Matthew 7

Nanqigtisnanilleq

1Jesus‑em apeghtuusani nagneghutkii, “Nanqigtigpenasi ilagpesineng enkaam Kiyaghneghem nanqiggneghillisi, 2qayughllak Kiyaghneghem nanqiglleqiisi tawatengngwaaq nanqigtilleghpesistun ilagpesineng. Atuqelleqiillu elpesinun ataasit tamaakut pikasi ilagpesinun. 3Sangan esghaghsigu yulgutegpek iisqughutnga, elpek katam iisqughuten unaghsighllak avelghaghluku? 4Salghiimeng yulguten pizigu, ‘Entaa‑a iisqughutngiqaghlaken’, elpek paninang iisqughutelguluten unaghsighllagmeng? 5Uyuq piniiyugneq! Sivukluku unaghsighllak iyegpeneng nusugluku elngaatall whateghlluwaaq esghaghluku yulguten iisqughutngighnaken.”

Legasiighwaghtenun Apeghtuusaqegpenaki Kiyaghneghem Akuzitangi

6Taagken Jesus‑em pikii, “Legasiighwaghtenun apeghtuusaqegpenaki Kiyaghneghem Akuzitangi, qayughllak qikmistunllu kurugaghestunllu ayuqut. Sangwaat agleghnalghiit tuunegpenaki qikminun luuraq sughugnayukangisi. Akituqat sungaat miluutegpenaki kurugaghnun, luuraq tutmaasghaqnayukatki.

Aaptelleq, Ivaghilleq, Tenglugtulleq

7“Aaptek, allgeghullequsi; ivaghitek, naalkullequsi; tenglugtughtek amigkun, qelpeghulleqiisi. 8Qayughllak kina alngunak aapleghhii, allgeghusaghqaaguq; kina alngunak ivaghilghii, naalkusaghqaaguq, kina alngunak tenglugtulghii amigkun, qelpeghulleqaa. 9Kitum yugem ighneni tungsiqan neqekrangllameng, tuunelleqaguu uyghagmeng? 10Nalighmeng tungsiqan iqallugmeng, tuunelleqaguu nemeghyameng? 11Seghleghughngaaghpesi, avaqutasi tuunyaghqaqasi pinilghiimeng tunusameng. Atazi qilagmelnguq tuuniyugataghaghluni ayuquq pinilghiimeng tunusameng tamaakunun aapleghhinun ellminun.

12“Enkaam yulgutegpesinun pinitun pistesukufsi, elpesillu pinitun piiqiteki. Tawaten apeghtughinguut Moses‑em Liilightuusiillu, uuknaliqistetlu igaqegkiit.”

Kagpestaaghhaq Amik

13Taagken Jesus‑em pikii, “Iteghtek kagpestaaghhaghqun amigkun. Amik hell‑mun ayuqelghii nuqutuuq, tuumkegtuqlu enkaam uglaq taakwagun igleghtaquq. 14Iwernga amik unguvalleghmun ayuqelghii kagpestaaghhaaguq, tuumllugmetuqlu enkaam qafsinkuuraghhaam naalkaqii tumet unguvalleghmun ayuqelghiit.

Naten Liigikelleghqii Uuknaliqistesighwaaghet

15“Kelengalusi uuknaliqistesighwaaghneng. Takulleqiisi penniighsugnighqelluteng, taawanginaq ugighsalghiistun amaastun ayuqut. 16Liigikelleqasi nangaghneghitgun liigikelleghpesistun uqfiget sameng piitestillghitgun. Sikughlluget piitestingigatut grapes‑meng nalighmeng figs‑meng, tawateghpigaq seghleghet yuget pinitun pingigatut. 17Uqfik pinilghii piitestiyaghqaaguq pinilghiimeng, taawanginaq uqfik seghleq piitestiyaghqaaguq seghleghmeng. 18Uqfik pinilghii piitestinaanghituq seghleghmeng, uqfik seghleq piitestinaanghituq pinilghiimeng. 19Enkaam alngunak uqfik piitestinghilnguq pinilghiimeng kepluni kumaghsaghqaaguq. 20Enkaangam tawatetellghitgun liigikelleqasi uuknaliqistesighwaaghutangi.”

Iteghyaghqat Ataneghpagullghanun Qilagem

21Jesus‑em apeghtuusani nagneghutkii, “Ilangi yugem whangamnun maligsaaghtekniiqut enkaam piiqaatnga, ‘Atanqamken’ iwernga iteghnaanghitut Ataneghpagullghanun Qilagem. Tamaakunginaat atuqilghiit piyukellghaneng Atama qilagmelnguum iteghyaghqaagut Ataneghpagullghanun Qilagem. 22Nanqigtillghem Aghneghani, uglam piyaghqaqaanga whaten, ‘Ataneq, Ataneq! Ateghpegun Kiyaghneghem ungipaa aapqaqaghput. Ateghpegun aanesquqaqaput tughneghaat uglalghiineng yugneng. Ateghpegun allaaghlluwhaghtiighaataqaagukut uglaghngaan!’ 23Iwernga whaten pilleqanka, ‘Nallukngwaaghamsi, iqitek whangamneng, seghletun pisteni’.

Ayugilnguq Tunemaq

24“Kina alngunak nagallghii apeghtughillemnun, qaatkegkumiki peghqinelghiitun yugtun ayuquq mangteghangllaqaq uyghagem qaayngakun. 25Eslallugughteghllagyalghiimi, kiiwet ulevumaghmeng, anuqlighllagyalghiimillu, tawallima mangteghaq uullghumangilnguq qayughllak uyghagkun nekeftekaalghii.

26“Iwernga kina alngunak nagateghngaaghmi apeghtughillemnun, qaatkenghilkumiki, nalluqatun yugtun ayuquq mangteghangllaqaq qenaaghllugkun. 27Eslallugughteghllagyalghiimi, kiiwet ulevumaghmeng, anuqlighllagyalghiimillu, aga mangteghaq uulqaq naavngwaaghluni.”

Jesus Apeghtughilghii Aghtughyaghqaanghillelighluni

28Jesus tamaaken apeghtughineghmeng taaqsan, yulghuteghllaget saghiighayukat, 29qayughllak apeghtughikaq aghtughyaghqaanghillelighluni, apeghtughikayugestun Liilightuusameng pigpenani.

Currently Selected:

Matthew 7: ess

Highlight

Copy