От Луки 22

Туқусюкаңат Иисус

1Ка̄сяҳтӯңулӷӣ «Нықынӷаҳқылъиҳа Закваскалӣмаңилңӯм Нықыкшаңлъям», атилъқылӷӣ Пасхамың. 2Первосвященнигытлъю, апыҳтуӷикаюгытлъю Лӣлиҳтӯсяның агӷиткыңъукаңат натын туқутылъыҳқамың Иисус. Иўырңа агӷиткылъытың лӣсимакысюнӷилъкаңит югнун қаюҳлъяк алиңылӷӣт сыӷлылӣҳқӣҳлъягнаюката.

Иудам Аңыҳқумакыхкаңа Иисус Увыҳпагунъалюку

3Та̄хкын Туӷныӷа̄м ӣтқа̄ Иуда Искариот, илятңалӷӣ қуля ма̄лӷук сӣпнықлъюку малиҳся̄ҳтынун. 4Ынка̄м алыҳқуӷьяҳтуқӣ первосвященнигытлъю, умӣлўа̄ӷитлъю Храмым кылыңакистыңита натын увыҳпагунъалюку Иисус лъңитнун. 5Таўатын пинақылъҳаның қуякат ынка̄м акықыхка̄т манилилъықнилюку. 6Иудам итагнақлъюки увыҳпагутилъыҳқаңнақуткыхкақ Иисусымың, иўырңа юхтуқами пиюгумаңилъкаңа.

Иисусым Малиҳся̄ҳтыкык Ята̄ҳқылӷӣк Пасхамун

7Аӷнық ка̄ткақ Нықынӷаҳқылъыҳқа̄нун Закваскалӣмаңилңӯм Нықыкшаңлъям. Таўани аӷныӷми тамаҳаӷмың ныңлъюгутыт туқутӣӷақылӷӣт пынъӣӷаӷаӷмың Пасхамун. 8Ынка̄м Иисусым пики Петырылъю, Иоаннылъю: «Ята̄ҳқысяҳтуҳтыху Пасхам нықыкаҳқа̄ ныӷӯнъалюта».

9А̄птыка̄к: «Нани ята̄ҳқыстысюхсигу?»

10Кӣмсиқакык: «Нагатаҳтык! Ӣтқуфтык ныҳлъягмун, югым налъяҳлъықӣси тугумӣлгӯқ мылӷутагның. Малигнакыси мыңтыӷамун ӣтқан, 11ынка̄м мыңтыӷам юга пинакыси: “Апыҳтуӷистым а̄пта̄тын, малиҳся̄ҳтыкулъҳӣни натуңа̄ўа ныӷвихкаҳпут Пасхамун?” 12Та̄хкын маю̄лъықӣси қымтамун нунатуқамың нылык, ныӷӯтылъыҳқамун атуҳқуақ. Таўани ята̄ҳқилӷа̄тык».

13Агляӷлютык пиялӷӣмык сяңўа̄ қамахлъюни Иисусым апылъҳатун аюқыхкақ, ынка̄м ята̄ҳқыхка̄т Пасхам нықыкаҳқа̄.

Атанӷым Ныӷыстилъҳа

14Ныӷвихкақ ка̄сян Иисусылъю, апостолынилъю ихасиҳқӯткат ныӷналютың. 15Пикӣ: «Ныӷылгуткысюпихтамси Пасхам нықңаның сивутҳулъюку икфиқылъыҳқақа! 16Уңипа̄тамси, алъя ныӷьяҳқақынӷитақа та̄на кынляңа Атаныҳпагулъыӷмини Кияӷныӷым апыӷӣқагу успықылъыни Пасхамун».

17Та̄хкын тугулюку қаю̄сиқ, игамсиқаюгвиклъюку Кияӷнық, пикақ: «Тугулюку қаю̄сиқ мыӷвика̄таҳтыху. 18Уңипа̄тамси, хўакын кынлыклъюку мыӷна̄нӷитақа вино кынляңа Атаныҳпагулъҳа Кияӷныӷым ка̄тылъҳанун».

