacte in jọban qui in. 31Ĉụiꞌdye yirity atsij cudyitity Jenꞌcheꞌ, meꞌ tsanꞌ cạvete areꞌjise in, mijam qui namꞌ muꞌ ñịbeꞌ ĉọ́te, jeijmuñimꞌ cajñete. 32Chimeꞌdye yoctyiꞌ atsij Levíty vóshiꞌ muꞌ. Meꞌ tsanꞌ muꞌ cạvete chimeꞌ, jeijjemcate mọmoꞌ cajñete. 33Jäꞌquiij yoctyiꞌ atsij, Samariaĉantyiꞌ muꞌ.#10:33 Muꞌin judío in anic fạ́cacsi jiquej in Samariaĉantyiꞌ in. Muꞌyaꞌ nạijte ñịbeꞌ ĉọ́te ĉojtyiꞌĉan. 34C̣hẹiꞌyaꞌ tŝọ́tyete muꞌ, pịñitute aseijteyaꞌ judyeyaꞌ vinoyaꞌ judyeyaꞌ panjepte areꞌredyeꞌ muꞌ. Chat qui jiꞌfoquinꞌte bóricocheꞌ muꞌ, dyäquedyeꞌyaꞌ cạte, muꞌyaꞌ ĉọjcate. 35Nojno mạyedyeꞌ muꞌ Samariaĉantyiꞌ muntyiꞌ soꞌmete päräꞌ ficha muꞌ aꞌtumtyiꞌ dyäquedyes, judyeyaꞌ jéte: "Ĉọjcame yụ́dyes uts muntyiꞌ, jam tupuj jụijyaꞌ uts querec̣ha yụ, aty raꞌ caꞌñibunyaꞌ yụ, yụ raꞌ räj yaꞌityebanꞌ mọꞌ ĉọjcacdyeꞌ mi", yi muꞌ Samariaĉantyiꞌ muntyiꞌ jéte.

36Jesús chimeꞌ jéte muꞌ jịꞌchiyacsity:

—Muꞌin chibin muntyiꞌ in cạvetety in muꞌin meꞌtety in, ¿jụꞌñity buty chätidyeꞌ buꞌyity muꞌ?

37Vorjete muꞌ:

—Muꞌ ñịbeꞌ ĉọ́tety.

Vorjajiti Jesús:

—Anic meꞌ, meꞌdye raꞌ mi bäꞌyi chimeꞌdye yojdyemꞌ muꞌ u.

Jesús sóbacsi Marta judyeyaꞌ María

38Jesús jịꞌchiyactyiꞌtum muꞌ cuvij miꞌeban in. Ventyequeꞌ in yiris bäꞌyedyeꞌ, mọꞌĉan yiris p̂en bäꞌyiꞌ, Marta tịj mọꞌ, mọꞌ tiĉuñete. 39Mọꞌĉan chimeꞌdye Martas vojiꞌ mọꞌ, María tịj mọꞌ. Jesústum buꞌyiꞌ bäꞌyiꞌ seꞌvevaꞌbite p̂eyacdyeꞌ muꞌ. 40Mọꞌ na Marta jam mọꞌ jämꞌ ĉọiꞌ ĉaĉaij na mọꞌ cajotyitiꞌ dyijtuquiꞌ ĉụiꞌsiꞌ carijtacdyeꞌ mọꞌ. Mọꞌdyes qui jéte Jesús:

—Jam cavibutiꞌ vojiꞌ om, mijam méquiꞌ ñútyin yụ, yiris mọmoꞌ carijtaquiꞌ yụ. Jévaꞌ mi paj qui mọꞌ ñútyinve yụ.

41Vorjeꞌ Jesús:

—Marta, Marta, anic nash cajotyitiꞌ dyijtuiꞌ jedyeꞌ mi. 42Yiris mọmoꞌ raꞌ jemoñeꞌ mọjoꞌchaꞌ dyijtuiꞌ mi, yojdyemꞌ ọij María o dyijtuiꞌ ọij p̂eyacdyeꞌ, mọꞌ mọjoꞌchaꞌ jemonacsiꞌ, mọꞌ raꞌ jam chutac —jeꞌ Jesús.

Currently Selected:

Lucas 10: CAS

Highlight

Copy