Luukasiup Aglangit 22
22
Jiisusiup Tuqutaunasuarumaninga
Maatiusi 26:1-5; Maakusi 14:1-2; Juanasi 11:45-53
1Nalliunniqsiurvik puvallaqqutiqanngittumik niaquujaqturvik qagliliqtillugu, Qaangiqtauvingmik taijaujuq. 2Tunirrusiqtitsijit angajuqqaangit piqujaniglu ilisaijit isumaksaqsiuliqput qanuq Jiisusi tuqutaujunnaqsijunnarmangaat; inungnik sivuuragamik.
Juutasiup Angirutiqarninga Jiisusimi Pijautitsijumalluni
Maatiusi 26:14-16; Maakusi 14:10-11
3Saataanasi itilauqpuq Juutasimut Iskariatimik taijaujumut, taassumunga ilinniaqtinut 12-nut ilagijaujumut; 4Juutasi uqaqatiqariaqtuqpuq tunirrusiqtitsijit angajuqqaanginnik, tuksiarvigjuarmilu qaujisaqtit angajuqqaanginnik, qanuq Jiisusimik pijautitsijunnarmangaarmi taakkununga. 5Taakkua uqaqatigijangit quviasuliqput, akilirumaliqpaallu kiinaujanik. 6Juutasi tamatuminga angiqpuq, qinilirluni qanuq piviksaqarunnarmangaarmi Jiisusi tigujautittumallugu taakkununga inungnut qaujijaunngillutik.
Jiisusiup Upalungaijarninga Qaangiqtauviksiutimik Niriqatigiingnirmik
Maatiusi 26:17-25; Maakusi 14:12-21; Juanasi 13:21-30
7Ulluq nalliutingmat puvallaqqutiqanngittunik niaquujaqturvik, siipiulu nurranganik tuqutsiluni tunirrusirviusuuq. 8Jiisusiup Piitturuusikkuk Juanasikkuk tilivaak, uqautillugik, “Ailirissik Qaangiqtauvingmik nalliunniqsiurutiksavut atuinnaruriaqturlugu, niriqatigiiqulluta.”
9Taakkuak apirivuuk, “Nani aaqqiksuijaqtuqujivit?”
10Jiisusiup uqautivaak, “Iglugasagjuanut tikikkussik, angut imaqautimik agjaqsijuq paarniaqpasik; taanna maliksikkuk iglumut itirvigijanganut, 11igluup inuanut uqaniaqpusik, ‘Ajuriqtuijiup uqaujjauqungmatit, nauktaima iniksaq ilinniaqtikkalu niriviginiaqtavut Qaangiqtauviksiutimik?’ 12Taassuma takutinniaqpaasik iglurusirmik angijumik atuinnarmik igluup qulaaniittumik; tavvani aaqqiksuiniaqpusik niriviginiaqtattinnik.”
13Taakkuak tilijaujuuk taikunngaqpuuk, taimaalluaq tamainnik Jiisusiup uqausirijanginnik pinasuaqpuuk; tavvani niriniaqtatik Qaangiqtauviksiurutiksaq aaqqiksuqpaak.
Ataniup Unnugummitarninga
Maatiusi 26:26-30; Maakusi 14:22-26; 1 Kurinti 11:23-25
14Ikarraq nalliutingmat, Jiisusiup iniginiaqtani upakpaa, aapuusitalit ilagillugit. 15Uqautillugit, “Uuminga qilanaammariglunga Qaangiqtauviksiutimik niriqatigijumalauqpassi aanniatitaunnginninni; 16uqautivassi nirikkannirniarunniirama taimaittumik Guutiup Ataniuvingani nalliutijarialit pijariilaunnginninginni.”
17Jiisusiup imiuti tiguvaa, qujalijariirami uqaqpuq, “Taanna tigulugu atunit niuqsivigisiuk; 18uqautivassi maannamit pigiarlugu uainimik imirniarunniirama Guutiup Ataniuvinga tikiqqaaqtinnagu.”
19Niaquujaq tigugamiuk, qujalijariirami avikpaa taakkununga tunillugu, uqaqpuq, “Una tavva timiga tunijaujuq ilissinnut. Taimailiuqattarissi iqqaumajjutigilugu uvannik.” 20Taimaaktauq imiuti tiguvaa nirijariirami, uqarluni, “Una imiuti kuvijaujuq ilissi pillusi angiqatigiiguti nutaaq aunnik nalunaikkutalik.
21“Takugissi uvannik pijautitsijuq uvaniippuq niriqatigijara nirrivingmi. 22Inuup Irninga tuqutauniaqpuq taimaak aaqqiktausimangmat; kappiannamigli angut taanna pijautitsijuq taassuminga!”
23Taakkua immingnut apiqsuqattautiliqput, nalliat taimaak pijautitsiniarmangaat.