19Та̄хкын тугулюку нықыкшаңлъяқ, игамсиқаюгвиклъюку Кияӷнық, а̄вгуӷлюку тунқуқӣ, хўатын пимӣта: «Уна югусиқақа тӯныхкыхка лъпыси апалъюқлъюси. Ныӷақитыху нықамикусӣлюку хўаңамнун». 20Ныныӷмың та̄қсямың таўатыҳпигақ тӯныхкӣ қаю̄симылңуӷмың виномың, хўатын пимӣта: «Уна қаю̄сиқ Кияӷныӷым нутаӷа̄гуқ акықуся̄ а̄мкун, кӯвылӷӣ лъпыси апалъюқлъюси.

21Иўырңа нагатык! Увыҳпагутистыка хўа̄нтуқ, ныӷылгусиӷақа̄ңа! 22Кияӷныӷым таўатын успықылъқа̄ Иӷныӷан Югым туқулъыҳқа̄. Иўырңа сыӷлыӷўа̄ӷунақңӯқ та̄на ю̄к увыҳпагутияҳқақ лъңаның!»

23Та̄хкын малиҳся̄ҳтыт а̄пқуӷа̄ӷуткат лъңитның налик таўатын пияҳқа̄таңа.

А̄ҳтӣра̄ӷутылъық Аңылъыҳпига̄лъыӷмың

24Та̄хкын малиҳся̄ҳтыт а̄ҳтӣра̄ӷуткат налиҳтың аңылъыҳпига̄яҳқа̄таңа. 25Иисусым пикӣ: «Язычнигыт умӣлгита атанӷутақӣт ютың, иглыӷутистыңитлъю атиҳтысюгақут “Каютңит Югыт” таўатынъыӷитыӷңа̄ӷмың. 26Иўырңа лъпыси таўатысяҳқа̄нӷитуси. Итупилъ акулыхпысини аңылъыҳпига̄т уюқлъиҳпига̄стун лъӣӷлит, ынка̄м иглыӷутиста қыпҳаҳтыстун лъӣӷли. 27Наликык а̄ңатаӷаҳта, ақумгалӷӣ қаюӷвигыгни, налиӷмың кыпсӣқулӷӣ? Ақумгалӷӣ а̄ңатаӷаҳтуқ. Иўырңа акулыхпысини хўаңаңӯқ кыпсӣқулӷӣ лъпысинун.

28Лъпысиңӯт хўаңамниткат нанӷӣҳсяӷалъымни. 29Тама̄кын апалъюқлъюку атаныҳпагулъылитамси катам Атама тагивалъҳатун хўаңамнун. 30Ынка̄м Атаныҳпагулъымни ныӷылъықусилъю мыӷылъықусилъю қаюӷвигымни. Ақумылъықусилъю умӣлгусим ақумутӣтхун нанқихсяҳқа̄люки қуля ма̄лӷук сӣпнықлъюку Израилым рамкыңи».

Иисусым А̄пқаңа Петырым Налъюнқылъыҳқа̄

31Иисусым пика̄ Петр: «Симон, Симон! Нагатын! Туӷныӷақ пилъыҳқаңума̄қ Кияӷныӷмың нанӷӣқуналюки ухпықилъыси. А̄фтысюгӣси хўаңамның катам пӣтысиӷаҳтым авулъҳатун малъят пшеницаның. 32Иўырңа юӷа̄ткума̄мкын Симон, ухпықилъҳын пыхтыфқа̄н писқылъюку. Ынка̄м ухпықынқихтыкувңа, икнақуҳсяӷьяҳқақатын малихся̄ҳтылгутыхпык ухпықилъҳитнын».

33Петырым пика̄: «Атанық, малихсяқлъыхӣна̄ҳсима̄мкын анусимиңлъяӷвигмун, туқулгусиӷналютынлъю!»

34Иисусым пика̄: «Петр, уңипа̄тамкын, унукун пиңаюның налъюнқылъықаҳпыңа сивуңани петухым қалӷилъыҳқа̄н».

