Luca 13

Tachi Ak'õremá chedaepɨra piudayade ada

1Mãɨya p'anɨne ẽpẽrarãpa Jesua jarasidama waapẽarã Galileadepemarãpa ãnimara Tachi Ak'õrea paatea p'anɨne Pilatopa ãchi k'enapisit'a. 2Mãɨpuru Jesupa jarasima: «Mãɨ ẽpẽrarã mĩanak'ari piudada pẽra ¿mãrapa k'ɨ̃risia p'anɨk'ãra ãchia atepe nemietá oopachidat'a waapẽarã Galileadepemarãpa nemietá oopataɨ k'aepẽra? 3Mɨa jararuma: Mãɨyawẽma. Maamina mãrapa nemietá oopataɨ itu bɨdak'ari Tachi Ak'õremá chedaepɨra mãra sida piudaipɨ. 4Siloede te ɨt'ɨ teesoa bɨ ẽpẽrarã ɨ̃rɨ baewãside dieciocho piusidama. Mãɨya piudada pẽra ¿mãrapa k'ɨ̃risia p'anɨk'ãra ãchia atepe nemietá oopachidat'a waapẽarã Jerusalene berãpa oopataɨ k'aepẽra? 5Mɨa jararuma: mãɨyawẽma. Maamina mãrapa nemietá oopataɨ itu bɨdak'ari Tachi Ak'õremá chedaepɨra mãra sida piudaipɨ».

Higojõ bɨɨrɨ chauk'a k'orea nepɨrɨda

6Maapae nepɨrɨdepa Jesupa ãchiá nãɨya jarateasima:

«Ẽpẽrapa ichi ne uu ĩjũane higojõ bɨɨrɨ uru basima. Ewariaba mãɨ pak'uru bɨɨrɨ ak'ɨde wãsima, chau nɨbɨ k'awai k'orea, maamina chauwẽa basima. 7Mãɨpuru chi chiparipa ichi ne uu ĩjũa ak'ɨparia nãɨya jarasima: “Ãyo k'ak'o ũpea pa bɨma mãma higojõ jɨrɨde che bɨ, maamina chauk'ama. Mãɨpuru t'ut'aapese. ¿K'ãre k'orea pak'uru chauk'á bɨ uru baima?”

8»Maamina chi ne uu ĩjũa ak'ɨparipa jarasima: “Jarateaparí, ãyo aba itu bɨdai pia bɨma. Mɨa chi k'arra k'ãramak'ari, t'ãa ãk'ak'a teaipɨ. 9Mãɨya chaui k'awadaipɨ. Nãɨ ãyo cherude chausira mãɨ itu bɨipɨ. Chauepɨra mãɨ t'ut'aase”».

Mimianak'apɨ́ ewaride Jesupa wẽra jɨpa beepida

10Mimianak'apɨ́ ewaride Jesupa judiorã ará pedeapataɨ tede jaratea basima. 11Mãma wẽra basima. Mãɨ wẽra dieciocho ãyo pa basima jai mietapa jãjorrea uru basit'a. Mãɨpuru p'ue jĩp'a jĩruk'a pasima. 12Jesupa ichi unuside t'ɨ̃k'ari nãɨya jarasima:

—Wẽra, pɨ jɨpa beese.

13Mãɨya jarak'ari Jesupa ichi jua ɨ̃rɨ bɨsima. Ara mãɨne chi wẽra jĩp'a bai nɨbeek'ari Tachi Ak'õrea pia jarasima. 14Maamina Jesupa mimianak'apɨ́ ewaride jɨpa beepida pẽra judiorã ará pedeapataɨ tedepema minachia k'awa bɨ k'ĩruusima. Mãɨne jõmãɨrã́ nãɨya jarasima:

—Mimianak'apɨ́ ewari awara sei ewari uru p'anɨma mimianai k'orea. Mãɨ ewaridepuru chet'ɨ mãra jɨpa beepidamẽrá. Maamina mimianak'apɨ́ ewaride cherãt'ɨ.

15Mãɨpuru Jesupa jarasima:

—¡Mãrapa jarateapataɨ jĩra oodak'ama! ¿Mimianak'apɨ́ ewaride mãra p'ak'a wa mũra#13:15 Mũra. K'ãp'ũra pedeade bɨ bɨma: burro. ẽranak'ari pania topide ateewãnawẽk'ãra? 16Mãɨyaipɨra ¿pia bɨwẽk'ãra nãɨ wẽra, tiorepa dieciocho ãyo pa bada piawẽa uru badadepema mimianak'apɨ́ ewaride jɨpa beepii?#13:16 Piawẽa uru badadepema. Griego pedeade nãɨya bɨ bɨma: jɨ̃k'arapa jɨ̃ badadepema. Jesupa jarateasima mimianak'apɨ́ ewaride tachia ãnimara nĩu ẽranak'ari topipata jĩra, ara mãɨya mãɨ ewaride Tiore juadepema ẽpẽra ẽrapii pia bɨma. ¿Ichi sida Abrahanepa chedawẽk'ãra?

17Jesupa mãɨ jaraside chi ichi k'orea k'achia pedea p'anana minachia p'erasidama, maamina ichia nepia oo bɨ k'orea chi p'uurudepemarã minachia arapá p'anasidama.

Mostaza net'a tau k'orea nepɨrɨda

Mateo 13:31-32; Marco 4:30-32

18Maapae Jesupa jarasima: «Tachi Ak'õrepa ichidirã ichi juade ua bɨt'a ¿k'ãre jĩra bɨma? 19Mostaza tau jĩra bɨma. Ẽpẽrapa mostaza tau ichi ĩjũane uusima. T'õnok'ari warisima aba pak'uru minachia nɨbeerudea. Mãɨpuru ĩpana chi pak'uru juat'aede te ook'oade chesidama».

