Juan 5

Jesupa mimianak'apɨ́ ewaride k'ak'ua sorek'ea bɨ jɨpada

1Mãɨya nak'ari Jesú Jerusalenea wãsima, judiorãpa mãma arapaapataɨ ewaride ne oopataɨ oomaa p'anana pẽra. 2Mãma k'uipataɨ yooro k'orodada basima. Hebreo pedeade Betzatá apatama.#5:2 Betzatá. Griego pedeade chok'ará k'art'ade Betesda wa Betsaida bɨ bɨma. Mãɨ k'uipataɨ chi p'uuru eda wãpataɨ Oveja apataɨ k'ait'a bɨma. Chi pania k'ait'a te chak'e joesoma p'anasima. 3Mãma jeeda k'ɨdade k'ak'ua piawẽa be, tau p'ãrio be, jĩru piawẽa be mãɨnepa sorek'ea be chok'ará p'anasima. [Ãchia mãɨ pania totomĩaru nɨ p'anapachidama. 4Edaɨde Tachi Chiparipa ɨt'aripa peeda mãɨ pania totomĩapide chepachima. Mãɨya oorude chi naa mãɨ paniane eda wãru ichi k'ak'ua piawẽa bada jɨpa beepachima.]#5:3-4 Griego pedeade chi eda waapẽarã k'art'ade pedea corchetede bɨ newẽma. 5Mãɨne ẽpẽra basima, 38 ãyo k'ɨdade bɨt'a basima. 6Jesupa mãɨ ẽpẽra jeeda bari bɨ unuside k'awasima ichi mãma tãaraa bɨt'a. Mãɨpuru ichiá idisima:

—¿K'ak'ua jɨpa beei k'ɨ̃ria bɨk'ãra?

7Mãɨne chi k'ɨdade bɨpa mãɨya p'anoosima:

—Ãjã, maamina chi pania totomĩarune, k'aipa mɨ ateewãi newẽma eda bɨmẽrá. Mɨ eda wãyá oorumisa, awaraɨ mɨ naa eda wãparima.

8Jesupa jarasima:

—P'irabarise. Pɨchi ne ẽpẽra uapataɨ atak'ari wãse.

9Ara mãɨne chi ẽpẽra jɨpa beesima. Ichi ne ẽpẽra uapataɨ atak'ari jĩte wãsima. Maamina mãɨ mimianak'apɨ́ ewari pasima. 10Mãɨpuru judiorã chi chaarearãpa ẽpẽra k'ak'ua jɨpa beedá jarasidama:

—Idi mimianak'apɨ́ ewari pẽra pɨ ne ẽpẽra uapataɨ p'ue atak'ari wãiwẽa bɨma.

11Mãɨne ichia p'anoosima:

—Maamina chi mɨ jɨpa beepidapa jarasima: “Pɨ ne ẽpẽra uapataɨ atak'ari wãse”.

12Ãchia idisidama:

—¿K'aipa pɨá mãɨya pɨ ne ẽpẽra uapataɨ atak'ari wãi pia bɨade asima?

13Maamina mãɨ atua basima. Jesú ẽpẽerã chok'ará nɨbɨ t'ãena bada eda wãna pẽra ichia p'ue jaraé pasima.

14Mãɨya nak'ari Jesupa ichi Tachi Ak'õre te eda unuside jarasima:

—Ũrise: pɨ jɨpa beeda pẽra waa nemietá oorãse pɨ piawẽa bada k'aepẽra atepe wariara piawẽa beepiemaapa.

15Mãɨya nak'ari chi ẽpẽra judiorã chi chaarearãmá wãk'ari jarasima chi ichi jɨpa beepida mãɨ Jesú pasit'a. 16Mãɨpuru p'aarerã chi chaarearãpa Jesú k'orea minachia k'achia pedea p'aneesidama mãɨ ẽpẽra mimianak'apɨ́ ewaride jɨpa beepida pẽra.#5:16 Griego pedeade chi eda waapẽarã k'art'ade mãɨnepa bɨ bɨma: pea k'ɨ̃ria p'anasidama. 17Maamina Jesupa ãchiá jarasima:

—Mɨ Ak'õre wapida ɨ̃apaawẽa mimiaparima mãɨnepa mɨ sida ɨ̃apaawẽa mimiaparima.