Иисусым Кылыңася̄қаңи Малихся̄ҳтыни

35Та̄хкын Иисусым а̄птыкӣ: «Каяхтақңамси манилӷутаңунаси, ақыфтаӷа̄ңунаси, налиӷмың ка̄мңунаси сямың аклъюмастык?» Кӣмсиқа̄т: «Аклъюмаңитукут».

36Пикӣ: «Иўырңа ма̄тын, кина алңунак манилӷуталгукуми, налиӷмың ақыфтаӷа̄лгукуми кылъқылъи. Кина алңунак сявихпагискуми қа̄слъигни акиклъюкык пикыңли. 37Уңипа̄тамси, игақңа̄қ Акузитни Игақыхкани: “Илялъкӣсима̄т Лӣлиҳтӯсят на̄фқӣстыңитнун”. Та̄на Акузин Игақыхкақ хўаңамның аюқуқ, ынка̄м апыӷӣӷьяҳқа̄ҳтуқ».

38Малихся̄ҳтыт пика̄т: «Ӣи Атанық! Хўа̄ ма̄лӷук сявихпагык». Иисусым пикӣ: «Таўатыңинаӷңам!»

Иисус Юӷалӷӣ Елеоным Найӷаҳани

39Иисусылъю малихся̄ҳтыкулъҳӣт а̄нлютың Иерусалимымың, пӣқылъыӷмыгыстун агляқат Елеоным найӷаҳанун. 40Ка̄сямың такукамыхнун пикӣ: «Юӷаҳтык а̄ҳқутақынӷитысқылъюси нанӷӣқулъыӷмун».

41Уйӷагым милю̄тылъҳан уя̄тулңатун тазиңавык агляқақ унилъюки малихся̄ҳтыни. Ынка̄м сыгысқуҳлъюни юӷақақ: 42«Атамни, пиюкылъқыхкувгу аўӣтигу уна қаю̄сиқ хўаңамның. Иўырңа хўаңа пиюкылъқа авылӷаӷлюку лъпык пиюкылъҳын апыӷӣӷли». 43Қилягмың яқулгым такулюку икнақуҳсяқа̄. 44Икфиқыҳлъягым аңталяңаның та̄куңинаҳа̄гның юӷақақ, қысиҳтылъҳалъю а̄ўыстун уқлъюҳқақақ нунамун.

45Юӷаныӷмың та̄қсями ныкывлюни малихся̄ҳтыминун пиялӷӣми қава̄тңуфтут, қаюҳлъяк қивӷулъҳым паӷьюҳқыхкаңи. 46Пикӣ: «Сяңафси қаваӷақыстык? Макылъюси юӷаҳтык а̄ҳқутақынӷитысқылъюси нанӷӣқулъыӷмун».

Тугукаңат Иисус

47Иисус акузималюку, Иудам маӷьяҳқуқӣ юлӷутыт лъңанун. (Иуда илятңалӷӣ қуля ма̄лӷук сӣпнықлъюку малихся̄ҳтынун.) Такука̄ Иисус на̄ӷналюку. 48Та̄хкын Иисусым а̄птыка̄: «Иуда, на̄ҳсигӯ Иӷныӷа Югым увыҳпагунъалюку аңуяганун?»

49Малихся̄ҳтыт Иисусымылңӯт лӣгиклъюку сяңўа̄ сянақутаңа, а̄птыка̄т: «Атанық, пилъюўа̄лътыкӣ сявихпамтыхун?» 50Ага налӣта сявихпагминың илыфкаӷаҳтыка̄ аӷынқигныӷан сигутңа қыпҳаҳтыля̄ӷан первосвященнигым.

51Иўырңа Иисусым пикӣ: «Га̄маңам, таўатынңам пикатык!» Ынка̄м ся̄флъюку қыпҳаҳтыля̄ӷым сигутңа ма̄мыстыка̄.

52Та̄хкын Иисусым а̄птыкӣ первосвященнигыт, умӣлўа̄ӷи Храмым кылыңакистыңита, сӣванлъыӷытлъю ақфа̄ӷилӷӣт лъңаның: «Тугуяҳтӯңустыңъа̄ сявихпахтӯмаҳпыси, анагутаҳтӯмаҳпыси никимқун ўаяӷнӣҳтыңуңа? 53Аҳутаңа тамаҳа̄н лъпысинитақңама Храмыми, тугунақуткумаңитаҳпысиңа. Иўырңа уна афлъюкаҳси, қаюҳлъяк аҳтуӷьяҳқа̄нӷилъҳа мамлыгым иглыӷутиңӯқ».

