Luke 12

Kelengasaalleq Piniiyugtelleghmeng

1Tawaten pimaluki thousand‑nelghutet yuget qerngughutkat, repall ilateng tuutqaghtaqluki pikiit. Jesus‑em sivukluki maligsaaghteni pikii, “Kelengalusi Pharisees‑et yeast‑angitneng. Piniiyugtellghat piiqaqa. 2Sangwaa saapegkaq saaputiighyaghqaaguq. Qamaglluni aksaqegkaq qayvighqesaghqaaguq. 3Sameng pillesi aksaqluku nagaqughyaghqaqiit qagani. Sangwaatlu sigutquutkegkasi uumgullusi nemi ungipaqsaghqaagut tamangani.

Aliksaghqaqaghsi Kiyaghneq

4“Ungipaatamsi ilakumtaamni, alikegpenaki tamaakut tuqutikayuget yugusimeng, iwernga taam kingunganeng alla sanaanghitiisi. 5Iwernga kelengasaaghnaqamsi kitumeng aliksaghqameng. Alikiteggu Kiyaghneq, tuquskumisi aghtughyaghqaanghillelguuq miluusaghqaalusi hell‑mun. Aa‑a, ungipaatamsi alikiteggu!

6“Tallimat qateghyiighaghhaat akikegkayugunghitaat maalghugegnun penny‑gnun? Tawalliima nalighhiiniit Kiyaghneghem puygunaanghitii. 7Talwa nuyaghpesi uglaghtalangi Kiyaghneghem liisimakii. Alingegpenasi, Kiyaghneghem megnukataghaghiisi qateghyiighalghutneng pakiggullusi.

Tuguklighilleq Nalighmeng Ighsakilleq Christ‑ameng

8“Enkaam ungipaatamsi, kitum alngunak ungipaaskaki sivungitni yuget whangamnun pikniluteng, Ighneghanllu Yugem piknilleqii sivungitni Kiyaghneghem yaqulelghutangan. 9Iwernga kitum alngunak ungipaaskaki sivungitni yuget whangamnun pikenghinniluteng, Ighneghan Yugem pikenghinnilleqii sivungitni Kiyaghneghem yaqulelghutangan.

10“Kitum alngunak seghletun akuzitkegkumigu Ighnegha Yugem, Kiyaghneghem seghevusaghqaqaa. Iwernga kitum alngunak seghletun akuzitkegkumikek Agleghnalghiik Taghneghak, Kiyaghneghem seghevunnaanghitaa.

11“Aglaaskangisi synagogue‑nnun, sivungitnun governor‑et, nalighmeng igleghutistet teggellghiighpenasi naten kiimsilleghqaghpesineng, nalighmeng sameng pilleghqaghpesineng. 12Tawani pilleghmi Agleghnalghiim Taghnegham akuzitkaghqalilleqiisi sameng pilleghqameng.”

Jesus‑em Ungipaghaatkegkanga Nalluuqaq Aklungilnguq Yuuk

13Yulghuteghllaget akulngitneng yugem Jesus pikaa, “Apeghtughista, anglegutka ungipaataghtigu, atamtunguq unitkaaneng saghyameng nengitaghllinga.”

14Iwernga Jesus‑em aaptekaa, “Yugmi whani, kitum nanqigtistengllaghtanga, nalighmeng nengighqistengllaghtanga elpetegnun?” 15Taagken qamaglluki pikii, “Kelengalusi allaaghiinaghmeng pakigniightelleghmeng, qayughllak yugem unguvalleghpigaa saghyiightelleghqun ayuqenghituq.”

16Taagken Jesus‑em ungipaghaatkii, “Yuuk aklungilnguq nunalguftuq piitestighllakayugmeng. 17Sumeghtaghaqaq, ‘Naten sanaqsinga? Piitesteghllakamnun kagpagvigitunga.’ 18Ellmineng kiimsiqaq, Whaten pinaqunga. Kagpagvigenka ifkaghqughluki, aangataghalghiineng kagpagvigkaneng nekefqughnaqunga. Enkaam qamaglluki grain‑enka, saghyankallu kagpaglleqanka. 19Taagken pillequnga unguvasimnun, ‘Unguvasimni, kagpagighllagtunga ayumiqullelghutnun! Taawa sananighnaqunga, neghaqlunga, meghaqlunga, pinighyuuggnaqunga!’ 20Iwernga Kiyaghneghem pikaa, ‘Uyuq nalluuqaq! Unukun unguvasin tuqunaqnguuq. Kagpagllakaghten tamaakut kitum piknaqaki?’” 21Jesus‑em taaqniqii, “Taatun yugtun ayuqut tamaakut sameng tamaghhaaneng kagpagilghiit ellmeggnun katam, iwernga Kiyaghneghmi aklumalghiinguut.”

