Uñedye' 4

Jiꞌmeꞌtac ayoꞌyaꞌ in Pedro judyeyaꞌ Juan

1Pedro judyeyaꞌ muꞌ Juan p̂eyacvaꞌjoij muꞌin in, ĉọsseti vatyquej cudyitity Jenꞌcheꞌ in judyeyaꞌ muꞌin saduceo in judyeyaꞌ ayoꞌ muꞌin yụꞌtactyiꞌ in ĉọjcaiꞌtyiꞌ acaꞌ in Jenꞌsiꞌ muꞌ. 2Jịꞌfajcacsiꞌ mọꞌ jiꞌchäyitidyeꞌ Pedros judyeyaꞌ Juansimꞌ, ĉaĉaij na yi in: "aty vañinyeban muꞌ Jesús". Mọꞌ jiꞌcaviyisinꞌ tsun chimeꞌ vañinyeban sänaquemuntyiꞌ in. 3Mọꞌ jiꞌmeꞌtyeyacsi in tapjeyacsi in Pedro judyeyaꞌ muꞌ Juan, ĉärꞌtaquisĉan tacjeyacsi in, muꞌĉandye ĉọshi in ĉaĉaij na aty yómoij in, jam tupuj jiꞌcaviti ayoꞌyaꞌ in. 4Meꞌ tsanꞌ meꞌ muꞌin seꞌvaquity in daiꞌ muꞌin anicyi in. Aty daiꞌ anicjetety Jesucristo in, ĉanamꞌ quiꞌ mir meꞌtum rụiꞌcuꞌ in sonꞌ in, p̂en qui namꞌ jam tsicsi in.

5Nojno mạyedyeꞌ vajmuꞌyaij Jerusalénĉan in muꞌin judíoty ayoꞌ muꞌin, judyeyaꞌ muꞌin tashcheꞌ buꞌyity in judyeyaꞌ muꞌin jịꞌchiyacsity yụꞌtacdyeꞌ chimeꞌ in. 6Muꞌyaꞌ muꞌ chimeꞌdye Anás, muꞌ tashchety cudyitity Jenꞌcheꞌ jiquej, judyeyaꞌ räj chätidyeꞌ muꞌ, Caifás, judyeyaꞌ Juan judyeyaꞌ Alejandro chimeꞌ. 7Aty tsudyujñitidyeꞌĉan muꞌin chat qui jutacsi in paj qui jäcacsi in muꞌ Pedro judyeyaꞌ muꞌ Juan, yụꞌtacsi in muꞌinsiꞌyaꞌ vej muꞌin. Chat qui cọdyetacsi p̂eyacdyeꞌ in:

—¿Junꞌ buꞌyi caꞌ jiꞌchäĉajtinte muꞌ muntyiꞌ? ¿Tyi caꞌ meꞌ soꞌminac ferdyeꞌ? —jéyacsi in.

8Jenꞌsiꞌ Ạꞌedyeꞌ játŝuti muꞌ Pedro, yi muꞌ vorjeyacsi:

—Seꞌvibutiĉamꞌ ọij p̂eyacdyeꞌ ayoꞌ tsuntyiꞌ miꞌin judyeyaꞌ miꞌin tashcheꞌ buꞌyity miꞌin. 9Miꞌin cudyityitiĉaꞌ p̂eyacdyeꞌ tsun miꞌin junꞌ buty tsun tupuj nọ́tyete muntyiꞌ jiꞌchäĉajte tsun. 10Mọꞌdyes tsun mạꞌjeꞌ jéyac paj qui räj chịj miꞌin Israeltyiꞌ vóshiꞌ miꞌin, mọꞌ därsiꞌ ferdyeꞌ Jesucristos, Nazaretĉantyiꞌ, mọꞌyaꞌ jiꞌchäĉajte tsun uts muntyiꞌ cạvetintety q̂uinꞌ miꞌin, yódyetydyemꞌ jiꞌpactintety croshcheꞌ u miꞌin. Jenꞌ qui namꞌ jajiꞌtsaꞌibun. 11Muꞌdye Jesús p̂eijte mọꞌ sánacdyeꞌ, mij jiꞌshupte yiꞌ: "Muꞌ acadyety mij vaꞌquectintety miꞌin acaijtyiꞌ miꞌin, muꞌ q̂uinꞌ mujuꞌchaꞌ yụꞌtac acadyety", yiꞌ sánacdyeꞌ. 12Anicdye meꞌ mumꞌ yirity jiꞌc̣honsinꞌ muntyiꞌ tsun, itŝij muꞌyaꞌ yoctyiꞌ yụꞌtac úcheꞌ jaccheꞌ paj qui jiꞌc̣honsinꞌ tsun —yi muꞌ Pedro jéyacsi.

