Luca 12

P'ariseorãpa piawẽa oopataɨ k'orea

1Mãɨya p'anɨne ẽpẽrarã chok'ará tausia cheepɨrɨsidama. Minachia p'isua nɨbɨ pẽra waapẽarã para chi t'ɨ̃sia wã para basima. Mãɨne Jesupa naa ichi ome p'ɨrrɨapataɨrã́ nãɨya jarasima: «Jĩrak'aua p'anat'ɨ chi p'ariseorãné p'ana ooropiparí ome. Ãchi chi pia jĩra berãpɨ. 2Ne ãarea mẽra oodada Tachi Ak'õrepa k'awapiipɨ. Tachia k'awadawẽa p'anɨt'a mẽra beeiwẽma. 3Mãrapa p'ãrione jaradada ẽpẽrarãpa ɨnaane ãarea ũrinaipɨ. Mãrapa eda wãpataɨ jõat'ɨdak'ari mẽra jaradada sida abaɨpa te ɨ̃rɨpa jĩk'ua jaraipɨ ãareaɨrãpa k'awadamẽrá.

¿K'ai wap'eadai p'anɨ?

Mateo 10:26-31

4»Mɨ k'õp'ãerorã, mɨa mãrá jararuma: chi nãɨ k'ak'ua peapataɨrã wap'earãt'ɨ, ãchia peadak'ari waa p'ue oodaiwẽ pẽra. 5Mɨa mãrá jararuma k'ait'a piarã wap'eadai p'anɨma. Mãrapa wap'eadai p'anɨma nãɨ k'ak'ua peak'ari p'ue tachi jaore t'ɨpɨ tau uruadea peei bɨt'a. Mɨa piarã jararuma ichit'a wap'eadai pia bɨma.

6»¿Netopatawẽk'ãra ĩpana chae joesoma p'anɨ erreara tau ume bɨ pari? Maamina Tachi Ak'õrepa ĩpana ãarea ak'ɨparima. 7Mãɨ awara Tachi Ak'õrepa k'awa bɨma mãrapa puda jõmasã́ uru p'anɨt'a. Tachi Ak'õrepa mãra ĩpana chok'ará p'anɨ k'aepẽra pia ak'ɨ bɨẽra ne wap'eadawẽa p'anat'ɨ.

Jesú k'orea k'ĩra p'eraiwẽa bɨma

Mateo 10:32-33; 12:32; 10:19-20

8»Mɨa nãɨ jararuma: abaɨ pida ẽpẽrarã k'ĩrari mɨne ĩjãa bɨade aipɨra, Tachi Ak'õre peedarã pajãnepema k'ĩrari mɨ, chi Ẽpẽra Warrapa ichi mõréane aipɨ. 9Ara mãɨ jĩra abaɨpa ẽpẽrarã k'ĩrari mɨ atua bɨade aipɨra, Tachi Ak'õre pajãnepema peedarã k'ĩrari mɨa ichi atua bɨade aipɨ.

10»Abaɨpa mɨ, chi Ẽpẽra Warra k'orea k'achia pedeaipɨra, Tachi Ak'õrepa mãɨ k'ɨ̃risia atuaipɨ. Maamina abaɨpa Tachi Ak'õre Jaore k'orea k'achia pedeaipɨra Tachi Ak'õrepa mãɨ k'ɨ̃risia atuaiwẽma.

11»Mãra mɨne ĩjãa p'anɨ k'orea judiorã ará pedeapataɨ tedea ateedak'ari, wa chi ak'ɨpataɨrãmá k'ĩrari, wa chi minachia k'awa p'anɨrãmá nepɨra pará bɨade adai k'orea, k'ɨ̃risia pará p'aneerãt'ɨ sãmaasã́ p'anooi wa k'ãret'a jaradai. 12Mãra nepɨra ak'ɨutade Tachi Ak'õre Jaorepuru mãrá k'awapiipɨ k'ãre jaradai p'anɨt'a».

Erreara minachia uru bɨ k'orea nepɨrɨda

13Mãɨne minachia nɨbɨdepemarã abaɨpa nãɨya jarasima:

—Jarateaparí, mɨ ũpẽá jarase tai ak'õre neet'á bɨeda, mɨá pida teapade ase.

14Maamina Jesupa ichiá jarasima:

—K'õp'ãero, ¿k'aipa mɨ bɨsima mãra nepɨra ak'ɨmẽrá?

