От Луки 15

Иисусым Уңипаӷа̄ткыхкаңа Ифлъякақ Пынъӣқ

1Ата̄сими аӷныӷми, налогмың қырңуҳтистылӷутытлъю, иляңилъю сыӷлыҳқыстылӷутыт нагася̄ткат Иисусымун. 2Фарисеитлъю, апыҳтуӷикаюгытлъю Лӣлиҳтӯсяның қикыҳқукат: «Ӯм югым тугуклъиӷақӣ сыӷлыҳқыстыт, ныӷылгусиӷақӣлъю».

3Ынка̄м Иисусым уңипаӷа̄ткӣ: 4«Налиҳси ю̄к талъиматмың пынъӣлгуяқуми, ата̄сиқ ифлъяяқумигу, сянаяҳта? Унилъюки ю̄к стамат стаманың иңлюлык сӣпнықлъюки пынъӣни ныӷумалюки выга̄ҳтуқами, иваӷьяҳтуӷнаяӷа̄ ифлъякақ пынъӣни кынляңа на̄лъкылъыӷминун. 5На̄лъкысямигу, қуяпихлъюни уямика̄. 6Лъмыхнун ка̄лъюни тахсиқлъиқӣ илякумта̄ни, увиқлъинилъю пикӣ: “Қуялгусиқаҳтыңъа, қаюҳлъяк на̄лъкақа пынъӣқа ифлъяка̄ялӷӣ!” 7Уңипа̄тамси, таўатыҳпигақ қилягми қуякатаӷаҳлъықа̄т ата̄сиқ сыӷлыҳқыста авутыҳқылъюни сыӷлыҳқынъанилӷӣ, пакихулъюку та̄куның ю̄к стамат стаманың иңлюлыӷьягның пинилӷӣның югның авутыҳқысяҳқа̄нӷилңуӷның».

Иисусым Уңипаӷа̄ткыхкаңа Ифлъякақ Монета

8Та̄хкын Иисусым иляңаның уңипаӷа̄ткӣ: «Аӷнақ қуляӷьяк серебромың монеталгуяқуми, ата̄сиқ ифлъяяқумигу, сянаяҳта? Кынылӷутак кумаҳлъюкык мыңтыӷани алъыгнаяӷа̄ иваӷиңўа̄ӷумаӷми кынляңа на̄лъкылъыӷминун. 9На̄лъкысямигу тахсиқлъиқӣ илякумта̄ни, увиқлъинилъю пикӣ: “Қуялгусиқаҳтыңъа, қаюҳлъяк на̄лъкақа монетака ифлъякақсяқыхка!” 10Уңипа̄тамси, таўатыҳпигақ Кияӷныӷым яқулги қуя̄қут ата̄сиқ сыӷлыҳқыста авутыҳқылъюни сыӷлыҳқынъанилӷӣ».

