Juanasiup Aglangit 12

Jiisusiup Uqsuqtiqtauninga Pitanimi

Maatiusi 26:6-13; Maakusi 14:3-9

1Ullut pingasuujuqtut Qaangiqtauvingmik nalliunniqsiurviup sivuningani, Jiisusi Pitanimuaqpuq, Laasaruusiup tuqungajunit uummaqtilauqtangata nunanganut. 2Tavvani unnugummitarniaqtanganik niqiksaliuqpaat; Maata ikajuqpuq aaqqiksuiqataulluni; Laasaruusi iksivaqatauvuq saami niriviginiaqtanganni. 3Tavva Miari tipitsiariksaummik akitujumik tigusilluni atausirmik uqumainniqaqtumik, piruqtuvinirnit pisimajumik ilasimanngittumik, Jiisusiup itiganginnut kuvisilluni nujarminut allaqtiqpait; tipitsiariksautiup tipitsiaringninganut iglulimaaq tippakpuq. 4Juutasili Iskariat, ilinniaqtingita ilangat, Jiisusimik pijautitsilaaqtuq; uqaqpuq: 5“Sungmanuna tipitsiariksaut niurrutigijaunngilaq siulvirinut 300-nut kiinaujaqtaarutaugajaqtuq, taakkualu ajuqsaqtunut tunijaungaarlutik?” 6Taimaak uqaqpuq, ajuqsaqtunik ikajurumanirmuunngittuq tigligasuungunirminulli; kiinaujaqautimik ikpiarjungmik pisimajiugami, tavvanngat nangminiq aturniaqtaminik tigusituinnaqpakkami.

7Jiisusi uqaqpuq, “Una arnaq kamaginngilauqsiuk, taimailiurutiqarmat ullumut iluviqtauniksannut. 8Ajuqsaqtunik inuuqatiqainnarniaqpusi, uvannigli najuqtiqainnanianngilasi.”

Laasaruusiup Tuqutaksauqujauninga

9Tavva Juutit amisut qaujimaliramik Jiisusiup Pitanimiinninganik, tavvunngaqput, Jiisusimituaq pijjutiqaratik Laasaruusimiglittauq takujumallutik, Jiisusiup tuqungajunit makitilauqtanganik. 10Tunirrusiqtitsijiit angajuqqaangit isumaqaliqput Laasaruusi tuquqasiutijumallugu, 11Laasaruusi pijjutigillugu Juutit amisut kamaluarunniirmata tunirrusiqtitsijinik, ukpirijaqarniqsaulirmata Jiisusimik.

Jiisusiup Niqtuqtauninga Jiruusalimmut Itiliqtillugu

Maatiusi 21:1-11; Maakusi 11:1-11; Luukasi 19:28-40

12Qautillugu inugiakturjuat Qaangiqtauvingmik nalliunniqsiuriaqsimajut tusaqput Jiisusiup Jiruusalimmualirninganik. 13Tavva napaaqtut paamiit avalangajunginnik nakatsillutik parrialiqput, qaigalaarlutik, “Huusaana! Niqtuqtauli Ataniup atingani tikittuq, Angajuqqaarjuaq Isarialimi!”

14Jiisusi siutiqquqtujuup nurranganik tigusilluni qaanganut ikivuq; aglangni titiraqsimangmat,

15“Sivuuraniarasi, Saiuniup paningit;

Takugit, angajuqqaarjuasi tikiliqpuq,

Siutiqquqtujuup nurrangata qaangani ikimalluni!”

16Ilinniaqtingitali tamanna tukisilaunngilaat atuqtillugu; Jiisusi niqturnarnirjuarmut makisimalirmat, iqqailauqput aglangni titiraqsimajuqarninganik taassuminga qanuq piniarviujumaarninganik.

17Inugasait Laasaruusimik tuqungajunit uummaqtitsitillugu najuutilauqtut unikkaaqpalliatuinnalauqput. 18Taimaimmat inugiakturjuat parrialauqpaat tusaqsimagamik tamatuminga nalunaikkutarmik pinasualaurninganik. 19Tavva Paarisit immingnut uqaqattautiliqput, “Takugit qanuiliurnivut pivalliisimanngitsiaqpuq; takugit, inulimaat maliliqput Jiisusimik.”

Guriikit Ilangita Qinirningat Jiisusimik

20Guriikilli ilangit ilagijaulaurivut nalliunniqsiuriaqtuqtunut Jiruusalimmut. 21Taakkualu Pilippuusimuaqput, taanna Pitsaitamit Galiliamiittumit pisimangmat, uqautillugu, “Jiisusimik takujumavugut.”

22Pilippuusiup Aanturuu uqautijaqtuqpaa; taakkuak marruullutik Jiisusimut uqariaqtuqpuuk. 23Jiisusiup kiuvaak, “Inuup Irningata niqturnaqtitauvia nalliutisimavuq. 24Sulijumik uqautivassik: niaquujaksaup kanngaqsuutiksaqtanga taannatuugajaqpuq nunamuaqtauluni tuqunngikkuni, tuqugunili, niaquujaksanik amisunik piruqtitsigajaqpuq. 25Inuusirminik annirusuktuq asiujijumaaqpuq, inuusirminigli annirusunngittuq uvani silarjuarmi inuusirmut nungusuittumut pigiinnarniaqpaa. 26Nalliat uvannik pijitsiqtuq, uvannik maliktuksauvuq; najugannilu, najuutijuksauvuq; uvannik pijitsirniaqtuq, Ataatama niqturnaqtittumaaqpaa.”