15Mãɨne ichia jõmãɨrã́ jarasima:

—¡Jĩrak'aua p'anat'ɨ! Erreara chi awaa p'anarãt'ɨ. Neet'á minachia uru bɨdepa tachi chok'ae bak'ama.

16Mãɨne Jesupa nepɨrɨdepa nãɨya jarateasima:

«Ẽpẽra erreara minachia uru bɨ basima. Mãɨ ẽpẽrapa ne uuda ne minachia chausima. 17Mãɨ k'orea nãɨya k'ɨ̃risiasima: “¿Mɨa k'ãre ooima? Te newẽma ãarea yaai k'orea”. 18Maapae k'ɨ̃risiasima: “Nãɨya ooipɨ. Mɨa net'a tau yaaparí te t'erap'et'ak'ari awara waibɨa ooipɨ. Mãma eda ne ãarea mɨa uru bɨt'a yaaipɨ. 19Mãɨya bak'ari piarã mɨchi tuaba jaraipɨ: mɨa yaada minachia uru bɨma ãyo minachia choai k'orea. Naapae minachia ne k'ɨ̃risiawẽa baipɨ. Mɨchia k'ɨ̃ria bɨ k'o baipɨ, to baipɨ mãɨnepa arapá baipɨ”. 20Maamina Tachi Ak'õrepa ichiá jarasima: “¡Pɨa k'ɨ̃risia pia bɨwẽma! Piarã nãɨ teamasi pɨ piuipɨ. Maapae pɨa yaada uru bɨt'a ¿k'ai pae beeima?”

21»Abaɨpa nãɨ ĩjũanepema atepe atai k'ɨ̃risia bɨpɨra, maamina Tachi Ak'õre k'orea k'ɨ̃risiawẽa bɨpɨra, mãɨ jĩra mãɨyaipɨ».

Tachi Ak'õrepa ichidirã ak'ɨparima

Mateo 6:25-34

22Mãɨpuru Jesupa ichi ome p'ɨrrɨapataɨrã́ jarasima:

«Mãra sãmaasã́ p'ananait'a minachia k'ɨ̃risiarãt'ɨ, nek'odai k'orea mãɨnepa neet'á jɨ̃nai k'orea. 23Tachi chok'ae bait'a, chik'o k'aepẽra atepe piipará bɨma. Tachi k'ak'ua, neet'á k'aepẽra atepe piipará bɨma. 24Ak'ɨt'ɨ, ĩpanarãpa ne uudak'ama mãɨnepa ne baadak'ama. Ne yaaparí te sida oodak'ama. Maamina Tachi Ak'õrepa ãchiá nek'opiparima. ¿Mãra ĩpana k'aepẽra atepe pia p'anɨwẽk'ãra? 25¿K'ai mãranepema, ichi k'ak'ua k'orea minachia k'ɨ̃risia bɨpa tãaraa chok'ae baima?#12:25 Tãaraa chok'ae baima. Waapẽarãmá mãɨpa jara bɨma «teesoa wariiwẽma». 26Tãaraa chok'ae baiwẽpɨra, ¿k'ãre k'orea minachia k'ɨ̃risiapatama nek'odai k'orea mãɨnepa neet'á jɨ̃nai k'orea?

27»Ak'ɨt'ɨ nep'ono sãmaasã́ wariparit'a. Mimiak'ama ichiaba p'aru k'osak'ama. Maamina mɨa jararuma: tachi chõarãenapema poro jũra jɨ̃parí jɨ̃ bɨ Salomón ne minachia uru badamina nep'ono jĩra k'ĩrawãrea jɨ̃k'a pasima.#1 Reye 10:4-7; 10:23-25. 28Chi idiapae p'ũajãra tachia mẽa unupataɨ mãɨ norema paapatamina Tachi Ak'õrepa wapida mãɨ t'õpiparima. Mãɨ k'aepẽra ¿ichia mãrá ne piipará jɨ̃namẽrá teaiwẽk'ãra? ¿K'ãre k'orea mãɨne p'ue ĩjãanawẽma? 29Mãɨpuru jɨrɨrãt'ɨ nek'odai k'orea mãɨnepa netodai k'orea. Minachia k'ɨ̃risiarãt'ɨ. 30Nãɨ ĩjũanepemarãpa ãarea mãɨ jɨrɨpatama, maamina Tachi Ak'õrepa k'awa bɨma mãrapa k'ãre uru p'ananai p'anɨt'a. 31Mãɨpuru k'ɨ̃riat'ɨ Tachi Ak'õrepa machi ichi juade ua bai ichidirã ome. Mãɨya mãra ne newẽa p'anɨ ichia teaipɨ.

