От Луки 19

Иисусынкук, Закхейенкук

1Иисус ка̄лъюни Иерихонымун акулңакун иглыҳтыка̄. 2Та̄ўаңуқ умӣлгат налогмың қырңуҳтиста, а̄тҳа Закхей, аклъюңилңуқ. 3Ысҳаӷьюка̄ налӣтаңа Иисус, иўырңа амсякаҳтаҳа̄тминың ысҳа̄маңилъкаңа қаюҳлъяк юхтупихлъыҳӣ. 4Ынка̄м ақфа̄ткақ сивутҳулъюки юлӷутыт, та̄хкын маюқа̄ смоковница уқфик ысҳаӷналюку Иисус қаюҳлъяк та̄кўагун наӷуҳнақылӷӣ. 5Иисус ка̄лъюни уқфигмун, сивухфиклъюку пика̄: «Закхей, ыгмӣнақ укиги қаюҳлъяк аӷныӷми хўани лъпысинитыпыста̄ӷнақңӯңа».

6Укигаҳлъюни, лъмыхнун Иисус агля̄лъюку қуякыпихлъюку упуӷатка̄. 7Юлӷутыт ысҳапаглюку қамахлъютың акузимлыӷа̄ткыхка̄т: «Сыӷлыҳқыстымун ага ақылъқа̄яҳтуҳтуқ!»

8Иўырңа Закхейем ныкывлюни Атанық пика̄: «Атанық, авыхлъюку аклъюңика тӯнақақа аклъюмалӷӣнун. Ынка̄м пӯҳсимакумкун кина ыстамаҳқылъюку выӷулъықақа».

9Иисусым пика̄: «Аӷныӷми хўани, ӯм югым ухпықыхкақутминың Кияӷнық, лъңа киңунқа̄ҳтыпӣга̄ Авраамым. Ынка̄м Кияӷныӷым югулӣ мыңтыӷами хўани кияҳлъыҳӣт. 10Иӷныӷа Югым тагика̄гуқ иваӷиналюни ифлъяканың югулиналюки».

Иисусым Уңипаӷа̄ткыхкаңи Золотат Монетат

11Югыт нагатңукаңат Иисус. Сюмыӷмыхни ка̄скуми Иерусалимымун Атаныҳпагулъҳа Кияӷныӷым пӣнлиӷаҳнақнилюку пика̄т. Ынка̄м лӣгикысқылъюки Иисусым уңипаӷа̄ткӣ. 12Пикӣ: «А̄ңўа̄қ ю̄к аӷуляқумалӷӣ уяванун нунамун умӣлгуҳналюни, апыӷӣқуми утыӷниӷьяҳқа̄люни. 13Аӷуляқфагилгами тахсиҳтыӷлюки қуля қыпҳаҳтыни тунқуқӣ золотамың монетамың. Пикӣ: “Кынляңа утыӷнилъымнун тукфиӷисиқитыкилъю, акилъпыга̄сиқитыкилъю нулястысқылъюку маника”. 14Иўырңа нуналгутаңита угумикыхкаңат, ынка̄м аӷуляқсян каяхтыкӣт югыт умӣлыхпигаӷмун хўатын писқылъюку: “Та̄на ю̄к умӣлъкысюнӷитаҳпут”.

15Иўырңа Умӣлыхпига̄м а̄ңўа̄қ ю̄к умӣлгуҳтыстыка̄. Утыӷниӷлюни нунаминун тахсиқлъиқӣ қыпҳаҳтыт манилиткани лӣгикналюки натын аңка̄н алъхыӷусиматаңи.

16Сивулӣм тагилюни пика̄: “Атанық, та̄хкын тагивақаҳпының алъхыҳсима̄нка қуляӷьягыт золотат монетат”. 17Умӣлгым пика̄: “Сыӷлыҳалык, пинилӷӣңӯтын қыпҳаҳта! Ата̄сӣӷмытутыхпының сясқуҳаӷмун, иглыӷутистыңлъяӷнақамкын қуляӷьягнун ныҳлъягнун”. 18Тӯңлиҳа̄н қыпҳаҳтым тагилюни пика̄: “Атанық, та̄хкын тагивақаҳпының алъхыҳсима̄нка талъиматгьягыт золотат монетат”. 19Умӣлгым пика̄: “Лъпык иглыӷунъақатын талъимат ныҳлъягыт”. 20Та̄хкын пиңая̄т қыпҳаҳтыт тагилюни пика̄: “Атанық, аң, золото монетан, какыхлъюгӣтакун ӣмгулъюку ӣқақақа. 21Аликамкын а̄ҳсяҳқа̄нӷитутыхпының. Тугуткаюгӯтын лъпык пикынӷилъкыхпының, сяӷнакаюгӯтынлъю пӣтысиӷақақынӷилъкыхпының”. 22Умӣлгым пика̄: “Уюқ, сыӷлық қыпҳаҳта. Акузитытын лъпынун нанқихтусиқнақанка. Лӣсимакаҳпыңа а̄ҳсяҳқа̄нӷилңӯгуңа. Тугуткаюгӯңа хўаңа пикынӷилъкымның, унатақаюгӯңалъю пӣтистыкақынӷилъкымның. 23Сяңанңам маника канаҳнаниҳсигу снамун? Утыӷнилъымни выҳнаяӷақа алъхыӷнылиӷлюку”. 24Та̄хкын ныкывӷалъҳӣт таўани, пикӣ: “Тугулюку лъңаның золото монета тӯнитыхӯ қыпҳаҳтымун қуляӷьяк монеталыгмун”. 25Пика̄т: “Атанық, сӣңынлъю қуляӷьяк монеталгӯқ!” 26Умӣлгым пикӣ: “Уңипа̄тамси, тамаҳаӷми сямың алъхыӷуткақ тӯныхкамның тӯнатаӷаӷьяҳқа̄гуқ. Иўырңа та̄на алъхыӷутылъҳилңуқ, талўа сялгуӷңа̄н лъңаның иқилъықӣт. 27Та̄хкын умӣлык пикақ, На̄ки тама̄кут аңуягынка умӣлгутысюнӷилңӯт хўаңамнун? Тагилъюки хўавык туқуқуҳтыки манумни!”»