13Muꞌĉantyiꞌ ayoꞌ in anic äjjeyacsi in Pedro judyeyaꞌ muꞌ Juan, ĉaĉaij na sóñiꞌyedyeꞌtum vorjeyacsi in. Yi ayoꞌ in: "Uts jam junꞌ jịꞌchiyactyiꞌ in, ¿junꞌ qui meꞌ sóñiꞌyedyeꞌtum voryi in?" yi in. Mọꞌ jorojĉanjeyacsi muꞌin nash penꞌdyeꞌ Jesústyiꞌ in, muꞌdye jịꞌchiyacsi. 14Chimeꞌdye muꞌyaꞌ muꞌ muntyiꞌ jiꞌchäĉajtety in, muꞌin na ayoꞌ in jam junꞌ tupuj jedyeꞌ jéyacsi in. 15Chat qui muꞌin ayoꞌ in jiꞌshupcacseban chum in paj qui p̂iyiti in. 16Yi in:

—¿Junꞌjeyacsejaꞌ bu raꞌ uts q̂uinꞌ muntyiꞌ in? Aty räj buꞌyiꞌ Jerusalénĉan chị́yacsi in anic därsiꞌ ferdyeꞌ jịꞌcaveyacsi in, jiꞌchäĉajte in muꞌ bureijtyiꞌ muntyiꞌ, jam tupuj ticamejaꞌ tsun. 17Damꞌdye jämꞌ chojvacsejaꞌ tsun paj qui aty jam cuvij voroꞌtacseban in paj qui jam jiꞌjäcbibajte Jesússiꞌ tịj in, paj jam yejĉoij in jiꞌtseꞌeꞌ in mọꞌ p̂eyacdyeꞌ —yi jítidyeij ayoꞌ in.

18Quivij jiꞌsitacseban in Pedro judyeyaꞌ muꞌ Juan, fercheꞌ jéyacsi in paj qui jam voroꞌtacsi in Jesússiꞌ p̂eyacdyeꞌ muꞌ, mijam raꞌ jịꞌchiyacsi muntyiꞌ in. 19Pedro judyeyaꞌ muꞌ Juan yi vorjeyacsi in:

—Dyijyevac miꞌin, Jenꞌsiꞌyaꞌ vej muꞌ, ¿tyi buty jemoñeꞌ chiquete tsun, areꞌ Jenꞌ areꞌ miꞌin chiqueyac? 20Tsun raꞌ jam junꞌ farajjeꞌ mọꞌ p̂eyeꞌ mọꞌ cạveꞌsiꞌ tsun judyeyaꞌ seꞌveꞌsiꞌ tsun, mijam raꞌ junꞌ ticameꞌ tsun —yi jéyacsi in.

21Muꞌin ayoꞌ in dadamꞌ mujuꞌchaꞌ c̣hojvacsi in chat qui jiꞌc̣honacsi in, jam tupuj vaꞌtacdyeꞌ soꞌmacsi in ĉaĉaij na räj muntyiꞌ in timaꞌquete Jenꞌ in ĉaĉaij na muꞌin jiꞌchäĉajte in. 22Muꞌ na jiꞌchäĉajtety muntyiꞌ in aty muꞌ ishoꞌ atsvun, vạjpedyeꞌ quiꞌtac yómodyeꞌ atsvun tyiti muꞌ.

Anicjetety Jenꞌ in cọdyete sóñiꞌyedyes muꞌin

23Pedro judyeyaꞌ muꞌ Juan aty c̣hoñi in chat qui ĉọcseĉan in muꞌin anicjetety Jenꞌ in, räj jiꞌshupqueyacseban p̂eyacdyeꞌ in ayos in judyeyaꞌ c̣hojvacdyeꞌ muꞌinsiꞌ tashchety cudyitity Jenꞌcheꞌ in judyeyaꞌ muꞌin tashcheꞌ buꞌyity judío in. 24Muꞌin anicjetety Jenꞌ in aty seꞌvacsebi p̂eyacdyeꞌ muꞌin chat qui yiriꞌyaꞌ cọdyete Jenꞌ in, jéte in:

—Tsuntyiꞌ Ayoꞌ, mi nash jämꞌtyeꞌ mạyedyeꞌ judyeyaꞌ jac judyeyaꞌ mar räjtumdye meꞌchuiꞌsiꞌ in. 25Ạꞌedyeꞌ mi jiquej jasoꞌmiti p̂eyacdyeꞌ muꞌ David, úñity mi, meꞌ sáñeꞌ muꞌ, yiꞌ:

"¿Jedyeꞌ buty jịꞌfajcacsiꞌ muntyiꞌ in yoctyiꞌdye in?

¿Junꞌ dash vaꞌbunyedyeꞌtum dyijyi in?

Fibis dyijyedyeꞌ muꞌin.

26Muꞌin jacchety ayoꞌ in vaj cäts dyijyi chuti in,

Ayoꞌtum chuti tsanꞌ in judyeyaꞌ Jiꞌc̣honacsitytum jutactyiꞌ Ayoty muꞌ", yiꞌ sánacdyeꞌ.

