Luca 18
18
P'ẽtãpa itu bɨwẽa idi bada
1Jesupa nepɨrɨdepa jarateasima Tachi Ak'õrea sẽnawẽa ɨt'aa chiididai p'anɨ. 2Nãɨya jarasima: «P'uurude nepɨra ak'ɨparí basima. Ichia Tachi Ak'õre, ẽpẽerã paara wap'eak'a pasima. 3Ara mãɨ p'uurude p'ẽtã́ basima. Mãɨ abaɨ ome nepɨra pará basima. Mãɨpuru ewaricha wãpachima chi nepɨra ak'ɨparipa k'aripamẽrá. 4-5Maamina wãrucha chi nepɨra ak'ɨparipa ichia jararut'a ũrii k'ɨ̃riak'a pasima. Maamina minachia itu bɨwẽa bɨẽra ara ichi tuaba jarasima: “Mɨa Tachi Ak'õre, ẽpẽerã paara wap'eak'ama. Maamina nãɨ wẽra paritua che bɨẽra mɨ sẽpii naena ichia jara bɨ ooipɨ”».
6Maapae Tachi Chipari Jesupa jarasima: «K'ɨ̃risiat'ɨ chi nepɨra ak'ɨparí sõpiawẽa bɨpa jarada. 7Tachi Ak'õrepa jɨrɨ atadaɨrãpa ãst'á mãɨnepa teamasi chichupuria idi p'anɨne ¿ichia jĩp'a oo bɨdepa k'aripaiwẽk'ãra? ¿Tãaraaik'ãra p'anooi k'orea? 8Mɨa jararuma: piarã tãaraawẽa bɨde Tachi Ak'õrepa k'aripaipɨ. Maamina mɨ, chi Ẽpẽra Warra cherude ¿nãɨ ĩjũane wapida mɨ pedea ĩjãa p'anɨ unune cheik'ãra?»
P'ariseo mãɨnepa Romanepema pae erreara jɨrɨp'eparí
9Waapẽarãpa ara ãchit'a jĩp'a be k'ɨ̃risia p'anasidama. Mãɨpuru ununaemaa uru p'anapachidama. Jesupa ãchiá nepɨrɨdepa nãɨya jarasima:
10«Ẽpẽra ume Tachi Ak'õre te minachia bɨdea ɨt'aa chiidide wãsidama. Aba p'ariseo pasima. Chi abaɨ Romanepema pae erreara jɨrɨp'eparí pasima. 11P'ariseo bai nɨbɨpa ara ichia nãɨya ɨt'aa chiidisima: “Tachi Ak'õre, mɨ sõpia bɨade pɨá aipɨ mɨ waapẽarã jĩra bak'a pẽra. Ãchi nechɨapatama, nemietá oopatama, wẽra awaraɨ ome k'ãipatama. Ichiaba mɨ jãɨ Romanepema pae erreara jɨrɨp'eparí jĩra bɨwẽma. 12Tomiocha bari k'ak'o ume Tachi Ak'õrene k'ɨ̃risiadayá nek'odak'apɨ́ ewari ooparima mãɨnepa ne diez jitarudepema mɨa pɨá aba teaparima”.
13»Mãɨne Romanepema pae erreara jɨrɨp'eparí t'ɨmɨwẽa basima. Maamina pajãnea ak'ɨé pasima. Mãɨpari sõp'uadepa ichi p'echumá sĩk'ari jarasima: “Tachi Ak'õre, mɨ k'ĩra chupuriase. Mɨa minachia nemietá ooparima”.
14»Mɨa mãrá jararuma: mãɨ p'ariseo k'aepẽra mãɨ ẽpẽra tedea wãside Tachi Ak'õre k'ĩrari jĩp'a basima. Chi atepe bai k'ɨ̃ria bɨ, Tachi Ak'õrepa mãɨ wariwẽa bɨipɨ. Abaɨ pida ara ichi ãpia bɨ jĩra k'ɨ̃risiasira Tachi Ak'õrepa mãɨ chi atepe bɨ jĩra bɨipɨ».
Jesupa warrarã́ pia jarada
Mateo 19:13-15; Marco 10:13-16
15Mãɨne waapẽarãpa ãchi warra chak'erã Jesumá enemeesidama ichi jua ɨ̃rɨ bɨk'ari pia jara bɨmẽrá. Jesú ome p'ɨrrɨapataɨrãpa mãɨ unusidaɨde chi warrarã enemeedaadarã ɨtɨasidama. 16Maamina Jesupa warrarã t'ɨ̃k'oak'ari ichi ome p'ɨrrɨapataɨrã́ jarasima:
Warrarã mɨmá itu chepit'ɨ, ãchi chi Tachi Ak'õrepa ichidirã ichi juade ua bɨ jĩra p'anɨ pẽra. 17Mɨa piarã jararuma: warra chak'e ichi ak'õre k'aade wãpari jĩra abaɨ pida Tachi Ak'õre k'aade wãepɨra, mãɨ ẽpẽra Tachi Ak'õre juade baiwẽma ichidirã paara.
Erreara minachia uru bɨ Jesú ome pedeada
Mateo 19:16-30; Marco 10:17-31
18Ẽpẽrarã chi chaarea bɨpa Jesua idisima:
—Pia jarateaparí, Tachi Ak'õre ome ewaricha chok'ae bai k'orea ¿mɨa k'ãre ooi bɨma?
