От Луки 14

Иисусым На̄лъҳускаңа Қинуюлӷӣ Ю̄к

1Ата̄сими Субботами, Иисус ныӷьяҳтуӷьян ата̄симун иглыӷутистыңитнун Фарисеит, таўанлыңӯт югыт рӣрңиңўа̄қа̄т. 2Иисусым мануңанитыфтуқ ю̄к, иӷукыклъю, талъикыклъю пӯвңалӷӣк. 3Иисусым алыҳқуқӣ апыҳтуӷикаюгыт Лӣлиҳтӯсяның, Фарисеитлъю, а̄птыкӣ: «Лӣлиҳтӯсямта̄ на̄лъҳутисқинкӯт Субботами, налиӷмың писнаниҳтинкӯт?» 4Иўырңа ныпӣӷўа̄ӷуткат. Та̄хкын ся̄флъюку ю̄к на̄лъҳулъюку, агляҳтыстыка̄. 5Та̄хкын а̄птыкӣ: «Налиҳси иӷнылгукуми, налиӷмың волылгукуми, Субботами мыҳтаӷвигмун ифкақан, таўаниңинақ сяюгнаяҳтагӯ Субботаңуӷңа̄н?» 6Та̄ўа кӣмсиҳпагниңитка̄т.

Иисусым Апыҳтӯсяқыхкаңа Қусывыгңалъық

7Иисусым ысҳақӣ иляңи ақылъқат ақумӯлъҳӣт а̄ңўа̄ӷыт ақумутӣтхун. Ынка̄м уңипаӷа̄ткӣ: 8«Тахсиқлъилъыңыхкувык ныңуҳнақылӷӣк нықынӷаҳқылъҳыхкынун, ақумыфқа̄вык пилӷа̄тын а̄ңўа̄ӷыт ақумутӣтхун, кина тахсиқлъиқа̄наюкан а̄ңўа̄ӷатаӷалӷӣ лъпынун. 9Тахсиқлъиӷикам лъпык тагилюни хўатын пилъықа̄тын: “Ақумыстигу та̄на ақумвихпыгун”. Ынңа̄талъ таўани кайңуюхлъықутын нӯхтыкувык укаванлыңӯм ақумутахкынун. 10Иўырңа тахсиқлъиқаңатын, ақумьяҳтуҳа̄тын ақумутам укавантылъҳанун. Тахсиқлъиҳтыхпык тагилюни пилъықа̄тын: “Илякумта̄мни, ақумьяҳта̄ а̄ңўа̄ӷуҳтыкат ақумутӣтнун”. Ынңа̄талъ қӯлвалъыңылъықутын ақылъқалӷутыт ысҳа̄манӷитни. 11Тамаҳаӷмың лъңитның а̄ңўа̄ӷуҳтыкат қусывыхтылъыңьяҳқа̄гут, иўырңа тамаҳаӷмың лъңитның қусывыхлъыҳӣт, та̄ўа а̄ңўа̄ӷуҳтылъыңьяҳқа̄гут».

12Та̄хкын Иисусым тахсиқлъиҳтыни пика̄: «Ныӷьяҳтӣсқикувык тахсиқлъифқӣта илякумта̄ҳтын, аңлыгутытын, илякўа̄ҳтын, налиӷмың аклъюңилңӯт увилиӷныҳтын, қаюҳлъяк утыӷмун лъңиталъю лъмыхнун ныӷьяҳтӣсқынъаюкаңатын. Таўатын пикуфки акиткалъҳӯҳлъықа̄тын. 13Иўырңа нықынӷаҳқыстинақңукувык, тахсиқлъиӷнакытын аклъюмалӷӣт, югусӣт налиӷныҳлъюгмылңӯт, иӷулъюгмылңӯт, ая̄катлъю. 14Ынка̄м қуястылъыңылъықутын қаюҳлъяк тама̄кут акитыпагниңита̄тын. Кияӷныӷым акилыҳтуҳлъықа̄тын уңуваҳтыкумики қа̄ткутңалӷӣт югыт».

Иисусым Уңипаӷа̄ткыхкаңа Нықынӷаҳқылъыҳлъяк

15Қаюӷвигыгни ата̄сим ақумгалӷӣм нагалъюку Иисус пика̄: «Қуястыка̄гут ныӷьяҳтуӷьяҳқат нықынӷаҳқылъҳанун Атаныҳпагулъҳан Кияӷныӷым!»

