От Матфея 27

Иисус Агля̄скаңат Пилатымун

1Уна̄ңулюку қамахлъютың первосвященнигытлъю, сӣванлъыӷытлъю агӷиткыхка̄т туқутысналюку Иисус. 2Ынка̄м асиҳқылъюку агля̄лъюку тӯныхка̄т Пилатымун, Римым правителыңанун.

Иудам Туқулъҳа

3Увыҳпагутистым Иудам, лӣгиксяқминики агӷистыт нанқихсимакаңат Иисус туқутысяҳқа̄люку, қымалъ авутыҳқыҳлъякақ. Ынка̄м первосвященнигынунлъю, сӣванлъыӷнунлъю выӷусяҳтуқӣ ю̄к қуля сӣпнықлъюку сереброт манит. 4Пикӣ: «Сыӷлыҳқума̄ңа увыҳпагутылъымкун сыӷлыҳқумаңилңуқ ю̄к туқутысқылъюку!»

Пика̄т: «Хўаңкунъун сясӣлъықа? Лъпык таўатын пилъқан!»

5Ынка̄м Иудам милю̄ткӣ манит Храмым илюңанун. Та̄хкын аӷуляқлъюни қымиткақ.

6Первосвященнигыт сяӷнаткылъюки манит пикат: «Лӣлиҳтӯсямнъи укут манит канаҳсяҳқа̄нӷитут манилӷута̄нун Храмым қаюҳлъяк лъивикӯсяқыхка̄гут туқутусиҳқа̄лютың югмун». 7Ынка̄м агӷиткыхка̄т мани тукфиӷисиқналюку нунамун атилъқылӷӣ: «Земля Горшечника» лъивыӷвихка̄люку накӯмӣнун. 8Ынка̄м хўавымун кынляңа та̄м нунам атылӣтка̄: «Нунаңа А̄ўым».

9-10Ныӷиӷлюку ӯкналиқистым Иеремиям ӯкналиқуткыхкақӣ хўатын:

«Иляңита Израилыӷмӣт итагнақыхкақӣт аңталяңит ю̄к қуля сӣпнықлъюку серебро манит, қаюҳлъяк сюмыӷмыхни таўатын акитутканилюку пика̄т.

Та̄хкын та̄кут манит тукфиӷисиқыхкӣт Земля Горшечникамун. Таўатын Атанӷым қылъқақа̄ңа».

Иеремиям ӯкналиқылъҳа апыӷӣҳтыстыкақа̄т первосвященнигыт тукфиӷақңамыхтыху Земля Горшечника.

Пилатым А̄пқуӷа̄қаңа Иисус

11Таўани Иисус ныкывӷалӷӣ сивуңакун Римым правителыңан. Правителым а̄птыка̄: «Иудеит Умӣлъката̄н?»

Иисусым кӣмсиқа̄: «Лъпык таўатынъилюку пӣн». 12Иўырңа первосвященнигытлъю, сӣванлъыӷытлъю анахунъиӷңа̄тни, сямың пимаңиткақ.

13Та̄хкын Пилатым а̄птыка̄: «Нагасикӣ қамахлъюки анахунъилъҳит?»

14Иўырңа Иисусым кӣмсӣмаңилъкаңа талўа ата̄симун анахунъилъыӷмун, ынка̄м правитель сяӷӣӷаюхлъякақ.

Иисус Туқутыснақыхкаңат

15Аюмӣтаңа тамаҳа̄н Пасхам Нықынӷаҳқылъҳани Римым правителыңан итымутақа̄ ата̄сиқ анусимиңлъяӷақ юлӷутыт накмикыхка̄т. 16Тама̄ни пилъыӷни тама̄нтыфтуқ апыҳсыӷуқ анусимиңлъяӷақ, а̄тҳа Варавва. 17Ынка̄м юлӷун қырңуҳсян, Пилатым а̄птыкӣ: «Налиқ итымутысюгыстыху Варавва налиӷмың Иисус, атилъқылӷӣ Христосымың?» 18Пилатым лӣсимакңукаңи Иудеит иглыӷутистыңита ақинаклъюку Иисус тагитңукаңат лъңанун.

19Пилат ақумгамалюку нанқихтивигми, нулиҳан уңипа̄тысяҳтуқа̄: «Сянақыфқа̄н та̄на сыӷлыҳқылъҳилңуқ ю̄к қаюҳлъяк қаваңуқыхкақақа ынка̄м аӷнылъқусиқ сыӷлылӣӷусиқақа».

20Таўатын пималюку первосвященнигытлъю, сӣванлъыӷытлъю а̄ҳқутақыхкӣт юлӷутыт итымутысқылъюку Варавва, Иисус туқутысқылъюку. 21Правителым а̄плъя̄тақӣ юлӷутыт: «Налиқ итымутысюгыстыху лъпысинун?»

Кӣмсиқа̄т: «Варавва!»

22Пилатым а̄птыкӣ: «Сянақсикунңам Иисус атилъқылӷӣ Христосымың?»