Nepia pajãne uru bai k'orea jarateada

Mateo 6:19-21

32»Mãra chi chok'ará p'anɨwẽmina ne wap'ea p'anarãt'ɨ.#12:32 Mãra chi chok'ará p'anɨwẽmina ne wap'ea p'anarãt'ɨ. Griego pedeade nãɨya bɨ bɨma: Mɨ ovejarã, ne wap'earãt'ɨ. Tachi Ak'õrepa mãra ichi juade ua bai k'ɨ̃ria bɨma, ichidirã ome. 33Mãɨ k'orea mãrapa ne uru p'anɨnepema netodak'ari chi nenea k'edea teat'ɨ. Nepia pajãne uru p'anai k'orea jɨrɨt'ɨ. Chi ne pajãnepema jõk'ama. Jãma simiapa ãrik'ama mãɨnepa nechɨapataɨrã pida p'ue chɨadak'ama. 34Mãrapa chi piipará bɨ machi sõnepa k'ɨ̃riapatama.

Chi chipari pae pari mimiaparí pia bɨ k'orea jarada

35-36»Te chipari pae pari mimiaparí pia bɨ jĩra p'anat'ɨ, Tachi Ak'õrepa jara bɨt'a ũrinai k'orea.#12:35-36 Te chipari pae pari mimiaparí pia bɨ jĩra p'anat'ɨ, Tachi Ak'õrepa jara bɨt'a ũrinai k'orea. Griego pedeade nãɨya bɨ bɨma: k'ɨrrɨde neet'á pia t'ã jɨ̃t'ɨ. Chi te chipari pae pari mimiaparí pia bɨpa ĩpira k'oa uru baparima ichi chipari cherude pia pedeai k'orea. Miak'ãipataɨ arapá ewari oo p'anɨmãɨpa chek'ari, chi chiparipa t'ɨ̃rune chi ichi pae pari mimiaparí pia bɨpa ara mãɨne tede eda wãpataɨ ewaipɨ. 37Chi chipari chek'ari, chi ichi pae pari mimiapataɨrã chok'ae p'anɨ unuipɨra, ãchi pia ak'ɨipɨ. Mɨa piarã jararuma: ara mãɨne chi chiparipa chi ichi pae pari mimiaparí neet'á jɨ̃k'ari ichi pae pari mimiapataɨrã chik'o k'opataɨde suak'abari beepiipɨ, ãchiá nek'opii k'orea. 38Chi ichi pae pari mimiapataɨrã pia p'anɨpa ãchi chipari nɨpatama, teamasi estarik'a cherude mãɨyawẽpɨra tap'ededa cherude. Chi chiparipa ãchi nɨ p'anɨ unuipɨra, ãchi pia ak'ɨipɨ.

39»Nãɨ k'awat'ɨ: te chiparipa nechɨaparí sãapae chei k'awa bɨpara, k'ãiwẽa bai pasima tede eda wãpiemaapa. 40Ara mãɨ jĩra mãra sida tau pará p'anat'ɨ. Mãrapa mɨ, chi Ẽpẽra Warra chei atua p'anɨne cheipɨ».

Mimiapataɨrã ume p'anɨ k'orea jarada

Mateo 24:45-51

41Pedropa Jesua idisima:

—Tai Chipari, ¿mãɨ nepɨra pɨa taiyá jara bɨk'ãra, wa ãareaɨrã́ jara bɨk'ãra?

42Jesupa p'anoosima:

—Te chipari pae pari mimiaparipa k'ɨ̃risia k'awa bɨdepa jĩp'a oo bɨpɨra, chi te chiparipa chi waapẽarã ichi pae pari mimiapataɨrã mãɨ ichi pae pari mimiaparí juade bɨipɨ ãchia ewari ará parude nek'opi bamẽrá. 43Chi te chipari pae pari mimiaparipa mãɨya oo bɨt'a ichi chiparipa unune cheipɨra, ichi sõpia baipɨ. 44Mɨa piarã jararuma: chi chiparipa ãarea ichia uru bɨt'a mãɨ ichi pae pari mimiaparí juade bɨipɨ.