Neghyukilleq Kiyaghneghqun

22Taagken Jesus‑em maligsaaghteni pikii, “Tamaaken apalluqluku ungipaatamsi, nulqaviighutkegpenaan unguvalleghsi, sameng neghelleghqaghsi, nalighmeng sameng aatelleghqaghsi. 23Unguvalleq megnunaghataghaghtuq neqneng, yugusiqlu megnunaghataghaghtuq aatkaneng. 24Esghaqaghtekiqun meteghlluget, piitesighiigatut, nalighmeng unatiigatut, nalighmeng kagpagingigatut, naqamllu Kiyaghneghem neghqaqii. Elpesi megnunaghataghaghtusi qawaagneng! 25Enkaam nalighpesi nulqaviighutkelluku unguvalleni taakughteregaghlleqaguu? 26Nulqaviighem uyguvleghaghnaanghitutanganeng unguvalleq, sanganꞌngam sangwaat alngunak nulqaviighutkaqesteki? 27Esghaqaghtekiqun piitesighaat nagulghiit, qepghiigatut nalighmeng aatkanglliigatut ellmeggneng. Iwernga ungipaatamsi, talwa Solomon, aklungiteghllagmini aasimangituq piitesighaghestun pinightutkalghiimeng. 28Kiyaghneghem aasightughaqii vegaaghet piitfigmeggnilnguut aghneghmi tawani, iwernga unaamingani qiitaqiit. Kiyaghneghem aasightuungukaki vegaaghet, elpesi aasightughataghaghnaanghitisii? Ugpeqilleghqestaapiguusi! 29Sumeghtaghaamanginaghpenasi sameng neghelleghqaghpesinengllu meghelleghqaghpesinengllu. Nulqaviighutkegpenaki tamaakut, 30qayughllak ugpeqingigalnguut Kiyaghneghmeng nulqaviighutkaqiit tamaakut. Atagpesi liisimakii aklukegkasi. 31Tamaaken apalluqluku kiyaghtelleghpesini megnunalleghpigaaghtestekek Kiyaghneghem Ataneghpagullghallu piyukellghallu. Tawaten pikufsi Kiyaghneghem tuunelleqii qamaglluki aklukegkasi.

Qilagmelnguut Aklungit

32“Alingegpenasi penniighhamni, qayughllak Atagpesi quyakusiqluku tuunyugaqaa elpesinun Ataneghpagulleq. 33Saghyasi akikluki maniliteki aklumalghiit. Enkaam elpesi kagpagillequsi aklungigpesineng qilagmi. Tawaten pikufsi qilagmi aqeftaghaalgullequsi naavyaghqaanghilngughmeng. Tawani aklungisi naangyaghqaanghilnguut, teglegniightetlu tugunaanghitiit, moth‑etlu naafqennaanghitiit. 34Aklungisi naantekata sumeghtaghallesillu tawanllequt.

Jesus‑em Apeghiighsiisqegkangi Tagilleghqaminun

35“Samun tamaghhaanun yataghqengngwaaghlusi, aatkasi aasaqleggiinaaghluki, kenelghutasi kumaghtengngwaaghluki. 36Tawaten pikufsi qepghaghtestun ayuqellequsi utaqiilghiit umiilegmeggneng uteghnilleghqaaneng nengughutellghem neqenghaghqellghaneng. Enkaam kaalluni tenglugtuqan qelpeghutqaghlleqaat. 37Quyanapigtut qepghaghtet teghhumaghmeng apeghiighwaaghluteng ayuqelghiit umiilgita kaaskumiki! Ipa ungipaatamsi, umiilgem qepghaghteni aqumuutesluki tipelegnekun, taagken kenigni tafsiillukek kepsiiqulleqii neqmeng. 38Tagiiqlillu unugem qukaghtestegpenaan nalighmeng unugem qukaan kingunganeng. Iwernga qakun alngunak tagikumi tamaakut qepghaghtet apeghiighwaaqat quyastellelguyaghqaagut. 39Iwernga liisimakluku una, mangteghalgem liisimaksaqumigu qakun teglegniightem tagilleghqaa, uninnaanghitaa mangteghani tegleghniighta naafqulluni iteghnayukan. 40Elpesillu apeghiighsaghwaaghlusi pitek qayughllak Ighnegha Yugem tagiyaghqaaguq waakenghillghaghulluni.”

