От Иоанна 18

Иисус Тугукаңат

1Иисус юӷаныӷмың та̄қлъюни, малихся̄ҳтыкулъҳӣт аӷвиқат сюқлъюнӷыгныкун а̄тқылӷӣк Кедронымың. Та̄ўаңуқ иңлюхкыни маслиныт уқфигыт; таўавык агляқат. 2Иисусым увыҳпагутистыңан, Иудам лӣсимакыхкаңа та̄на такука̄т, қаюҳлъяк Иисусылъю малихся̄ҳтыкулъҳӣт таўавык пикатуқат. 3Ынка̄м Иуда первосвященнигынунлъю, Фарисеинунлъю ақфаткақ кылыңакистыныңлъю, иляңитныңлъю Римым пилъюўаҳтыңитның. Та̄хкын маӷьяҳқуқӣ уқфихтуқамун. Та̄кут кылъқыхкат гӯтутмың, иляңи унаҳсимың кумаңалӷӣмың, иляңи кынылӷутамың. 4Иисусым лӣсимакыхкаңа қамахлъюку сялъыҳқани, ынка̄м такулюки а̄птыкӣ: «Кина иваӷақыстыху?» 5Кӣмсиқа̄т: «Иисус Назаретыӷмӣ». Иисусым пикӣ: «Хўаңа Иисусыңӯңа». (Иудалъю увыҳпагутиста ныкывӷалӷӣ пилъюўаҳтыни.) 6Иисусым таўатын пийистың: «Хўаңа Иисусыңӯңа», та̄кут югыт утыӷмӣқаӷлютың улъыӷа̄ткат. 7Иисусым а̄плъя̄тақӣ: «Кина иваӷақыстыху?» Кӣмсиқа̄т: «Иисус Назаретыӷмӣ».

8Иисусым пикӣ: «Уңипа̄тамси, хўаңа Иисусыңӯңа. Хўаңаңукан ивақаҳси укут югыт аӷуляқыстыки». 9Иисус таўатын пика̄лӷӣ апыӷӣӷысқылъюку хўатын пилъыни: «Ата̄й, тагивақаҳпының талўа ата̄сиқ ю̄к ифлъямаңитақа».

10Та̄хкын Симон Петырым сявихпани нусюгаҳлъюку илыфкаӷаҳтыка̄ Малхым аӷынқигнық сигутңа. (Малха, первосвященнигым қыпҳаҳтыля̄қыхкаңа.) 11Иисусым пика̄ Петр: «Сявихпагын канаҳтигу. Қаю̄сиқ мыӷынӷилъякӯн Атам тагивақа̄?»

Иисус Агля̄скаңат Аннамун

12Та̄хкын пилъюўаҳтыт, умӣлгатлъю, кылыңакистытлъю Иудеит такулюку Иисус, тугулюку асиҳқыхка̄т. 13Ынка̄м сивуклъюку агля̄тка̄т Аннамун, сякиңанун Каиафам. (Таўани аюмиқулъыӷми Каиафа первосвященнигукалӷӣ.) 14Каиафам пикақыхкаңи Иудеит иглыӷутистыт, пиниӷатаӷаҳлъықнилюку ата̄сиқ ю̄к туқумаяқан югнун.

Петырым Налъюнқыхкаңа Иисус

15Симон Петырымлъю, иляңанлъю малихся̄ҳтым киңуңаның малихтыка̄к Иисус. Первосвященнигым лӣсимакыхкаңа а̄лъҳа малихся̄ҳта. Ынка̄м лыган та̄м малихся̄ҳтым малихтыка̄ Иисус, первосвященнигым мыңтыӷа̄н увитаңанун. 16Петр ныкывӷамалюку амигым туңаңани, а̄лъҳан малихся̄ҳтым, первосвященнигым лӣсимакыхка̄н, а̄нлюни алыҳқуӷлюку аӷнаӷақ амигнӣҳта итыҳтыстыка̄ Петр. 17Аӷнаӷа̄м амигнӣҳтым а̄птыка̄ Петр: «Лъпыклъю̄ та̄м югым малихся̄ҳтыкатын?» Петырым кӣмсиқа̄: «Нака̄! Малихся̄ҳтыкынӷита̄ңа!»

18Қыпҳаҳтытлъю, кылыңакистытлъю кулымың кумаҳтика̄лӷӣт уӷухсиӷналютың қаюҳлъяк ақлъяӷалңуқ. Петырлъю таўани уӷухсиқақ.

Первосвященнигым А̄пқуӷўа̄қаңа Иисус

19Қама илюңани первосвященнигым а̄пқуӷўа̄қа̄ Иисус, малихся̄ҳтыңаныңлъю, апыҳтуӷилъҳаныңлъю. 20Иисусым кӣмсиқа̄: «Юхтуқами акузӣқуңа. Қӯнпың апыҳтуӷӣқуңа қамахлъютың Иудеит қырңуӷутфигитни, синагогани, Храмымилъю. Сяңўа̄ алңунак аксяқлъюку акузиткигатақа. 21Ынка̄м сяңама а̄пқуӷўа̄ҳсиңа? А̄птики югыт нагатка̄т апыҳтуӷилъымның. Лӣсимака̄т сямың пиматка». 22Иисус таўатын пиян кылыңакистым туңаңанилңӯм қасяҳлъюку а̄птыка̄: «Сяңан таўатын кӣмсиҳсигу первосвященнига?» 23Иисусым кӣмсиқа̄: «Сямың сыӷлытун акузимакума, а̄пҳу сыӷлытун акузилъқа. Иўырңа ылъқуӷусимакума сяңама қасяҳсиңа?»

