Luukasiup Aglangit 24

Jiisusiup Makinninga

Maatiusi 28:1-10; Maakusi 16:1-8; Juanasi 20:1-10

1Ullaraarjukkut pinasuarusiup ullungita sivulliqpaangani, arnait iluvirmuaqput, tipitsiariksautinik atuinnarulauqtamingnik naksarlutik. 2Iluviup matunga ujaraaluk aksakaqtitaviniq takuvaat, 3iluanut itiramik Ataniup Jiisusiup timinga takunngilaat. 4Tavvani naluliuqqatillugit, takugit, nangiqatiqaliqput angutiingnik marruungnik qaumajunik qilliqtunik annuraaliingnik. 5Kappiasungnirmut nunamut paammakput, taakkunanga uqaujjauvut, “Sungmat makisimajuq tuqungajuni qiniqpisiuk? 6Tamaaniinngilaq makisimavuq. Iqqailirissi uqautilaurmasi, Galiliamiilluni suli, 7‘Inuup Irninga tunijaujariaqaqpuq ajuqtulijunut, kikiaktuqtaulunilu, ulluillu pingajuanni makilaarivuq.’”

8Arnait iqqailiqput uqausinginnik, 9iluvirmit utiramik tamakkualimaat uqausirivait 11-nut ilinniaqtinut asilimaanginullu. 10Arnait ukuangulauqput Miari Maaktaliini, Juanalu, Miarilu Jaimisiup Anaananga; arnanik asimingnik ilaqarlutik unikkaalauqput aapuusitalingnut; 11taakkua uqausinnguatuinnaujuriksivut, ukpirusugatik taakkuninga. 12Piitturuusili nikuvilluni iluvirmut ullaksivuq, iluanut itsuarami, takuvuq qallunaaqtat immutivinit taakkuatuat tavvaniittut, utirlunilu, isumaksaqsiuliqpuq qanualuk tamakkua pinnirmangaata.

Nunalingnut Imaiasimut Pisuqatigiiktut

Maakusi 16:12-13

13Ullumi taissumanitsainnaq marruuk Jiisusiup maliktingik pisulauqpuuk nunalingnut Imaiasimut, immaqaa 7-mailimik ungasingniqaqtumut Jiruusalimmit, 14taakkuak uqaqatigiikpuuk uqausiqarlutik piniarniulauqtunik tamainnik. 15Uqaqatigiiktillugik suli, Jiisusi nangminiq upagutivuq taakkungnunga pisuqatigilirlugik. 16Taakkuak taassuminga ilitaqsijunnaqtitaulaunngilaak. 17Jiisusiup uqautivaak, “Sunamik uqaqatigiigutiqaqpisik pisuktillusik?”

Taakkuak nuqqaqpuuk, qiksaaglutik. 18Aippangata Kiliupaasimik atiliup, kiuvaa, “Ivvituaq Jiruusalimmuaqsimajunit ulluni tamakkunani pijuqalauqtumik qaujimanngittutuuvit?”

19Jiisusiup apirivaa, “Sunamik pijuqalaurmat?”

Taakkuak uqaqpuuk, “Jiisusi Naasariitimiuq pillugu, taanna nalauttaijulauqpuq pijunnarniqarluni piniarnirmigut uqausirmigullu Guutiup inuillu saangani. 20Tunirrusiqtitsijitta angajuqqaanngitta aulatsijittalu pijautilauqpaat tuqutauqullugu, kikiaktuqtaulauqpuq sanningajulingmut. 21Uvagulli niriulauqpugut taassumunga Isarialimiut uqumaiksarunniiqtitauniarasugillugit. Taimanngalli maanna ullut pingajugiliqpaat taimailiuqtaulauqtillugu. 22Ammattauq, arnait ilagijatta quaqsaaqtiqqauvaatigut, ullaaq qaummaliqtillugu iluvirmuaramik; 23timinganik takuqqaunngimmata; utiramik unikkaaqqauvut aingilimik takutitaunirarlutik, uqaujjaunirarlutiglu Jiisusi makisimaniraqtautillugu. 24Ilagijatta ilangit iluvirmualauqput takullutik arnait unikkausiriqqaujangititut taimaalluaq, kisianili Jiisusimik takunatik.”

25Jiisusiup uqautivaak, “Silaittualuujusik, ukpirusulirunnanngittusiglu nalauttaijut uqausirisimajanginnik! 26Qaujimanngilasik Christuusi taimaak ilungiqsuqtitaunikkut iniqunarnirjuarmut pititaujuksauninganik?” 27Jiisusiup nalunaiqsivigitsiaqpaak pigiarluni Muusisiup aglanginnit nalauttaijullu aglanginnit aglalimaat nalunaijaqpait imminik uqausiqaqsimajulimaat.