Петырым Налъюнқыхкаңа Иисус

54Та̄хкын Иисус тугулюку аӷуляқутка̄т, агля̄тка̄т первосвященнигым мыңтыӷа̄нун. Уявақа̄нлъюни Петырым малихтыка̄. 55Дворым қука̄ни, кума̄қиямың қырңаӷмың ақумӯткат. Петырлъю акулңитхун ақумыхкақ. 56Та̄хкын аӷнаӷа̄м қыпҳаҳтым ысҳаӷьямигу ақумгалӷӣ кынӷыгни, ысҳапахтуӷлюку пикақ: «Уналъю ю̄к лъңаниткаюгӯқ!»

57Иўырңа Петр мысиӷақақ: «Аӷнами хўани, налъюкақа̄ кинаңутаңа!»

58Мулюхпынани югым ысҳаӷлюку пика̄: «Лъпыклъю налиқа̄тын малихся̄ҳтыңан!» Иўырңа Петырым пика̄: «Югми хўани, малихся̄ҳтыкынӷита̄ңа!»

59Та̄хкын ынтақун ата̄сиқ афлъю наӷуҳтақуқлъю иляңан югым сягиқутка̄: «Ипапыста̄қ уна ю̄к лъңанитка̄гуқ, қаюҳлъяк Галилеяӷмӣңӯқ!»

60Иўырңа Петырым пика̄: «Югми хўани, сямың пӣқсин налъюкақа̄!» Таўаниңинақ таўатын акузималюку, петух қалӷиқақ. 61Атанӷым қӣвлюку ысҳақа̄ Петр ийыхкынкун. Та̄хкын Петырым нықаңуқӣ Атанӷым акузитаңи, пикақыхкаңа: «Унукун петух қалӷиҳтыстыхпына̄н пиңаюның налъюнқылъықаҳпыңа». 62Ынка̄м Петр а̄нлюни қия̄ӷўаҳлъякақ.

Иисус Лыгасӣӷўа̄ткыхка̄тлъю, Қывӯтка̄тлъю

63Югыт кылыңакилӷӣт Иисусымың лыгасӣӷўа̄ткыхка̄тлъю, қывӯтка̄тлъю. 64Қӣпаӷаӷмың ӣскык ся̄плъюкык тыңлюўа̄та̄тка̄т. Та̄хкын пика̄т: «Ӯкналиқистыңӯтын. Уңипа̄тикут китум тыңлюхтатын?» 65Сыӷлықӯҳта̄ка̄тлъю.

Иисус Агӷистынун Агля̄скаңат

66Аҳсягу, Иудеит сӣванлъыӷит, первосвященнигыт, апыҳтуӷикаюгытлъю Лӣлиҳтӯсяның қырңуӷулъютың, Иисус тагитыстыка̄т. 67Пика̄т: «Христосыңукувык уңипа̄тикут». Иўырңа пикӣ: «Уңипа̄скумси, ухпықна̄нӷитаҳпысиңа. 68А̄птыкумсилъю кӣмсиӷна̄нӷитаҳпысиңа. 69Иўырңа қантаӷақун Иӷныӷа Югым ақумылъықуқ аӷынқигныӷакун Аҳтуӷьяҳқа̄нӷитыҳлъягым Кияӷныӷым».

70Қамахлъютың а̄птыка̄т: «Аўӣ, Кияӷныӷым Иӷнықа̄тын?» Кӣмсиқӣ: «Лъпыси та̄наңунӣҳпысиңа».

71Та̄хкын пикат: «Та̄ўа лӣсимакистысюӷнӣӷутӣлъю! Лъңаның катам нагақуӷаҳпут Кияӷныӷмун Иӷнықнилюни пӣқ».

Currently Selected:

От Луки 22: ess2

Highlight

Copy