Иисусым Уңипаӷа̄ткыхкаңа Иӷныӷым Сякусӣқилъҳа Уңувалъыӷминың

11Та̄хкын Иисусым иляңаның уңипаӷа̄ткӣ: «Та̄ўаңуқ ю̄к ма̄лӷугыгның иӷнылык. 12Уюқлъӣм иӷныӷан пика̄ атани: “Ата̄й, сяӷьяхпының тӯниңа ныңиҳқамның”. Ынка̄м атаңан тӯныхкакык иӷныӷыгни ныңиҳқахкының. 13Мулюнӷитуқ, уюқлъӣм иӷныӷан акикуӷлюки ныңини аӷуляқыхкақ уяванлыңуӷмун нунамун. Тама̄ни манини сякусӣқлъюку, 14сяқшахӣӷуткақ. Ынрақлъю тама̄на нуна нықаңисяхлъягуҳтыкақ ынка̄м нӯҳтыҳлъягуҳтыкақ. 15Ынка̄м қыпҳаӷьяқақ югмун тама̄нлыңуӷмун; та̄хкын югым қыпҳақалитка̄ ныҳқистыңулюку куругаӷның. 16Игатам аңталяңаның куруга̄т ныҳқуткӣтның ныӷьяӷңа̄ӷми лъӣқақ, китумлъю алңунак ныӷьяҳқалисигалъкаңа. 17Қынўатлъю лӣся̄ӷақақ: “Паныӷниқумалюңа ма̄ни, қамахлъютың атама акилыҳтуӷлютың қыпҳаҳтыңи ныӷақут кыпсю̄лъютың, масисю сӣптӣгақут! 18Агляӷнақуңа атамнун хўатын пиналюку, Ата̄й, сыӷлыҳқума̄ңа Кияӷныӷмунлъю, лъпынунлъю. 19Иӷныӷулюңаңам пияҳқа̄наниӷңа. Акилыҳтуқаюгыстун қыпҳаҳтыхпытун лъӣҳтыстиңа”. 20Ынка̄м ныкывлюни атаминун агляқақ. Иўырңа сялин уяванлъюку атаңан ысҳақа̄. Наңлъыгьягутыҳлъяглюку ақфа̄снақ пайыӷлюку қытқаҳлъюку на̄қа̄. 21Иӷныӷан пика̄: “Ата̄й, сыӷлыҳқума̄ңа Кияӷныӷмунлъю, лъпынунлъю. Иӷныӷулюңаңам пияҳқа̄наниӷңа”. 22Иўырңа атаңан пикӣ қыпҳаҳтыни: “Ӯкук, пинилъыҳпига̄к аткуя̄ӷык тагилъюкык а̄тыстыкык, аляңқуӷӣтиҳтыхулъю, камыхтыхулъю. 23Ынка̄м қуўинталъҳаның каум туқутӣӷутыху. Нықынӷаҳқыҳлъягнақукут қуяҳлъягым аңталяңаның, 24қаюҳлъяк иӷнықа уна туқука̄ялӷӣ, уңува̄ма̄қ; ифлъяка̄ялӷӣ на̄лъкума̄қ”. Ынка̄м нықынӷаҳқыҳлъякат.

25Таўани пилъыӷми, нуйыклъиқ иӷныӷа пӣтысиӷаӷвигмылңуқ. Мыңтыӷамун ка̄сяҳтуӷлюни нагақуқӣ айңанаңалӷӣтлъю, тукалыгалӷӣтлъю. 26Ата̄сиқ қыпҳагата туқлъюӷлюку а̄птыка̄ ся̄қутаңи. 27Қыпҳаҳтым пика̄: “Уюӷа̄н ка̄сима̄қ. Атахпык туқутӣӷутысима̄ қуўинталъҳаның каум қаюҳлъяк ка̄лъҳӣ яйўа̄сың пиниӷлюни”. 28Аныңа̄ сякшиткақ, итыӷьюгумаңиткақлъю. Атаңан а̄нвиклъюку ӣтҳысқуӷа̄қа̄. 29Иўырңа атани пика̄: “Аюмиқулъылӷутни қыпҳа̄тыҳлъягамкын, қа̄ткынӷисигатанка қылӷуткаҳтын. Таўалъӣма козлёнока̄ӷаӷмың туқутӣӷусигатаҳпыңа илякумта̄қулъҳӣни нықынӷаҳқысқылъюта. 30Иўырңа ӯм иӷныҳпык сякусӣқыхкақа̄ манин аӷнанун югусимыхның акикикаюгның. Ынка̄м утыӷниӷьян хўа̄ лъпык туқутӣӷутыстан қуўинталъҳаның каум!” 31Атаңан пика̄: “Иӷнымни, қӯнпың лъпык хўаңкунъитақутын. Қамахлъюки сяӷьянка лъпык пикатын. 32Иўырңа қуялюта нықынӷаҳқыңъӯкут, қаюҳлъяк уна уюӷа̄н туқука̄ялӷӣ, уңува̄ма̄қ; ифлъяка̄ялӷӣ на̄лъкума̄қ”».

Currently Selected:

От Луки 15: ess2

Highlight

Copy