45Maamina mãɨ ichi pae pari mimiaparipa ichi sõne “mɨ chipari tãaraayane” aipɨra, waapẽarã ichi pae pari mimiapataɨrã, wẽrarã sida jok'ae beek'ari, nek'ok'ari, netok'ari mãɨnepa it'uapa piu baipɨ. 46Abaeda ichi chipari chei k'ɨ̃risiawẽa bɨde ara mãɨya bɨde cheipɨ. Mãɨ ichi pae pari mimiaparí minachia ɨtɨak'ari chi ĩjãanak'apɨɨrã ome eda jɨ̃a nɨbɨpiipɨ.

47»Chi chipari pae pari mimiaparipa chi chiparipa oopi bɨt'a k'awaipɨra maamina mãɨya oowẽpɨra, chi chiparipa mãɨ ichi pae pari mimiaparí minachia soapa p'eipɨ. 48Maamina chi ichi pae pari mimiaparipa atua bɨdepa chi chiparipa jara bɨt'a piawẽa oosira mãɨ ichi pae pari mimiaparí ãpia puru soapa p'eipɨ. Piarã Tachi Ak'õrepa waapẽarã́ waibɨa tea bɨma ichi pae oodamẽrá. Chi waibɨa jitadaɨrãpa ichi pae waibɨa oodai pia bɨma.

Jesú k'orea ẽpẽrarã k'ĩruupik'adada

Mateo 10:34-36

49»Mɨ chesima nãɨ ĩjũa ɨtɨai k'orea.#12:49 Griego pedeade nãɨya bɨ bɨma: Mɨ chesima t'ɨpɨ urua nãɨ ĩjũanea bat'a peei k'orea. Ara nãɨena mãɨya oorupara mɨmá pia bai pasima. 50Maamina mãɨ naena mɨ minachia mĩa bɨma.#12:50 Mɨ minachia mĩa bɨma. Griego pedeade nãɨya bɨ bɨma: Mɨ porochoa piipará bɨma. Mãɨpuru ãarea sõp'ua baparima mãɨ ewari parudea. 51¿Mɨ nãɨ ĩjũanea chesiade a k'ɨ̃risia p'anɨk'ãra ẽpẽerã ne k'ɨ̃risiadawẽa p'anapii k'orea? Mɨa jararuma mãɨ k'orea chewẽa bɨma, mãɨpari che bɨma ẽpẽerã ãarea k'ĩruu p'ananamẽrá. 52Idiidepa ara tedepemarã mɨ k'orea chi nek'ĩramá p'aneenaipɨ. Joesoma p'anɨne umepema waapẽarã ũpẽarã p'anɨ ome chi nek'ĩramá p'aneenaipɨ. 53Chi ak'õre chi warra ome chi nek'ĩramá padaipɨ. Chi warra chi ak'õre ome chi nek'ĩramá padaipɨ. Chi nae chi k'au ome nek'ĩramá padaipɨ, chi k'au chi nae ome chi nek'ĩramá padaipɨ. Chi p'ak'õre chi ãyo ome chi nek'ĩramá padaipɨ. Ichiaba chi ãyo chi p'ak'õre ome chi nek'ĩramá padaipɨ.

Ewari sãmaasã́ bai k'orea k'awa jarada

Mateo 5:25-26; 16:1-4; Marco 8:11-13

54Mãɨ awara Jesupa ẽpẽrarã́ nãɨya jarasima:

—Mãrapa jɨ̃ara t'aua ɨmata baeparide ochiaru unuutade k'oe cheyade apatama. Mãɨya piarã k'oe cheparima. 55Ichiaba nãu ĩjũa pania newẽa ãpɨteariipa p'õat'ɨsira pisia bayade apatama. Mãɨya beeparima. 56Mãra chi pia jĩra berãpa ewari k'ĩra k'awa p'anɨmina Tachi Ak'õrepa nãɨ ewaride oo bɨt'a k'awadak'ama.

57»Mãrapa ¿k'ãre k'orea p'ue k'awadak'ama k'ãre jĩp'a bɨt'a? 58Pɨchi nek'ĩramaapa pɨ chi nepɨra ak'ɨparimá ateewãipɨra, ode wãutade ãarea oose ichi ome sõpia beei k'orea. Mãɨya oowẽpɨra ichia pɨ chi nepɨra ak'ɨparí juade bɨipɨ. Maapae chi ak'ɨparipa pɨ chi jɨ̃a nɨbɨpataɨ te ot'eaparia jitapiipɨ eda jɨ̃a nɨbɨmẽrá. 59Mɨa jararuma: pɨ jãmapema wãiwẽma aba pɨa teai bɨ erreara ãarea p'aarudea.

Currently Selected:

Luca 12: tdc

Highlight

Copy