От Луки 6

А̄пқуӷа̄лъық Субботамың

1Субботам аӷныӷани, Иисус иглыҳтыкақ пшеницат пӣтфигитхун. Малихся̄ҳтыңи икутақлъютың пшеницам пӣтутаңаның, ӣхмыхның миңўа̄гақлъюки қантӣт икуӷналюки ныӷыхкӣт пӣтутыт. 2Иляңита Фарисеит пикӣт: «Таўатын пияҳқа̄нӷитуси. Лӣлиҳтӯсямнъи ӣнӷутңа̄қ Субботами сяӷналъыҳқақ».

3Иисусым пикӣ: «Атиҳтӣгастыхӯ Давидым пилъҳа игатаӷақңами, та̄кутлъю лъңанилңӯт? 4Итыӷлюни Скиниямун тугулюку нықыкшаңлъяқ тӯныхкақ Кияӷныӷмун, икулъюни ныӷыхка̄гуқ, ныӷыстыкақӣлъю юни. Лӣлиҳтӯсямта пилъҳани китум алңунак ныӷьяӷақынӷита̄ нықыкшаңлъяқ иўырңақун священнигыт».

5Та̄хкын пикӣ: «Иӷныӷа Югым Атанқа̄ Субботам».

Ю̄к Ӣхылык Унӣқамың

6Иляңани Субботам, Иисус итыӷлюни синагогамун апыҳтуӷикақ. Таўантыфтуқ ю̄к аӷынқигныӷыт ӣхи унӣқа̄т. 7Иляңита апыҳтуӷикаюгыт Лӣлиҳтӯсяның, Фарисеитлъю рӣрңиңўа̄қа̄т Иисус на̄лъҳутинаюкан Субботами анахунилюку пияҳқа̄люку. 8Иўырңа лӣсимакутминың сюмыҳтаӷалъҳит, ю̄к ӣхылык унӣӷңалӷӣмың пика̄: «Таги хўавык ныкывьяҳта̄». Ныкывлюни тазиңавык агляқақ. 9Та̄хкын Иисусым пикӣ: «А̄птаҳлъямси, Лӣлиҳтӯсямта сясқилъю Субботами? Пинитун писқинкӯт налиӷмың сыӷлытун? Югулиӷисқинкӯт уңувалъыӷмың налиӷмың туқутисқилъю?» 10Қамахлъюки ысҳаҳтыӷлюки, ю̄к пика̄: «Ӣхытын ныңугутики». Ӣхыни ныңугутӣ, ага на̄лъҳуткат.

11Ынка̄м угумиягутыҳлъяглюку Иисус агӷиткыхка̄т сяналюку.

Иисусым Накмикыхкаңи Қуля Ма̄лӷук Сӣпнықлъюку Апостолыт

12Таўани пилъыӷми Иисус на̄йӷамун маюқақ юӷаӷналюни. Унулъқусиқ юӷақақ Кияӷныӷмун. 13Аҳсягу туқлъюӷлюки малихся̄ҳтыни, та̄куның накмӣқақ қуля ма̄лӷук сӣпнықлъюку ынка̄м атиқӣ апостолыт. 14А̄тҳит: Симонңуқ, (Иисусым атиқа̄ Петырымың), Андрейеңуқ аңлыгутаңа, Иаковыңуқ, Иоанныңӯқ, Филиппыңуқ, Варфоломейеңуқ, 15Матфейеңуқ, Фомаңуқ, Иаковыңуқ иӷныӷа Алфейем, Симоныңуқ атылык Зилотымың, 16Иудаңуқ, иӷныӷа Иаковым, Иуда Искариотлъю, увыҳпагутистыңуҳтыкақ.

Иисус Апыҳтуӷилӷӣлъю, На̄лъҳуқулӷӣлъю

17Иисусылъю апостолыкулъҳӣт укиглютың на̄йӷамың, лъӣвнықыхтылъҳакун нунам ныкывӷалгусиқӣ малихся̄ҳтылӷутыҳлъяни. Юлӷутыҳлъягыт тагиляӷа̄ткат тама̄ҳа̄ның Иудеям, Иерусалимымыңлъю, ысныхкыныңлъю Тирылъю, Сидонылъю. Нагасяҳтӯтка̄т, на̄лъҳутысқылъютыңлъю ақниӷныӷмыхның пикат. 18На̄лъҳуқуқӣлъю тама̄кут туӷныӷа̄т сыӷлылӣҳқыстыкӣт. 19Қамахлъютың юлӷутыҳлъягыт ся̄фнақуткыхка̄т Иисус, қаюҳлъяк лъңаның аҳтуӷьяҳқа̄нӷилъық а̄нңулӷӣ ынка̄м қамахлъютың на̄лъҳуқӯткат.