Умӣлгулюни Иисус Тагилӷӣ Иерусалимымун

28Уңипаӷаныӷмың апыӷӣӷьями Иисусым сивулъха̄қӣ Иерусалимымун. 29Туӷа̄ӷақа̄лъю Виффагияңук, Вифаниянңкук, Елеоным найӷаҳанилңӯк, ма̄лӷук малихся̄ҳтыгни каяхтыкакык сивулъха̄қыстӣсқылъюкык. 30Пикакык: «Тазиңавык нымун агляҳтык, ӣтҳуткылъюку ысҳаҳлъықаҳтык осёлаӷақ пытугңалӷӣ; китум алңунак иглыӷусиқигалъкаңа. Итымулъюку тагинъакыси. 31Китум а̄птыкаңистык: “Сяңан итымутыстыху?” Хўатын кӣмсиӷна̄кыхси: “Атанӷым атуқсюга̄”».

32Та̄хкын аӷуляқлъютык ысҳа̄ткат Иисусым апылъҳатун аюқлъюку. 33Итымусималюку осёлаӷақ югита а̄птыкахкыт: «Сяңан осёлаӷақ итымутыстыху?» 34Кӣмсиқа̄т: «Атанӷым атуқсюга̄». 35Ынка̄м Иисусымун тагилъюку, қа̄слъимыхның тыфқуӷвиклъюку осёлаӷақ, та̄хкын Иисус ақумыстыка̄т қа̄йңакун. 36Иглыҳсян, югыт қа̄слъитың ся̄ҳқуқӣт тӯмкаҳқа̄кун. 37Иерусалимымун ка̄сяҳтуӷлюни, ка̄тақа̄лъю укигьяӷақ тумынилңуқ Елеоным найӷаханың, ӣңунаӷмың малихся̄ҳтылӷутыҳлъяги қуятыҳлъягуҳтыкат. Игляхтупихлъютыңлъю усюқыхка̄т Кияӷнық Иисусым алъя̄ҳлъюхўаҳтилъыҳлъяганың ысҳапакамыхның. 38Пикат:

«Кияӷныӷым қуяслъигу Умӣлык тагилӷӣ а̄тҳакун Атанӷым!

Ныкыхмылъық қилягми, усюқнаҳалыклъю Кияӷнық ӯсқалъыҳпигаӷмылңуқ!»

39Та̄хкын иляңи Фарисеит юлӷутнилңӯт пика̄т: «Апыҳтуӷиста, малихся̄ҳтытын ныпӣӷысқики».

40Иисусым пикӣ: «Уңипа̄тамси, ныпӣӷңаяқата, уйӷагыт акилӷӯҳлъягнаяҳтут».

Иисусым Қиякыхкаңа Иерусалим

41Иисус ка̄сяҳтуӷлюни Иерусалимымун, ысҳаӷьямигу қиякыхка̄. 42Пика̄: «Хўа̄ ма̄тын лӣсимакыхкынтуқ сяңутаңа аклъюкыхкан кияҳтысқылъютын ныкыхмылъыӷми! Иўырңа ма̄тын лӣгикыпагниңитан. 43Аӷныӷыт ка̄нъақңӯт аңуяхпык амигӣритаӷвиңлъяҳлъықа̄тын узимун. Аӷулӣҳнақңўа̄т иглыӷалъық итыӷмунлъю, а̄нмунлъю, каңлъюлъықа̄тынлъю узимун. 44На̄фқылъықа̄тын, туқуқуҳлъықӣтлъю юхтын миңлъютыхпык илюңанилңӯт, талўа ата̄сиқ уйӷак нымининъанӷитуқ. Тама̄кут қамахлъютың пияҳқа̄гут қаюҳлъяк лӣгикынӷилъкын Кияӷныӷым югулияҳтуқақсяқаңатын!»

Иисус Храмымун Пилӷӣ

45Та̄хкын Иисус ӣтҳақңами Храмымун, югыт тукфиҳтулӷӣтлъю, акилъпыгалӷӣтлъю сякшитутыпихлъюки ыслъятмун а̄нысқуқӣ. 46Уңипа̄ткӣ: «Игақңа̄қ Акузитни Игақыхкани Кияӷнық пика̄гуқ: “Мыңтыӷақа юӷаӷвигӯқ югнун”, иўырңа лъпыси ӣӷаӷвиңлъяӷаҳси тыглыгнӣҳтынун!»

47Аҳутаңа тамаҳа̄н, Иисус апыҳтуӷикақ Храмыми. Первосвященнигытлъю, апыҳтуӷикаюгытлъю Лӣлиҳтӯсяның, иглыӷутистыңиталъю югыт агӷиткыңъукаңат натын туқутылъыҳқамың. 48Иўырңа туқутыпагниңитка̄т қаюҳлъяк юлӷутыҳлъягыт каңлъюлюку нагатңўа̄ӷутңукаңит апыҳтӯсӣ.

Currently Selected:

От Луки 19: ess2

Highlight

Copy