Jiisusiup Uqausiqarninga Tuqutauniksaminik

27“Maannali uummatikkut uqumaitumiippunga. Qanuq uqausirijarianga naluvara? Uqarunnaraluaqtunga, ‘Ataatak, iqarraq tamanna nalliutitittailiguk.’ kisianili tamanna tikijjutigisimavara, ikarraq tamanna atuutijariaqarakku. 28Ataatak, Atiit niqturnaqtiliruk.”

Tavva nipimik qilangmit nilliqtuqaqpuq, “Niqturnaqtilauqpara, sulilu niqturnaqtikkannirniaqpara.”

29Inugiakturjuat tavvani nangiqtut nipimik tusaramik uqaqput, “Kalliliqpuq.” Ilangilli uqaqput, “Aingiliup uqaqatigivaa.”

30Jiisusiup kiuvait, “Nipi tusaqtasi tusaqsauvuq ilissi pijjutigillusi, uvanga pijjutiginanga. 31Maanna silarjuarmiut iqqaqtuqtauviat nalliutivuq, maannalu silarjuap tamatuma aulatsijinga saalauluni anititaunialiqpuq; 32uvangalu, qangattaqtitauniaruma nunamit, inuqatigiigjuangujulimaat uvannuarumaliqtinniaqpakka.” 33Tamatuminga uqaqpuq tukisititsilluni tuqutaunirmut qanuittumut tuqutauniarmangaarmi.

34Inugiakturjuat kiuvaat, “Piqujattinnit tusaqsimavugut Christuusiguuq isuqanngittumut inuujumaarmat. Qanuimmalli uqaqpit Inuup Irninga nappaqtitaujariaqaqpuq; kinainna Inuup Irninga?”

35Jiisusiup uqautivait, “Qaumajuup suli sivikittumik najurniaqpaasi. Kajusitsiarissi pinasuaqtassinnik najuqtiqarnissinni qaumajumik, taaqturjuarmut tikitauqunasi; taaqtumi pinasuaqtuq qaujimanngimmat namunngaungmangaarmi. 36aQaumajumik najuqtiqarnissinni, qaumajuq ukpirisiuk, qiturngauliqullusi qaumajumut.”

Juutit Ukpilirunnannginningit

36bJiisusili tamakkuninga uqariirami, taakkunanngat qimaruutivuq ijirluni. 37Jiisusili nalunaikkutarnik amisunik pinasuaqattaraluarmat taakkunani, Jiisusimut ukpililaunngilat; 38nalauttaijuup Aisaiasiup uqausingit nalautsiqullugit uqaqsimajut:

“Ataniq, kia uqausirijavut ukpirivait?

Kikkunnullu Ataniup pijunnarnini saqqitippauk?”

39Taimaimmat ukpilirunnanngilat. Amma Aisaiasi uqaqsimangmingmat,

40“Guutiup ijingit takpiitilauqpait uummatingillu sititippait,

Ijimingnut takuqunagit uummatimingnullu tukisiqunagit,

Uvannullu saagiaqunagit, aaqqiktauqunagillu.”

41Aisaiasi taimaak uqalauqpuq Jiisusiup niqturnarninga takulauramiuk uqautigigamiuglu.

42Sulili Juutit angajuqqaangit amisut Jiisusi ukpirigaluaqpaat, Paarisilli pillugit saqqijaaqtumik uqausiqanngilat, Juutit ukpirnirmut katimavingannut itirunnaillititaujumanatik: 43inungnut naammagijauniq pijumaniqsarigamijjuk Guutimut naammagijaunirmit.

Jiisusiup Uqausinginnut Iqqaqtuqtauniq

44Jiisusi nipiqquqtulluni uqaqpuq, “Uvannut ukpiqtuq, uvannuinnaq ukpinngilaq taassumungali uvannik tilisijumut. 45Uvanniglu tautuktuup uvannik tilisijuq tautukkivaa. 46Qaumajuullunga silarjuarmut tikippunga, uvannut ukpiqtuq taaqtumiinginnaqunagu. 47Uqausinnik tusaqtuq maliganilu, iqqaqturnianngilara; tikilaunnginnama silarjuarmiut iqqaqturiaqturlugit, silarjuarmiulli piulijaqturlugit. 48Uvannik narrujuq ilaliuqsinanilu uqausinnik najuqtiqaliqpuq iqqaqtuqtaujjutiksaminik; uqausirnut uqausirilauqtannut iqqaqtuqtaujumaaqpuq ulluit naggataani. 49Uvannik pijunnarniqarlunga uqalaunnginnama; Ataataulli tilijima piqujaminik tunisivigilauqpaanga uqausirijaksannik, qanurlu uqaqtuksaungmangaarma. 50Qaujimavungalu taassuma piqujininga inuusiqtaarnarmat nungusuittumik. Taimaimmat uqausirijakka, uqausirivakka Ataataup taimaak uqaqulaurmanga.”

Currently Selected:

Juanasiup Aglangit 12: EAIBR

Highlight

Copy