19Jesupa ichiá jarasima:
—¿K'ãre k'orea mɨ pia bɨade a bɨma? Aba pida pia bɨwẽma; abapuru Tachi Ak'õret'u pia bɨpɨ. 20Pɨa k'awa bɨma Tachi Ak'õrepa oopi bɨ pedea. Nãɨya jara bɨma: wẽra awaraɨ ome k'ãirãse, ẽpẽra pearãse, nechɨarãse, sea jararãse chĩara k'orea, pɨ ak'õre pɨ nae ome wap'ea base.#Éxodo 20:12-16.
21Chi ẽpẽrapa p'anoosima:
—K'ũtãenapema mɨa mãɨ ãarea oo bɨma.
22Mãɨ ũrik'ari Jesupa ichiá jarasima:
—Wapida ne aba ooiwẽa bɨma: pɨa ne uru bɨ ãarea netok'ari erreara chi nenea k'edea jedase. Mãɨya nepia pajãne uru baipɨ. Maapae mɨ ome p'ɨrrɨade chese.
23Mãɨ ũriside chi ẽpẽra k'ĩra piawẽa beesima, erreara minachia uru bɨẽra. 24Jesupa ichi mãɨya bɨ unuside nãɨya jarasima:#18:24 Ichi mãɨya bɨ. Griego pedeade chi eda waapẽarã k'art'ade mãɨ newẽma. Ichiaba chi eda waapẽarã k'art'ade bɨ bɨma: Ichi k'ɨ̃risia pará sõp'ua beesima.
—Piarã chi t'aju bɨma ẽpẽra ɨbɨa bɨ Tachi Ak'õre juade bai k'orea, ichidirã paara. 25T'ajuwẽa bɨma camello akuja ãtaude eda wãit'a, mãɨ chi ẽpẽra errearadepa ɨbɨa bɨ Tachi Ak'õre juade bai k'aepẽra.
26Mãɨ ũrinaanapa idisidama:
—Mãɨyara Tachi Ak'õrepa ¿k'ait'a k'aripaima?
27Jesupa p'anoosima:
—Ẽpẽrapa mãɨ p'ue ook'ama maamina Tachi Ak'õremá ne chi t'aju bɨ newẽma.
28Mãɨne Pedropa jarasima:
—Taipa ne ãarea ameesidama pɨ ome wãnai k'orea.
29-30Jesupa ãchiá jarasima:
—Mɨa piarã jararuma: abaɨ sida Tachi Ak'õre juade bai k'orea ichidirã paara, ichi te, ak'õre, nae, ũpẽarã, k'ima, warrarã sida ameeipɨra, ichia ameena k'aepẽra nãɨ ewaride ne minachia atepe uru baipɨ. Ichiaba chi k'aadeapema ewaride Tachi Ak'õre ome ewaricha chok'ae baipɨ.
Jesupa ichi peadai k'orea aba mãicha jarada
Mateo 20:17-19; Marco 10:32-34
31Jesupa doce peedaɨrã awara ateewãk'ari jarasima: «Tachi Ak'õre pari pedeapataɨrãpa mɨ, chi Ẽpẽra Warra k'orea k'art'ade bɨsidama. Tachi Jerusalene cheutade ãchia bɨdada jõma mãɨyaipɨ. 32Waapẽarãpa mɨ judiorãwẽa teadaipɨ. Mɨ oo uru p'ananaipɨ, k'achia pedeadaipɨ mãɨnepa mɨ k'ĩtarra taba idudaipɨ.#Isaía 50:6; 53:5. 33Maapae mɨ soapa p'edak'ari peadaipɨ. Maamina ewari ũpeaɨde mɨ chok'ae p'irabariipɨ».
34Mãɨpuru ichi ome p'ɨrrɨapataɨrãpa mi ãpia pida k'awadaé pasima. Ãchia k'awa k'ɨ̃risiadaé pasi pẽra atua p'anasidama ichia k'ãre jara bɨt'a.
Jesupa tau p'ãrio bɨ jɨpa beepida
Mateo 20:29-34; Marco 10:46-52
35Jesú Jericó p'uuru k'ait'a cherude ẽpẽra tau p'ãrio bɨ o ik'idá erreara idi bɨ suak'abari basima. 36Ichia ẽpẽrarã ooroa cheuta ũriside idisima k'ãre k'orea mãɨya p'anɨ. 37Mãɨne waapẽarãpa jarasidama:
—Jesú Nazaredepema cheru pẽra jãɨya ooroa p'anɨma.
38Mãɨpuru tau p'ãrio bɨpa jĩk'ua biasima:
—¡Jesú, Davidepa cheda, mɨ k'ĩra chupuriase!
39Ichi Jesú naa wãutarãpa ɨtɨasidama k'ĩup'eamẽrá. Maamina jĩk'ua biasima:
—¡Davidepa cheda, mɨ k'ĩra chupuriase!
40Mãɨ ũriside Jesú bai nɨbeesima. Maapae tau p'ãrio bɨ k'ait'a enemeepik'ari idisima:
41—¿K'ãre k'ɨ̃ria bɨma mɨa ooit'a pɨ k'orea?
Chi tau p'ãrio bɨpa p'anoosima:
—Mɨ Chipari, mɨ taupa unu k'ɨ̃ria bɨma.
42Jesupa jarasima:
—Unu beese. Pɨa ĩjãana pẽra jɨpa beesima.
43Ara mãɨne unu beek'ari Jesú k'aade wãsima. Ichia Tachi Ak'õrea minachia pia jara nipasima. Mãɨ ununaanarã pida Tachi Ak'õrea pia jara p'aneesidama.
Currently Selected:
Luca 18: tdc
Highlight
Share
Copy
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.
