Maatiusiup Aglangit 9

Jiisusiup Nukiqanngittumik Aaqqiksininga

Maakusi 2:1-12; Luukasi 5:17-26

1Jiisusi umiamut ikigami tasiup akianut nunatuqaminut utirivuq, 2inuit ilangita aatsivigivaat angummik nukiqanngittumik, iglirmi nalajumik; Jiisusiup qaujimagamigit ukpirniqarninginnik, angut nukiqanngittuq uqautivaa, “Irniik quviasulirit! Ajurnitit isumagijaujunnairmata.”

3Takugit, piqujanik ilisaijit ilangit immingnut uqaqatigiiliqput, “Una Guutimik uqarnirluutiqaqtuq!”

4Jiisusiup qaujigamigit sunamik isumangmangaata, uqautivait, “Sungmat taimaak isumaqaqpisi piunngittualungmik? 5Nalliat pijarnirniqsauva? Uqarluni, ‘Ajurnitit isumagijaujunnaiqput,’ uvvalu uqarluni, ‘Makillutit pisulirit’? 6Qaujiniarassi, Inuup Irninga pijunnarniqarmat, tamaani nunarjuarmi ajurnirnik isumagijunnaiqsijunnarnirmik,” taimaimmat nukiqanngittumut uqaqpuq, “Makittit, nallangaviit tigulugu, angirralirit!”

7Angut makinnami angirraqpuq. 8Inuilli tamatuminga takunnaqtut, kamaniammarikput, Guutimik niqtuilirlutik, inungnut pijunnarnirmik tunisisimaninganut.

Jiisusiup Qaiqujininga Maatiusimik

Maakusi 2:13-17; Luukasi 5:27-32

9Jiisusi tavvannga qimaruutilirluni, takuvuq Ruumamiut kiinaujaiqtitsijiqutingannik, Maatiusimik atilingmik, pinasuarvingmini iksivajumik; uqautivaa, “Malinnga.” Nikuvinnami, Jiisusi maliliqpaa.

10Kinguningagut Jiisusi nirijaqtuqatauvuq Maatiusiup iglungani,#9:10 Maatiusiup iglungani, uvvaluunniit Jiisusiup najuqpaktangani suqquinanngittuq Ruumamiut kiinaujaiqtitsijingit amisut ajuqtulinirmut narrunarniraqtaujut qaiqataugivut, Jiisusi ilinniaqtingillu nirivingmi niriqatigilirlugit. 11Paarisit ilangita tamanna takugamijjuk Jiisusiup ilinniaqtingit apirivait, “Sungmanuna ilisaijisi kiinaujaiqtitsijinik ajuqtulijuniglu niriqatiqaqpa?”

12Jiisusiup tusaramigit uqautivait, “Qanimanngittut aanniasiutiqariaqanngilat, qanimajulli kisimi. 13Atii qaujisatsialaurissi, Guutiup uqausinginni qanuq tukiqarmangaat, imaak uqaqsimajuq: ‘Nikagusungniq pijumavara, uumajunik tunirrusirniunngittuq.’ Nalaaguutsiaqtunik tikijjutiqaqsimanngilanga, ajuqtulijunigli qaiqujijaqtuqpunga.”

Nirittailinirmik Jiisusiup Apirijauninga

Maakusi 2:18-22; Luukasi 5:33-39

14Taissumani Juanasi Paaptitsirijiup ilinniaqtingit Jiisusimuaqput, apirillugu, “Sungmat Paarisillu nirittailivakpita? Ilinniaqtitilli nirittaililauqsimatinnagit?”

15Jiisusiup kiuvait, “Katititaujuqaqtillugu quviasuglutik niriqatigiiktillugit qaiqujausimajut qiksaagiaqaqturivisiuk, uiksaq suli tavvaniitillugu? Taimaisuungunngilat! Ullurli nalliutijumaaqpuq uiksamik aqsaaqtauvingat, tavva taakkua nirittaililitainnarumaaqput.

16“Annuraatuqarmik ilasijuqaqpanngilaq nutaamik iqijattumik,#9:16 Uliktijattumik, uvvalu mikigliniusajumik taassuma nutaap iqiliruni annuraatuqaq alikturajarmagu, annuraatuqaullu angmajunga angiglikkannituinnarajaqpuq. 17Ammattauq uainimik nutaamik kuvisijuqaqpanngilaq uainiqautituqarmut uumajuviniup aminganut; uainiup nutaap uainiqautituqaq suratuinnarniarmagu,#9:17 Sukkulangangmagu uainilu kuvituinnarniaqpuq, uainiqautituqaq atuqtuksaujunniirluni; uainili nutaaq kuvijauguni uainiqautimut nutaamut, tavva taakkuak tamarmik asirunngittuinnaugajaqpuuk.”#9:17 Sukkunnianngilaq

Angajuqqaap Paninga Arnaullu Jiisusiup Annuraanganik Aktuqsininga

Maakusi 5:21-43; Luukasi 8:40-56

18Jiisusi suli tamakkuninga uqallaktillugu, takugit angajuqqaamit upaktauvuq, Jiisusiup saanganut siiqqurluni, uqaqpuq, “Paniga tuqurataarmat; upalauruk patimmijaqturlugu, tavva inuuniaqpuq.”