Ataasiighmelnguqlu Ataasiighmenneghilnguqlu Qepghaghta

41Peter‑em aaptekaa, “Ataneq, ungipaghaan aapqan, whangkunnun pingwaa, nalighmeng tamaghhaanun?”

42Atanghem kiimsiqaa whaten, “Kinangaawa ataasiighmelnguq, peghqinelghii qepghaghta? Taananguyaghqaaguq umiilgan igleghutistengllaqaa qepghaghteminun, neqelitaatiisqellukillu aghhutanga tamaghhaan. 43Taana qepghaghta quyastellengyaghqaaguq, umiilgem kaalluni esghaqumigu qelelleghmitun pilghii. 44Ipa ungipaatamsi, taana qepghaghta umiilgan igleghutistengllaghyaghqaqaa saminun tamaghhaanun. 45Iwernga taana qepghaghta sumeghtaghaamakumi whaten, ‘Umiilka muluuq tagigpenani’, enkaam qevutqughyagulleqii qepghaghtet yugetlu aghnatlu. Neghaqluni, meghaqluni, suumaqlunillu pillequq. 46Taagken umiilga kaallequq nallutghaaghulluni, sighimakenghilkangani aghneghem. Enkaam umiilgem aghyuughmigtaaghllaglleqaa, ilatesleqaallu ataasiighneghilngughnun. 47Qepghaghta apeghiighsallghilnguq nalighmeng umiilegmi piyukellghatun piyunghilnguq anagulellengeghllagllequq. 48Iwernga qepghaghtem nallukegkumigu sasqesullgha umiilegmi, anaggutkaayaghngaaghmi aghsaan ayuqluku anagulellengellequq. Yuuk tuunellengeghllakaq sameng, sayaghqaghtullequq; yuuk wata tuunellengeghllakaq sameng, wataqaaghaq sayaghqaghtughllagllequq.

Jesus Aafqemeraaghutestilghii

49“Tagikaagunga keneghmeng milughnaluku nuna, whaatuq maaten kumalghii! 50Iwernga taam sivungani paaptaayeyaghqaagunga ikfiqelleghqunllu tuqulleghqunllu. Enkaam seghleliighllaguunga kenlanga paaptaayelqa apeghiillghanun. 51Sumeghpesini taginnilunga nekeggmelleghmeng pistengngaa nunamun? Yeghlegillu, ungipaatamsi, aafquutestiyaghtuugunga. 52Whaken kenlekluku nengllugutkullghiit tallimat aafquullequt apalluqlunga whanga. Pingayut kipullginaaghlleqagket maalghuk, enkaam maalghuk kipullginaaghlleqiik pingayut. 53Ellngit aafqemeraaghullequt; atam kipullginaaghlleqaa ighneni, enkaam ighneghem kipullginaaghlleqaa atani. Naam kipullginaaghlleqaa panini, enkaam panigan kipullginaaghlleqaa naani. Aghnam kipullginaaghlleqaa ukaani, enkaam ukaaghan kipullginaaglleqaa aghnaq sakini.”

Jesus‑em Kelengasaaqangi Nagatesteni

54Taagken Jesus‑em yulghuteghllaget pikii, “Esghaqufsigu qilagwaaq mayulghii pakfallamelluku, tawaninginaq pillequsi, ‘Eslallugughnaqaa’ pinaqnilleghpesistun pillequq. 55Anuqa ikevaaghtekan, pillequsi, ‘Puqlaghqwaanaqaa’ pinaqnilleghpesistun pillequq. 56Liisimakisighwaalghiini elpesi! Nunamllu qilagamllu nekegnegha esghaneghpesigu, eslam natetulanga liisimakaqaghsi. Sanganꞌngam liisimaksunghisteki maaten sangwaat sallghet sameng pisiitangi?

Jesus‑em Apeghtuusaqegkanga Qaniqutellghem Nallghusallgha

57“Sangan liigikigasteggu elpesineng katam sangwaa pinitun pillghutanga? 58Avutkistegpek nanqigtivigmun aglaasimaluten, tumemi taakwani kaatfagilgaftek nallghusaghnaken qaniqutelleghtek. Pinghilkuvek ighsagpegun aglaalleqaaten nanqigtistemun. Enkaam nanqigtistem tuunelleqaaten umiilwaaghmun anusiminglliisqelluten. 59Ungipaatamken, aanaanghituten kenlanga kingulighpigaq manin llivikuusaqelleghpenun.”

Currently Selected:

Luke 12: ess

Highlight

Copy