От Луки 5

Иисусым Малихся̄ҳтыксюхўа̄ӷи

1Ата̄сими аӷныӷми, На̄йвам Геннисаретым ысныңани, Иисус ныкывӷаңулюку югыт каңлъюқаҳтыка̄т наганъалюки Кияӷныӷым Акузитаңи. 2Ысҳақакык ма̄лӷук аңьяк ысными сяюгңалӷӣк. Нақам югит иқалъынӣҳтыт авӣтыфтут, уӷвуӷьяҳтӯмакаңит ныгаҳпатың. 3Ӯхлъюни Симоным аңья̄кун, аўаваҳқа̄ӷутысқыхкақ ыснымың. Та̄хкын ақумлюни аңьякун югыт апыҳтуқӣ. 4Апыҳтуӷиныӷмың та̄қсями, Симон пика̄: «Ӯсқалъҳанун аўаваӷлютын ныгаҳпахтын атыҳтики на̄птысқылъюки».

5Симоным пика̄: «Югунӣқ, унулъқусиқ иқалъинӣҳта̄яҳтукут сякыңылъҳитукут! Иўырңа каяхтыкывңа ныгаҳпагыт атыӷнақанка». 6Лыган атыҳтӣт на̄пқаӷӣҳлъякат рыпалъ пӣгуқыстаӷлютың лъӣқат. 7Аңьям а̄лъҳанилңӯт илятың апақӣт каюсиӷьяҳтӣсқылъютың. Ка̄систың аңьяк имиқахкыт ыслъықаӷаҳлъюкык рыпалъ калыфқаҳтыкат. 8Иўырңа Симон Петырым ысҳаӷьямигу алъя̄ҳлъюхўаҳтилъық, Иисусым сивуңакун нӣнӷулъюни пика̄: «Атанық, хўаңамнитыхпынаң қаюҳлъяк сыӷлыҳқыстыңӯңа!»

9Симонылъю юкулъҳӣт сяӷӣӷаюкат на̄пқаӷӣлъыӷмыхның, 10қыпҳалгуткыклъю Иаковым, Иоанным, Зеведейем иӷныӷык.

Иисусым пика̄ Симон: «Алиңыхпынаң, хўакын кынлыклъюку югмың на̄псягунъақңӯтын».

11Аңьяк қӯтмун сяюглюкык, униткӣт сяңўа̄т қамахлъюки ынка̄м малихтыка̄т Иисус.

Иисусым Укмаңиқаңа Ю̄к Прокаженныелык

12Иисус иляңитнисималюку ныҳлъягыт, ю̄к тама̄нтыфтуқ ынңа̄талъ прокаженнылыхлъяк. Ысҳаӷьямигу Иисус, сивуңакун нӣнӷуткақ манигӯтыпихлъюни пика̄: «Атанық, пиюкылъқыхкувгу укмаңиӷңа».

13Иисусым ныңуглюни ся̄фсима̄н пика̄: «Пиюкылъқақа; укмаңӣҳтын». Таўаниңинақ проказаңӣткақ. 14Иисусым иныҳтыңъўа̄қа̄: «Кина алңунак уңипа̄тыхпына̄н, иўырңа агля̄ священнигымун ювӷӣӷысқылъютын. Та̄хкын аҳқыша̄ҳа̄тын Моисейем қылӷутылъҳатун ипапиҳқысқылъюку укмаңӣҳтылъҳын».

15Иўырңа Иисус ўатақа̄ӷақ уңипақыхка̄т тамаҳа̄ни, ынка̄м юлӷутыҳлъягыт такуляӷа̄симаңинақа̄т наганъалюку, на̄лъҳутысқылъютыңлъю ақниӷныӷмыхның. 16Иўырңа килга̄нун аўын аӷуляқақылӷӣ юӷаӷналюни.

Иисусым На̄лъҳускаңа Унӣқақ Ю̄к

17Ата̄сими аӷныӷми, Иисус апыҳтуӷималюку, таўани ақумгатңуфтут Фарисеитлъю, апыҳтуӷикайгытлъю Лӣлиҳтӯсяның. Та̄кут тагиляӷа̄тка̄фтут тамаҳӣтның Галилеям ныңитның, Иудеям ныңитның, Иерусалимымыңлъю. Атанӷым аҳтуӷьяҳқа̄нӷилъҳа на̄лъҳутимун лъңанилңуқ. 18Иляңита югыт тагитка̄т лъңанун унӣқақ ю̄к алъиӷа̄кун. Мыңтыӷамун итҳутфихкамың иваӷикат, Иисусым мануңакун лъиналюку. 19Иўырңа итҳунъыӷмың аҳтуқа̄т қаюҳлъяк югыт каңлъю̄тңаҳлъягулӷӣт, ынка̄м мыңтыӷам қа̄йңанун маю̄тка̄т. Таўани кровлям иляңи иқиқуӷлюки, рыӷиӷулъюку укихтыка̄т алъиӷа̄кун акулңитнун югыт мануңанилңӯт Иисусым. 20Лӣсимакыхкаңи ухпықилъылгулӷӣт ынка̄м ю̄к пика̄: «Сыӷывутанка сыӷлыҳқылъыҳтын».