Anginiqsaujumanirmut Aivautiniq
24Ilinniaqtilli immingnut aivaqatigiiliqput, nalliat anginiqsamik isumagijaujuksaungmangaat. 25Jiisusiup uqautivait, “Juutiunngittut angajuqqaarjuangit pijunnarniqarmata inuqutimingnut; aulatsijillu taijaujumavakput inungnut sivuliqtinnik. 26Ilissili taimaittariaqanngilasi; naliqsili anginiqpaangujuq ilissinnit inuusungniqpaatitut taimaittariaqaqpuq, sivuliqtiujurlu pijigijaujutut taimaittariaqaqpuq. 27Nalliak anginiqsauvaa, nirivingmi iksivajuq uvvalu niriniaqtanginnik qaitsijuq? Ilaak taannauvuq iksivaaqtuq niriniarluni taanna anginiqsauvuq; uvangali ilissinnik nirititsijuq ajjigivara.
28“Ilissi ilagiinnalauqpassinnga uqumaittukkuuqtillunga; 29Ataatama tunisivigilaurmanga aulatsijunnarnirmik, taimaaktauq tunisivigijumavassi aullatsijunnarnirmik Ataniuvingmi, 30niriqatigijumaarassi imiqatigilusilu Ataniuvingma niriviani, iksivajumaaqpusilu iksivautarjuani angajuqqaangulusi Isarialimiup kinguvaanginnut 12-nut.”
Jiisusiup Pijuqarniaqtumik Uqaujjininga Piitturuusimik
Maatiusi 26:31-35; Maakusi 14:27-31; Juanasi 13:36-38
31“Saimuuni, Saimuuni, naalagit! Saataanasi pijumagaluaqpuq Atangirlusi saniijarumallusi piruqsiivilirijiup niaquujaksanik saniijainingatut, 32tuksialauqpungali ukpirniit saalauqunagu; utiruvit uvannut, inuuqativit ukpirnirngit makitikkanniriaqalaaqpatit.”
33Piitturuusiup kiuvaa, “Ataniq, upalungaiqsimavunga tigujauqatigijumallutit tuquqatigijumallutillu.”
34Jiisusiup uqautivaa, “Piitturuusi uqautivagit, angutiviaq unnuk nillirniaqpuq pingasuiqsurlutit uvannik qaujimannginniraqattaqsimaliqtillutit.”
Kiinaujakkuvik, Ikpiarjuk, Savigjuarlu
35Ilinniaqtini uqautivait, “Taissumani tililaurassi kiinaujakkuvilijaqunasi ikpiarjulijaqunasilu itigagutilijarasiluunniit, sunatuinnarmik kinnguumajaqalauqpisi?”
Taakkua kiuvaat, “Sunamigluunniit kinnguumajaqalaunngilagut.”
36Jiisusiup uqautivait, “Maannali, naliqsi kiinaujakkuviqaruni ikpiarjuqaruniluunniit naksariaqaliqpuq. Naliqsi savigjuaqanngikkuni uligjuani niurrutigijaksarivaa savigjuaqtaarutigilugu. 37Tamakkuninga uqautivassi; aglait naalautsiqullugit uvannik uqausiqaqsimajut, ‘Piunngittulijurjuanut ilaliujjauvuq,’ taakkua uvannik uqausiqaqsimajut nalautsiniarmata.”
38Ilinniaqtingita uqautivaat, “Ataniq takugit, uvva savigjuak marruuk.”
Kiuvait, “Taakkuak naammakpuuk.”
Jiisusiup Tuksiarninga Qaqqami Napaaqtulingmi Uqsuksaujunnaqtunik Paurngaqasuunik
Maatiusi 26:36-46; Maakusi 14:32-42
39Jiisusi anigami, ailiqpuq piusirivaktamitut, qaqqamut napaaqtulingmut uqsuksaujunnaqtunik paurngaqasuumut; ilinniaqtingita malikpaat. 40Upaktaminut tikinnami uqautivait, “Tuksiarissi piunngittumik pijumisaaqtaunirmut tikiqunasi.”
41Qimakpait miluutimut tikitaksaujumut, siiqqurluni tuksiaqpuq, 42uqarluni, “Ataataak, pijumaguvit, imiut una piiqtilauruk uvannit; pijumajaraunngitturli, pijumajailli pili.” 43Aingilimut qilangmit upaktauvuq suungusititaullunilu. 44Uqumaiksalualirami aksururniqsaulluni tuksialiqpuq, aukkarningalirluni auktitut kutuktunik nunamut.
45Tuksiarnirminit makinnami, ilinniaqtiminut utiqpuq siniktut upakpait qiksaaluarnirmut sinigumatuinnaliqtut. 46Uqautillugit, “Sungmat sinikpisi? Makigissi tuksiarlusi piunngittumut pijumisaaqtaunirmut tikiqunasi.”