Қуялъҳылъю, Қивӷулъҳылъю

20Та̄хкын Иисусым ысҳаҳтыӷлюки малихся̄ҳтыни пикӣ:

«Лъпыси аклъюмалӷӣни қуяслъылгӯси,

қаюҳлъяк Атаныҳпагулъҳа Кияӷныӷым лъпыси пикаҳси!

21Лъпыси игаталӷӣни қуяслъылгӯси,

қаюҳлъяк кыпсюӷьяҳқа̄гуси.

Лъпыси қиялӷӣни қуяслъылгӯси,

қаюҳлъяк ныңляӷьяҳқа̄гуси!

22Қуяслъылгӯси югыт угумикынӷиси,

иҳсякынӷиси, сыӷлықӯнӷиси, сыӷлыӷуникаңисилъю.

Таўатын пӣқӣси қаюҳлъяк малихся̄ҳтыкыхкаңиси Иӷныӷан Югым!

23Таўатын пикаңиси ынңа̄талъ қуялӷа̄си, қытхыӷақлъюси қуям аңталяңаның, қаюҳлъяк қилягми акилыҳтӯсялыхлъягӯси. Амынқун сивунӷани, сивунӷита амьюқыта̄ткыхкақыхкаңит ӯкналиқистыт.

24Иўырңа сыӷлыӷўа̄ӷунақңӯси лъпыси аклъюңилңуӷни, қаюҳлъяк хўани уңувалъыӷми кияҳлъя̄тақулъыҳси та̄наңина̄гуқ пикаҳқаҳси!

25Сыӷлыӷўа̄ӷунақңӯси лъпыси кыпсюӷңалӷӣни ма̄тын, қаюҳлъяк игатиқылъықуси!

Сыӷлыӷўа̄ӷунақңӯси лъпыси ныңлялӷӣни ма̄тын, қаюҳлъяк қия̄ӷўаҳлъяхлъықуси!

26Сыӷлыӷўа̄ӷунақңӯси лъпыси қамахлъютың югыт итагнатун акузиткыхкаңиси,

қаюҳлъяк сивунӷита таўатыҳпигақ акузиткыхкақӣт ӯкналиқистысиӷўа̄ӷыт».

Пиниқлъюки Угумикистыси

27«Иўырңа хўаңа пӣмси нагалъҳӣни: Пиниқлъюки аңуяси, пинитун пӣқитыки угумикистыси. 28Қуястысқақитыки Кияӷныӷмун тама̄кут уйваляӷистыси, юӷа̄ткақлъюкилъю амьюқыта̄ткистыси. 29Китум алңунак улъюңахпыгун қасяҳтыкаңатын, иңлюңалъю қасяҳтыснакын. Китум алңунак қа̄слъихкын тугукакык, хатыхкынлъю лъңанун писқынъакыхкын. 30Қамахлъюки туңсиӷнӣлӷӣт тӯнақитыки. Китум тугувикумакаңиси сяӷьяхпысиның, выҳтыхпынаки. 31Юлгутыси пӣқитыки таўатын писқысюлъыҳпысистун лъпысинун.

32Пиниқистыңинаси пиниқнақңукуфсики, сиӷимахпынаси қуястылъыӷмың алъхыӷутылъыҳқаҳпысиның. 33Пинитун пистыңинаси пинитун пинақңукуфсики, сиӷимахпынаси қуястылъыӷмың алъхыӷутылъыҳқаҳпысиның. Талўа сыӷлыҳқыстыт таўатын пӣқут. 34Навӷиткуфсики тама̄кут сюмыҳпысини выӷутияҳқат, сиӷимахпынаси қуястылъыӷмың алъхыӷутылъыҳқаҳпысиның. Талўа сыӷлыҳқыстыт навӷитӣқут сыӷлыҳқыстынун, тама̄кут навӷақат выӷутақӣт навӷатың алмысиқлъюки аңталңит. 35Иўырңа пиниқлъюки аңуяси, пинитун пӣқитык, навӷитӣқитыклъю, сиӷимакыхпынаки выӷутылъыҳқӣт. Акилыҳтӯсяҳқалыхлъягӯси, авақутӣстунлъю Кияӷныҳлъягым пилъықуси, қаюҳлъяк наңлъыхтаҳтуқ игамсиқаюгигалңуӷнунлъю, сыӷлытунлъю пистынун. 36Наңлъыхтаҳтык катам таўатын Атахпыси наңлъыхталъҳатун».