21Апыҳтуӷикаюгыт Лӣлиҳтӯсяның, Фарисеитлъю умьюгамыхтыхун а̄пқуӷа̄ӷуткат: «Кинаңа̄ўа уна ю̄к Кияӷныӷукалъҳӯӷунилӷӣ? Кияӷныҳӣна̄гуқ сыӷывутияҳқақ сыӷлыҳқылъыӷның».

22Иисусым лӣсимакыхкаңи сюмыҳтаӷалъҳит ынка̄м а̄птыкӣ: «Сяңан таўатын сюмыҳтаӷаӷыстык? 23Наликык хўатын пилъҳык пияқнӣтак: “Сыӷлыҳқылъыҳтын сыӷывутут”, налиӷмың: “Макылъютын пиюги”? 24Иўырңа лъпысинун лӣсимакысюгақа Иӷныӷа Югым аҳтуӷьяҳқа̄нӷилъылгӯқ нунами сыӷывутияҳқа̄люни сыӷлыҳқылъыӷның». Та̄хкын пика̄ унӣқа̄ялӷӣ ю̄к: «Уңипа̄тамкын, макытын, тугулюку алъиӷан, лъпысинун агля̄!»

25Юлӷутыт ысҳа̄манӷитни таўаниңинақ ю̄к макылъюни, алъиӷани тугулюку лъмыхнун агляқақ, усюқума̄н Кияӷнық. 26Қамахлъютың юлӷутыт сяӷӣӷаюхлъякат, усюқыхка̄тлъю Кияӷнық, пикат: «Аӷныӷми хўани ынңа̄талъ ысҳапахтукут алъя̄ҳлъюхўаӷмың!»

Иисус Малихтысқылӷӣ Левийемун

27Таўатын пилъҳыт киңуңитның, Иисус навык пилюни ысҳақа̄ налогмың қырңуҳтиста, а̄тҳа Левий. Ақумгафтуқ налогмың қырңуҳтивигмини, пика̄: «Малихтиңа». 28Ныкывлюни сяңўа̄ қамахлъюку унилъюку малихтыка̄.

29Та̄хкын мулюнӷитуқ Левийям лъмыхни нықынӷаҳқутыҳлъяка̄ Иисус. Таўантыфтут налогмың қырңуҳтистылӷутытлъю, иляңитлъю югыт, ақумылгусиқӣт қаюӷвигми. 30Фарисеитлъю, апыҳтуӷистыңитлъю Лӣлиҳтӯсят қикыҳқукат малихся̄ҳтыңанун: «Сяңан ныӷылгусиӷақыстыкилъю, мыӷылгусиӷақыстыкилъю налогмың қырңуҳтистытлъю, сыӷлыҳқыстытлъю?»

31Иисусым пикӣ: «Югунқыхтат аӷалъыхтаҳсюӷнӣтут иўырңақун тама̄кут қинуюлӷӣт. 32Тагиңунӷитуңа тахсиқлъиӷналюки ылъқуӷутңалӷӣт югыт. Иўырңа тагиңӯңа сыӷлыҳқыстыт авутыҳқылъюки сыӷлыҳқынъанӣсқылъюки».

Иисусым Апыҳтӯсяқыхкаңа Посталъық

33Иляңита югыт Иисус пика̄т: «Иоанным малихся̄ҳтыңи аўын постақутлъю, юӷаӷақутлъю. Фарисеитлъю малихся̄ҳтыңит таўатын пӣқут. Иўырңа лъпык малихся̄ҳтытын ныӷақутлъю, мыӷақутлъю».

34Иисусым а̄птыкӣ: «Ныңуҳнақылӷӣк ақылъқӣк посталъықа̄т нулиҳтуӷнақылӷӣ лъңитнилъюку? 35Иўырңа пилъыҳқақ ка̄лъықуқ нулиҳтуӷнақылӷӣ лъңитның иқилъықа̄т, ынңа̄талъ таўани посталъықут».

36Ынка̄млъю Иисусым уңипаӷа̄ткӣ: «Китум алңунак икувикна̄нӷита̄к қа̄слъиӷраӷа̄к, иля̄ӷналюкык қа̄слъилюгык. Таўатын пикумикык пӣхлъықа̄к қа̄слъиӷраӷа̄к ынка̄м нутаӷақ иля̄ӷутка̄ алъяңумиӷулъықуқ. 37Налиӷмың китум алңунак аўатаҳпалюгыт имиӷна̄нӷитӣ виноӷраӷаӷмың. Имиқумики аўатаҳпалюгыт қӯпаҳлъықут ынка̄м виноӷраӷақ сякусӣқылъықуқ. Аўатаҳпалюгытлъю атӯяҳқа̄наниҳлъықут. 38Итупилъ виноӷраӷақ кӯвьяҳқа̄гуқ аўатаҳпаграӷаӷмун! 39Кина алңунак винолюгмың мыӷлюни, мыӷьюгна̄нӷитуқ виноӷраӷаӷмың қаюҳлъяк хўатын пияҳқа̄гуқ: “Винолъюк нықниӷатаӷаҳтуқ виноӷраӷаӷмың”».

Currently Selected:

От Луки 5: ess2

Highlight

Copy