Jiisusiup Tigujauninga
Maatiusi 26:47-56; Maakusi 14:43-50; Juanasi 18:3-11
47Jiisusili suli uqallaktillugu, inugiaktut tikipput, Juutasiup ilinniaqtit 12 ilangatta tavvunngautijangit. Jiisusi upakkamiuk kunikpaa; 48Jiisusiup uqautivaa, “Juutasi, Inuup Irninga kuniglugu pijaukkaqpiuk?”
49Ilinniaqtingit qaujigamik qanuiliuqtuqalirmangaat, Jiisusi apirivaat, “Ataniq, savigjuamik atutuinnariaqaliqpita?” 50Ilangattali tunirrusiqtitsijit angajuqqaangatta pijikataanga savigjuaminut siutingata taliqpia nakappaa.
51Jiisusi uqaqpuq, “Taimailiurunniirissi!” Angutiup siutinga akturlugu aaqqikpaa.
52Jiisusi uqaqpuq tunirrusiqtitsijit angajuqqaanginnut tuksiarvigjuallu angajuqqaanginnut inuillu angajuqqanginnut, tavvunngaqsimajut tigusijaqturlutik taassuminga, “Qaivisi savigjualijarlusi anautalijarlusilu pirajaksimajumik tigusijaqtuqtutitut? 53Qautamaat ilagiqattalauqpassi tuksiarvigjuarmi, tigulaunngilassinnga. Maannali ikarrasi nalliutivuq, taaqtuullu pijunnarninga aulatsiliqpuq.”
Piitturuusiup Qaujimannginnirarninga Jiisusimik
Maatiusi 26:57-58,69-75; Maakusi 14:53-54,66-72; Juanasi 18:12-18,25-27
54Tavva Jiisusi tiguvaat aullarutillugu, tunirrusiqtitsijit angajuqqaangatta iglunganuurutivaat; Piitturuusi ungasigijaani malikpuq; 55ikualatitsijuqaqpuq igluup silataani iksivallutik avataani, Piitturuusiullu iksivaqatigivait. 56Arnaup pijiup, takugamiuk ikumamut qaummitausimajuq, takunnaarluniuk uqaqpuq, “Uuma angutiup Jiisusi ilagivaa.”
57Piitturuusi qaujimannginnirarluni uqaqpuq, “Arnaq, qaujimanngilara.” 58Akuniuluaqtinnagu asiata takugivaa uqarluni, “Ivvittauq taikkua ilagivaatit.”
Piitturuusi uqaqpuq, “Taikkununga ilagijaunngilanga.”
59Ikarraq aniguqsimaliqtillugu suli asia uqalirivuq, “Uuma ilaak qularnanngittumik Jiisusi ilagivaa; Galiliamiungungmat.”
60Piitturuusi uqaqpuq, “Uqausirijatilluunniit qaujimanngilakka” sulili uqallaktillugu, tavvainnaq angutiviaq nilliqpuq. 61Ataniullu qiviarluniuk Piitturuusi takusaqpaa. Piitturuusi iqqailiqpuq Ataniup uqausinginnik, uqautiqqaungmagu, “Angutiviaq nilliqqaaqtinnagu, ullumi pingasuiqsurlutit uvannik qaujimannginniraqattarniaqputit.” 62Piitturuusi anivuq aksualuk qialluni.
Jiisusiup Mitautigijauninga Aanniqsiqtauningalu
Maatiusi 26:67-68; Maakusi 14:65
63Jiisusimik tigusisimajut taassuminga mitautiqaqput anaulirlugulu. 64Ijingik matuarlugik apiriqattaliqpaat, “Nalauttailaurit! Kia tiglukpaatit?” 65Asinginniglu amisunik uqausiqaqput uqarnirluglutik akiraqturlugu.
Jiisusiup Iqqaqtuijirjuaniititauninga
Maatiusi 26:59-66; Maakusi 14:55-64; Juanasi 18:19-24
66Ullaannguqtillugu qaumalirmat, tuksiarvigjuap angajuqqaangit tunirrusiqtitsijillu angajuqqaangit, piqujaniglu ilisaijit kativut; Jiisusi katimajut saangannuaqtippaat, uqarlutik, 67“Christuusiungmangaaqpit uqautilauqtigut.”
Jiisusiup uqautivait, “Uqautigussi ukpirinianngilassinnga; 68apirigussiluunniit kiujunnarnianngilasi. 69Maannamit pigiarlugu Inuup Irninga iksivajumaaliqpuq Guutiup ajugaqanngittuup taliqpiani.”
70Taakkualimaat apirivaat, “Tavvaa Guutiup irnirivaatit?”
Jiisusiup kiuvait, “Tavva uqariirassi taannauvunga.”
71Taakkua uqaqput, “Asianik qaujisimajuksamik qiniriaqarunniiqpugut, nangminiq uqaqtillugu tusaratta.”
Currently Selected:
Luukasiup Aglangit 22: EAIBR
Highlight
Share
Copy
Want to have your highlights saved across all your devices? Sign up or sign in
Eastern Arctic Inuktitut Bible (Romanized) © Canadian Bible Society, 2022-2023.