24Та̄хкын Аннам, агля̄тыстыка̄ Иисус асиҳқыңъа̄н Каиафамун, первосвященнигмун.

Петырым Налъюнқылъя̄тақа̄ Иисус

25Симон Петр ныкывӷаӷми уӷухсӣмалюку а̄птыка̄т: «Лъпыклъю̄ малихся̄ҳтыкатын та̄м югым?» Петр мысиӷақақ: «Нака̄! Малихся̄ҳтыкынӷита̄ңа!» 26Ата̄сиқ қыпҳаҳтыңа первосвященнигым таўанлыңуқ, илякўа̄ӷа югым, Петырым сигутңиӷаҳтыка̄н. Қыпҳаҳтым а̄птыка̄: «Ысҳаҳсюгнисикын лъңанилъютын маслинытми уқфихтуқами?» 27Алъямың Петр мысиӷаӷля̄тақақ. Ага таўаниңинақ петух қалӷиқақ.

Иисус Агля̄скаңат Пилатымун

28Та̄хкын уна̄ңупихлъюку Иудеит иглыӷутистыңита агля̄тка̄т Иисус Каиафам мыңтыӷа̄ның, Римым умӣлыхпаган нанқихтивикыңанун. Та̄кут иглыӷутистыт ӣтҳумаңилңӯт нанқихтивигмун, қаюҳлъяк укмаңиҳсяӷўа̄қа̄лӷӣт Моисейем Лӣлиҳтӯся̄н писқылъҳатун ныӷналютың Пасхами. 29Ынка̄м Пилатым а̄нвиклъюки а̄птыкӣ: «Сямың анахусимафта уна ю̄к?» 30Кӣмсиқа̄т: «Уна ю̄к тагинъаянӷитаҳпут лъпынун анахусимаңисяқан». 31Пилатым пикӣ: «Агля̄лъюку лъпысиның нанқихтыху Лӣлиҳтӯсяҳпыси писқылъҳатун».

Пика̄т: «Римым лӣлиҳтӯсӣтни хўаңкута Иудеяни аӷью̄ӷисиқсяҳқақынӷитаҳпут туқутилъық». 32(Таўатын акузилъҳита апыӷӣқа̄т Иисусым апылъҳа натын туқулъыҳқаминың.) 33Та̄хкын Пилат итынқихлъюни нанқихтивигмун, тагитыслъюку Иисус а̄птыка̄: «Лъпа̄к умӣлъкатын Иудеит?» 34Иисусым кӣмсиқа̄: «Лъпының а̄псиңа таўатын? Налиӷмың китум уңипа̄ткақа̄тын хўаңамның?» 35Пилатым кӣмсиқа̄: «Сюмыҳпыни Иудейеңузиңа̄? Лъпык катам юхпык, первосвященнигытлъю тагиткақа̄тын хўаңамнун. Сямың анахусимазин?» 36Иисусым пика̄: «Атаныҳпагулъқа ӯм нунам пикынӷита̄. Атаныҳпагулъқа нунамың пиңуяқан, қыпҳаҳтыма пилъюўа̄нъаяӷа̄тңа Иудеянун тӯныфқа̄ма писқылъюңа. Иўырңа Атаныҳпагулъқа нунамың пиңунӷитуқ». 37Пилатым пика̄: «Та̄ўа умӣлгуфтутын!» Иисусым пика̄: «Лъпык умӣлгунӣҳпыңа. Тагика̄гуңа нунамун уна апалъюқлъюку: апыӷналюку ипапиҳқылъық югнун; та̄на апалъюқлъюку алъхықа̄гуңа. Қамахлъюни пиниқиңалӷӣ ипапилъыӷмың нагаткаюгӯқ хўаңамнун». 38Пилатым а̄птыка̄: «Сяңа̄ўа ипапиҳқылъық?»

Таўатын пилюни Иудеит а̄нвиклъя̄тақӣ. Пикӣ: «Уна ю̄к на̄лъкыфикынӷитақа сямың анахусиматаңа аӷью̄ӷусиҳқамың. 39Иўырңа лъпыси наңаӷнықыхкыси, Пасхами хўаңамнун а̄ныстысюгақыхкыси ата̄сиқ анусимиңлъяӷақ. Итымутысюгыстыхӯ уна умӣлга Иудеит?» 40Акилӷӯкат: «Нака̄, лъңа пифқа̄н, Варавва а̄ныстигу!» (Варавва ўаяӷнӣҳтыңулӷӣ.)

Currently Selected:

От Иоанна 18: ess2

Highlight

Copy