Кӣмсиқа̄т: «Қақӯраҳтыстигу!»

23Пилатым а̄птыкӣ: «Сяңан? Сяңўа̄ сыӷлық пикақагу?»

Иўырңа игляхта̄ӷалъютың акилӷӯкат: «Қақӯраҳтыстигу!»

24Пилат лӣгиклъюни алъя сяпагниңисями ысҳаӷлюки юлӷутыт сыӷлылӣқысталӷӣт, тугулюкык аӷмигусик ӯҳтуқақ сивуңитни юлӷутыт. Та̄хкын пикӣ: «Хўаңа авутңитуңа туқутылъыҳқа̄нун, лъпыси таўатын пистыңъўа̄ҳси!»

25Юлӷутым ӣңунаҳаӷмың акитка̄т: «Хўаңкута киңунқулъҳӣни авутңулъықукут туқутылъҳанун».

26Та̄хкын Пилатым Варавва итымулъюку, ынка̄м Иисус кахсягмихтыслъюку тӯныхка̄ пилъюўаҳтынун қақӯрӣсқылъюку.

Пилъюўаҳтыт Лыгасӣӷўа̄ткыхкаңат Иисус

27Та̄хкын правителым пилъюўаҳтыңита агля̄тка̄т Иисус қырңуҳта̄ӷвигмыхнун правителым мыңтыӷа̄ни. Таўани илятың қырңуҳлъюки каңлъюка̄т. 28А̄ткӣ матаҳқуӷлюки, кавишакыхтагның аткуя̄ӷыгның а̄тысфикыхка̄т. 29Та̄хкын сикуҳлъюхтуқамың аваямың қаҳпаңлъяӷлюку на̄сқўакун а̄тыстыка̄т. Аӷынқигныӷанлъю ӣхакун тугуслъюку унаҳсӣӷўақ, сыгысқуҳқӯлъютың сивуңакун лыгасӣӷўа̄ткыхка̄т. Пика̄т: «Қӯлваӷамкын Умӣлгат Иудеит!» 30Та̄хкын қысиқулюку, тугулюку унаҳсӣӷўақ на̄сқўакун анагукат. 31Лыгасӣӷўа̄ткынъыӷмың апыӷӣӷьямыхтыху, аткуя̄ӷык матаҳлъюкык лъңан катам а̄ткӣ а̄тысқуқӣт. Та̄хкын қақӯраӷьяҳтуқа̄т.

Иисус Қақӯрақаңат

32А̄нумалютың ныҳлъягмың ысҳаӷлюку ю̄к, Киринеяӷмӣ, а̄тҳа Симон, қылъқа̄т уямигысқылъюку Иисусым қақӯра̄. 33Ка̄сямың Голгофамун (Голгофа хўатын писӣгуқ: «Югым На̄сқўан Ныңа»), 34пилъюўаҳтыт Иисусымун тӯныхка̄т мыӷысқылъюку вино сюңаӷнилңуӷмың ақумыхкақ. Иўырңа на̄сӣӷлюку мыӷьюнӷитка̄.

35Пилъюўаҳтыт қақӯраӷьямыхтыху, ныңӣткӣт а̄ткӣ атыҳтӣра̄ӷуткақлъюки. 36Та̄хкын таўани ақумӯлъютың кылыңакыхка̄т. 37На̄сқўан қӯлңакун ныкыхтыка̄т қақӯралъҳанун апалъюқ игақңалӷӣ хўатын: «уна иисусыңӯқ, умӣлгат иудеит». 38Ма̄лӷуклъю ўаяӷнӣҳтык қақӯрақахкыт, а̄лъҳа аӷынқигныӷакун, иляңа сяӷумигныӷакун.

39Югыт наӷуҳлъыҳӣт, лыгасӣӷўа̄ткыхка̄т Иисус, на̄сқутың уфсюгусимӣта 40акилӷӯка̄т: «Лъпык пика̄гутын Храм на̄фқынъақнилюку ынка̄м пиңаюни аӷныӷни ныкыфнықихнақнилюку. Кияӷныӷым Иӷнықңукаңатын лъпынун катам югули, қақӯрамың укиги!»

41Таўатыҳпигақ Первосвященнигыт, малигулъютың апыҳтуӷикаюгнун Лӣлиҳтӯсяның, сӣванлъыӷнунлъю, лыгасӣӷўа̄ткыхка̄т: 42«Югулӣқӣ иляңи, нақам лъңаның катам югулипагниңитуқ! Умӣлгукуни Израилыӷмӣнун укигли қақӯраминың ынка̄м ухпықнаяӷаҳпут. 43Ныӷьюкңўа̄ Кияӷнық, пӣқуқлъю Кияӷныӷмун Иӷнықнилюни. Кияӷныӷым пиюкңукумигу югулилигу ма̄тын».

44Қақӯралгутыхкынкалъю ўаяӷнӣҳтык лыгасӣӷўа̄ткыхка̄к.