19Jiisusi nikuvilluni angut maliliqpaa, ilinniaqtingillu malikkivut.

20Takugit arnaq iluanngijutiqaqtuq aunaanginnarnirminut arraagunik 12-nik, Jiisusi maligluniuk kinguninganit, annuraangata sinaagut aktuqpaa. 21Imaak isumaqalirami, “Annuraangaluunniit akturunnarukku, aaqqiktauniaqpunga.”

22Jiisusi tunummut qiviarluni arnaq takuvaa, uqautillugu, “Paniik quviasulirit! Ukpirnivit aaqqikpaatit,” tavvatsainnaq arnaq aaqqiktautsiaqpuq.

23Jiisusi tikiutivuq angajuqqaap iglunganut itirluni, nijjausijaqtunigli iluviqsijuqsiutinut takugami, inungniglu nipiqquqtujunik,#9:23 Nipaajut qiksaangnirmut, uvvalu qiajut ugguarnirmut 24uqaqpuq, “Anilaurissi! Una niviaqsaaq tuqunngimmat sinituinnaqpurli!” Taakkualu mitautigiliqpaat. 25Inuit aningmata iglumit, Jiisusi niviaqsaap najuqtanganuaqpuq aggangitigut tiguvaa, niviaqsaaq makippuq. 26Tamanna piniarniurataaqtuq siammaqtitauliqpuq namutuinnalimaaq tavvani nunaqaqtunut.

Jiisusiup Tautunngittuungnik Tautuliqtitsininga

27Jiisusi tavvanngat qimaruutilluni pisuliqtillugu, tautunngittuuk marruuk maliksaqpuuk, qaigalaarlutik uqaqpuuk, “Taivitiup Irninga naakkigitiguk!”#9:27 Naakkigitiguk, nagligiluta ikajuqtiguk

28Jiisusi iglumut itirmat, tautunngittuuk tavvunngaqpuuk; Jiisusiup apirivaak, “Ukpirusukpisik ilissinnik tautuliqtitsijunnarninnik?”

Taakkuak kiuvuuk, “Ukpirusukpuguk, Ataniq!”

29Ijingiktikkuglu akturlugik uqaqpuq, “Ukpirusungnisik maliglugu taimailirli.” 30Taakkuaglu tautuliqpuuk. Jiisusiup iniqtimmariglugik uqaqpuq, “Tamanna kinatuinnamut qaujijautittailisikkuk!”

31Taakkuagli tavvanngat anigamik Jiisusiup piniarninga uqausiriliqpaak namutuinnalimaaq tavvani nunaqaqtunut.

Jiisusiup Tusaanngittumik Tusaaliqtitsininga

32Taakkuak angutiik marruuk tavvanngat aningmatik, Jiisusimuarujjijuqaqpuq angummik uqarunnanngittumik, anirnirlungmut itiqtausimajumik. 33Anirnirlugli inungmit anititaungmat, taanna uqarunnanngittuq uqallaliqpuq, inuillu kamaniammariliqput, uqarlutik, “Taimaak takulauqsimanngimmarikpugut Isarialimi!”

34Paarisilli uqaliqput, “Una anirnirluktut angajuqqaangannut pijunnarniqaqtitaujuq anititsijunnarnirmik taimaittunik.”

Jiisusiup Inungnik Nagligusungninga

35Jiisusi nunaliktigut iglugasaktigullu ingirravuq, Juutit ukpirnirmut katimavinginni ajuriqtuivagluni, uqallaglunilu Uqausirnik Tusaruminaqtunik Guutiup Ataniuvinganik, inuillu qanutuinnaq aannialit, qanimajullu aaqqikpait. 36Inugiakturjualli takugamigit, ilatsugiliqpait, isumajaarmata ikajuqtiksaqaqtuujaaratik, siipititut paiqsijiqanngittutitut. 37Taimaimmat ilinniaqtini uqautivait, “Piruqtut katiqsugaksait angijuuvut, pinasuaqtuksailli amigaqput. 38Taimaimmat piruqtut katiqsugaksat ataningat tuksiarvigisiuk tilisiqullugu pinasuaqtuksanik, katiqsuiniaqtunik piruqtunik nakatirivingmi.”

Currently Selected:

Maatiusiup Aglangit 9: EAIBR

Highlight

Copy