18Mãɨ k'orea judiorã chi chaarearãpa ichi atepe peada k'ɨ̃ria p'aneesidama. Ichia mimianak'apɨ́ ewaride ne oodak'apɨ́ oodat'a k'ɨ̃rianaé pasima. Mãɨ awara mɨ Ak'õreane ada k'orea mãɨ atepe k'ɨ̃rianaé pasima mãɨpa ara ichi Tachi Ak'õreane ada pẽra.

Tachi Ak'õrepa jua chaarea ichi Warrá tea bada

19Maapae Jesupa ãchiá jarasima: «Mɨa mãrá piarã jararuma: mɨ, Tachi Ak'õre Warrapa ara mɨchi tuaba p'ue ne ooiwẽma. Maamina mɨa unu bɨma mɨ Ak'õrepa oo bɨt'a. Mãɨ ãarea mɨ Ak'õrepa oo bɨt'a mɨa pida oo bɨma. 20Mɨ Ak'õrepa mɨ k'ɨ̃ria bɨma. Mãɨpuru ãarea ichia oo bɨt'a mɨá unupiparima. Mãɨ awara ichia nãɨ ẽpẽerãpa ne p'ue oodak'apɨ́ ooda k'aepẽra ne waibɨa bet'a unupiipɨ. Mãɨ k'orea mãra ak'ɨɨtua nɨbeeipɨ. 21Mɨ Ak'õrepa piudaadarã chok'ae p'irabaripik'ari chok'ae bɨpipari jĩra, ara mãɨya mɨ chi Warrapa chi mɨa k'ɨ̃riarut'a chok'ae bapiparima. 22Mɨ Ak'õrepa aba pida ɨtɨawẽma. Mãɨpari mɨ bɨsima ãareaɨrã ɨtɨamẽrá. 23Mãɨya ãareaɨrãpa mɨ Ak'õre wap'ea p'anɨ jĩra mɨ sida wap'eadaipɨ. Chi mɨ wap'eawẽa bɨpa mɨ Ak'õre sida wap'eawẽa bɨma, mɨ Ak'õrepa mɨ nãɨ ĩjũanea peeda pẽra.

24»Mɨa piarã jararuma: abaɨpa mɨ pedea ũrik'ari mɨ Peeda ĩjãaipɨra, mãɨ ẽpẽra ichi ome ewaricha chok'ae baipɨ. Tachi Ak'õrepa ichi ɨtɨaiwẽma. Piarã mãɨ ẽpẽra piu bada chok'ae bɨma. 25Piarã jararuma: ewari chei bada chesima. Nãmãɨpa chi piuda jĩra p'anɨrãpa mɨ, chi Tachi Ak'õre Warra pedea ũrinaipɨ. Chi mɨne ĩjãauta chok'ae p'ananaipɨ. 26Mɨ Ak'õrepa chok'ae bapipari jĩra, mɨa ara mãɨya chok'ae bapiparima ichia mãɨya bɨda pẽra. 27Mãɨ awara mɨ bɨsima ãareaɨrã ɨtɨamẽrá, mɨ Ẽpẽra Warra pẽra.#Daniel 7:13-14. 28Mɨa jara bɨ k'orea k'awa k'ɨ̃risiadawẽa p'anarãt'ɨ. Piarã ewariaba ãarea jãɨrã tede piu beadapa mɨ, chi Ẽpẽra Warra pedea ũriutade, 29mãɨne ãareaɨrã chok'ae p'irabaridaipɨ. Chi nepia oo p'anana chok'ae p'irabaridaipɨ mɨ ome ewaricha chok'ae beadai k'orea, maamina chi nemietá oopataɨrã chok'ae p'irabaridaipɨ mɨa mãɨrã ɨtɨamẽrá.

30»Ara mɨchi tuaba ne p'ue ooiwẽma. Mɨa ẽpẽra ɨtɨaparima mɨ Ak'õrepa jararu jĩra. Mɨa jĩp'a ɨtɨaparima. Mɨa k'ɨ̃ria bɨ jĩra ook'ama mãɨpari mɨ Ak'õre, chi mɨ Peedapa k'ɨ̃ria bɨ jĩra ooparima.