Иисусым Туқулъҳа

45Та̄хкын қамахлъюни нуна мамлыҳқўа̄кақ аӷныӷым қука̄ның кынляңа пиңаюмункылъя̄гмун. 46Тама̄ни нани пиңаюмункылъя̄гми Иисус акилӷӯҳлъякақ хўатын: «Или, Или, лама савахфани?» Хўатын писиқ: «Кияӷнымни, Кияӷнымни, сяңама унисиңа?»

47Иляңита югыт таўанлыңӯт ныкывӷалъҳӣт нагалъюку пикат: «Ӯм югым Илия туқлъюӷаӷа̄». 48Таўаниңинақ ю̄к ата̄сиқ ақфақуқақ ныпсягусимың. Та̄хкын ныплъюку қуўа̄лӷӣмун виномун, унаҳсӣӷўаҳқун ныкыхлъюку ныңугутка̄ Иисусымун мылюгрӣсқылъюку.

49Иўырңа иляңита пика̄т: «Ўӣнтаку, ысҳапака̄лътыху Илиям югулияҳтуӷнаюкагу!»

50Алъямың Иисус араҳлъяглюни пыхтыкакык таӷныӷагни.

51Таўани пилъыӷми Храмымылңуқ сяфка̄ӷун, пикыхкын канавык пӣкақ малӷуҳқылъюни. Нуна уфсюгусян, уйӷагыт қӯпаҳта̄ткат, 52лъӣвӷыт қылъпыӷаҳта̄ткат, углялӷӣтлъю Кияӷныӷым юги туқуляӷа̄тка̄ялӷӣт уңуваҳтӯткат, 53ынка̄м лъивыӷмыхның а̄нлыӷа̄ткат. Киңуңаның Иисусым уңуваҳтылъҳан агляҳтӯткат Аглыӷналӷӣмун Ныҳлъягмун, таўани юлӷутым ысҳақӣт.

54Таўани қақӯраӷвигми, умӣлўа̄ӷылъю пилъюўаҳтыкулъҳӣт кылыңакыхкаңат Иисус, ысҳаӷьямыхтыху нуна қапшахлъялӷӣ, тама̄налъю сяңўа̄ пиян, алиңрӯӷутыҳлъякат. Пикат: «Ипапыста̄қ уна Иӷнықумаяҳтагу Кияӷныӷым!»

55Тама̄нтыфтут аӷналӷутыт ысҳапалӷӣт уяваның. Галилеямың малихтыка̄т Иисус каюсӣнъалюки. 56Акулңитнитыфтут Мария Магдалаӷмӣ, Мариялъю на̄ңат Иаковым, Иосифым, Зеведейемлъю иӷныӷыхкынка на̄ңат.

Лъивылъҳа Иисусым

57Хўаникуягу аклъюңилңуқ ю̄к а̄тҳа Иосиф, Аримафеяӷмӣ, малихся̄ҳтыңа Иисусым ка̄ткақ. 58Пилатымун пилюни Иисусым югусӣ туңсиқа̄. Ынка̄м Пилатым қылӷутка̄ югусиқ Иосифымун тӯнысқылъюку. 59Ынка̄ңам тугулюку югусӣ, нутаӷаҳлъюхкун қӣпаӷакун ӣмгутка̄. 60Та̄хкын лъика̄ лъми лъивыӷраӷаӷмикун, уйӷагрухлъяхкун ля̄хтыстыкамикун сиклъяқумың. Та̄хкын па̄йңанун улъҳитаҳлъюку уйӷахлъяк, апыӷӣӷьями аӷуляқыхкақ. 61Таўантыфтуқ Мария Магдалаӷмӣ, а̄лъҳалъю Мария лъивыӷмун аюқлъютык ақумгалӷӣк.

Кылыңакыхкаңат Иисусым Лъӣвӷа

62Уна̄миңани киңуңаның Ятаҳқыфигым Аӷныӷан, первосвященнигытлъю, Фарисеитлъю алыҳқуӷьяҳтуқа̄т Пилат. 63Пика̄т: «Югунӣқ, нықамикаҳпут та̄на пӯҳтиста сялин уңувалюни пика̄гуқ: “Пиңают аӷныӷыт атуӷлюки уңуваҳтыслъықуңа”. 64Ынка̄ңам каягутигу лъӣвӷа кылыңакңўа̄ӷысқылъюку пиңаюнун аӷныӷнун, лю̄рақ малихся̄ҳтыңита югусӣ тыглыглюку уңипа̄нъаюкатки югыт уңува̄манилюку. Уна иқлъыңақ сыӷлыӷатаӷа̄яҳқа̄гуқ сивулиӷмың».

65Пилатым пикӣ: «Кылыңакистылгӯси, ынңа̄талъ кылыңакыстыңъўа̄ҳтыху лъивық».

66Ынка̄м лъивыӷмун агляӷлютың маҳқалъюку налъюнӣқа̄т уйӷак қылъпыҳнаюкатху. Та̄хкын қылӷутка̄т пилъюўаҳтынун кылыңакысқылъюку.

Currently Selected:

От Матфея 27: ess2

Highlight

Copy