28Nunalingnut upaktamingnut tikiliramik, Jiisusi qaangiutiniaqtuujaaliqpuq, 29taakkuak nuqqaqujiliqpuuk, uqautillugu, “Uvattinniilaurit, unnulilirmat taaqsivallialirluni.” Jiisusiup iglumuaqatigivaak taakkunaniilirluni. 30Ingippuq niriqatiginiarlugik, niaquujaq tiguvaa, qujalilluni, avikpaa, taakkungnunga tunillugu. 31Ijingik tavva takutitauliqpuuk ilitarillugulu; Jiisusili tavvanngat takuksaujunniiqpuq. 32Taakkuak immingnut uqaliqpuuk, “Uunaqsijualuuqqaugaluaqpuguk iluttingni uqallaktillugu aqqutikkuuqtilluta, aglangnik uqarvigingmatikkuk nalunaiqsivigillunuglu.”

33Taakkuak nangiqsivuuk, tavvainnaq Jiruusalimmut utilirlutik; ilinniaqtit 11 upakpait ilagijangillu katimajut. 34Taakkuak uqaqpuuk, “Ataniq ilaak sulijumik makisimavuq, Saimuunimut saqqilauqtuq!”

35Tavva angutiik unikkaaliqpuuk aqqutimi qanuinniriqqaujamingnik, qanurlu Atanirmik ilitaqsiniriqqaujamingnik, niaquujamik aviksiliqtillugu.

Jiisusiup Saqqinninga Ilinniaqtiminut

Maatiusi 28:16-20; Maakusi 16:14-18; Juanasi 20:19-23; Aapuusitaliit 1:6-8

36Taakkuak unikkaaqtillugik suli tamatuminga, Ataniq nangminiq akunninganni nangiliqpuq uqarluni, “Saimaniqarissi.” 37Taakkuali quaqsaangaliqput kappiasuglutik, tuurngarmik takunasugillutik. 38Jiisusiup uqautivait, “Sungmat quaqsaangavisi sungmallu qularniqaqpisi uummatissinni? 39Aggakka takuliqsiuk itigakkalu, uvangallariuvunga; aktuliqsinnga, qaujilirissi anirnituinnaq uviniqaranilu sauniqanngimmat takuvusili uviniqarlungalu sauniqarama.”

40Taimaak uqariirami, aggaminik itigaminiglu qimirrutippait. 41Suli ukpirusunngimmata quviasuluarnirmut, kamanirmullu; Jiisusiup uqautivait, “Uvani nirijaksaqaqpisi?” 42Iqalungmik uusimajumik tunisivigivaat, 43tigullugu nirivaa takkuanni.

44Tavva uqautivait, “Tamakkuninga tavva uqautiqattalauqpassi najurlusi suli, titirausiqaqsimajulimaat uvannik Muusisiup piqujanginni, nalauttaijullu aglanginni inngirutinilu nalautsijariaqalaurmata.”

45Tavva qaujitippait aglangnik tukisiqullugit, 46uqautillugit, “Imaak tavva titiraqsimavuq, Christuusi aanniatitaujariaqaqpuq ulluillu pingajuanni makitsariaqaqpuq tuqungajunit, 47Christuusiup atingani saagiariaqarnirmik ajurnillu isumagijunnaiqtaujunnarningit ajuriqtuijutaujariaqaliqput inuuqatigiigasagjuanut, Jiruusalimmit pigiarluni. 48Ilissi tavva tamakkuninga qaujisimajuqutigivassi. 49Takugit, nangminiq tilisiviginiaqpassi Ataatama angirutigisimajanganik; ilissili Jiruusalimmi utaqqijariaqaqpusi, pijunnarnirmik qilangmit tunisiviunginnissinni.”

Jiisusiup Qilaliarninga

Maakusi 16:19-20; Aapuusitaliit 1:9-11

50Iglugasagjuanillu aullarutivait Pitanimut tikillutik, isaagvigillugillu saimmaqtippait. 51Saimmaqtigiituaramigit, qimaliqpait qilaliaqtitaulirlunilu. 52Taakkualu Jiruusalimmut utiqput quviasummariglutik. 53Taimanngal tuksiarvigjuamiipput Guuti niqturlugu.

Currently Selected:

Luukasiup Aglangit 24: EAIBR

Highlight

Copy