¿K'aipa Jesú k'orea pia pedeapatama?

31»Mɨa jara bɨ piarãmina ara mɨchi k'orea pedea bɨ pẽra, mãramá mãɨ piarãpẽawẽma.#Deuteronomio 19:15. 32Maamina mɨ Ak'õre mɨ k'orea pedea bɨma.#5:32 Griego pedeade nãɨya bɨ bɨma: awaraɨpa mɨ k'orea pedea bɨma. Mɨa k'awa bɨma ichia jara bɨ piarãt'a. 33Mãrapa ẽpẽerã Juan chi Porochoaparimá peesidama mɨ k'orea ididamẽrá. Mãɨne ichia jarada piarã pasima.#Juan 1:19-34. 34Mɨa jɨrɨwẽa bɨma ẽpẽra mɨ k'orea pedeamẽrá. Maamina Juanpa mɨ k'orea jarada mɨa pida mãrá jara bɨma k'aripadamẽrá. 35Juan ĩpira urua bɨ jĩra basima. Ichi mãra ome tãaraa badawẽmina, mãra ichi ɨnaane arapá p'anasidama.

36»Maamina Juanpa jarada k'aepẽra nãɨ mɨ k'orea pia pedea bɨma: Mɨ Ak'õrepa oopi bɨt'a mɨa ãarea oo bɨ pẽra k'awapi bɨma mɨ Ak'õrepa mɨ piarã peesit'a. 37Piarã mɨ Ak'õre, chi mɨ Peedapa mɨ k'orea pedea bɨma. Maamina mãrapa ichi pedea ũrinak'ama#Éxodo 19:9; 33:11. mãɨnepa ichi ununak'ama. 38Mãɨnepa ichi pedea mãra sõne newẽma,#Josué 1:8-9. mɨ, chi ichia Peedade ĩjãanak'a pẽra. 39Mãrapa Tachi Ak'õre pedea pia unupatama, mãɨnepema Tachi Ak'õre ome ewaricha chok'ae p'ananait'a k'ɨ̃risia p'anɨ pẽra. ¡Mãɨ k'art'ade mɨ k'orea pedea bɨma! 40Maamina mãra mɨmá chedai k'ɨ̃rianak'ama, mɨa mãra chok'ae p'anapimẽrá.

41»Mɨa jɨrɨwẽa bɨma mãrapa mɨ pia ununamẽrá. 42Mãɨ awara mɨa mãra k'awa bɨma. K'awa bɨma mãrapa Tachi Ak'õre k'ɨ̃rianak'at'a. 43Mɨ Ak'õre t'ɨ̃nepa che bɨma, maamina mɨá pia pedeadawẽa p'anɨma. Mãɨne awaraɨ ara ichi t'ɨ̃nepa cheipɨra, mãɨa pia pedeapatama. 44¿Sãmaasã́ mɨne ĩjãanaima? Abapuru k'ɨ̃ria p'anɨma waapẽarãpa mãra pia ununait'a. Maamina Tachi Ak'õre aba bɨpa mãra pia unuit'a mãɨ jɨrɨdawẽma.

45»K'ɨ̃risiarãt'ɨ mɨ Ak'õre k'ĩrari mɨa mãra nepɨra pará p'anɨane ait'a. Mãrapa Moisé k'orea pia p'ananai k'ɨ̃risia p'anɨma. Maamina ara mãɨ Moisepa mãra mɨ Ak'õre k'ĩrari nepɨra pará p'anɨane aipɨ. 46Mãrapa Moisepa jarada piarã ĩjãa p'ananapara mɨne ĩjãanai pasima, Moisepa mɨ k'orea bɨda pẽra.#5:46 Piarã ãarea Tachi Ak'õre chõarãenapema k'art'ade Jesú k'orea bɨ bɨma. Deuteronomio 18:15-19. 47Maamina Moisepa bɨda sida ĩjãanaepɨra ¿sãmaasã́ mɨ pedea ĩjãanaima?»

Currently Selected:

Juan 5: tdc

Highlight

Copy