Matthew 8

Jesus‑em Naallghuskanga Leprosy‑lek

1Jesus qemimeng ukigyan, yulghuteghllagem maligtekaa. 2Taagken yuuk, leprosy‑lek, tagiluni ellnganun, segesqughfikluku, pikaa, “Ataneq, piyukelqegkuvgu, ukmangiqaghnga.”

3Enkaam Jesus‑em tawavek saafluku pikaa, “Piyukelqaqa, ukmangiighten!” Tawaninginaq leprosy‑ngiitkaq. 4Taagken Jesus‑em pikaa, “Wataghllak kina alngunak ungipaategpenaan naallghutelleghpeneng, yeghlegi aglaa priest‑mun esghaghligu naallghutellghen. Taagken aghqerraaghhaaten Moses‑em Liilightuusaan pisqellghatun ipapighqesqelluku naallghutellghen.”

Jesus‑em Naallghuskanga Rome‑em Umiilwaaghan Qepghaghtenga

5Taagken Jesus Capernaum‑emun pikaq. Kaataquqlu, Rome‑em umiilwaaghan takuluku kayusiitaghtesqelluni pikaa, 6“Ataneq, whangkunni qepghaghteka, uniighumaaq, ikfiqeghllaguuq.”

7Jesus‑em pikaa, “Naallghusaghtughnaqaqa.”

8Iwernga umiilwaaghem pikaa, “Ataneq, itagnanghitunga elpenun iteghviksaghqaalunga mangteghamnun. Legan tawanlluten naallghutesqigu qepghaghteka enkaam naallghulli. 9Qelghikayugmeng umiilelguunga enkaam whangallu qelghaqanka pilluwaghtenka. Ataasiq qelqumkun, ‘Aghulaqi’ aga aghulaqellequq. Ilanga whaten pikumkun, ‘Tagi’ tagillequq. Qepghaghteka qelqumkun, ‘Una piightigu’, aga pilleqaa.”

10Jesus‑em nagalluku saghiighayukaq, enkaam yuget maligullghiit ellminun pikii, “Ipa ungipaatamsi, nallaasigatunga kitumeng alngunak Israel‑eghmiimeng, uutun yugtun ugpeqineghtutkalghiimeng. 11Ungipaatamsi, asivaghmengllu pakfallamengllu yulghutet tagilaghaasaghqaagut Ataneghpagullghanun Qilagem. Tawani aqumuulluteng neghelgusighlleqiit sivuneput Abraham‑enkut, Isaac‑enkut, Jacob‑enkut. 12Iwernga tamaakut Ataneghpagulleghmesaghqaayalghiit aanesaghqaagut mamlegllagmun, tawani elngaatall qiyaaghwaghllagllequt gguteteng terqitaagtaamiita avuteghqem angtalanganeng.” 13Taagken Jesus‑em pikaa umiilwaaq, “Aglaghhaaten, ugpeqilleghpetun apeghiighllequq.”

Enkaam tawaninginaq umiilwaaghem qepghaghtenga naallghutkaq.

Jesus‑em Naallghuskangi Yulghutet

14Jesus Peter‑enkunun piluni, esghaqaa aghnaq Peter‑em sakinga qavaghvigmeteftuq puqleghaluni. 15Saafsaqminigu iiggakun puqleghangiitkaq, aga makelluni kepsiiqukaa.

16Ighivgaghyagu Jesus‑mun tagiquutkiit tughneghalget ilumegteggun enkaam aanesquqii tughneghiit akuzilleghmikun, qamagllukillu qinuyuget naallghutkii. 17Tawaten pikaq apeghiighnaluku uuknaliqistem Isaiah‑m whaten pillgha,

“Tugukaqii qinuyulleput,

iqitkaqii aqnighneput.”

Jesus‑mun Maligsaaghtengughsulghiik

18Jesus‑em esghaghluki uvitminilnguut yulghuteghllaget, yataaghqesqegkii naayvam inglunganun aghvighnaluteng. 19Taagken apeghtughikayugem Liilightuusameng takuluku pikaa, “Apeghtughista, maliglleqamken natmun alngunak pikuvek.”

20Jesus‑em pikaa, “Kaviighet riigtelguut, qawaaget unglutelguut, iwernga Ighnegha Yugem ingaghfigitaquq.”

21Ilangan maligsaaghtengan pikaa, “Ataneq, maliglleqamken iwernga sivukluku ataka lliveghyaghtuqaghlakun.”

22Iwernga Jesus‑em pikaa, “Maligtinga. Tamaakut maligusunghilnguut whangamnun tuqukaagut taghneghamegteggun; lliveghlitki tuqumasliiteng.”

Jesus‑em Amsanaghtestekanga Naaftelleghllak

23Taagken Jesus angyamun uugsan maligsaaghtengillu uuglleghaatkat. 24Puglellghita kiingungiighhaaneng esla nuuskagllagan naafteghllakaq, naayvaqlu imaghllugughteghllagumaghmi, repall angyaq imighaataqegkaa. Iwernga Jesus qavaalghii. 25Maligsaaghtet takuluku taghtughtekaat whaten pimaan, “Ataneq, yugulikut! Tuqulaghaannaqukut!”

26Jesus‑em pikii, “Sangafsi alingetsi? Ugpeqilleghqestaapiguusi!” Taagken nekevluni ineghtekakek anuqallu imaghllugetlu enkaam amsanaghllugughtekaq.

27Qamaglluteng saghiighayukat. Whaten pikat, “Natelnguuwa yuuk una? Talwa anuqemllu imaghllugetlu qaatkegkangat!”

Jesus‑em Naallghuskek Tughneghalgek

28Jesus‑enkut kaasameng inglunganun naayvam, aglaqat Gadara‑ghmiit nunangitnun. Taagken maalghuk yugek tughneghalgek ilumegnegun tagilutek lliveghneng nallaqaak Jesus. Suugllugllagek repall kina alngunak taakwagun tuumkun igleghsigalnguq. 29Legan esghaghluku Jesus akilghuukak, “Sanaqsikut, Ighneghani Kiyaghneghem? Ikfiqesnaqsikut pilleghqaq kaatestegpenaan?”

30Taawanguq qantaghani kurugalghutet, neghaqeftut. 31Tughneghaat maniguutepiglluteng Jesus pikaat, “Aanestekufkut, kurugaghnun iteghaatesnakefkut.”

32Enkaam Jesus‑em pikii, “Aanleghaatek!” Aanleghaalluteng kurugaghnun iteghaatkat. Aga kurugaat pangalgutkat asitmun naayvamun nagneghluteng meghmi tuqulaghaatkat.

33Kurugaghneng aflengakilghiit qimaaguutkat nemun. Tawani aapqagket samatkek tughneghalguyalghiik ilumegnegun, samatangillu kurugalghutet. 34Enkaam qamagtengngwaaghluteng tamaakumiit esghaghyaghtuutkaat Jesus. Esghaghyamegteggu maniguutepiglluteng aghulaqesqegkaat nunameggneng.

Currently Selected:

Matthew 8: ess

Highlight

Copy