Luukasiup Aglangit 14

Jiisusiup Aaqqiksininga Aanniajumik

1Sapatit ilanganni Jiisusi nirijaqtuqpuq Paarisit sivuliqtingatta ilangatta iglunganut, taakkua qaujisatsiarasukpaat. 2Takugit, angummik tavvaniittuqaqpuq niumigut talirmigullu immaksimanirminut puvittumik, 3Jiisusi uqaqpuq, piqujanik ilisaijinut Paarisinullu, “Piqujait Sapatimi aaqqiksiqujivaa aaqqiksiqujinngilalluunniit?”

4Taakkua nillinngilat. Tavva Jiisusiup upaglugu angut aaqqikpaa, tavvanngat aniqullugu. 5Taakkua uqautivait, “Nallisi irninga uumajuqutingaluunniit imiqtarvingmut katakpat, tuavirluni qilusigajanngilaq Sapatiutillugu?”

6Taakkua tamatuminga kiujunnanngilat.

Mikiglitirnirmik Tunngasuktitsinirmiglu

7Jiisusi qaujigami inuit ilangit nirijaqtuqsimajut iksivautarni initsiavauniqpaani iksivajumangmata, ajjiujumik uqautivait, 8“Nirijaqtuqujaugussi nalliannutuinnaq katititaurataaqtunut, initsiavauniqpaani inginniarasi, ilissinnit pillariuniqsamik nirijaqtuqtuqatuinnariaqarmat, 9taassuma ilissinnik nirijaqtuqujijuup upaglunitit uqautikpatit, ‘Una agvairuk,’ tavva kanngusulirlutit initsiavaunnginniqsamut ingitsariaqalirajaqputit. 10Taimaimmat nirijaqtuqujauguvit, initsiavaunnginniqsamut ingitsaqturit, taassuma nirijaqtuqujijuup ilissinnik upaglunitit uqautikpaatit, ‘Ilannaak, initsiavauniqsamut ingitsaqturit’; tavva taakkunanngat nirijaqtuqatigisimajarnit quviagijaugajaqputit. 11Immingnik angijuruqtittulimaat mikiglititauniaqput, immingniglu mikiglitiqtut angijuruqtitauniaqput.”

12Amma uqarivuq nirijaqtuqujisimajumut, “Unnugummitarmik nirivigjuaqtitsinirmigluunniit nirijaqtuqujiguvit, ilannarijatit qatanngutitilluunniit ilagijatilluunniit inuuqatitilluunniit ajuqsanngittut nirijaqtuquniarnagit, taakkunanngat nirijaqtuqujaulaarmigavit niritittinirilauqtait pillugu. 13Nirijaqtuqujiguvilli, ajuqsaqtut qaiqukkit, ilakunnguqsimajut, nuqiqattianngittut, tautunngittullu; 14tavva saimmaqtitauniaqputit, taakkua nirijaqtuqtitijuktiksaqanngimmata ilingnik. Akiliqtaujumaaqputilli iluaqtut tuqungajunit makivviani.”

Jiisusiup Ajjiutitsininga Nirivigjuaqtunik

Maatiusi 22:1-10

15Tavvani niriqataujut ilangatta tamanna tusaramiuk, Jiisusi uqautivaa, “Saimaqtitausimajumik inuusiqaqput taikkua niriqataujumaaqtut Guutiup Ataniuvingani!”

16Jiisusiup uqautivaa, “Angummik nirivigjuaqtitsijuqalauqpuq, amisunik nirijaqtuqujilluni; 17nirivigjuarnaq nalliutingmat pijini tilivaa nirijaqtuqujaminut uqaujiqullugu, ‘Qailirissi maanna niriniaqtasi atuinnaulirmata!’ 18Taakkua qaiqujausimajut atunit upanngijjutiksaqsiuliqput. Sivulliqpaaq uqariaqtuqtumut uqaqpuq, ‘Piruqsiivingmik niuvirama, maanna takujaqturiaqarakku; qaijunnannginnama pasijauttaililanga.’ 19Asia uqarivuq, ‘Immuksiugarnik 10-nik piruqsiivilirijjutiksannik niuvirama, taakkua uukturiaqturniarakkit; qaijunnannginnama pasijauttaililanga.’ 20Asia uqarivuq, ‘Nulianirataarama, taimaimmat qaijunnanngilanga.’ 21Piji angajuqqaaminut utiqpuq tamakkuninga uqarvigilluniuk. Angut ninngaktualuulluni pijini uqautivaa, ‘Tuavirlutit aturianut ailirit aqqutillaringnullu nunalingni, uvunngautillugit ajuqsaqtut, piggaqtullu tautunngittullu, tusiattullu.’ 22Akuniunngittuq piji uqariaqturivuq, ‘Angajuqqaaq, taimaak piqujiqqaugavit pijariiqpuq, sulili iniksaqaqpuq.’ 23Angajuqqaanga uqaqpuq pijiminut, ‘Iglugasait silataaniittunut aqqutinut, nunalingnurianullu ailirit, inuit qaiqulugit igluga tatattauqullugu. 24Uqautivagit, taikkua qaiqulauqtaraluakka niriniaqtattinnik uuksinianngilalluunniit.’”

Jiisusimut Ilinniaqtigijauniup Akiqarninga

Maatiusi 10:37-38

25Taissumani inugiaktualuit Jiisusi ilagingmajjuk; saavvigillugit uqautivait, 26“Nalliat uvannut qaijuq unganiqsaukpat ataataminik anaanaminiglu, nuliaminik qiturngaminiglu, qatanngutiminik najangminiglu, aglaallu imminik, taanna ilinniaqtigijunnanngilara. 27Sanningajuliksaminik agjaqsijumanngittuq maliglunga, taanna ilinniaqtigijunnanngilara. 28Naliqsi igluliurumaguni puqtujumik, isumaksasiurutigiqqaarajanngilaa qanuq akitutiginiarmangaat, kiinaujat naammangniaraluarmangaata pijariirunnarlugu? 29Taimaagli pilaunngikkuni tunngaviksanga pijariiraluarlugu, iglu puqtujuq pijariirunnailikpagu, qaujijunit mitautigijaulirajaqpuq. 30Uqarlutik, ‘Una iglumik puqtujumik sanagialauqtuugaluaq pijariirunnanngittuq.’ 31Uvvaluunniit angajuqqaarjuaq angajuqqaarjuarmiktauq asiminik unatariaqturniaruni, unataqtuksanik 10,000-nik ilaqarluni, isumaksaqsiurajanngilaq? Akirangit unataqtuksait 20,000-upata, saalagijunnarniaraluarmangaarmiuk? 32Saalagijunnarniaqtuujaanngikkuniugli, ungasiktillugit suli tilisilirajaqpuq qanuq unatanngijjutiksamingnik apirititsijaqturluni. 33Taimaaktauq tavva, naliqsi pigijalimaaminik qujanaaqsinianngittuq ilinniaqtigijunnanngilara.”

Tariup Tariungujunniiqtuup Atuqtuksaunnginninga

Maatiusi 5:13; Maakusi 9:50

34“Tariuq piujualuuvuq; kisianili tariuqsunnittunniiqpat, qanurli tariunngukkanniqtitaujunnaqpa? 35Taimaippat atuqtuksaujunniiqpuq nunamulluunniit, piruqtunulluunniit piruqsautiksamut; igitaksatuinnauliqpuq. Tusaajunik siutilik tusarli.”

Currently Selected:

Luukasiup Aglangit 14: EAIBR

Highlight

Copy