27Anic cạ̈tsiꞌ mọꞌ, ĉaĉaij na q̂uinꞌ úĉan bäꞌyedyeꞌĉan in yedyety ayoꞌ in vajmuꞌyaij in, Herodes judyeyaꞌ Poncio Pilato judyeyaꞌ Israeltyiꞌ vóshiꞌ in judyeyaꞌ yoctyiꞌdye muntyiꞌ in, muꞌintum muꞌin in.#4:27 Jam yirity mọmoꞌ Herodes Jenꞌsiꞌcheꞌ sánacdyeꞌ muꞌ. Uts nash Herodes Antipas, muꞌ nash ạvaꞌ muꞌ tashchety Herodes, muꞌ jiꞌujacsity miquiꞌmuntyiꞌ in. Vaj cäts dyijyi muꞌin in junꞌ buꞌyi chuc ijate in muꞌ Jesús, muꞌ rụijtyity jutactyiꞌ mi, muꞌ yụꞌtactyiꞌ mi paj qui muꞌ jiꞌc̣hoñin tsun. 28Meꞌ tsanꞌ mọꞌ dyijyedyeꞌ muꞌin, muꞌin qui namꞌ jịꞌcätsibun in dyijyedyeꞌ mi, ĉaĉaij na ferdyeꞌyaꞌ mísiꞌ dyijyi mi paj qui ijac muꞌ. 29Mọꞌdyes q̂uinꞌ tsun cọdyeyac Ayoꞌ, dyijtuvaꞌ c̣hojvacdyeꞌ tsundyes q̂uinꞌ, ñútyitiĉamꞌ tsun paj qui sóñiꞌyedyeꞌtum jéyacsi p̂eyacdyeꞌ tsun, paj qui jam quijnacdyeꞌtum tsun. 30Chimeꞌdye ferdyeꞌ soꞌmitiĉamꞌ tsun mi paj qui tupuj jiꞌchäcacseban tsun muꞌin areꞌreijtyiꞌ in judyeyaꞌ chimeꞌ paj qui jịꞌcaveyacsi tsun ferdyeꞌ mi, jiꞌjäcbiteyaꞌ tsun Jesússiꞌ tịj muꞌ, muꞌ rụijtyity jutactyiꞌ mi —yi jéte cọdacdyeꞌĉan muꞌin.

31Aty ijaijyaꞌ cọdyete Jenꞌ in, mọꞌ qui acaꞌ yóĉandyemꞌ vajmuꞌyaijĉan u in ĉụiꞌdye mọꞌ sijsijyiꞌ, meꞌĉandye tŝọcsiꞌ Jenꞌsiꞌ Ạꞌedyeꞌ muꞌ judyeyaꞌ jam quijnacdyeꞌtum tiyacchuiꞌ in voroꞌtacsi in Jenꞌsiꞌ p̂eyacdyeꞌ muꞌ.

Vaj meij soꞌmitidyeij jedyeꞌ muꞌin

32Vaj anicjetety Jenꞌ in, vaj cäts dyijyi in, mijam quijatutyitidyeij jedyeꞌ in, vaj meij soꞌmitidyeij ĉụiꞌsiꞌ jedyeꞌ muꞌin. 33Jutactyiꞌ Jenꞌtyiꞌ muꞌ yejĉoij jịꞌchiqueyacsi in junꞌ chuc muꞌ Jesús Ayoꞌ tsun vañinyeban, ferdyeꞌtum voroꞌtacsi muꞌin in Jenꞌ ñịbeꞌyedyeꞌyaꞌ muꞌ nọ́tyetacsi räj in. 34Jam yirity muꞌinĉantyiꞌ in jam jedyeꞌ jayejjotaqui in. Tyi chuc meꞌchuiꞌtyiꞌ jac in, paj tsanꞌ acaꞌ muꞌin, mọꞌ jiꞌmincaqui in, muꞌ qui querec̣ha 35soꞌmacsi in muꞌin jutactyiꞌ Jenꞌtyiꞌ muꞌ, muꞌin qui jiꞌjiyeyacsi in muꞌin jayejjotaquity in. 36Meꞌdye chimeꞌ muꞌĉantyiꞌ yirity muntyiꞌ, José tịj muꞌ, Levítyiꞌ vóshiꞌ muꞌ, Chiprevety muꞌ. Muꞌin jutactyiꞌ Jenꞌtyiꞌ muꞌ jéte in: Bernabé, jéte in. Bernabé yiꞌ ca yiꞌ: "Jiĉun Yụꞌtacsity." 37Uts José chimeꞌ jiꞌmincaqui yiris jac muꞌ, chat qui soꞌmacsi querec̣ha muꞌ muꞌin jutactyiꞌ Jenꞌtyiꞌ muꞌ.

Currently Selected:

Uñedye' 4: CAS

Highlight

Copy