P'ana ooropiparí k'orea nepɨrɨda

Mateo 13:33

20Mãɨ awara jarasima: «Tachi Ak'õrepa ichidirã ichi juade ua bɨt'a ¿k'ãre jĩra bɨma? 21P'ana ooropiparí jĩra bɨma. Mãɨ p'ana ooropiparí wẽrapa ãpia atak'ari harina ome p'oerasima. Maapae minachia eapasima ãarea ẽesãarunea».

Eda wãpataɨ p'isua bɨ

Mateo 7:13-14; 7:21-23

22Jerusalenea wãrune Jesupa p'uuru waibɨade, p'uuru chak'ede pida jarateasima. 23Mãɨne abaɨpa ichiá idisima:

—Mɨ Chipari, ¿Tachi Ak'õrepa ẽpẽrarã chok'araawẽa p'anɨ k'aripaik'ãra?

Jesupa p'anoosima:

24—Tausia p'anat'ɨ chi eda wãpataɨ p'isua bɨde eda wãnai k'orea. Piarã eda wãnai k'orea berã chok'ará p'anɨma maamina p'ue ãarea eda wãnaiwẽma. 25Te chiparipa chi eda wãpataɨ jõat'ɨk'ari chi tajata p'anɨpa nãɨya t'ɨ̃ jaradaipɨ ewamẽrá: “Tai chipari, tai chipari, ewase”. Maamina chi te chiparipa p'anooipɨ: “Mɨa mãra unuk'ama mãɨnepa sãmapema atuama”. 26Chi tajata p'anɨpa nãɨya jaradaipɨ: “Tai pɨ ome ará nek'osidama, netosidama mãɨnepa pɨa tai p'uurude jaratea nipaside arí p'anasidama”. 27Mãɨne ichia mãrá jaraipɨ: “Mɨa mãra unuk'ama mãɨnepa sãmapema atua bɨma. K'achia oopataɨrã, ãyá wãt'ɨ”.

28»Mãra chi tajata berã jẽa p'ananaipɨ mãɨnepa p'uapa k'ida k'ɨterrea p'ananaipɨ. Abrahán, Isá, Jacobo mãɨnepa Tachi Ak'õre pari pedeapataɨrã sida Tachi Ak'õrepa ichidirã ichi juade ua bɨde p'ananaipɨ, maamina mãrat'u Tachi Ak'õrepa itu eda wãpiiwẽma. 29Mãɨ ewaride tua awaraɨdepema ɨmata ochiaparidepa, ɨmata baeparidepa, k'ĩrariipa mãɨnepa ãpɨtepa chedaipɨ. Mãɨrã Tachi Ak'õrepa ichidirã ichi juade ua bɨde nek'o suak'abari p'aneenaipɨ. 30Mãɨya chi k'aadea p'anɨ naa p'ananaipɨ mãɨnepa chi naa p'anɨ k'aadea p'ananaipɨ.#13:30 Chi k'aadeapema arude judiorãwẽ jara bɨma. Chi naapemarã arude judiorã jara bɨma.

Jesú Jerusalén k'orea k'ĩra piawẽa bada

Mateo 23:37-39

31Mãɨ ewaride waapẽarã p'ariseorã orrobaridak'ari Jesua jarasidama:

—Nãmapema isapea wãse. Herodepa pɨ pea k'ɨ̃ria bɨma.#13:31 Mãɨ Herode «Antipa» t'ɨ̃ jarapachidama.

32Mãɨne Jesupa ãchiá jarasima:

—Jãɨ ẽpẽra et'erre k'oparí jĩra bɨa nãɨya jarade wãt'ɨ:#13:32 Jãɨ ẽpẽra et'erre k'oparí jĩra bɨa. K'ɨ̃risia ũpea tea bɨma: ẽpẽra k'ɨ̃risia k'awa bɨma, ẽpẽra k'achia bɨma, wa ẽpẽra k'ĩra piawẽa bɨma. “Idi, nũ pida mɨa k'ɨdade be, jaore mietá pará be sida jɨpa beepik'oaipɨ. Mɨa ooi bɨt'a, ewari ũpeaɨde jõma ook'ari uru baipɨ”. 33Maamina idi, nũ mãɨnepa nõnorema ode wãipɨ Jerusalenea chei k'orea. Tachi Ak'õre pari pedeapataɨrã Jerusalene peapata pẽra mãmá wãi pará bɨma.#13:33 Tachi Ak'õre pari pedeapataɨrã Jerusalene peapata pẽra mãmá wãi pará bɨma. Griego pedeade nãɨya bɨ bɨma: Tachi Ak'õre pari pedeaparí Jerusalén tajata piuit'a, pia bɨwẽma.

34»¡Jerusalén, Jerusalén, mãrapa Tachi Ak'õre pari pedeapataɨrã peapatama! ¡Tachi Ak'õrepa peedarã sida mawarapa bat'a peapatama! Mɨa bari k'ak'o minachia mãra ará jerep'e k'ɨ̃ria basima et'erre wẽrapa ichi warrarã ĩk'arra ek'ari jerep'epari jĩra. Maamina mãrapa k'ɨ̃rianaé pasima. 35Mãɨpuru Tachi Ak'õre waa mãra ome baiwẽma. Mɨa jara bɨma: mãrapa mɨ waa ununaiwẽma aba mɨá pia pedeautamá. Mãɨ ewaride nãɨya jaradaipɨ: “¡Minachia pia bɨma chi Tachi Chipari t'ɨ̃ne cherut'a!”

Currently Selected:

Luca 13: tdc

Highlight

Copy