От Иоанна 17

Иисусым Юӷа̄ткыхкаңи Малихся̄ҳтыни

1Иисус та̄қсями акузиныӷмың сивухлъюни қилягмун юӷақақ: «Ата̄й, аӷнық ка̄туқ. Қӯлваҳу Иӷныӷын, қӯлвӣсқылъютын Иӷныҳпынун. 2Иӷнық Атаныңлъяқақан тамаҳа̄нун югнун. Ынка̄м кынлыңилңуқ уңувалъық тӯнңўа̄ тамаҳӣтнун тӯныхкаҳпынун лъңанун. 3Югыт кынлыңилңуӷмың уңувалъыңақут лӣтылъыӷмыхтыхун лъпык, та̄наңинаҳақ Кияӷныҳпигақ, лӣтылъыӷмыхтыхунлъю Иисус Христос лъпык каяхтыкан. 4Қӯлва̄ма̄мкын нунами хўани апыӷӣлъымкун қыпҳақақ қылӷуткан хўаңамнун писқылъюку. 5Ынка̄ңам Ата̄й, манухпынисималюңа қӯлваӷңа қӯлвалъыӷмың хўаңа пиксяқымның лъпынилъюңа, сивуңани нунам улималъҳан.

6Лӣтыстыкақақа натытулын югнун тагивақаҳпынун нунамың хўакын. Лъпык пиксяқытын тагивақаҳтын хўаңамнун. Қа̄ткыхкақӣт акузитытын. 7Қынўатлъю лӣтӣт сяңўа̄т қамахлъюки тагивақаҳтын лъпынун пиңутаңи, 8қаюҳлъяк апыҳтӯсяқыхкаҳтын хўаңамнун апыҳтӯсяқыхкақанка лъңитнун. Тугуклъӣмӣт ынка̄м лӣта̄т ипапыста̄қ тагика̄тка лъпынун. Ухпықа̄тлъю лъпынун каяхтыка̄тка.

9Юӷа̄ткыңъўа̄нка лъңит. Юӷа̄ткыңъунӷитанка югыт нунам пиңи. Юӷа̄ткыңъўа̄нка тама̄кут тагивақаҳтын қаюҳлъяк лъпык пикыхкытын. 10Қамахлъюки хўаңа пинка лъпык пикатын; қамахлъюки лъпык пикатын хўаңа пиканка. Лъңитхун а̄ңылъыҳлъяка кылгулъюни аюқуқ. 11Агляӷьяҳтуңыстаҳтуңа лъпынун, нунамынъаниӷьяҳтуңыстаҳтуңа, иўырңа лъңит нунамылъықут. Аглыӷналӷӣ Ата, афлъыңакики аҳтуӷьяҳқа̄нӷилъҳакун атыҳпык, тагивақаҳтын хўаңамнун, ата̄сӣсқылъюки ата̄сӣлъымтыхун. 12Лъңитнилъюңа афлъыңакыхкақанка аҳтуӷьяҳқа̄нӷилъҳакун атыҳпык, тагивақаҳтын хўаңамнун. Кылыңакыхкақанка, ынка̄м талўа ата̄сиқ ифлъялъҳитуқ, иўырңақун ата̄сиқ ю̄к ифлъяяҳқақ, Акузитыт Игақыхкат апыӷӣӷысқылъюки. 13Хўа̄ ма̄тын лъпынун агляӷнақуңа. Иўырңа таўатын юӷаҳтуңа паниның нунамылъюңа, қуялъқа илюңитнитысқылъюку хўаңа пима. 14А̄пқақанка Акузитытын лъңитнун, ынка̄м нунам юган угумикӣ қаюҳлъяк нунам пикынӷилъкаңи хўаңамтун. 15Юӷа̄ткыңъунӷитанка лъпынун иқитысқылъюки нунамың. Иўырңа юӷа̄ткыңъўа̄нка лъпынун афлъыңакаҳтысқылъюки Туӷныӷаӷмың. 16Нунам пикынӷитӣ катам хўаңа пикынӷитылъҳатун. 17А̄фтики лъпынун ипапилъыҳқун; акузитын ипапилъҳӯқ. 18Каяхтыкақанка нунамун, каяхтылъыҳпытун хўаңа. 19Лъңит апалъюқлъюки хўаңамның а̄фтыка̄гуңа лъпынун, лъңитлъю а̄фтысқылъюки акузитыхпыгун ипапилъыҳқун.

20Юӷа̄ткыңъўа̄нка та̄кут югыт, юӷа̄ткыңъўа̄нка тама̄кутлъю югыт ухпықияҳқат хўаңамның уңипақилъҳитхун малихся̄ҳтыма. 21Юӷаҳтуңа қамахлъюки ата̄сӣсқылъюки. Ата̄й, йықай илюмтыгнитыстики катам таўатын лъпык илюмнитылъыҳпытун, хўаңа лъпык илюхпынитылъымтун. Илюмтыгнитыстики нунам юганун ухпықысқылъюку лъпынун каяхсиматка. 22Қӯлвақақанка катам таўатын қӯлвалъыҳпытун хўаңа, лъңит ата̄сӣсқылъюки катам таўатын хўаңкутуң ата̄сӣлъымтыхун. 23Хўаңа илюңитнитуңа, лъпык илюмнитутын лъңит ата̄сӣҳтыңъўа̄ӷысқылъюки. Ынка̄м нунам юган лӣлъықа̄т лъпынун каяхсиматка. Лӣлъықа̄тлъю пиниқылъҳын тама̄кунун ухпықилӷӣнун хўаңамның, хўаңамнун пиниқылъыҳпытун аюқылӷӣ.

24Ата̄й, укут югыт тагивақаҳтын хўаңамнитысюўақанка, лъңитнун ысҳӣсқылъюку ниӷуҳқылъқа. Пиниқутыхпының та̄на ниӷуҳқылъық тагивақақан сивуңани нунаңлъялъҳым. 25Ка̄й ылъқуӷутңалӷӣ Ата, нунам юган налъюка̄тын; хўаңа лӣсимакамкын. Та̄кутлъю тагивақаҳпык лӣсимака̄т лъпынун каяхсиматка. 26Лӣтыстыкақанка натытулыхпының. Лӣтысимаңинаӷнақамкын пиниқылъҳын хўаңамнун илюңитнитысқылъюку, хўаңалъю илюңитнинъалюңа».

Currently Selected:

От Иоанна 17: ess2

Highlight

Copy