Génesis 15

Jenꞌ jayuꞌtyiti p̂eyacdyeꞌ Abramdyes

1Chat qui taminꞌdyeꞌĉan muꞌ Ayoꞌ jiꞌcaviti Abramyaꞌ, jajiti:

—Jam raꞌ noiꞌyi mi Abram, yụ nash ñutschuyety, anic raꞌ chäcdyis bijodyeꞌ soꞌmeye.

2-3Vorjete Abram:

—Yụ́tyiꞌ Jenꞌ Ayoꞌ yụ, fibiꞌ raꞌ soꞌmitim bijodyes yụ ĉaĉaij na itŝij ạvaꞌ yụ. Mijam yirity ạvaꞌ soꞌmitim, úñity mọmoꞌ yụ Eliezer Damascoĉantyiꞌ, muꞌ ramꞌ räj jicbubun jedyeꞌ yụ säñiyaꞌ yụ —yi Abram jéte Jenꞌ.

4Ayoꞌ vorjajiti:

—Ĉụiꞌtyiꞌ raꞌ ạvaꞌ mi, muꞌ raꞌ jicbubun räj jedyeꞌ ĉụiꞌsiꞌ mi, jam raꞌ úñitydyes mi.

5Chat qui Jenꞌ jorojyaꞌ jácati, jajiti:

—Cạvevaꞌ jämꞌ mạyedyeꞌ, tsicseva räj ọ́rotaꞌ in tupuj jụijyam. Meꞌtum raꞌ vóshiꞌ mi anic raꞌ daiꞌ in.

6Abram anicjete muꞌ Ayoꞌ meꞌdyes muꞌ rụij jayuꞌti. 7Jenꞌ jajiti:

—Yụ nash Ayoꞌ jiꞌshupjadyeyety Urĉantyiꞌ jiquej mi, Caldeaĉansiꞌ jac, q̂uinꞌ raꞌ soꞌmeye ọij jac, tasenꞌdye raꞌ mídyes —yi jajiti.

8Abram vorjete:

—Yụ́tyiꞌ Jenꞌ Ayoꞌ yụ, ¿junꞌ buty raꞌ tupuj chịj yụ aty yụ́dyes ọij jac?

9Vorjajiti Jenꞌ:

—Jeshaꞌ, tucseva cuꞌdyeꞌ, cäts chibinsis yómodyeꞌ in, yiris vaca judyeyaꞌ yiris chivo p̂en, judyeyaꞌ yirity oveca sonꞌ, judyeyaꞌ yiris chimeꞌ ọꞌtoꞌ judyeyaꞌ yiris tórtula chimeꞌ,#15:9 Mọꞌ tórtula jaijtyiꞌ nash chimeꞌ jeꞌñes ọꞌtoꞌ joꞌmes mọꞌ tórtula. meꞌ meꞌ raꞌ tuyitim.

10Meꞌ meꞌdye tuyete Jenꞌ cuꞌdyeꞌ in, chat qui muꞌ Abram ijacsi jaiꞌtacsi judyeyaꞌ qui pạrejjeꞌ ovemun yụꞌtyeꞌ muꞌ. Mọꞌin na jaijtyiꞌ in jam jaiꞌtac in, memꞌ mun in. 11Atsij tsanꞌ cáyenꞌ ĉọ́teꞌ jebacdyeꞌ in, muꞌ na Abram ishajjeĉunacsi. 12Aty jurumyejoiꞌ Abram ĉọshi, säñej muꞌ ĉọshi. Meꞌĉandye juñumjajiti tojmas, där noiꞌyi muꞌ, tyumꞌyi ĉojtyimꞌ.

13Chat qui muꞌ Ayoꞌ jajiti:

—Yụ jéye q̂uinꞌ muꞌin raꞌ vóshiꞌ mi yocsiꞌĉan raꞌ bäꞌyedyeꞌ bäꞌyi in, yoctyiꞌtum muntyiꞌ in úñi raꞌ bäꞌyi in, där raꞌ ñịbeꞌtac in, vạjpedyeꞌ quiꞌ cien yómodyeꞌ, meꞌquiꞌ raꞌ ñịbeꞌtac in. 14A raꞌ meꞌsiꞌ yụ raꞌ soꞌmacsi vaꞌtacdyeꞌ muꞌin ñịbeꞌtacsity in, jiꞌcarijtacsity muꞌĉan in, mítyiꞌ raꞌ vóshiꞌ c̣hoñi raꞌ in anic raꞌ jedyeꞌtum shuban in muꞌĉantyiꞌ in. 15-16Anic raꞌ daiꞌ yómodyeꞌ bäꞌyi in yocsiꞌĉan bäꞌyedyeꞌ, vạjpedyeꞌ quiꞌ cien raꞌ yómodyeꞌ meꞌ buꞌyi in, chat q̂uinꞌdyemꞌ raꞌ úĉan jijtuban in. Muꞌin raꞌ jam cavintum atsij in ĉaĉaij na tacaꞌ raꞌ úĉan bäꞌyi in Amorreo in. Muꞌin raꞌ yejĉoij ac̣hiꞌ bäꞌyi in, ĉụiꞌdye raꞌ ayij tupudyeꞌ yụ raꞌ soꞌmacsi vaꞌtacdyeꞌ muꞌindyes in, mity qui raꞌ vóshiꞌ úĉan bäꞌban in. Mi na raꞌ jam cạveꞌ joꞌmes, maꞌjodyeꞌtum ramꞌ bäꞌyi mi jämꞌ ramꞌ ishoij mi, chat qui raꞌ q̂uinꞌdyemꞌ säñi mi, penꞌdyetucsi raꞌ vóshiꞌvun mi —yi jajiti.

17Aty siti tsun q̂uinꞌdyemꞌ tomajyejoiꞌ, ĉụiꞌdye jiꞌcavitiꞌ in mọꞌyaꞌ jeñej jịꞌsaꞌtumsiꞌ jedyeꞌ coꞌshaiꞌsiꞌ, mọꞌyaꞌ chimeꞌ yiris miquis fur buꞌyis, ĉụiꞌ miꞌi in dyeteꞌĉan yóyaꞌdyemꞌ jayeꞌyaꞌ jebacdyeꞌ u in, mọꞌyaꞌ tyeiꞌ in. 18Mọꞌdye mạyedyeꞌ muꞌ Ayoꞌ yụꞌtyeyete p̂eyacdyeꞌ Abramdyes, jajiti:

—Ọij q̂uinꞌ jac yụ raꞌ soꞌmacsi mítyiꞌ vóshiꞌ in, yoquiꞌdyemꞌ tiyacchutiꞌ cojiro u, Egipto tịj muꞌ, meꞌdye chaꞌshete muꞌ därtyiꞌ cojiro, Eufrates tịj muꞌ, meꞌquiꞌyaꞌ raꞌ jịjcaiꞌ soꞌmacsi jac yụ. 19Muꞌĉan bäꞌyi muꞌin ceneo in, judyeyaꞌ cenezeo in, cadmoneo in, 20hitita in, ferezeo in, refaita in, 21amorreo in, cananeo in, gergeseo in judyeyaꞌ muꞌin jebuseo in, meꞌ meꞌ muꞌĉan bäꞌyi q̂uinꞌ in —yi Jenꞌ jajiti Abram.

Currently Selected:

Génesis 15: CAS

Highlight

Copy