16Иўырңа Иисусым пика̄: «Ю̄к нықынӷаҳқинақумалӷӣ, угляқлъю тахсиқлъиқа̄. 17Нықыт апыӷӣӷьята, қыпҳаҳтыни каяхтыка̄ хўатын пияҳтӣсқылъюки тахсиқлъиқани: “Тагиляӷа̄тык, ныӷьяқлъыхӣна̄ҳтукут!” 18Иўырңа қамахлъютың тахсиқлъиқӣ апҳусӣӷуткат. Сивулӣм қыпҳаҳта пика̄: “Пӣтысиӷаӷвиңума̄ңа, ысҳаӷьяҳтупыста̄ӷнақңўа̄қа. Умӣлгын уңипа̄нъакын, қивӷукақаңуқ ныӷьяҳтуҳпагниңилңӯңа!” 19Тӯңлиҳа̄н пика̄: “Талъимат иңлюкулъҳӣт волыт тукфӣма̄нка, нанӷӣқуяҳтуӷнақақанка қыпҳалъыхтулңит. Умӣлгын уңипа̄таҳнакын, қивӷукақаңуқ ныӷьяҳтуҳпагниңилңӯңа”. 20Ынка̄м иляңан пика̄: “Нулиҳтунҳа̄гуңа, ынка̄м ныӷьяҳтуҳпагниңитуңа”. 21Қыпҳаҳтым тагилюни умӣлыгминун а̄пқӣ сямың пилъҳит. Та̄хкын умӣлгым сякшитыҳлъягумаӷми қыпҳаҳтыни пика̄: “А̄нқаҳлъютын ныҳлъягым тӯмңитның тагиқӯтики аклъюмалӷӣт, югусӣт налиӷныҳлъюгмылңӯт, ая̄кат, иӷулъюгмылңӯт”. 22Мулюхпынани қыпҳаҳтым пика̄: “Югунӣқ, қылылъыҳпытун апыӷӣҳтуқ, иўырңа паниның ныкаҳқаҳлъягӯқ”. 23Умӣлгым пика̄: “А̄нлютың ныҳлъягмың тумынилңӯт югыт тагиляӷа̄тысқики ынка̄м мыңтыӷақа ыслъықаӷаҳлъи. 24Уңипа̄тамси, тама̄кут тахсиқлъиқақсяқынка ныӷна̄нӷитут нықынӷаҳқусимның”».

Малихся̄ҳтыңулъық

25Юлӷутыҳлъягыт малихлъыӷа̄тка̄т Иисус. Қӣвлюки пикӣ: 26«Кина алңунак тагилӷӣ хўаңамнун малихся̄ҳтыкна̄нӷитақа ўыткуқун пиниқатаӷақумиңа пакихулъюңа атаминың, на̄миның, нулӣӷминың, авақутаминың, аңлыгутминың, наягминың, лъңаның лъю катам. 27Китум алңунак лъми катам қақӯрани уяминӷилъкумигулъю, малихтыкумиңалъю, малихся̄ҳтыкыпагниңитақа». 28Та̄хкын Иисусым пикӣ: «Налиҳси башняңлъяӷьюгукуми, сивуклъюни ақумлюни акитуляңа нарақылъықа̄ на̄маяҳқа̄наюкан манини. 29Нарақынӷилъкумигу манини, тунымаңлъяӷлюку башня пыхлъықа̄. Ынка̄м югыт ысҳаӷлюку ныңляӷьюхся̄ткылъықа̄т. 30Пилъықут: “Ӯм югым пӣнлиӷлюку ныкыфтыкани та̄қыпагниңита̄”». 31Та̄хкын Иисусым а̄птыкӣ: «Сянаяҳтатуқ умӣлык иляңан умӣлгым сюӷугнақңукаңатни? Сивуклъюни ақумаҳлъюни акузимҳуткынъаяӷа̄ иляминун кая̄лъқӣяҳқа̄наюками 10,000мың пилъюўаҳтылиӷлюни, пилъюўаӷьяӷьяқумигу умӣлык 20,000мың пилъюўаҳтылык. 32Иўырңа кая̄лъқӣпагниңилъкуми, та̄хкын умӣлык сялин уявантыҳлъяглюку каяхлъықӣ акузистыкаҳқани лъңанун. Хўатын пияҳтӣсқылъықа̄: “Сясқысюхсикут ныкыхмытунъалюта?”» 33Иисусым нагныӷуткӣ: «Ынка̄м уна сюмыхтаӷа̄ткитыху, китум алңунак пыхсюнӷилъкумики қамахлъюки лъми пини, малихся̄ҳтыкыпагниңитақа».

Сясӣнӷилңуқ Таӷьюқ

34Иисусым та̄қниқӣ: «Таӷьюқ пиниҳтуқ, иўырңа таӷьюӷниңӣскуми алъямыңлъю таӷьюӷниӷунъа̄нӷитуқ. 35Та̄ўа пиниӷна̄нӷитуқ сюнамун, налиӷмың пӣнъа̄сӣлюни пӣтысиӷаӷвигмун, ынка̄м югыт ыхлъықа̄т. Нагатык, сигутылгӯси!»

Currently Selected:

От Луки 14: ess2

Highlight

Copy