Нанқихтиснанилъық

37«Нанқихтыхпынаки юлгутыси, ынка̄м Кияӷныӷым нанқихныӷилъықӣси. Анахунъихпынаки килъю ынка̄м Кияӷныӷым анахунъинӷилъиси. Сыӷывутӣқитык ынка̄м Кияӷныӷым сыӷывулъықӣси. 38Тӯнӣқитык юлгутыхпысинун ынка̄м Кияӷныӷым тӯнылъықӣси. Тӯныхкани лъпысинун кыныхтақлъюки, уфсюгутақлъюки, ныкыхсяӷўа̄ҳлъықӣ, ўата иля̄ӷатаӷаҳлъықӣ тывуӷаслъюки кыниси. Таўатын тӯнилъыҳпысистун Кияӷныӷым тӯнылъықӣси».

39Та̄хкын Иисусым уңипаӷа̄ткӣ: «Ая̄кам югым маӷьяҳқуҳлъықагӯ ая̄кақ ю̄к? Маӷьяҳқуқумигу ля̄гўа̄ӷмун калыфкахта̄лъықук. 40Игаӷьяҳта а̄ңатаӷанӷитуқ апыҳтуӷистыминың. Иўырңа игаӷьяҳта пыҳқиҳтыңъўа̄қуми, апыҳтуӷистымитун лъӣҳлъықуқ.

41Сяңан ысҳаҳсигу юлгутыхпык ӣсқуӷутысқуҳа̄, ысҳаҳпына̄н лъпык катам ӣсқуӷутын унаҳсиҳлъяк? 42Сяңан юлгутын пизигу: “Ӣсқуӷутңиқаӷлякын” лъпык паниның ӣсқуӷутылиӷлютын унаҳсиҳлъягмың? Уюқ пинӣюгнық! Сивуклъюку унаҳсиҳлъяк ийыхпыңның нусюглюку, ынңа̄талъ хўатыҳлъюўа̄қ ысҳаӷлюку юлгутыхпык ӣйңа ӣсқуӷутңиӷнакын».

Уқфиклъю, Пӣтыстыкӣлъю

43«Уқфик пинилӷӣ пӣтыстиңигатуқ сыӷлыӷмың. Уқфик сыӷлық пӣтыстиңигатуқ пинилӷӣмың. 44Уқфик натылңӯтаңа лӣгиксяҳқа̄гуқ пӣтыстыка̄кун. Сикуҳлъюгыт пӣтыстиңигатут смоквамың, налиӷмың ныӷьяҳқа̄нӷилңӯт нунивахсыӷат пӣтыстиңигатут виноградымың. 45Пинилӷӣ ю̄к атуқӣқуқ пинилӷӣмың илюмикыхкаминың, иўырңа сыӷлық ю̄к атуқӣқуқ сыӷлыӷмың илюмикыхкаминың. Ю̄к акузикаюгӯқ илюмикыхкаминың».

Мыңтыӷаңлъяҳтык

46«Сяңан туқлъюӷыстыңъа: “Атанық, Атанық?” нақам писқылъҳынка атуқыхпынаки? 47Кина алңунак тагилюни хўаңамнун, нагалъюки акузитынка қа̄ткыхкаки, уңипа̄лъықамси натытуляңаның. 48Юхтун мыңтыӷаңлъялӷӣтун аюқуқ. Нуна сямавырухлъяк ля̄глюку уйӷагмун, тунымиӷлюку та̄хун ныкыфлъықа̄ мыңтыӷақ. Кӣўык улывыҳлъяглютык таўалъӣма мыңтыӷақ қапшахтылъҳилъкаңа қаюҳлъяк уйӷагмың тунымиӷлюни ныкыфтыка̄лӷӣ. 49Иўырңа китум алңунак нагалъюки акузитынка, қа̄ткынӷилъкумики юхтун аюқуқ тунымаңуна̄н мыңтыӷаңлъялӷӣтун. Кӣўык улывыҳлъяглютык ага мыңтыӷақ на̄фқыҳлъяка̄».

Currently Selected:

От Луки 6: ess2

Highlight

Copy