Acts 6

Nakmiilghiit Kayutkaghqameng

1Tamaani aghneghni ugpeqat nulanguluki Greek‑stun akuzikayuget Jews‑et seghleghyukat, Hebrew‑stun akuzikayugneng Jews‑eneng, qayughllak ugingighaghtiiteng aklukegkiitneng tuunlaaghigalkangit. Enkaam yiillgikiit, “Aghhutanga tamaghhaan uyegtistet palasqughhaan tuunaqiit whangkuta ugingighaput.” 2Tamaaken apalluqluku qula maalghuk siipneqluku apostle‑et, qerngughlluki ugpeqat pikiit, “Anaggullequkut pegtekumteggu ungipaqilleghput Kiyaghneghem akuzitanganeng uyegtistengughhnaluta. 3Ugpeqaalgutemnni, tamaaken apalluqluku nakmikiteki maaghraghvinlek yuuk pinilghii, Agleghnalghiigneng Taghneghagneng imighngalghiit, peghqinelghiit, uyegtistengllaghlleqaput. 4Tawaten pikumta whangkuta apostle‑eni yughaamanginaghllequkut, ungipaqimanginaghllequkut Kiyaghneghem ungipaaneng.”

5Ugpeqat efquqegkiit apostle‑et agghillghit. Enkaam nakmikegkaat Stephen, elngaatall ugpeqingaghllak Kiyaghneghmeng, imighngalghiillu Agleghnalghiigneng Taghneghagneng. Nakmikegkiitlu Philip‑enkut, Prochorus‑enkut, Nicanor‑enkut, Timon‑enkut, Parmenas‑enkut, Nicolaus‑llu Gentile‑a Antioch‑eghmii Jews‑estun maniguusagutkaq. 6Taakut yuget tagitkiit apostle‑enun yughaatkesqelluki, naasqwitgun saafluki yughaatkegkiit.

7Kiyaghneghem ungipii mingisimanginaqiit. Enkaam nulakaalghiit ugpeqat Jerusalem‑emi, priest‑elghutetlu ilalghutngit ugpeghtuutkat maligulluteng.

Tugukangat Stephen

8Stephen kayusillelegllagutminengllu aghtughyaghqaanghillelegllagutminengllu Agleghnalghiigneng Taghneghagneng allaaghlluwhaghtighllagaataqaq. 9Taagken ilangita Jews‑et, Cyrene‑eghmiinguyalghiitlu, Alexandria‑ghmiinguyalghiitlu aaghtiiraaghyaghtuqaat Stephen. Taakut yuget synagogue‑ngita aatqeftaa, “Itemutkat Qepghaghtelaaghet.” Yuget Cilicia‑ghmiinguyalghiitlu, Asia‑ghmiinguyalghiitlu ilatkat taakunun. 10Iwernga Stephen, Agleghnalghiim Taghnegham peghqinepiglluku akuzistekaa repall kiimsighpagningitkaat. 11Tamaaken apalluqluku ilangi yuget aksaqluku akileghtuqiit iqlengiqutkesqelluku Stephen whaten, “Nagatkaqaghput seghlequuqek Moses‑enkuk Kiyaghneghenkuk.” 12Siivanlleghetlu, apeghtughikayugetlu Liilightuusaneng, ilangillu yuget nagalluteng iqlengiqellghitneng sakritutkat. Taagken aaghtiiraaghulluteng aglaatkaat Stephen agghistenun. 13Taam kingunganeng yuget tagitkiit agghistenun iqlengiqutkesqelluku Stephen. Pikat, “Stephen‑em quunpeng seghletun akuzitkaqaa Temple‑a, Liilightuusatlu Moses‑em tuunegkii whangkunnun. 14Nagatkaqaghputlu pilghii Jesus‑emnguq Nazareth‑eghmiim naafqelleqaa Temple‑a, allangughlleqaallunguq kiyaghtaalleghput Moses‑em apeghtuutkaa whangkunnun.” 15Qamaglluteng tawanlenguut esghaqaat Stephen‑em gginaa kuukgullghii yaqulgem gginaatun.

Currently Selected:

Acts 6: ess

Highlight

Copy